Mayong sueldohan na mga ministro sa organisasyon mi. Imbes, arog kan ginibo pagkaestablisar kan Kristianong kongregasyon, nagnonombra nin kualipikadong mga paraataman tanganing “pastoran an kongregasyon nin Dios.” (Gibo 20:28, NW) An mga elder na ini maygurang sa espirituwal na nangengenot sa kongregasyon asin nagpapastor, ‘bakong huli sa kapiritan kundi sa sadiring boot; ni minsan huli sa maating pirak, kundi sa andam na pag-isip.’ (1 Pedro 5:1-3) Ano an ginigibo ninda sa kapakanan mi?

Nangangataman asin nagbabantay sa samo. Sinda an naggigiya sa kongregasyon asin nagtatabang na protektaran iyan sa espirituwal. Huling aram ninda na ipinagkatiwala sa sainda nin Dios an importanteng papel na ini, dai ninda dinodominar an mga lingkod nia, imbes nakakakontribwir sinda sa ikakarahay asin kagayagayahan mi. (2 Corinto 1:24) Kun paanong mahigos na inaataman nin pastor an kada saro sa mga karnero, pinagmamaigotan man kan mga elder na mamidbid bilang indibiduwal an gabos na miembro kan kongregasyon.—Talinhaga 27:23.

Nagtotokdo kun paano gigibohon an kabotan nin Dios. Kada semana, pinangengenotan kan mga elder an mga pagtiripon kan kongregasyon tanganing pakosogon an pagtubod mi. (Guibo 15:32) An dedikadong mga lalaking ini nangengenot man sa pag-ebanghelyo, na iniibanan asin sinasanay kami sa gabos na aspekto kan ministeryo.

Nagtatao nin personal na pampakosog sa boot. Tanganing maasikaso an pangangaipo mi sa espirituwal bilang indibiduwal, an mga elder sa lokal na kongregasyon dinadalaw kami sa harong o kinakaolay sa Kingdom Hall tanganing tabangan asin rangahon gamit an Biblia.—Santiago 5:14, 15.

Apuera sa gibohon sa kongregasyon, an kadaklan na elder igwa man nin sekular na trabaho asin paninimbagan sa pamilya na nangangaipo nin panahon saka atension. An mahigos na mga tugang na ini maninigo sa paggalang mi.—1 Tesalonica 5:12, 13.

• Ano an papel kan mga elder sa kongregasyon?

• Sa anong mga paagi ipinapahiling kan mga elder an personal na interes sa samo?

Sinasambit kan Biblia an duwang grupo nin Kristianong mga lalaki na nag-aasikaso kan mga paninimbagan sa kongregasyon—‘mga paraataman asin ministeryal na lingkod.’ (Filipos 1:1, NW) Sa pangkagabsan, may nagkapirang paraataman asin ministeryal na lingkod sa lambang kongregasyon. Ano an ginigibo kan ministeryal na mga lingkod para sa kapakinabangan mi?

Nagtatabang sa mga elder sa lokal na kongregasyon. An ministeryal na mga lingkod espirituwal an kaisipan, maaasahan, asin sadiosan na mga lalaki, na an nagkapira hoben asin an iba may edad na. Inaasikaso ninda an importante pero sa parate rutinang mga bagay na pang-organisasyon asin pisikal na mga gibohon sa kongregasyon. Huli kaini, nakakakonsentrar an mga elder sa paninimbagan na magtokdo asin magpastor.

Naglilingkod sa praktikal na paagi. An nagkapirang ministeryal na lingkod inaasignaran bilang attendant tanganing taratarahon an gabos na nag-aatender sa mga pagtiripon. An iba nag-aasikaso kan sound system, pagdistribwir nin publikasyon, kuenta kan kongregasyon, asin pag-asignar nin teritoryo sa mga miembro kan kongregasyon. Nagtatabang man sinda sa pagmantenir kan Kingdom Hall. Puede man sindang pakiolayan nin mga elder na magtabang sa mga may edad na. Ano man an iasignar sa ministeryal na mga lingkod, an pagigin andam nindang gibohon iyan dahelan tanganing igalang sinda kan gabos.—1 Timoteo 3:13.

