1, 2. Anong sitwasyon sa dakul na kongregasyon an nariparo kan mga paraataman nin sirkito?

MADALI nang tapuson kan paraataman nin sirkito an pakikipagmiting niya sa grupo nin kamagurangan. Mantang minamasdan niya sinda, nakamati siya nin pagkamuot sa mahihigos na pastor na ini, na an iba sa sainda garo ama na niya. Pero, igwa man siyang ikinakahadit, kaya hinapot niya sinda, “Kumusta mga tugang su ginibo nindong pagsasanay sa iba para magkaigwa sinda nin dagdag na paninimbagan sa kongregasyon?” Nagirumduman kan mga elder na kan huring dalaw kan paraataman nin sirkito, dinagka sinda kaini na tawan nin atensiyon an pagsasanay sa iba. Dangan, sarong elder an nagsimbag, “An totoo, haros mayo kaming nasanay.” Nagtarango an ibang elder.

² Kun saro kang Kristiyanong elder, tibaad arog man kaiyan an simbag mo. Nariparo kan mga paraataman nin sirkito sa bilog na kinaban na sa dakul na kongregasyon, dakula pa an pangangaipong magsanay nin mga brother​—hoben asin gurang​—tanganing makatabang sa pangangataman sa aripumpon. Dipisil ini para sa iba. Taano?

3. (a) Paano ipinahiling kan Kasuratan an kahalagahan kan pagsasanay sa iba, asin taano ta dapat na magin interesado kita gabos diyan? (Hilingon an nota sa ibaba.) (b) Taano ta nasasakitan an ibang elder na magsanay nin iba?

³ Bilang pastor, siguradong aram mo na importante an personal na pagsasanay sa iba.a Aram mong kaipuhan nin mas dakul na brother tanganing magdanay na makusog an espirituwalidad kan dati nang mga kongregasyon asin tanganing makabilog nin bagong mga kongregasyon. (Basahon an Isaias 60:22.) Aram mo man na sinasadol ka kan Tataramon nin Diyos na ‘magtukdo sa iba.’ (Basahon an 2 Timoteo 2:2.) Pero tibaad nasasakitan kang gibuhon iyan, arog kan mga elder na nasambitan sa inot na parapo. Pagkatapos mong maasikaso an mga pangangaipo kan saimong pamilya saka trabaho, mga paninimbagan sa kongregasyon, asin iba pang importanteng mga bagay, garo mayo na nin natatadang panahon para sanayon an iba sa kongregasyon. Huling arog kaiyan an sitwasyon, pag-ulayan ta kun gurano kaimportante an pagsasanay sa iba.

PRIYORIDAD AN PAGSASANAY

4. Ano an tibaad saro sa mga dahilan kun taano ta may panahon na pinapaliman-limanan an pagsasanay sa iba?

⁴ Ano an tibaad saro sa mga dahilan kun taano ta nasasakitan an ibang elder na magtagama nin panahon para sa pagsasanay sa iba? Tibaad iniisip kan iba: ‘Mahalaga an pagsasanay, pero may ibang mga paninimbagan sa kongregasyon na mas kaipuhan gibuhon tulos. Kun dai ko nguna gigibuhon an pagsasanay, dai man maaapektaran an kongregasyon.’ Totoo na kadakul nin mga bagay an kaipuhan mong tawan tulos nin atensiyon, pero an pagpaliman-liman sa pagsasanay sa iba puwedeng makaapektar sa espirituwalidad kan kongregasyon.

5, 6. Ano an manunudan ta sa halimbawa nin sarong drayber saka sa iniisip niya dapit sa pagmentenar nin makina, asin paano ini maiaaplikar sa pagsasanay sa iba sa kongregasyon?

⁵ Pag-isipan an halimbawang ini: Aram nin sarong drayber na kaipuhan niyang regular na mag-change oil tanganing mapagdanay na nasa kondisyon an saiyang awto asin an makina kaini. Pero, tibaad isipon niya na mas importante kisa diyan an pagpagasolina. Huli ta kun mayong gasolina, dai na maandar an awto niya. Tibaad isipon niya, ‘Kun mayo pa akong panahon na mag-change oil, maandar pa man an makina kaiyan.’ Pero taano ta peligroso iyan? Kun parating pinapaliman-limanan kan drayber an pagmentenar kan makina, maabot an panahon na mararaot iyan asin dai na maandar. Kun mangyari iyan, dakul na panahon asin kuwarta an kakaipuhanon niya tanganing maipahirahay asin mapaandar giraray an awto. Ano an manunudan ta digdi?

