Dakol an dai na nag-aatender sa mga seremonya nin relihion huling dai sinda nakakakua nin espirituwal na paggiya o kaginhawahan. Kun siring, taano ta maninigo kang mag-atender sa mga pagtiripon na inorganisar kan Mga Saksi ni Jehova? Ano an maeeksperyensiahan mo dian?

An kagayagayahan na makaiba an mamomoton asin mapagmakolog na mga tawo. Kan enot na siglo, inorganisar an mga Kristiano sa mga grupong inaapod na kongregasyon, asin nagtitiripon sinda sa pagsamba sa Dios, pag-adal kan Kasuratan, asin pagpakinosogkosogan. (Hebreo 10:24, 25) Huling may pagkamoot sa tahaw ninda, namamatean nindang kaibanan ninda an tunay na mga katood—an mga tugang sa espirituwal. (2 Tesalonica 1:3; 3 Juan 14) Sinusunod mi an arogan na iyan asin naeeksperyensiahan an kaparehong kagayagayahan.

An pakinabang na makanood kun paano iaaplikar an mga prinsipyo sa Biblia. Arog kaidtong mga panahon kan Biblia, iribang nagtitiripon an mga lalaki, babae, asin aki. Gamit an Biblia, tinatabangan kita nin kualipikadong mga paratokdo na masabotan kun paano iaaplikar sa aroaldaw na buhay an mga prinsipyo kaiyan. (Deuteronomio 31:12; Nehemias 8:8) An gabos puedeng makikabtang sa pagkanta asin pagtokar na may partisipasyon an mga nagdadangog, na dian ikinakapahayag niato an Kristianong paglaom.—Hebreo 10:23.

An bendisyon na mapakosog an pagtubod sa Dios. Sinabi ni apostol Pablo sa saro sa mga kongregasyon kan panahon nia: ‘Ako nagmamawot na mahiling kamo, tanganing ako sa kaibahan nindo maranga dian sa saindo, an lambang saro sa sato huli sa pagtubod kan iba, an saindo asin an sako man.’ (Roma 1:11, 12) Sa mga pagtiripon, an regular na pakikiasosyar sa mga kapwa Saksi nakakapakosog sa pagtubod asin determinasyon niato na mamuhay bilang Kristiano.

Taano ta dai mo akoon an imbitasyon mi na umatender sa sunod na pagtiripon kan kongregasyon tanganing maeksperyensiahan ini? Maogma kang aakoon. Daing bayad an gabos na pagtiripon—mayo nin ano man na koleksion.

• Sa anong arogan ibinasar an mga pagtiripon mi sa kongregasyon?

• Paano kita makikinabang sa pag-atender sa Kristianong mga pagtiripon?

Dawa kun kaipuhan ming magbaklay sa kadlagan o maraot an kamugtakan nin panahon, regular kaming nag-aatender sa mga pagtiripon. Dawa masakit an buhay asin pagal sa maghapon na trabaho, taano ta naghihingoa nanggad an mga Saksi ni Jehova na makiasosyar sa mga kapagtubod?

Para sa ikakarahay mi. “Magpamaromangno kita,” an surat ni Pablo, na an pinanonongdan iyo an mga nakakaasosyar sa kongregasyon. (Hebreo 10:24) An mga tataramon na ini nangangahulogan na “pag-isipan na marhay,” na an boot sabihon, magkamiridbidan. Kaya, dinadagka kita kan sinabi kan apostol na magin interesado sa iba. Paagi sa pagmidbid sa ibang Kristianong pamilya, naaaraman mi na napangganahan kan nagkapira sa sainda an kadepisilan na inaagihan mi man asin sinda puedeng makatabang sa samo na magin mapanggana man.

Nakakatabang na magkaigwa nin nagdadanay na pakikikatood. Sa mga pagtiripon, an kaiba mi bako sanang basta mga kabisto, kundi sarong grupo nin dayupot na mga katood. Sa ibang panahon, nag-iiribanan kami sa kapakipakinabang na pag-aling-aling. Ano an marahay na epekto kan siring na pakikiasosyar? Mas naaapresyar mi an lambang saro, kaya minakosog an pagkaminorootmootan. Dangan, kun may problema an mga tugang mi, tolos kaming minatabang huli ta igwa na kami nin makosog na relasyon bilang magkakatood. (Talinhaga 17:17) Paagi sa pakikiasosyar sa gabos na miembro kan kongregasyon, ipinapahiling mi na may ‘pag-ingat’ o pagmakolog kami sa lambang saro.—1 Corinto 12:25, 26.