Nagtatao nin marahay na halimbawa bilang mga Kristiano. An ministeryal na mga lingkod pinipili basado sa marahay na espirituwal na mga kualidad ninda. Kun may mga kabtang sindang ipinepresentar sa mga pagtiripon, napapakosog ninda an pagtubod mi. Paagi sa pangengenot ninda sa paghuhulit, namomotibar kami na orog na magmaigot. Huli sa pakikikooperar ninda sa mga elder, mas nagkakaigwa nin kagayagayahan asin pagkasararo. (Efeso 4:16) Pag-abot nin panahon, puede man sindang makualipikar bilang elder.

• Anong klaseng mga lalaki an ministeryal na mga lingkod?

• Paano an ministeryal na mga lingkod nakakatabang sa kongregasyon na magpunsionar nin areglado?

Si Bernabe asin apostol Pablo parateng sinasambit sa Kristianong Griegong Kasuratan. Sinda naglingkod bilang nagbibiaheng paraataman, na nagdadalaw sa enot na mga kongregasyon. Taano? Sinda may tunay na pagmakolog sa kapakanan kan mga tugang sa espirituwal. Si Pablo nagsabi na gusto niang ‘magbalik asin songkoon an mga tugang’ tanganing kumustahon sinda. Andam siang magbiahe nin ginatos na kilometro tanganing dumanan asin pakosogon sinda. (Guibo 15:36) Iyan man an pagmawot kan nagbibiaheng mga paraataman ngonyan.

Nagdadalaw tanganing pakosogon kami. An kada paraataman nin sirkito duwang beses sa sarong taon na nagdadalaw sa 20 o labi pang kongregasyon, na sarong semana an lawig kan kada pagdalaw. Nakikinabang nanggad kami sa eksperyensia ninda asin kan saindang agom, kun igwa. Hinihingoa nindang mamidbid an mga hoben pati an mga may edad na, asin gustong-gusto nindang ibanan kami sa ministeryo sa langtad saka sa mga tinotokdoan mi sa Biblia. An mga paraataman na ini nagpapastor kaiba kan mga elder asin pinapakosog kami paagi sa mga pahayag sa mga pagtiripon saka asamblea.—Guibo 15:35.

Nagpapahiling nin interes sa gabos. An mga paraataman nin sirkito interesadong marhay sa espirituwalidad kan mga kongregasyon. Nakikipagmiting sinda sa mga elder asin ministeryal na lingkod tanganing repasohon an nagibong pag-oswag saka magtao nin praktikal na sadol sa pag-asikaso kan mga paninimbagan kaini. Tinatabangan ninda an mga payunir na magin epektibo sa ministeryo, asin naoogma sindang mamidbid an mga bago pa sanang nakikiasosyar saka madangog an pag-oswag kaini sa espirituwal. An kada saro sa mga tugang na ini nagsasakripisyo nanggad bilang ‘kapwa trabahador para sa kapakanan’ mi. (2 Corinto 8:23, NW) Dapat ming arogon an pagtubod asin debosyon ninda sa Dios.—Hebreo 13:7.

• Taano ta nagdadalaw sa mga kongregasyon an mga paraataman nin sirkito?

• Paano ka orog na makikinabang sa pagdalaw ninda?

Kun may kalamidad, tolos-tolos na nag-oorganisar an mga Saksi nin pag-ayuda sa apektadong mga kapagtubod. Ipinapahiling nin siring na paghihingoa an pagigin tunay kan pagkamoot mi sa lambang saro. (Juan 13:34, 35; 1 Juan 3:17, 18) Sa anong mga paagi kami nagtatabang?

Nagdodonar nin kuarta. Kan magkaigwa nin grabeng tiggutom sa Judea, an enot na mga Kristiano sa Antioquia nagpadara nin pinansial na tabang sa mga kapagtubod. (Guibo 11:27-30) Kaagid kaiyan, kun maaraman mi na may mga kapagtubod sa sarong parte kan kinaban na napapaatubang sa kasakitan, nagdodonar kami paagi sa lokal na kongregasyon tanganing magpadara nin materyal na tabang sa mga nangangaipong marhay.—2 Corinto 8:13-15.

