An Puwersa nin Maboot na Tataramon
“An puso na duminuko huli sa kahaditan, maboot na tataramon nanggad an makakarepresko dian!”—Talinhaga 12:25, Knox.
AN MGA Kristiano bakong biyong protektado sa kasakitan. Kun beses nakakaeksperyensia sinda nin kahaditan huli sa pamumuhay sa “delikadong mga panahon [na ini] na masakit pakibagayan.”—2 Timoteo 3:1.
Kun nagsasakit nin siring na kalamidad, kanigoan na bendisyon na makadangog nin maboot na mga tataramon gikan sa maimbod na katood! “An tunay na katood mamomoton sa gabos na panahon, asin tugang na namundag para sa panahon nin kasakitan,” sabi kan Biblia. (Talinhaga 17:17) Midbid an maimbod na tawong si Job sa pagigin arog kaining klase nin katood. Maski si Elifaz nagsabi manongod saiya: “Kun an saro masingkog, maluya asin pagal, an saimong mga tataramon pinakosog sia na tumindog.”—Job 4:4, Today’s English Version.
Alagad, kan nangangaipo mismo si Job nin pagpapakosog, si Elifaz asin an saiyang kairiba dai nagtaram nin maboot na mga tataramon. Binasol ninda si Job huli sa saiyang kasakitan, na ipinaririsa na siertong nagkaigwa sia nin hilom na pagkakasala. (Job 4:8) Nagkomento an The Interpreter’s Bible: “An kaipuhan ni Job iyo an pakikidamay nin puso nin tawo. An saiyang nakua sunod-sunod na absolutong ‘totoo’ asin absolutong magayon na relihiyosong daan na mga kasabihan asin moral na mga sarabihon.” Nauyam na gayo si Job sa pakadangog sa pagtaram ni Elifaz asin kan saiyang kairiba kaya sia napiritan na kumurahaw: “Sagkod noarin nindo paaanggoton an sakong kalag asin pamomondoon ako nin mga tataramon?”—Job 19:2.
Nungkang maninigo kitang magin dahelan na an kapwa lingkod nin Dios kumurahaw sa kasakitan huli sa satong mayong pagmakolog, bakong maboot na mga tataramon. (Ikomparar an Deuteronomio 24:15.) Nagpapatanid an talinhaga sa Biblia: “An saindong sinasabi puwedeng makaligtas nin buhay o makalaglag kaiyan; kaya kaipuhan nindong akoon an mga kaaabtan kan saindong mga tataramon.”—Talinhaga 18:21, TEV.
Minimidbid an puwersa nin pagtaram, sunodon niato an halimbawa ni apostol Pablo. Mantang nasa Macedonia, saiyang ‘pinakosog an mga yaon duman paagi sa kadakoldakol na tataramon.’—Gibo 20:2.