Ineenkaminar mi ika na an pilion mong mga katood iyo an mga naggigibo kan kabotan nin Dios. Makakanompong ka nin siring na mga katood sa Mga Saksi ni Jehova. Dai tabi pagtogotan an ano man na makaolang sa saimo na makiasosyar sa samo

• Taano ta kapakipakinabang para sa samo an pakikiasosyar sa mga kapagtubod durante nin mga pagtiripon?

• Noarin mo gustong mag-atender sa kongregasyon mi asin mamidbid an mga Saksi?

An pagkanta, pamibi, pagbasa, asin pagtokar kan Kasuratan mayor na kabtang kan enot na Kristianong mga pagtiripon—na gabos mayo nin ano man na ritual. (1 Corinto 14:26) Arog nanggad kaiyan an maaasahan mo sa mga pagtiripon mi.

An pagtotokdo basado sa Biblia asin praktikal. Kada Sabado o Domingo, nagtitiripon an lambang kongregasyon tanganing magdangog nin 30 minutos na diskurso sa Biblia manongod sa sinasabi kan Kasuratan dapit sa buhay asin sa panahon na kinabubuhayan niato. Gabos kami dinadagka na magsubaybay sa sadiring Biblia. Pagkatapos kan diskurso, may sarong oras na Pag-adal sa “Torrengbantayan,” na dian an mga nag-aatender puedeng magpartisipar sa pag-adal nin sarong artikulo sa pinag-aadalan na edisyon kan An Torrengbantayan. Nakakatabang ini sa samo na iaplikar sa buhay an paggiya kan Biblia. Parehong publikasyon an pinag-aadalan sa labing 110,000 na kongregasyon sa bilog na kinaban.

Tinatabangan kaming mapaoswag an abilidad sa pagtotokdo. Nagtitiripon man kami sa sarong banggi sa laog kan semana para sa programa na inaapod na An Satong Kristiyanong Pamumuhay Asin Ministeryo, gamit an bulanan na publikasyon na Workbook sa Pagtiripon Mapadapit sa Pamumuhay Asin Ministeryo. May tolong kabtang an pagtiripon na iyan. An enot iyo an Kayamanan na Yaon sa Tataramon nin Diyos, na nagtatabang sa samo na magin pamilyar sa sarong porsiyon kan Biblia na patienot nang binasa kan mga miembro kan kongregasyon. An sunod iyo an Magin Andam sa Ministeryo, na may mga demonstrasyon kun paano ipapakipag-olay sa iba an Biblia. Sarong parakonseho an nagtatabang sa samo na mapaoswag an abilidad sa pagbasa asin pagtaram. (1 Timoteo 4:13) Sa ultimong kabtang na Pamumuhay Bilang Kristiyano, tinotokar kun paano iaaplikar sa pang-aroaldaw na buhay an mga prinsipyo sa Biblia. May kaiba ining hapot-simbagan na pagtokar na nagpapararom kan pakasabot mi sa Biblia.

Kun maatender ka sa mga pagtiripon mi, daing duda na mahanga ka sa kalidad kan edukasyon sa Biblia na aakoon mo.—Isaias 54:13.

• Ano an maaasahan mong madangog sa mga pagtiripon kan Mga Saksi ni Jehova?

• Arin sa semanal na mga pagtiripon mi an gusto mong atenderan?

Narisa mo daw sa mga ritrato sa brosyur na ini kun gurano karahay magbado an mga Saksi ni Jehova kun nag-aatender sa mga pagtiripon? Taano ta tinatawan mi nin siring na atension an pagbado asin pagpakarhay sa sadiri?

Tanganing ipahiling an paggalang sa samong Dios. Totoo na an pighihiling nin Dios labi pa sa pangluwas na itsura niato. (1 Samuel 16:7) Minsan siring, kun kami nagtitiripon tanganing sambahon sia, an odok sa pusong pagmawot mi iyo na magpahiling nin paggalang sa saiya pati na sa mga kapwa parasamba. Kun kita maatubang sa sarong huwes sa husgado, posibleng marhay na tatawan niato nin atension an satong itsura bilang paggalang sa katongdan nia. Sa kaagid na paagi, ipinapahiling kan samong itsura mantang nasa pagtiripon an hararom na paggalang mi sa “Hokom kan bilog na kinaban,” si Jehova Dios, asin sa lugar na dian sinasamba mi sia.—Genesis 18:25.