Nagtatabang sa praktikal na paagi. Hinahanap kan mga elder na nasa lugar nin kalamidad an lambang miembro kan kongregasyon tanganing masierto na an gabos ligtas asin mayong nawawara. Sarong komite sa pag-ayuda an nagkokoordinar kan pagtao nin kakanon, malinig na tubig na inomon, bado, istaran, asin medikal na tabang. Dakol na Saksi na may partikular na mga abilidad an nagboboluntaryo gamit an sadiring kuarta asin nagtatabang sa pag-ayuda o paghirahay nin naraot na mga harong saka Kingdom Hall. Huli sa pagkasararo bilang organisasyon asin eksperyensia sa pagtarabangan, nakakagibo tolos kami nin aksion sa panahon nin pangangaipo. Minsan ngani ‘mga kapagtubod’ an enot ming inaayudahan, tinatabangan mi man an iba kun posible, ano man an relihion ninda.—Galacia 6:10.

Nagtatao nin espirituwal asin emosyonal na tabang. An mga biktima nin kalamidad nangangaipo nanggad nin karangahan. Sa siring na panahon, nakakakua kami nin kosog hale ki Jehova, an ‘Dios nin bilog na karangahan.’ (2 Corinto 1:3, 4) Naoogma kaming ipakipag-olay sa mga nawawaran nin paglaom an dapit sa mga panuga kan Biblia, na sinisierto sa sainda na madali nang taposon kan Kahadean nin Dios an gabos na trahedyang kawsa nin kolog asin pagsakit.—Kapahayagan 21:4.

• Taano ta nakakapag-ayuda tolos an mga Saksi kun may kalamidad?

• Anong espirituwal na pagranga an puede ming ipakipag-olay sa mga nakaligtas sa kalamidad?

Kan madali nang magadan si Jesus, sia nakipag-olay nin pribado sa apat na disipulo—ki Pedro, Santiago, Juan, asin Andres. Mantang sinasabi an magigin tanda kan saiyang presensia sa huring mga aldaw, nagpalataw sia nin mahalagang marhay na hapot: “Siisay man nanggad an maimbod asin mapagmansay na oripon na ninombrahan kan saiyang kagurangnan na mamahala sa saiyang mga lingkod sa harong, tanganing magtao sa sainda kan saindang kakanon sa tamang panahon?” [NW] (Mateo 24:3, 45; Marcos 13:3, 4) Sinisierto nia sa mga disipulo na bilang “kagurangnan” ninda, nonombrahan nia an mga padagos na matao nin espirituwal na kakanon sa saiyang mga parasunod sa panahon kan katapusan. Sairisay an makompuesto sa oripon?

Sadit na grupo iyan nin linahidan na mga parasunod ni Jesus. An “oripon” iyo man sana an Namamahalang Grupo kan Mga Saksi ni Jehova. Nagtatao iyan nin napapanahon na espirituwal na kakanon sa mga kapwa nagsasamba ki Jehova. Kita nag-aasa sa maimbod na oripon na ini tanganing padagos kitang tawan nin “igong kakanon sa tamang panahon.”—Lucas 12:42, NW.

Iyan an nangangataman sa pamilya nin Dios. (1 Timoteo 3:15) Itinao ni Jesus sa oripon an magabat na paninimbagan na pagmanehar sa gibohon kan organisasyon ni Jehova digdi sa daga—an pag-asikaso sa materyal na pagsasadiri kaiyan, pagdirehir sa paghuhulit, asin pagtotokdo sa samo sa mga kongregasyon. Kaya, tanganing ikatao an kaipuhan mi sa panahon na kaipuhan mi iyan, nagpapaabot “an maimbod asin mapagmansay na oripon” nin espirituwal na kakanon paagi sa mga publikasyon na ginagamit mi sa ministeryo, saka sa mga programa sa pagtiripon patin asamblea.

An oripon maimbod sa mga katotoohan sa Biblia saka sa asignasyon na ihulit an maogmang bareta, asin mapagmansay sa kun paano kaiyan madonong na inaasikaso an intereses ni Cristo digdi sa daga. (Guibo 10:42) Binebendisyonan ni Jehova an gibohon ninda paagi sa pagdakol nin mga Saksi asin abundang espirituwal na probisyon.—Isaias 60:22; 65:13.

• Siisay an ninombrahan ni Jesus tanganing pakakanon sa espirituwal an mga disipulo nia?

• Sa anong mga paagi maimbod asin mapagmansay an oripon?

Kan enot na siglo, sarong sadit na grupo, an ‘mga apostol asin kamagurangan sa Jerusalem,’ an naglingkod bilang namamahalang grupo tanganing gumibo nin importanteng mga desisyon para sa bilog na linahidan na Kristianong kongregasyon. (Guibo 15:2) An pagigin oroyon kan desisyon ninda resulta nin pag-orolay sa sinasabi kan Kasuratan asin pagpagiya sa espiritu nin Dios. (Guibo 15:25) Sinusunod ngonyan an arogan na iyan.

