Tulong banggi nang nasa Betania si Jesus asin an mga disipulo puon kan mag-abot sinda haling Jerico. Ngunyan, sa amay na aga nin Lunes, Nisan 10, mapa-Jerusalem sinda. Nakamati nin gutom si Jesus. Kaya kan may mahiling siyang puon nin higera, nagrani siya. Igwa daw idtong bunga na an apod igos?

Patapos na an Marso, pero sa Hunyo pa an burungahan. Alagad, may mga dahon nang nahihiling huling amay ining nag-ugbos. Kaya inisip ni Jesus na tibaad may mga inot nang bunga. Pero dai siyang nahiling. Nagin mapandaya an itsura kan kahoy huli sa mga dahon kaini. Dangan sinabi ni Jesus: “Magpuon ngunyan, dai na nin siisay man na makakan nin bunga hali sa saimo.” (Marcos 11:14) Tulos na nagpuon na maalang an puon nin higera, asin an kahulugan kaiyan maaaraman pa sa sunod na aga.

Dai nahaloy, nasa Jerusalem na si Jesus asin an mga disipulo. Naglaog siya sa templo, na siniyasat na niya kasuudmang hapon. Ngunyan, bako sanang pagsiyasat an ginibo niya; ginibo niya an arog kan ginibo niya tulong taon na an nakaagi, sa Paskuwa kan 30 C.E. (Juan 2:14-16) Sa pagkakataon na ini pinalayas ni Jesus “an mga nagtitinda saka nagbabakal sa templo.” Itinuwal man niya an “mga lamesa kan mga pararibay nin kuwarta saka an mga bangkô kan mga nagtitinda nin mga salampati.” (Marcos 11:15) Dai man niya tinutugutan an siisay man na may darang kasangkapan na gamiton bilang mas haraning agihan an patyo kan templo para makabalyo sa ibang parte kan siyudad.

Taano ta determinadong marhay si Jesus na palayason an mga pararibay nin kuwarta saka an mga nagtitinda nin mga hayop sa laog kan templo? Nagsabi siya: “Bakong nasusurat, ‘An sakuyang harong aapudon na harong na pamibian para sa gabos na nasyon’? Alagad ginigibo nindo iyan na lungib nin mga parahabon.” (Marcos 11:17) Inapod niya sindang mga parahabon huling pinepresyuhan ninda nin halangkawon an mga minabakal nin mga hayop na kaipuhan sa pag-atang. Kaya ibinibilang ni Jesus na pangingikil, o paghabon, an ginigibo ninda.

Siyempre, nadangog kan mga panginot na saserdote, mga eskriba, pati mga lider kan banwaan an ginibo ni Jesus, asin naghinguwa giraray sinda na maghanap nin paagi para gadanon siya. Pero, may problema sinda. Dai ninda aram kun paano gagadanon si Jesus huling nakapalibot sa saiya an mga tawo para magdangog.

Bako sanang mga Judio sa laman an nagduruman sa Paskuwa, kundi pati mga proselita na nakumbertir sa relihiyon kan mga Judio. Kabilang sa sainda an mga Griego na nag-arabot para sumamba sa panahon kan kapiyestahan. Nagdulok sinda ki Felipe, tibaad huli sa pangaran kaini na Griego, asin nakiulay sinda na mahiling si Jesus. Tibaad dai sigurado si Felipe kun baga angay ini kaya hinapot niya si Andres. Sinabi kan duwa an bagay na iyan ki Jesus, na minalataw na nasa templo pa.

Aram ni Jesus na mga pirang aldaw na sana magagadan na siya, kaya bako na ini an panahon para paniguan an kagustuhan nin mga tawo na mahiling siya o para magin popular. Sinimbag niya an duwang apostol paagi sa sarong ilustrasyon, na sinasabi: “Nag-abot na an oras tanganing pamurawayon an Aki nin tawo. Sinisigurado ko nanggad sa saindo, sagkod na an sarong tipasi nin trigo dai mahulog sa daga asin magadan, nagdadanay iyan na saro sanang tipasi; pero kun iyan magadan, namumunga iyan nin dakul.”—Juan 12:23, 24.