Tanganing ipahiling kun anong mga pamantayan an sinusunod mi sa buhay. Dinadagka kan Biblia an mga Kristiano na magbado na “may kabinian asin toltol na isip.” (1 Timoteo 2:9, 10, NW) An pagbado na “may kabinian” nangangahulogan nin dai pagsulot nin bado na mapagpasikat, mapang-akit, o haros hiling na an dai dapat mahiling. Siring man, an pagkaigwa nin “toltol na isip” nakakatabang sa samo na pumili nin magayon na bado na bakong disareglado o malaenon sa paghiling. An mga prinsipyong ini dai man nagbabawal sa saro na pumili nin laen-laen na klase nin bado na gusto nia. Dawa dai kita magtaram, an satong magayon asin kawiliwiling itsura puedeng ‘magsamno sa katokdoan kan satong Paraligtas’ asin “magpamuraway sa Dios.” (Tito 2:10; 1 Pedro 2:12) Kun siring, paagi sa marahay na pagbado mi sa mga pagtiripon, nakakaimpluwensia ini sa pagmansay nin iba dapit sa pagsamba ki Jehova.

Dai ka mag-alangan na mag-atender sa Kingdom Hall huli sana sa bado mo. Iyan dai man kaipuhan na mamahalon o magarbo tanganing magin angay, malinig, asin presentable.

• Gurano kaimportante an pagbado mi kun nagsasamba sa Dios?

• Anong mga prinsipyo an naggigiya sa pagpili mi nin bado asin pagpakarhay sa sadiri?

Kun tinotokdoan ka sa Biblia nin sarong Saksi ni Jehova, posibleng marhay na pinagmamaigotan mong patienot na pag-adalan an nakaiskedyul na mga totokaron. Tanganing lubos na makinabang sa pagtiripon kan kongregasyon, marahay na gibohon man iyan bago mag-atender. Marahayon an nagigin resulta kun may regular kitang rutina.

Aramon kun saen asin noarin maadal. Noarin ka nakakakonsentrar na marhay? Iyan daw sa amay na aga bago ponan an trabaho o sa banggi kun torog na an mga aki? Dawa kun dai ka makakapag-adal nin halawig, magdesisyon kun gurano kadakol na oras an puede mong itagama, asin pagmaigotan na mayo nin ano man na makaolang sa saimo. Maghanap nin toninong na lugar, asin haleon an gabos na disturbo paagi sa paggadan kan radio asin TV, saka paglaag kan cell phone sa silent mode. An pagpamibi bago mag-adal makakatabang sa saimo na mahale sa isip an mga kahaditan kan aldaw tanganing makapagkonsentrar sa Tataramon nin Dios.—Filipos 4:6, 7.

Hanapon an mga simbag sa pag-aadalan, asin magin andam na magpartisipar. Ponan paagi sa pag-aram kan pangkagabsan na tema. Pag-isipan an titulo kan artikulo o kapitulo, estudyaran kun paano an kada subtema konektado sa tema, asin analisaron an mga ritrato saka hapot sa pagrepaso na nagtatampok kan pangenot na mga punto. Dangan basahon an kada parapo, asin hanapon an simbag sa mga hapot. Buksan asin basahon an mga tekstong sitado, saka isip-isipon kun paano kaini sinusuportaran an pinag-aadalan. (Guibo 17:11) Kun nahiling mo na an simbag sa hapot, kuritan o i-highlight an nagkapirang pangenot na tataramon o frase sa parapo na magpapagirumdom sa saimo kan simbag. Dangan, durante kan pagtiripon, puede kang magtaas nin kamot asin magkomento nin halipot sa sadiring tataramon.

Paagi sa pagsiyasat sa laen-laen na tema na totokaron sa mga pagtiripon kada semana, madadagdagan nin bagong impormasyon an saimong “sarayan” (NW) nin kaaraman sa Biblia.—Mateo 13:51, 52.

• Anong rutina an puede mong gibohon tanganing makapag-andam para sa mga pagtiripon?

• Paano mo aandamon an sadiri tanganing makapagkomento sa pagtiripon?