Ginagamit nin Dios tanganing gibohon an kabotan nia. An linahidan na mga tugang na kabilang sa Namamahalang Grupo interesadong marhay sa Tataramon nin Dios asin dakol an eksperyensia sa pag-asikaso sa praktikal asin espirituwal na mga bagay. Sinda nagmimiting kada semana tanganing pag-olayan an pangangaipo kan pambilog na kinaban na kasararoan nin magturugang. Arog kan enot na siglo, itinatao an basado sa Biblia na mga instruksion, magsalang paagi sa surat o nagbibiaheng mga paraataman asin iba pa. Paagi kaini, mas nagigin sararo sa isip asin gibo an mga lingkod nin Dios. (Guibo 16:4, 5) Pinangengenotan kaiyan an pag-andam nin espirituwal na kakanon, ineengganyar an gabos na ihulit an Kahadean, asin nagnonombra nin mga tugang sa mga katongdan na may paninimbagan.

Nagpapagiya sa espiritu nin Dios. An Namamahalang Grupo nag-aasa sa paggiya kan Unibersal na Soberano, si Jehova, asin kan Payo kan kongregasyon, si Jesus. (1 Corinto 11:3; Efeso 5:23) Dai ibinibilang kan mga miembro kaiyan na sinda an mga lider kan mga lingkod nin Dios. Sinda, kaiba an gabos na linahidan na Kristiano, padagos na ‘nagsusunod sa Kordero [si Jesus] saen man sia paduman.’ (Kapahayagan 14:4) Pinapahalagahan kan Namamahalang Grupo an mga pamibi mi para sa sainda.

• Sairisay an kabilang sa namamahalang grupo kan enot na siglo?

• Paano nagpapagiya sa Dios an Namamahalang Grupo ngonyan?

Iyan Hebreong ngaran na an boot sabihon ‘Harong nin Dios.’ (Genesis 28:17, 19) Angay na apod iyan sa mga edipisyong itinogdok kan mga Saksi sa bilog na kinaban na dian pinangengenotan asin sinusuportaran an paghuhulit. An Namamahalang Grupo yaon sa pambilog na kinaban na opisina sa New York State, U.S.A., asin duman pinangengenotan ninda an aktibidad kan mga sangang opisina sa dakol na nasyon. Bilang sarong grupo, an mga naglilingkod sa mga pasilidad na ini inaapod na pamilyang Bethel. Siring sa sarong pamilya, sinda nag-iistar asin nagtatrabaho nin iriba, nagkakarakan nin iriba, asin iribang nag-aadal kan Biblia na may pagkasararo.—Salmo 133:1.

Pambihirang lugar na dian an mga miembro kan pamilya mapagsakripisyo sa sadiri. Sa lambang pasilidad nin Bethel, may mga Kristianong lalaki asin babae na dedikado sa paggibo kan kabotan nin Dios asin paglilingkod nin bilog na panahon para sa intereses kan Kahadean. (Mateo 6:33) Gabos sinda daing bayad o sueldo, pero tinatawan nin istaran asin kakanon saka dikit na personal na panggastos. Sinda gabos may asignasyon, magsalang sa opisina, sa kusina, o sa lugar na kakanan. May mga nasa printery o bindery, o sa housekeeping, laundry, maintenance, o iba pang departamento.

Lugar na an gabos sibot sa pagsuportar sa paghuhulit kan Kahadean. An pangenot na obheto kan lambang Bethel iyo na ipaaram an katotoohan sa Biblia sa pinakadakol na mapupuede. An brosyur na ini sarong halimbawa kaiyan. Ini isinurat sa superbisyon kan Namamahalang Grupo, ipinadara paagi sa kompyuter sa ginatos na team nin paratradusir sa bilog na kinaban, inimprenta sa mga high-speed press sa nagkapirang Bethel, asin ipinadara sa labing 110,000 na kongregasyon. Sa lambang kabtang kan prosesong ini, nagtatao an mga pamilyang Bethel nin kinakaipuhan na suporta sa pinakaapurado sa gabos na gibohon—an paghuhulit kan maogmang bareta.—Marcos 13:10.

• Sairisay an naglilingkod sa Bethel, asin ano an mga probisyon sa sainda?