⁶ Kadakul na importanteng trabaho an mga elder na kaipuhan nindang asikasuhon tulos; ta kun dai, maaapektaran na marhay an kongregasyon. Kaya kun paanong kaipuhan na siyertuhon kan drayber na pirming gasolinahan an awto, dapat man na siyertuhon kan mga elder kun ano an “urog na mahalagang mga bagay.” (Fil. 1:10, NW) Pero huling sibot-sibot na an nagkapirang elder sa pag-asikaso kan ibang mahalagang mga bagay, puwedeng napapabayaan na ninda an pagsasanay sa iba​—an pagmentenar kan makina, sabi ngani. Kun padagos na papaliman-limanan kan mga elder an pagsasanay sa iba, dai mahahaloy, magkukulang an kongregasyon nin kuwalipikadong mga brother na maasikaso kan gabos na dapat gibuhon.

7. Paano ta dapat mansayon an mga elder na nagtatao nin panahon tanganing magsanay sa iba?

⁷ Kaya malinaw na dai niyato dapat isipon na bakong gayong priyoridad an pagsasanay sa iba. An mga elder na harayo an pananaw asin nagtatao kan saindang panahon sa pagsasanay sa mga brother na mayo pang gayong eksperyensiya madunong na mga katiwala asin tunay na bendisyon sa bilog na kongregasyon. (Basahon an 1 Pedro 4:10.) Paano nakikinabang an kongregasyon?

MADUNONG NA PAGGAMIT NIN PANAHON

8. (a) Anong mga kuwalidad asin mga bagay na dapat isaisip an makakapahiro sa mga elder na magsanay sa iba? (b) Anong paninimbagan an dapat gibuhon tulos kan mga elder na nagboluntaryong tumabang sa mga lugar na dakula an pangangaipo? (Hilingon an kahon na “Misyon na Dapat Gibuhon Tulos.”)

⁸ Dapat na mapakumbabang akuon, dawa kan pinakaeksperyensiyadong mga elder, na luway-luway na nalilimitaran kan paggurang ninda an mga nagigibo ninda para sa kongregasyon. (Miq. 6:8) Dapat man na magin realistiko sinda, na iniisip na huli sa “panahon asin dai inaasahan na mga pangyayari,” puwedeng biglang magin dipisil na para sa sainda na maasikaso an mga paninimbagan sa kongregasyon. (Ecl. 9:11, 12, NW; Sant. 4:13, 14) Kaya huli sa udok sa pusong pagmakulog sa kapakanan kan mga karnero ni Jehova, an mga elder na nag-iisip kan mangyayari sa maabot nagtatagama tulos nin panahon tanganing itukdo sa mas hoben na mga brother an mga nanudan ninda sa maimbod na paglilingkod ninda sa dakul na taon.​—Basahon an Salmo 71:17, 18.

9. Anong pangyayari sa maabot na panahon an dahilan kaya importanteng marhay an pagsasanay sa iba?

⁹ Sa ano pang paagi nagigin bendisyon para sa aripumpon an mga elder na nagsasanay nin iba? Pinapakusog ninda an espirituwal na depensa kan kongregasyon. Paano? Huli sa paghihinguwa kan mga elder na magsanay nin iba, magkakaigwa nin mas dakul na brother na andam na tumabang sa kongregasyon na manindugan nin marigon asin magkasararo, bako sana ngunyan kundi lalo na kun mag-abot na an maribok na mga panahon kan dakulang kahurasaan. (Ezeq. 38:10-12; Miq. 5:5, 6) Kaya, namumutan na mga elder, gibuhon tabi nindong regular na kabtang kan saindong ministeryo ngunyan an pagsasanay sa iba.

10. Tanganing magkaigwa nin panahon sa pagsasanay sa iba, ano an tibaad kaipuhan na gibuhon nin sarong elder?

¹⁰ Siyempre, nasasabutan mi na puwedeng ubos na an panahon nindo sa pag-asikaso kan importanteng mga aktibidad sa kongregasyon. Kaya, tibaad kaipuhan nindong kumua nin pirang panahon diyan tanganing magamit sa pagsasanay sa iba. (Par. 3:1) Madunong na paggamit iyan kan saindong panahon.

ANDAMON AN TAMANG KAMUGTAKAN

11. (a) Ano an maririsa sa mga suhestiyon kan mga elder sa lain-lain na nasyon kun dapit sa pagsasanay sa iba? (b) Uyon sa Talinhaga 15:22, taano ta magigin kapaki-pakinabang na pag-ulayan an mga suhestiyon kan ibang mga elder?

¹¹ Kasuarin pa sana, sarong grupo nin mga elder na mapangganang nakatabang sa mga brother na umuswag sa espirituwal an hinapot kun anong pamamaagi an ginamit ninda sa pagsasanay sa iba.b Maririsa na dawa magkakalain na marhay an kamugtakan kan mga brother na ini, may pagkakaagid an mga sadol ninda. Ano an pinapatunayan kaini? An pagsasanay na basado sa Bibliya aplikado sa mga sinasanay “sa gabos na lugar sa lambang kongregasyon”​—arog kaidtong panahon ni apostol Pablo. (1 Cor. 4:17, NW) Kaya, sa artikulong ini asin sa masunod, pag-uulayan ta an nagkapira sa mga suhestiyon kan mga elder na ini.​—Tal. 15:22.