An sarong tipasi nin trigo garo baga haros daing halaga. Pero pag itinanom iyan sa daga asin “magadan” bilang banhi, puwede iyan tumubo dangan magin uhoy na namumunga nin dakul na tipasi. Kaagid kaiyan, si Jesus saro sana. Pero, huli sa pagigin maimbod niya sa Diyos bilang perpektong tawo sagkod sa kagadanan, siya an magigin paagi para matawan nin buhay na daing katapusan an dakul na mapagsakripisyo man na arog niya. Kaya nagsabi si Jesus: “An siisay man na namumuot sa saiyang buhay ipinapahamak iyan, alagad an siisay man na nauungis sa saiyang buhay sa kinaban na ini maiingatan iyan para sa buhay na daing katapusan.”—Juan 12:25.

Bako sanang sadiri niya an iniisip ni Jesus, huling siya nagsabi: “Kun an siisay man gustong maglingkod sa sako, magsunod siya sa sako, asin kun hain ako, yaon man duman an sakuyang lingkod. Kun an siisay man gustong maglingkod sa sako, tatawan siya nin onra kan Ama.” (Juan 12:26) Magayunon nanggad na balos! An mga tatawan nin onra kan Ama makakaibanan ni Cristo sa Kahadian.

Huling nasa isip ni Jesus an grabeng pagsakit asin an makulugon na kagadanan na aagihan niya, siya nagsabi: “Ngunyan napupurisaw ako, asin ano an sasabihon ko? Ama, iligtas mo ako sa mangyayaring ini.” Pero habo ni Jesus na dai mautob an kabutan nin Diyos. Sinabi pa niya: “Minsan siring, dahil kaini kaya ako nagdatong.” (Juan 12:27) Uyon si Jesus sa gabos na katuyuhan nin Diyos, pati na sa saiya mismong kagadanan bilang atang.

Kan Lunes, Nisan 10, nasa templo si Jesus asin nagtataram dapit sa nagdadangadang niyang kagadanan. Napupurisaw siya sa magigin epekto kan kagadanan niya sa reputasyon nin Diyos, kaya nagsabi siya: “Ama, pamurawaya an saimong ngaran.” Sarong makusog na boses hali sa langit an nagsimbag: “Pinamuraway ko na iyan asin papamurawayon ko liwat.”—Juan 12:27, 28.

Nagngaralas an mga yaon duman. May nagsarabing nakadangog sinda nin daguldol. An iba man nagsabi: “May anghel na nakipag-ulay sa saiya.” (Juan 12:29) Pero, an nadangog pa sana nindang nagtaram iyo si Jehova! Bako ini an inot na pagkakataon na nadangog nin mga tawo an boses nin Diyos kun sain si Jesus an pinapanungdan.

Tulo may kabangang taon bago kaini, kan bawtismuhan si Jesus, nadangog ni Juan Bautista an Diyos na nagsabi dapit ki Jesus: “Ini an sakuyang Aki, an namumutan, na sakong inuuyunan.” Paghaloy-haloy, pakatapos kan Paskuwa kan 32 C.E., naliwat an itsura ni Jesus sa atubangan ni Santiago, Juan, asin Pedro. Nadangog kan tulong ini na nagsabi an Diyos: “Ini an sakuyang Aki, an namumutan, na sakong inuuyunan. Maghinanyog kamo sa saiya.” (Mateo 3:17; 17:5) Pero ngunyan, sa ikatulong pagkakataon, nagtaram si Jehova na dakul na tawo an nakadangog!

Nagsabi si Jesus: “An boses na ini bako para sa sako, kundi para sa saindo.” (Juan 12:30) Patunay iyan na talagang Aki siya nin Diyos, an ihinulang Mesiyas.

Saro pa, an maimbod na pamumuhay ni Jesus nagtataong halimbawa kun paano dapat mamuhay an mga tawo asin nagpapatunay na dapat sanang laglagon si Satanas na Diyablo, an tagapamahala kan kinaban. Nagsabi si Jesus: “Ngunyan may ginigibong paghukom sa kinaban na ini; ngunyan an tagapamahala kan kinaban na ini papalayason.” Imbes na pagkadaog, an nagdadangadang na kagadanan ni Jesus magigin kapangganahan. Paano man? Nagpaliwanag siya: “Alagad ta ako, pag ikinaitaas na ako nin mga tawo hali sa daga, irarani ko sa sakuya an gabos na klase nin tawo.” (Juan 12:31, 32) Paagi sa kagadanan niya sa sarong harigi, irarani niya sa saiya an ibang mga tawo, na binubuksan an dalan pasiring sa buhay na daing katapusan.