Poon pa kan suanoy na panahon, gusto na ni Jehova na an lambang pamilya magkaigwa nin panahon na mag-iribanan, na pinapakosog an espirituwalidad asin relasyon sa lambang saro. (Deuteronomio 6:6, 7) Iyan an dahelan kun taano an mga Saksi ni Jehova ta may iskedyul kada semana sa pagsamba bilang pamilya—na pinag-oolayan, sa relaks na kamugtakan, an espirituwal na mga bagay na espesipiko nindang kaipuhan. Dawa nagsosolo ka, an panahon na iyan puedeng magin marahayon na oportunidad na makaibanan an Dios paagi sa proyekto nin pag-adal sa Biblia na pinili mo.

Panahon na orog na rumani o mas dumayupot ki Jehova. “Rumani kamo sa Dios, asin sia marani sa saindo.” (Santiago 4:8) Mas namimidbid mi si Jehova mantang nanonodan mi an mga detalye dapit sa saiyang personalidad asin mga gibo paagi sa nasusurat niang Tataramon. An sarong pasil na paagi na makapoon nin pampamilyang pagsamba iyo an paggamit nin pirang minuto para sa makosog asin iribang pagbasa kan Biblia, na tibaad sinusunod an semanal na iskedyul para sa Pagtiripon Mapadapit sa Pamumuhay Asin Ministeryo. Puedeng barangabangaon kan mga miembro nin pamilya an babasahon, dangan pag-olayan kan gabos kun ano an nanodan sa Kasuratan.

Panahon na mas dumayupot sa mga kapamilya. Paagi sa pag-adal sa Biblia bilang pamilya, mas napapakosog an relasyon kan mga mag-agom, pati na kan mga magurang asin mga aki. Iyan maninigong magin maogma asin matoninong na panahon, saka pirmeng inaantisipar kan gabos. Depende sa edad kan mga aki, puedeng pumili an mga magurang nin praktikal na mga temang pag-oolayan, na tibaad ginagamit An Torrengbantayan asin Awake! o an mga nasa website niato na jw.org. Puede nindong pag-olayan an problema kan mga aki sa eskuelahan asin kun paano iyan aatubangon. Magayon kun magheling kamo nin sarong programa sa JW Broadcasting (tv.jw.org) dangan pag-orolayan iyan pagkatapos. Ikakaogma man nindo an pagpraktis kan mga kakantahon sa mga pagtiripon asin an pagmerindal pagkatapos kan pampamilyang pagsamba.

An espesyal na panahon na ini kada semana para sa iribang pagsamba ki Jehova makakatabang sa gabos na miembro kan pamilya na ikaogmang marhay an Tataramon nin Dios, asin bebendisyonan nanggad nia an paghihingoa nindo.—Salmo 1:1-3.

• Taano ta nag-iiskedyul kami nin panahon para sa pampamilyang pagsamba?

• Paano magigibo kan mga magurang na magin nakakaogma sa gabos na miembro kan pamilya an panahon na ini?

Taano ta mahihiling sa lalawgon kan mga tawong ini an siring na kagayagayahan? Nag-aatender sinda sa saro sa mga asamblea mi. Arog kan enot na mga lingkod nin Dios, na pinagbotan na magtiripon nin tolong beses kada taon, inaantisipar mi an pag-atender sa mas darakulang pagtiripon. (Deuteronomio 16:16) Taon-taon, igwa kami nin tolong okasyon: duwang tigsarong aldaw na pansirkitong asamblea, asin tolong aldaw na pangrehion na kombension. Paano kami nakikinabang dian?

Napapakosog an samong Kristianong kasararoan nin magturugang. Kun paanong an mga Israelita naggayagaya sa pag-omaw ki Jehova ‘sa mga katiriponan,’ naoogma man kami na iriba siang sambahon sa espesyal na mga okasyon. (Salmo 26:12; 111:1) Nagtatao ini nin oportunidad na makamidbid asin makaasosyar an mga Saksi hale sa ibang kongregasyon o nasyon. Sa udto, maogma kaming nagkakarakan sa lugar mismo kan asamblea, kaya nagigin mas kawiliwili an espirituwal na mga pagtiripon. (Guibo 2:42) Sa mga asambleang iyan, naeeksperyensiahan mi an pagkamoot na bogkos kan samong “bilog na kasararoan nin mga tugang” sa kinaban.—1 Pedro 2:17, NW.