12. Ano an kaipuhan na iandam nin sarong tagasanay, asin taano?

¹² Kaipuhan na iandam nin sarong tagasanay an tamang mga kamugtakan para sa pagsasanay. Kun paanong kaipuhan na andamon nin sarong hardinero an daga bago tanuman nin banhi, kaipuhan man kan tagasanay na andamon an puso kan sinasanay bago siya tukduan na magkaigwa nin bagong mga kakayahan. Kaya paano aandamon kan mga tagasanay an tamang mga kamugtakan para sa pagsasanay sa iba? Puwede nindang arugon an pamamaagi na ginamit kan sarong propeta kaidto. Anong pamamaagi iyan?

13-15. (a) Anong asignasyon an itinao ki propeta Samuel? (b) Paano iyan isinagibo ni Samuel? (Hilingon an ritrato sa kapinunan kan artikulo.) (c) Taano ta dapat na magin interesado an mga elder ngunyan sa istoryang ini sa Bibliya dapit ki Samuel?

¹³ Sarong aldaw, labing 3,000 na taon na an nakaagi, sinabihan ni Jehova an may edad nang propetang si Samuel: ‘Sa aga, sa siring kaining oras, ipapadara ko saimo an sarong lalaki na gikan sa tribo ni Benjamin; lahidan mo siya bilang hadi kan sakong banwaan na Israel.’ (1 Sam. 9:15, 16, An Marahay na Bareta Biblia) Narealisar ni Samuel na tapos na an papel niya bilang lider asin na inaasignaran siya ni Jehova na nombrahan an masalida sa saiya. ‘Paano ko iaandam an lalaking iyan para sa asignasyon niya?,’ an siguradong hapot ni Samuel. May naisip siya, dangan nagplano kan gigibuhon niya.

¹⁴ Kan sunod na aldaw, kan mahiling na ni Samuel si Saul, sinabihan ni Jehova an propeta: “Uya, iyo ini an lalaki.” Dangan isinagibo ni Samuel an saiyang plano. Inimbitaran niya si Saul na magkakan sa kuwartong kakanan. Itinao niya ki Saul asin sa katabang kaini an pinakamarahay na puwesto sa lamesa saka piling mga karne, asin sinabi ni Samuel: ‘Kumakan ka, huli ta dati nang inandam iyan sa saimo.’ Pagkatapos, naglakaw si Samuel asin Saul pasiring sa harong kan propeta na nag-uulay-ulay. Gustong aprobetsaran ni Samuel an pagkakataon na idto na maugma sindang magkaibanan. Kaya inimbitaran niya si Saul na magduman sa saiyang bubungan. Sa bangging iyan na presko an huyop kan duros, padagos na ‘nakipag-ulay si Samuel ki Saul sa [bubungan]’ sagkod na magturog sinda. Pagkaaga, linahidan ni Samuel si Saul, hinadukan siya, asin tinawan nin dagdag pang mga instruksiyon. Pagkatapos kaiyan, pinapuli niya si Saul​—na andam na para sa masunod na mangyayari.​—1 Sam. 9:17-27; 10:1.

¹⁵ Siyempre, an pagnombra sa sarong tawo na magin lider nin sarong nasyon iba sa pagsanay sa sarong brother na magin elder o ministeryal na lingkod sa kongregasyon. Pero, makakakua nin mahalagang mga leksiyon an mga elder ngunyan sa pamamaagi ni Samuel. Pag-ulayan ta an duwa sa mga iyan.

MAGTUKDO NIN GIKAN SA BUOT ASIN MAGIN TUNAY NA AMIGO

16. (a) Ano an namatian ni Samuel kan maghagad an Israel nin sarong hadi? (b) Anong sabuot an ipinahiling ni Samuel kan sinunod niya an asignasyon na lahidan si Saul?

¹⁶ Magtukdo nin gikan sa buot, dai mag-alangan. Kan inot na madangog ni Samuel na gusto kan mga Israelita nin sarong tawong hadi, namundo siya asin pagmati niya habo na sa saiya kan banwaan. (1 Sam. 8:4-8) Sa katunayan, nag-alangan siyang marhay na gibuhon an hinahagad kan banwaan kaya tulong beses pa siyang kinaipuhan na sabihan ni Jehova na magdangog sa sainda. (1 Sam. 8:7, 9, 22) Pero, dai tinugutan ni Samuel na makamati siya nin pagkauyam o raot nin buot sa tawong masalida sa saiya. Kan sabihan siya ni Jehova na lahidan si Saul, nagsunod an propeta, bakong huli ta obligasyon niya iyan, kundi ginibo niya iyan nin gikan sa buot huli sa pagkamuot.