Bilang simbag sa sinabi ni Jesus na kaipuhan siyang ‘iitaas,’ nagsabi an mga tawo: “Nadangog mi sa Katugunan na an Cristo magdadanay sagkod lamang. Paano mo nasabing an Aki nin tawo kaipuhan na iitaas hali sa daga? Siisay an Aki nin tawo na ini?” (Juan 12:34) Sa ibong kan gabos na ebidensiya, dawa nadangog kan mga tawo an mismong boses nin Diyos, an kadaklan sa sainda dai nagtubod ki Jesus bilang an tunay na Aki nin tawo, an ipinanugang Mesiyas.

Arog kan ginibo niya kaidto, nagtaram si Jesus dapit sa sadiri niya bilang “an ilaw.” (Juan 8:12; 9:5) Sinadol niya an mga tawo: “An ilaw makakaibanan pa nindo nin dikit na panahon. Maglakaw kamo miyentras na yaon pa sa saindo an liwanag, tanganing dai kamo madaog kan kadikluman . . . Mantang an ilaw kaibanan pa nindo, magtubod kamo sa ilaw, tanganing kamo magin mga aki nin liwanag.” (Juan 12:35, 36) Dangan naghali si Jesus, huling bako pa siya sa Nisan 10 kaipuhan na magadan. Sa Paskuwa kan Nisan 14 siya ‘iiitaas’—ipapako sa harigi.— Galacia 3:13.

Kun babalikan an ministeryo ni Jesus, malinaw na nauutob an hula kan dai magtubod sa saiya an mga Judio. Ihinula ni Isaias na an mga mata kan mga tawo mabubuta asin an mga puso ninda papatagason kaya dai sinda mabakli para maumayan. (Isaias 6:10; Juan 12:40) Iyo, an kadaklan kan mga Judio may katagasan na habong akuon an ebidensiya na si Jesus an ipinanugang Paraligtas ninda, an dalan pasiring sa buhay.

Si Nicodemo, si Jose na taga Arimatea, asin an dakul na iba pang tagapamahala “talagang nagturubod” ki Jesus. Pero ipapahiling daw ninda paagi sa mga gibo an pagtubod ninda, o itatago iyan, magsalang huli sa natatakot sindang matiwalag sa sinagoga o kaya “mas minamawot pa ninda an kamurawayan na hali sa mga tawo”?—Juan 12:42, 43.

Ipinaliwanag mismo ni Jesus kun ano an kalabot sa pagtubod sa saiya: “An siisay man na nagtutubod sa sako nagtutubod bako sana sa sako kundi sa saiya man na nagsugo sa sako; asin an siisay man na nakakahiling sa sako nakakahiling man sa Saiya na nagsugo sa sako.” Mahalagang marhay an mga katotoohan na ipinagbuot nin Diyos na itukdo ni Jesus asin padagos niyang ibinabalangibog, kaya nasabi niya: “Kun an siisay man nagbabasang-basang sa sako asin dai nag-aako kan sakuyang mga tataramon, igwa nin mahukom sa saiya. An tataramon na ipinahayag ko iyo an mahukom sa saiya sa huring aldaw.”—Juan 12:44, 45, 48.

Bilang pagtatapos, sinabi ni Jesus: “Dai ako nagtataram sa sadiri kong kabutan, kundi an Ama na nagsugo sa sako iyo mismo an nagtao sa sako nin pagbuot manungod sa kun ano an sasabihon asin kun ano an itataram. Asin aram kong an saiyang pagbuot nangangahulugan nin buhay na daing katapusan.” (Juan 12:49, 50) Aram ni Jesus na sa dai na mahahaloy papabuluson niya an sadiri niyang dugo bilang atang para sa mga tawong nagtutubod sa saiya.—Roma 5:8, 9.