Natatabangan kaming umoswag sa espirituwal. Nakinabang man an mga Israelita huling sinda ‘nakasabot kan mga tataramon’ kan Kasuratan na detalyadong ipinaliwanag sa sainda. (Nehemias 8:8, 12) Inaapresyar mi man an pagtotokdong itinatao sa mga asamblea. An lambang programa basado sa sarong tema na sono sa Kasuratan. Paagi sa interesanteng mga pahayag, simposium, asin pag-akto nin mga eksperyensia, nanonodan mi kun paano gigibohon an kabotan nin Dios. Napapakosog kami kun nadadangog mi an mga eksperyensia kan mga nagigin mapanggana sa pag-atubang sa kadepisilan sa buhay bilang Kristiano sa masakit na panahon na ini. Sa mga pangrehion na kombension, an mga costume drama ginigibong mas tunay an mga salaysay sa Biblia asin nagtotokdo sa samo nin praktikal na mga leksion. Sa kada asamblea, may ginigibong bautismo para sa mga gustong simbolisaran an pagdusay ninda sa Dios.

• Taano ta maogmang okasyon an mga asamblea?

• Paano ka makikinabang sa pag-atender sa asamblea?

Kan madali nang magadan si Jesus, sia nagsabi: ‘Ining ebanghelyo nin kahadean ihuhulit sa bilog na kinaban sa pagpatotoo sa gabos na nasyon; dangan madatong an katapusan.’ (Mateo 24:14) Alagad, paano ini gigibohon sa bilog na kinaban? Paagi sa pagsunod sa arogan na itinao ni Jesus kan sia nasa daga pa.—Lucas 8:1.

Pinagmamaigotan ming makaolay an mga tawo sa harong ninda. Sinanay ni Jesus an mga disipulo nia na ihulit an maogmang bareta sa harong-harong. (Mateo 10:11-13; Guibo 5:42; 20:20) An mga ebanghelisador na idto kan enot na siglo inasignaran nin espesipikong mga teritoryo na huhulitan. (Mateo 10:5, 6; 2 Corinto 10:13) Sa kaagid na paagi ngonyan, organisadong marhay an paghuhulit mi, asin an lambang kongregasyon inaasignaran nin teritoryo. Paagi kaini, naootob mi an pagboot ni Jesus na ‘maghulit sa mga tawo, asin magpatotoo’ nin lubos.—Guibo 10:42.

Hinihingoa ming makaolay an mga tawo saen man sinda. Nagtao man si Jesus nin halimbawa paagi sa paghuhulit sa pampublikong mga lugar, arog baga sa may baybayon o sa may bubon kan banwaan. (Marcos 4:1; Juan 4:5-15) Nakikipag-olay man kami dapit sa Biblia saen man magigibo iyan—sa tinampo, lugar nin negosyo, parke, o paagi sa telepono. Nagpapatotoo man kami sa samong pagtaraed, katrabaho, kaklase, asin paryente kun may angay na oportunidad. Paagi sa gabos na paghihingoang ini, nagin posible na madangog nin minilyon sa bilog na kinaban an ‘maogmang bareta kan pagliligtas.’—Salmo 96:2, NW.

May naiisip ka daw na gusto mong kaolayon dapit sa maogmang bareta kan Kahadean nin Dios asin sa kahulogan kaiyan para sa puturo ninda? Dai mo pagsadirihon an mensaheng ini nin paglaom. Sabihon tolos iyan sa sainda!

• Anong “maogmang bareta” an dapat ibalangibog?

• Paano inaarog kan Mga Saksi ni Jehova an pamamaagi ni Jesus sa paghuhulit?

An termino sa Ingles na “pioneer” parateng nanonongod sa mga nagsisiyasat nin bagong teritoryo tanganing buksan an dalan para sa iba. Si Jesus arog sa sarong payunir, huling sia isinugo sa daga tanganing gibohon an nagtataong buhay na ministeryo asin buksan an dalan pasiring sa kaligtasan. (Mateo 20:28) Ngonyan, inaarog sia kan mga parasunod nia paagi sa paggamit nin pinakadakol na oras na mapupuede sa ‘paggibo nin disipulo.’ (Mateo 28:19, 20) An nagkapira naglaog sa inaapod ming paglilingkod bilang payunir.

Bilog na panahon na ebanghelisador. An gabos na Saksi ni Jehova parahayag kan maogmang bareta. Minsan siring, inareglar nin nagkapira an buhay ninda tanganing maglingkod bilang regular payunir, na naggagamit nin 70 oras kada bulanTanganing magibo ini, dakol an nagtatrabaho nin part-time. Igwa man nin mga pinipili na magin espesyal payunir sa mga lugar na mas nangangaipo nin mga parahayag kan Kahadean, na naggagamit nin 130 oras o labi pa kada bulan. An mga payunir kontento na sa simpleng pamumuhay, na may kompiansa na itatao ni Jehova an pangangaipo ninda sa buhay. (Mateo 6:31-33; 1 Timoteo 6:6-8) An mga dai makakapagpayunir nin bilog na panahon puedeng maglingkod bilang auxiliary payunir sa mga panahon na magigibo ninda, na naggagamit nin 30 o 50 oras kada bulan.