17. Paano inaarog kan mga elder ngunyan an sabuot na ipinahiling ni Samuel, asin anong klaseng kaugmahan an itinatao kaiyan sa sainda?

¹⁷ Arog ni Samuel, nagpapahiling man nin kabuutan an eksperyensiyadong mga elder ngunyan sa mga sinasanay ninda. (1 Ped. 5:2) An siring na mga elder dai nag-aalangan na magsanay nin iba huling dai sinda natatakot na butasan an nagkapirang mga pribilehiyo ninda sa kongregasyon para itao sa mga sinasanay. Minamansay kan mabuot na mga tagasanay an mga sinasanay ninda, bako bilang mga kakumpetensiya, kundi bilang “mga kapwa trabahador”​—mahalagang marhay na mga regalo sa kongregasyon. (2 Cor. 1:24, NW; Heb. 13:16) Asin dakulang kaugmahan nanggad an namamatian kan bakong maimot na mga tagasanay na iyan mantang nahihiling ninda kun paano ginagamit kan mga sinasanay an mga kakayahan ninda tanganing makatabang sa kongregasyon!​—Gui. 20:35.

18, 19. Paano puwedeng andamon nin sarong elder an puso nin sarong sinasanay, asin taano ta importanteng marhay na gibuhon iyan?

¹⁸ Magin sarong amigo, bako sanang tagasanay. Kan aldaw na mahiling ni Samuel si Saul, puwede kutanang kinua na niya an lalagan nin lana tanganing ibubo tulos sa payo ni Saul, dangan papulion an bagong hadi​—na lubos nang linahidan pero biyo man na bakong andam. Pero dai iyan ginibo ni Samuel. Imbes, nagtao siya nin panahon tanganing luway-luway na andamon an puso ni Saul. Saka sana namatian kan propeta na nag-abot na an tamang oras tanganing lahidan si Saul pagkatapos nindang magkaibanan na magkakan, maglakaw-lakaw, mag-ulay nin halawig, asin magpahingalo.

¹⁹ Siring man, dapat na punan kan sarong tagasanay ngunyan an pagsasanay sa iba paagi sa pagtao nin panahon tanganing makaandam nin tamang kamugtakan asin magin amigo an sinasanay. Magkakalain an mga paagi nin mga elder sa pakikiamigo sa sinasanay ninda, depende sa lugar asin kinaugalian ninda. Pero, sain man kamo nakaistar asin gurano man kamo kasibot, kun nagtatagama kamo nin panahon sa sinasanay nindo, garo man sana sinasabi nindo sa saiya, “Importante ka sako.” (Basahon an Roma 12:10.) Siguradong mamamatian asin mapapahalagahan iyan na marhay kan mga sinasanay nindo.

20, 21. (a) Paano mo ilaladawan an sarong mapangganang tagasanay? (b) Ano an pag-uulayan sa masunod na artikulo?

²⁰ Mga elder, tandaan: An sarong mapangganang tagasanay bako sanang namumutan an saiyang gibuhon na pagsasanay sa iba kundi namumutan man an tawong sinasanay niya. (Ikumparar an Juan 5:20.) An importanteng aspektong iyan kan sabuot nin sarong tagasanay nahihiling tulos kan sinasanay asin dakula an epekto kaiyan sa magigin pag-ako niya sa pagsasanay sa saiya. Kaya, namumutan na mga elder, mantang nagsasanay kamo nin iba, dai sana kamo magin sarong tagasanay​—magin sarong amigo man.​—Tal. 17:17; Juan 15:15.

²¹ Pagkatapos na maandam an puso nin sarong sinasanay, puwede nang itukdo kan elder sa saiya an kinakaipuhan na mga kakayahan. Anong mga pamamaagi an puwedeng gamiton kan elder? Pag-uulayan iyan sa masunod na artikulo.

1. (a) Ano an haloy nang aram kan mga lingkod nin Diyos kun dapit sa pagsasanay, asin paano ini aplikado ngunyan? (b) Ano an pag-uulayan ta sa artikulong ini?

HALOY nang aram kan mga lingkod nin Diyos na kaipuhan an pagsasanay tanganing magin mapanggana. An patriyarkang si Abram ‘tinipon an saiyang sinanay na mga tawuhan’ tanganing isalbar si Lot​—asin nagin mapanggana sinda. (Gen. 14:14-16, NW) Kan panahon ni Hading David, “sinanay sa pag-awit ki Jehova” an mga parakanta sa harong nin Diyos, asin nakatao sinda nin kaumawan sa Diyos. (1 Cron. 25:7, NW) Sa ngunyan, may espirituwal kitang pakikilaban ki Satanas asin sa mga parasunod niya. (Efe. 6:11-13) Hinihinguwa ta man na makatao nin kaumawan ki Jehova. (Heb. 13:15, 16) Huli kaini, arog kan mga lingkod nin Diyos kaidto, tanganing magin mapanggana, kaipuhan man kitang sanayon. Sa kongregasyon, ipinagkatiwala ni Jehova sa mga elder an paninimbagan na sanayon an iba. (2 Tim. 2:2) Anong mga pamamaagi an ginagamit kan eksperyensiyadong mga elder para sanayon an mga brother na magin kuwalipikado sa pangangataman sa aripumpon?