• Anong apuradong gibohon an sinusuportaran kan aktibidad sa lambang Bethel?

An mga miembro nin pamilyang Bethel naglilingkod sa laen-laen na departamento tanganing maasikaso an paghuhulit sa saro o nagkapirang nasyon. Sinda naglilingkod bilang paratradusir, nag-iimprenta nin magasin asin libro, nag-aasikaso kan warehouse nin publikasyon, nasa produksion nin audio saka video, o naggigibo nin iba pang bagay para sa teritoryong nasasakopan.

Sarong Komite kan Sangay an nangengenot sa gibohon. An pagpunsionar kan kada sangang opisina ipinagkakatiwala kan Namamahalang Grupo sa sarong Komite kan Sangay, na kompuesto nin tolo o labi pang kualipikadong marhay na elder. Iniimpormaran kan komite an Namamahalang Grupo dapit sa pag-oswag kan gibohon asin mga problema sa teritoryong nasasakopan. An mga report na ini nakakatabang sa Namamahalang Grupo sa pagdesisyon kun anong mga tema an totokaron sa mga publikasyon, pagtiripon, asin asamblea sa maabot na panahon. An mga representante kan Namamahalang Grupo regular na nagdadalaw sa mga sangay asin nagtatao nin giya sa mga Komite kan Sangay sa pag-asikaso kan asignasyon ninda. (Talinhaga 11:14) Nag-aareglo nin espesyal na programa na may pahayag kan representante kan pambilog na kinaban na headquarters tanganing pakosogon an mga nasa teritoryo kan sangay.

Nagsusuportar sa lokal na mga kongregasyon. Inaaprobaran nin responsableng mga tugang sa sangang opisina an pag-establisar nin bagong kongregasyon. May mga nagdidirehir man kan aktibidad nin mga payunir, misyonero, asin paraataman nin sirkito na naglilingkod sa teritoryo kan sangay. Nag-oorganisar sinda nin mga asamblea asin kombension, kinokoordinar an pagtogdok nin bagong mga Kingdom Hall, saka sinesegurado na ikinakapadara an mga publikasyon sa mga kongregasyon. An gabos na ginigibo sa sangay nakakakontribwir sa organisadong paghuhulit.—1 Corinto 14:33, 40.

• Paano tinatabangan nin mga Komite kan Sangay an Namamahalang Grupo?

• Anong mga paninimbagan an inaasikaso sa sangang opisina?

Tanganing magibo an pinakamakakaya na ipahayag an ‘maogmang bareta’ (NW) sa ‘gabos na nasyon asin tribo asin tataramon patin banwaan,’ nagpoprodusir kami nin mga publikasyon sa labing 750 lenguahe. (Kapahayagan 14:6) Paano mi nagigibo an depisil na trabahong ini? Paagi sa tabang nin sarong grupo nin mga parasurat hale sa manlaen-laen na parte kan kinaban asin nin dedikadong mga paratradusir—na gabos Saksi ni Jehova.

Ingles an orihinal na text. Nasa superbisyon kan Namamahalang Grupo an Writing Department na yaon sa pambilog na kinaban na opisina mi. Kinokoordinar kan departamentong ini an mga asignasyon para sa mga parasurat na nasa pambilog na kinaban na opisina asin nagkapirang sangang opisina. Paagi sa laen-laen na parasurat, ikinakabagay mi an mga tema sa dakol na kultura, kaya nagigin kaakit-akit sa bilog na kinaban an mga publikasyon mi.

Ipinapadara sa mga paratradusir an text na Ingles. Pagkatapos ma-edit asin aprobaran an text, ipinapadara iyan paagi sa kompyuter sa mga team nin paratradusir sa bilog na kinaban tanganing itradusir, i-check, asin i-proofread. Hinihingoa nindang pumili nin tamang ‘mga tataramon nin katotoohan’ tanganing ikapahayag nin lubos sa lokal na lenguahe an boot sabihon kan Ingles.—Parahulit 12:10.

Napaparikas nin kompyuter an proseso. Dai puedeng salidahan nin kompyuter an mga tawong parasurat asin paratradusir. Pero, puedeng maparikas an gibohon ninda paagi sa paggamit nin mga diksionaryo asin program na nasa kompyuter para sa pagtradusir saka pag-research. Nagdisenyo an mga Saksi nin Multilanguage Electronic Publishing System (MEPS), na paagi kaiyan an text ikinaka-type sa ginatos na lenguahe, ikinaka-merge sa mga ritrato o drowing, asin kino-compose tanganing maimprenta.