Motibado nin pagkamoot sa Dios asin mga tawo. Arog ni Jesus, naririsa mi an kaherakherak na kamugtakan sa espirituwal nin dakol ngonyan. (Marcos 6:34) Alagad, igwa kami nin kaaraman na makakatabang sa sainda ngonyan mismo, na nagtatao sa sainda nin marigon na paglaom para sa puturo. Pagkamoot sa kapwa an nagmomotibar sa sarong payunir na gumamit nin dakol na panahon asin paghihingoa tanganing tabangan an iba sa espirituwal. (Mateo 22:39; 1 Tesalonica 2:8) Bilang resulta, napapakosog an pagtubod nia, mas napapadayupot sia sa Dios, asin nakakaeksperyensia nin dakulang kaogmahan.—Guibo 20:35.

• Paano mo ilaladawan an sarong payunir?

• Ano an nakakamotibar sa nagkapira na magpayunir nin bilog na panahon?

An Mga Saksi ni Jehova haloy nang midbid na nagtatao nin teokratikong edukasyon. May espesyal na mga paadalan na bukas para sa mga bilog na panahon na naghuhulit kan Kahadean tanganing lubos na ‘maotob an saindang paglilingkod.’—2 Timoteo 4:5.

Paadalan sa Paglilingkod Bilang Payunir. Kun an sarong regular payunir makasarong taon na sa paglilingkod, ini-enroll sia sa anom na aldaw na paadalan na puedeng gibohon sa sarong haraning Kingdom Hall. An katuyohan kaiyan iyo na tabangan an mga payunir na mas maparani ki Jehova, magin mas epektibo sa gabos na paagi nin ministeryo, asin magpadagos sa maimbod na paglilingkod.

School for Kingdom Evangelizers. Katuyohan kan duwang bulan na paadalan na ini na magsanay nin eksperyensiadong mga payunir na andam na maglingkod sa ibang lugar na kaipuhan sinda. Garo man sana sinasabi ninda, ‘Uya ako, sugoa ako’! bilang pag-arog sa pinakanangongorog na Ebanghelisador na naglingkod sa daga, si Jesu-Cristo. (Isaias 6:8; Juan 7:​29) An pagbalyo sa harayong lugar puedeng mangaipo nin pagpasimple nin pamumuhay. Tibaad ibang-iba sa kinatodan an kultura, klima, asin mga kakanon duman. Posible nganing kaipuhan pang mag-adal nin ibang lenguahe. Tinatabangan kan paadalan na ini an daing agom na mga brother asin sister saka an mga mag-agom, na edad 23 sagkod 65, na magkaigwa kan espirituwal na mga kualidad na kakaipuhanon sa saindang asignasyon asin kan mga kakayahan na makakatabang tanganing lubos sindang magamit ni Jehova asin kan saiyang organisasyon.

Watchtower Bible School of Gilead. Sa Hebreo, an “Gilead” nangangahulogan na “Tambak na Patotoo.” Poon kan magkaigwa nin Gilead kan 1943, labi nang 8,000 na naggradweyt an idinestino bilang misyonero tanganing magpatotoo sagkod “sa kaporoporohi nin daga,” asin nagin mapangganang marhay sinda. (Guibo 13:47) Kan enot na mag-abot sa Peru an mga naggradweyt sa paadalan, mayo pang kongregasyon duman. Ngonyan, may labi nang 1,000. Kan magpoon na maglingkod an mga misyonero sa Hapon, mayo pang sampulo an Saksi duman. Ngonyan, may labi nang 200,000. Kaiba sa limang bulan na pag-adal sa Gilead an lubos na pag-adal sa Tataramon nin Diyos. Mga espesyal payunir o misyonero, mga naglilingkod sa sangang opisina, o mga paraataman nin sirkito an iniimbitaran sa paadalan na ini para sa orog na pagsasanay tanganing makatabang sa pagpaoswag asin pagpakosog kan pambilog na kinaban na gibohon.

• Ano an katuyohan kan Paadalan sa Paglilingkod Bilang Payunir?

• Siisay an puedeng mag-adal sa School for Kingdom Evangelizers?