PAKUSUGON AN ESPIRITUWALIDAD KAN MGA SINASANAY

2. Bago tukduan nin bagong mga kakayahan an sarong sinasanay, ano an tibaad kaipuhan ngunang gibuhon nin sarong elder, asin taano?

² Bilang elder, puwede kang ikumparar sa sarong hardinero. Bago magtanom nin banhi, tibaad kaipuhan ngunang magdagdag an sarong hardinero nin pataba sa daga tanganing mas magtalubo an mga tanom niya. Sa kaparehong paagi, bago mo tukduan nin bagong mga kakayahan an sarong mayo pang gayong eksperyensiyang brother, tibaad kaipuhan mo ngunang magtao sa saiya nin nagkapirang mga punto sa Kasuratan tanganing magin mas andam siyang iaplikar an mga manunudan niya.​—1 Tim. 4:6.

3. (a) Paano mo magagamit an mga tataramon ni Jesus sa Marcos 12:29, 30 sa pakikipag-ulay sa sarong sinasanay? (b) Ano an puwedeng magin epekto sa sinasanay kan pamibi nin sarong elder?

³ Tanganing maaraman kun gurano na kararom kan epekto kan katotoohan sa saiyang kaisipan asin paggawi, puwede mo siyang haputon, ‘Ano an nagin epekto kan pagdusay mo ki Jehova sa mga desisyon mo sa buhay?’ An hapot na iyan puwedeng magresulta sa makahulugan na pag-uulay dapit sa kun paano gigibuhon na bilog na kalag an satong sagradong paglilingkod. (Basahon an Marcos 12:29, 30.) Pagkatapos kan arog kaiyan na pag-uulay, puwede kang mamibi, na hinahagad ki Jehova na tawan an sinasanay kan banal na espiritu na kaipuhan niya para sa pagsasanay. Makakapakusog nanggad sa brother kun madadangog niya an udok sa puso mong pamibi para sa saiya!

4. (a) Magtao nin mga halimbawa nin mga istorya sa Bibliya na makakatabang sa sinasanay na umuswag sa espirituwal. (b) Anong pasuhan an nasa isip kan mga elder kun nagsasanay nin iba?

⁴ Sa kapinunan kan pagsasanay, pag-ulayan an nagkapirang istorya sa Bibliya na makakatabang sa mga sinasanay na mahiling an kahalagahan kan pagigin andam, maaasahan, asin mapakumbaba. (1 Ha. 19:19-21; Neh. 7:2; 13:13; Gui. 18:24-26) Mahalagang marhay para sa mga sinasanay an siring na mga kuwalidad arog kan mga pataba sa daga. Mapaparikas kaiyan an saiyang pag-uswag sa espirituwal. Ini an sinabi ni Jean-Claude, sarong elder na taga France: “An pinakapasuhan ko sa pagsasanay sa iba iyo na tabangan an sinasanay na magin mapagpahalaga sa espirituwal na mga bagay. Naghahanap ako nin mga pagkakataon na puwede ming sabay na basahon an sarong espesipikong teksto tanganing ‘mabuksan an mata’ kan sinasanay sa ‘makangangalas’ na mga bagay na nasa Tataramon nin Diyos.” (Sal. 119:18) Ano pa an ibang paagi tanganing mapakusog an sarong sinasanay?

MAGSUHERIR NIN MGA PASUHAN ASIN SABIHON KUN TAANO

5. (a) Gurano kaimportante na ipakipag-ulay sa sarong sinasanay an mapadapit sa espirituwal na mga pasuhan? (b) Taano ta dapat sanayon kan mga elder dawa an hoben na mga brother? (Hilingon an nota sa ibaba.)