Taano ta ginigibo mi an gabos na paghihingoang ini, dawa sa mga lenguaheng pira sanang ribo an nagtataram? Huli ta kabotan ni Jehova na an ‘gabos na tawo makaligtas asin makaabot sa pakasabot kan katotoohan.’—1 Timoteo 2:3, 4.

• Paano ginigibo an pagsurat para sa mga publikasyon mi?

• Taano ta itinatradusir mi sa kadakol na lenguahe an mga publikasyon mi?

An organisasyon mi nagpupublikar asin nagdidistribwir kada taon nin ginatos na milyon na Biblia asin iba pang publikasyon na daing hinahagad na bayad. Nagtotogdok asin nagmamantenir kami nin mga Kingdom Hall saka sangang opisina. Sinusuportaran mi an rinibong Bethelite saka misyonero, asin nag-aayuda kami sa panahon nin kalamidad. Kaya tibaad iniisip mo, ‘Paano ini gabos ginagastosan?’

Dai naghahagad nin porsiento asin bayad, o nangongolekta nin kuarta. Minsan ngani dakula an gastos sa pagsuportar sa pag-ebanghelyo mi, dai kami naghahagad nin kuarta. Labing sarong siglo na an nakaagi, nagsabi an ikaduwang isyu kan magasin na Watchtower na kami nagtutubod na sinusuportaran kami ni Jehova asin “nungka na makikimaherak o mahagad nin suporta sa mga tawo”—asin dai mi noarin man ginibo iyan!—Mateo 10:8.

An aktibidad suportado nin boluntad na mga donasyon. Dakol an nag-aapresyar sa pagtotokdo mi sa Biblia asin nagdodonar para dian. An mga Saksi mismo naoogmang magkontribwir nin panahon, kosog, kuarta, asin iba pang pagsasadiri sa paggibo kan kabotan nin Dios sa bilog na daga. (1 Cronica 29:9) Sa Kingdom Hall asin sa samong mga asamblea saka kombension, may mga contribution box para sa mga gustong magdonar. Puede man magdonar paagi sa samong website na jw.org. Sa pangkagabsan, an kuartang nareresibi hale sa mga simple sana an pamumuhay, arog nanggad kan pobreng babaeng balo na inomaw ni Jesus huli sa paghulog nin duwang sadit na sinsilyo sa kaha kan templo. (Lucas 21:1-4) Kaya, an siisay man puedeng regular na “magtagama” nin itatao “siring sa pinagmawot nia sa saiyang puso.”—1 Corinto 16:2, NW; 2 Corinto 9:7.

Kombensido kami na padagos na papahiroon ni Jehova an puso kan mga gustong ‘tawan sia nin onra paagi sa saindang mahahalagang bagay,’ bilang pagsuportar sa gibohon na pang-Kahadean tanganing magibo an kabotan nia.—Talinhaga 3:9, NW.

• Taano ta laen sa ibang relihion an organisasyon mi?

• Paano ginagamit an boluntad na mga donasyon?

Siring kan ipinaparisa kan terminong Kingdom Hall, an pangenot na katokdoan sa Biblia na tinotokar sa lugar na iyan nakasentro sa Kahadean nin Dios—an tema kan ministeryo ni Jesus.—Lucas 8:1.

Sentro nin tunay na pagsamba sa komunidad. Dian inoorganisar an paghuhulit kan maogmang bareta kan Kahadean. (Mateo 24:14) Laen-laen an kadakulaan asin disenyo kaiyan, pero gabos iyan simpleng estruktura, na an dakol ginagamit nin labi sa sarong kongregasyon. Sa nakaagi pa sanang mga taon, nakapagtogdok kami nin manampulong ribo na bagong Kingdom Hall (may average na lima kada aldaw) tanganing makasabay sa pagdakol nin kongregasyon. Paano ini nagigin posible?—Mateo 19:26.

Itinotogdok paagi sa mga donasyon na espesipikong para dian. Ipinapadara an donasyon na ini sa sangang opisina tanganing ipagamit sa mga kongregasyon na nangangaipong magtogdok o mag-remodel nin Kingdom Hall.