⁵ Haputon an sinasanay, ‘Ano an espirituwal na mga pasuhan mo?’ Kun mayo siya nin malinaw na mga pasuhan, tabangan siyang magkaigwa nin sarong rasonableng pasuhan na kaya niyang maabot. Sabihon sa saiya an sarong espesipikong espirituwal na pasuhan mo kaidto, asin entusiyastikong iistorya kun gurano ka kaugma kan maabot mo idto. Garo simpleng pamamaagi sana ini, pero epektibo. Si Victor, sarong elder asin payunir sa Aprika, nagsabi: “Kan hoben pa ako, sarong elder an naghapot sako nin pirang piniling marhay na mga hapot dapit sa mga pasuhan ko. Nakatabang sako an mga hapot na idto tanganing punan na seryosuhon an sakong ministeryo.” Sinabi man kan eksperyensiyado nang mga elder na importanteng sanayon na an mga brother mantang hoben pa sinda​—tin-edyer pa sana​—paagi sa pagtao sa sainda nin mga asignasyon sa kongregasyon na bagay sa edad ninda. An siring na amay na pagsasanay makakatabang sa mga hoben na magdanay na nakapokus sa espirituwal na mga pasuhan dawa adulto na sinda asin napapaatubang na sa dakul na ulang.​—Basahon an Salmo 71:5, 17.a

6. Anong importanteng pamamaagi nin pagsasanay sa iba an ginamit ni Jesus?

⁶ Mamomotibar mo man na maglingkod an sarong sinasanay kun ipapaliwanag mo sa saiya bako sanang kun ano an dapat gibuhon kundi kun taano ta importante iyan na gibuhon. Kun ginigibo mo iyan, inaarog mo an Dakulang Paratukdo, si Jesus. Halimbawa, bago isugo ni Jesus an saiyang mga apostol na gumibo nin mga disipulo, itinao nguna niya an dahilan kun taano ta dapat sindang magsunod. Sinabi niya: “An gabos na awtoridad sa langit asin sa daga itinao na sa sako.” Dangan, sinabi pa niya: “Kun siring, paduman kamo asin gumibo kamo nin mga disipulo sa mga tawo kan gabos na nasyon.” (Mat. 28:18, 19, NW) Paano mo maaarog an pamamaagi ni Jesus nin pagsasanay sa iba?

7, 8. (a) Paano maaarog kan mga elder ngunyan an pamamaagi ni Jesus nin pagsasanay sa iba? (b) Taano ta mahalagang tawan nin komendasyon an sinasanay? (c) Anong mga suhestiyon an makakatabang sa mga elder sa pagsasanay sa iba? (Hilingon an kahon na “Kun Paano Sasanayon an Iba.”)

⁷ Ipaliwanag sa sinasanay an basehan sa Kasuratan kun taano ta ipinapagibo sa saiya an sarong bagay. Sa paaging iyan, tinutukduan mo siya na mag-isip basado sa mga prinsipyo sa Bibliya. Halimbawa, ipamugtak na pinakiulayan mo an sarong brother na siguraduhon na pirming malinig asin ligtas an agihan palaog sa Kingdom Hall. Puwede mong ipakipag-ulay sa saiya an Tito 2:10 asin ipaliwanag kun paano an paglinig niya kan Kingdom Hall makakatabang na ‘masamnuhan an katukduan nin Diyos na satong Paraligtas.’ Sabihon man sa sinasanay na isaisip an mga may edad sa kongregasyon asin kun paano sinda makikinabang sa paggibo niya kan saiyang asignasyon. Makakatabang sa sinasanay an arog kaiyan na mga pag-uulay tanganing masanay siyang mas isipon an mga tawo kisa mga susundon. Mauugma siya pag nahihiling niya kun paano nakikinabang an mga tugang sa ginigibo niyang paglilingkod.

⁸ Dai man paglingawan na tawan nin komendasyon an sinasanay sa paghihinguwa niyang iaplikar an mga suhestiyon mo. Taano ta mahalaga iyan? Kun paanong an pagbaribi nakakatabang tanganing tumalubo an sarong tinanom, an pagtao nin sinserong komendasyon sa sarong sinasanay nakakatabang man na umuswag siya.​—Ikumparar an Mateo 3:17.

SARO PANG PROBLEMA

9. (a) Kun mapadapit sa pagsasanay sa iba, anong problema an napapaatubang sa ibang mga elder sa mayaman na mga nasyon? (b) Taano ta bakong paglilingkod sa Diyos an panginot sa buhay kan nagkapirang hoben na brother?

⁹ An mga elder sa mayaman na mga nasyon puwedeng mapaatubang sa saro pang problema: kun paano dadagkahon an bawtisadong mga brother na an edad labing 20 o labing 30 na makikabtang sa mga aktibidad sa kongregasyon. Hinapot mi an eksperyensiyadong mga elder sa mga 20 nasyon sa Sulnupan kun taano ta sa hiling ninda dai nag-aako nin mga pribilehiyo sa kongregasyon an hoben na mga brother. Ini an lataw na lataw sa mga simbag ninda: Kan an mga hoben na ini aki pa, dai sinda dinadagka kan saindang mga magurang na umabot nin espirituwal na mga pasuhan. Sa katunayan, may mga hoben ngani na gusto kutanang magkaigwa nin siring na mga pasuhan pero dinadagka sinda kan mga magurang ninda na sekular na mga pasuhan na sana an abuton! Kaya bakong paglilingkod sa Diyos an nagigin panginot sa buhay kan mga hoben na ini.​—Mat. 10:24.