Itinotogdok nin daing bayad na mga boluntaryo na laen-laen an kamugtakan sa buhay. Sa dakol na nasyon, may inorganisar na mga Kingdom Hall Construction Group. An mga grupo nin mga construction servant asin volunteer nagduduman sa mga kongregasyon sa sarong nasyon, pati na sa hararayong lugar, tanganing magtabang sa lokal na mga kongregasyon sa pagtogdok kan mga Kingdom Hall ninda. Sa ibang nasyon, may ninonombrahan na kualipikadong mga Saksi tanganing maneharon an pagtogdok asin paghirahay nin mga Kingdom Hall sa rehion na inasignar sa sainda. Dawa ngani dakol na eksperto sa trabaho hale sa rehion an nagboboluntaryo sa kada lugar na may itinotogdok, an kadaklan kan mga boluntaryo hale sa lokal na kongregasyon. Paagi sa espiritu ni Jehova asin sa bilog na kalag na paghihingoa kan mga lingkod nia, nagigin posible an gabos na ini.—Salmo 127:1; Colosas 3:23.

• Taano ta inaapod na Kingdom Hall an samong mga lugar nin pagsamba?

• Paano nagigin posible an pagtogdok nin mga Kingdom Hall sa bilog na kinaban?

Mahihiling sa gabos na Kingdom Hall of Jehovah’s Witnesses an banal na ngaran nin Dios. Kaya, para sa samo an pagtabang na mapagdanay iyan na malinig, presentable, asin marahay an kondisyon sarong pribilehio saka mahalagang kabtang kan sagradong pagsamba mi. An gabos puedeng makipagtabangan.

Pagboluntaryo sa paglinig pagkatapos nin pagtiripon. Pagkatapos nin kada pagtiripon, an mga tugang maogmang naglilinig sa Kingdom Hall. Sarong beses kada semana, may mas kompletong paglinig. May elder o ministeryal na lingkod na nagkokoordinar kaiyan, na sa parate may sinusunod na checklist. Depende sa pangangaipo, may mga nagsasamod, nagma-mop o nagba-vacuum kan salog, nagpupunas nin alpog, nagpapakaray kan tukawan, naglilinig asin naglalaag nin pandisimpektar sa CR, naglilinig kan bintana saka salming, nag-aapon nin basura, o naglilinig sa palibot kan hall. Kisiera sarong beses kada taon, nag-iiskedyul nin sarong aldaw para sa general cleaning. Paagi sa pagtao man nin pirang gibohon sa mga aki, tinotokdoan mi sinda na igalang an samong lugar nin pagsamba.—Parahulit 5:1.

Pagtabang sa ano man na kaipuhan hirahayon. Kada taon, may detalyadong pag-inspeksion kan laog asin luwas kan Kingdom Hall. Basado dian, may regular na pagmantenir tanganing papagdanayon na marahay an kondisyon kaiyan, na nakakatabang na malikayan an dai kaipuhan na gastos. (2 Cronica 24:13; 34:10) An malinig asin namamantenir na marhay na Kingdom Hall angay na lugar para sa pagsamba sa samong Dios. Paagi sa pakikipagtabangan, ikinakapahiling niamo kun gurano karani sa puso mi si Jehova asin an samong lugar nin pagsamba. (Salmo 122:1) Nagtatao man ini nin magayon na impresyon sa komunidad.—2 Corinto 6:3.

• Taano ta dai mi dapat pabayaan an samong lugar nin pagsamba?

• Ano an mga areglo tanganing mapagdanay na malinig an Kingdom Hall?

Gusto mo daw na mag-research tanganing madagdagan an kaaraman sa Biblia? Interesado ka daw na maaraman an dapit sa partikular na teksto o sarong karakter, lugar, o bagay na sinambit dian? O iniisip mo daw kun baga matatabangan ka kan Tataramon nin Dios sa sarong personal na problema? Kun iyo, gamiton mo an libreriya kan Kingdom Hall.

May nakakatabang na mga kasangkapan sa pag-research. Posibleng marhay na mayo ka kan gabos na basado sa Bibliang publikasyon kan mga Saksi na makukua sa lenguahe mo. Pero, an libreriya igwa kan kadaklan sa pinakabagong publikasyon. Tibaad may laen-laen man dian na bersion nin Biblia, magayon na diksionaryo, asin iba pang nakakatabang na reperensia. Puede mong gamiton an libreriya bago asin pagkatapos nin pagtiripon. Kun may kompyuter dian, tibaad igwa iyan nin Watchtower Library. Ini program sa kompyuter na yaon an dakol sa mga publikasyon mi asin an pasil gamiton na search feature tanganing mahanap mo an sarong tema, termino, o teksto.

Kapakipakinabang sa mga estudyante sa Pagtiripon Mapadapit sa Pamumuhay Asin Ministeryo. Puede mong magamit na marhay an libreriya kun nag-aandam kan asignasyon mo. An paraataman kan Pagtiripon Mapadapit sa Pamumuhay Asin Ministeryo an nag-aasikaso kaiyan. Paninimbagan niang siertohon na iyan areglado asin may pinakabagong mga publikasyon. Ikakapahiling nia o kan nagtotokdo sa saimo sa Biblia kun paano makukua an impormasyon na kaipuhan mo. Pero, dai puedeng iluwas sa Kingdom Hall an mga libro dian. Asin, siempre, gusto tang ingatan an mga libro asin dai iyan pagmarkahan.

Ipinapaliwanag kan Biblia na tanganing ‘makua an kaaraman dapit sa Dios’ (NW), dapat na andam kitang hanapon iyan siring sa nakatagong “kayamanan.” (Talinhaga 2:1-5) An libreriya kan Kingdom Hall makakatabang sa saimo na ponan an paghanap kaiyan.

• Anong mga kasangkapan sa pag-research an yaon sa libreriya kan Kingdom Hall?

• Sairisay an makakatabang sa saimo na gamiton an libreriya sa pinakamarahay na paagi?

Si Jesu-Cristo nagsabi sa mga parasunod nia: ‘Paliwanaga an saindong ilaw sa atubangan nin mga tawo; tanganing mahiling ninda an saindong marahay na mga gibo, asin pamurawayon ninda an saindong Ama na nasa langit.’ (Mateo 5:16) Sa katuyohan na iyan, ginagamit mi nin tama an modernong teknolohiya, pati na an Internet. An samong website na jw.org an opisyal na pinagkukuanan nin impormasyon sa Internet dapit sa tinutubod asin aktibidad kan Mga Saksi ni Jehova. Ano an itinatampok kaiyan?

Simbag kan Biblia sa mga bagay na pirmeng ihinahapot. Makukua mo an simbag sa nagkapira sa pinakaimportanteng hapot nin mga tawo. Halimbawa, an tract na Matatapos Pa Daw an Pagsakit? asin Puwede Daw Talagang Mabuhay an mga Gadan? makukua online sa labing 600 na lenguahe. Yaon man dian an New World Translation sa labing 130 lenguahe asin an nagkapirang pantabang sa pag-adal sa Biblia, kaiba an librong Ano Man Nanggad an Itinotokdo kan Biblia? saka an bagong mga isyu kan An Torrengbantayan patin Awake! Dakol sa mga publikasyon na ini an puedeng basahon o dangogon sa Internet o i-download sa format na arog kan MP3, PDF, o EPUB. Puede mo pa nganing i-print an pirang pahina kaiyan tanganing ipabasa sa sarong interesado, sa sadiri niang lenguahe! An mga publikasyon na nasa video makukua sa dakol na lenguaheng pasenyas. Puede kang mag-download nin mga dramatic Bible reading, Bible drama, asin magayon na musika na siertong ikakaogma mo.

Totoong impormasyon dapit sa Mga Saksi ni Jehova. Yaon man dian an pinakahuring mga bareta asin video clip dapit sa pambilog na kinaban na gibohon mi, mga pangyayaring apektado an mga Saksi, asin pag-ayuda sa panahon nin kalamidad. Mahihiling mo an impormasyon dapit sa nagdadangadang na mga kombension asin kun paano makokontak an mga sangang opisina mi.

Paagi kaini, pinapasirang mi an liwanag nin katotoohan sagkod sa pinakahararayong lugar sa kinaban. Nakikinabang an mga tawo sa lambang kontinente, kaiba na an malipoton asin harayoon na Antarctica. Ipinapamibi mi na logod marikas na ‘makalakop an tataramon nin Kagurangnan’ sa bilog na kinaban, para sa kamurawayan ni Jehova.—2 Tesalonica 3:1.

• Paano an jw.org nakakatabang sa dakol pa na makanood kan katotoohan sa Biblia?

• Ano an gusto mong hilingon sa samong website?