10, 11. (a) Paano luway-luway na matatabangan nin sarong elder na mabago an isip nin sarong brother na garo baga bakong interesadong umabot nin pribilehiyo? (b) Anong mga punto sa Kasuratan an puwedeng gamiton nin sarong elder sa siring na mga brother, asin taano? (Hilingon an nota sa ibaba.)

¹⁰ Kun an sarong brother garo baga bakong interesadong umabot nin pribilehiyo sa kongregasyon, kaipuhan nin dakul na paghihinguwa asin pasensiya tanganing mabago an isip niya, pero posibleng magibo iyan. Kun paanong puwedeng giyahan nin sarong paratanom na magtalubo nin diretso an sarong tinanom paagi sa luway-luway na pagtatanos kan lawas kaiyan, puwede mo man na luway-luway na tabangan an ibang mga brother na mahiling na kaipuhan nindang baguhon an iniisip ninda dapit sa pag-ako nin mga pribilehiyo. Pero paano?

¹¹ Magtao nin panahon na amiguhon an brother. Ipaaram sa saiya na kaipuhan siya sa kongregasyon. Dangan sa pana-panahon, ipakipag-ulay sa saiya an espesipikong mga teksto na matabang sa saiya na pag-isipan an dapit sa saiyang pagdusay ki Jehova. (Par. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Puwede mo siyang haputon, ‘Ano an ipinanuga mo ki Jehova kan idusay mo an saimong sadiri sa saiya?’ Hinguwahon na mapahiro an puso niya paagi sa paghapot, ‘Ano daw sa paghuna mo an namatian ni Jehova kan mabawtismuhan ka?’ (Tal. 27:11) ‘Ano daw an namatian ni Satanas?’ (1 Ped. 5:8) Dakulang marhay an puwedeng magin epekto sa sarong brother kan pagbasa nin piniling marhay na mga teksto.​—Basahon an Hebreo 4:12.b

MGA SINASANAY, MAGIN MAIMBOD

12, 13. (a) Anong kaisipan an ipinahiling ni Eliseo kan siya sinasanay? (b) Anong balos an itinao ni Jehova ki Eliseo huli sa kaimbudan kaini?

¹² Mga hoben na brother, kaipuhan kan kongregasyon an saindong tabang! Pero, anong kaisipan an makakatabang sa saindo na magin mapanggana? Tanganing masimbag iyan, pag-ulayan ta an nagkapirang pangyayari sa buhay nin sarong sinanay kaidto.

¹³ Haros 3,000 na taon na an nakaagi, inagda ni propeta Elias an hoben na si Eliseo na magin saiyang katabang. Tulos-tulos na inako iyan ni Eliseo asin maimbod na ginibo an simpleng mga trabaho para tabangan an may edad nang propeta. (2 Ha. 3:11) Dangan pakalihis nin mga anom na taon na pagsasanay, naaraman ni Eliseo na madali nang matapos an gibuhon ni Elias sa Israel. Sa panahon na iyan, sinabi ni Elias sa nasanay na niyang marhay na kaiba-iba na dai na magsunod sa saiya, pero tulong beses na sinabi ni Eliseo ki Elias: “Dai taka babayaan.” Determinado siyang dai bayaan an saiyang tagasanay sagkod na mapupuwede. Kaya, bilang balos ni Jehova sa kaimbudan ni Eliseo, tinugutan niyang mahiling kaini an makangangalas na paghali ni Elias.​—2 Ha. 2:1-12.

14. (a) Paano maaarog kan mga sinasanay ngunyan si Eliseo? (b) Taano ta mahalagang marhay para sa sinasanay na magin maimbod?

¹⁴ Paano mo ngunyan maaarog si Eliseo? Akuon tulos an mga asignasyon sa saimo, pati idtong simpleng mga gibuhon. Ibilang mong amigo an saimong tagasanay asin sabihon sa saiya na pinapahalagahan mo an mga ginigibo niya para sa saimo. Kun ipinapahiling mong gusto mo pang makanuod sa saiya, garo man sana sinasabi mo sa saiya: “Dai taka babayaan.” An pinakamahalaga, maimbod mong gibuhon an ano man na asignasyon na itinao sa saimo. Taano? Kun maipapahiling mong maimbod ka asin maaasahan, masisiyerto kan mga elder na gusto ni Jehova na tawan ka nin dagdag na mga paninimbagan sa kongregasyon.​—Sal. 101:6; basahon an 2 Timoteo 2:2.

ITAO AN MANINIGONG PAGGALANG

15, 16. (a) Sa anong mga paagi ipinahiling ni Eliseo an paggalang sa nagsanay sa saiya? (Hilingon an ritrato sa kapinunan kan artikulo.) (b) Taano ta nagtiwala ki Eliseo an mga kapwa niya propeta?

¹⁵ Ipinapahiling man kan istoryang ini dapit ki Eliseo kun paano ikakapahiling nin mga brother ngunyan an maninigong paggalang sa eksperyensiyadong mga elder. Pagkatapos na bisitahon an sarong grupo nin mga propeta sa Jerico, si Elias asin Eliseo naglakaw pasiring sa Salog nin Jordan. Pag-abot duman, ‘kinua ni Elias an saiyang [opisyal na gubing], tinipig niya idto, asin hinampak niya an katubigan, asin iyan nagbuka sa mag-ibong-ibong.’ Pagkabalyo sa marang salog, padagos sindang ‘naglakaw asin nag-ulay-ulay.’ Malinaw nanggad na dai inisip ni Eliseo na sa puntong idto aram na niya an gabos. Sagkod sa paghali ni Elias, isinapuso ni Eliseo an lambang tataramon na sinabi kan saiyang tagasanay. Dangan si Elias ilinayog na paitaas kan bagyong duros. Pagkatapos, pagbalik ni Eliseo sa Jordan, hinampak niya kan gubing ni Elias an tubig, asin nagsabi: ‘Hain si Jehova na Diyos ni Elias?’ Nabanga giraray an tubig sa salog.​—2 Ha. 2:8-14.

¹⁶ Narisa mo daw na an inot na milagro ni Eliseo eksaktong kapareho kan huring milagro ni Elias? Ano an itinutukdo kaiyan sa sato? Minalataw na dai inisip ni Eliseo na huling siya na an nanginginot, babaguhon na niya tulos an pagpadalagan kan mga bagay-bagay. Imbes, paagi sa pag-arog ni Eliseo sa pamamaagi nin pag-utob ni Elias kan ministeryo, ipinahiling niya na itinatao niya an maninigong paggalang sa saiyang tagasanay, na nakatabang tanganing magtiwala sa saiya an mga kapwa niya propeta. (2 Ha. 2:15) Pero pagkatapos kaiyan, durante kan 60 taon na ministeryo ni Eliseo bilang propeta, tinawan siya ni Jehova nin kapangyarihan na makagibo nin mga milagro na mas dakul pa sa ginibo ni Elias. Ano an manunudan digdi kan mga sinasanay ngunyan?

17. (a) Paano maaarog kan mga sinasanay ngunyan an kaisipan ni Eliseo? (b) Pag-abot nin panahon, paano puwedeng gamiton ni Jehova an maimbod na mga sinasanay?

¹⁷ Kun nag-ako ka na nin mga paninimbagan sa kongregasyon, dai pag-isipon na kaipuhan mo nang baguhon an mga bagay-bagay​—na ginigibo iyan sa paaging ibang marhay sa dating mga pamamaagi. An tamang rason para sa pagbabago iyo na huli ta kaipuhan iyan kan kongregasyon asin instruksiyon iyan kan organisasyon ni Jehova, bakong huli ta gusto mo sana iyan. Kun paanong nakua ni Eliseo an pagtitiwala kan mga kapwa niya propeta asin naipahiling an saiyang paggalang sa sinalidahan niya paagi sa padagos na pag-arog sa mga pamamaagi ni Elias, makukua mo man an tiwala kan saimong mga kapagtubod asin maipapahiling an paggalang sa eksperyensiyadong mga elder paagi sa padagos na pag-arog sa saindang mga pamamaagi na basado sa Bibliya. (Basahon an 1 Corinto 4:17.) Pero, mantang nagkakaeksperyensiya ka, siguradong makakatabang ka sa pag-aplikar kan mga pagbabago na matabang sa kongregasyon na makasabay sa progresibong paghiro kan organisasyon ni Jehova. Sa katunayan, pag-abot nin panahon, arog ni Eliseo, kun maimbod ka sa pag-ako nin pagsasanay tibaad tabangan ka man ni Jehova na makagibo nin mas dakul pa kisa sa nagibo kan nagsanay sa saimo.​—Juan 14:12.

18. Taano ta priyoridad na marhay ngunyan an pagsasanay sa mga brother sa mga kongregasyon?

¹⁸ Lugod na an mga suhestiyon sa artikulong ini asin sa nainot na artikulo makapahiro sa mga elder na magtagama nin panahon sa pagsasanay sa iba. Magin andam man lugod an kuwalipikadong mga brother na akuon an siring na pagsasanay asin madunong na iaplikar iyan mantang nagtatabang sinda sa pag-ataman kan mga karnero ni Jehova. Paagi kaiyan, mapapakusog an mga kongregasyon sa bilog na kinaban asin matatabangan an lambang saro sa sato na magdanay na maimbod sa delikadong mga panahon na maabot.