Makusog an Buot kan Pamangkin ni Pablo

Aramon ta an istorya nin sarong soltero na ilinigtas an buhay kan tiyuon niya. An tiyuon niya iyo si apostol Pablo. Dai ta aram an pangaran kan soltero, pero may ginibo siya na nagpapahiling na makusugon an buot niya. Gusto mong maaraman kun ano an ginibo niya?—

Nakakulong kaidto si Pablo sa Jerusalem. Pigdakop siya ta nagtutukdo siya manungod ki Jesus. Igwa nin mga tawo na anggot ki Pablo, kaya may maraot sindang pigplano. Sinabi ninda: ‘Sabihon ta sa komander na darahon kan mga suldados si Pablo sa korte. Matago kita sa gilid kan tinampo, tapos pag nag-agi na si Pablo, gagadanon ta siya!’

Naaraman kan pamangkin ni Pablo an plano. Ano an gigibuhon niya? Nagduman siya sa presuhan para sabihon iyan ki Pablo. Pigsabihan tulos siya ni Pablo na isumbong sa komander kan mga suldados an maraot na plano. Sa hiling mo, madali daw sa pamangkin ni Pablo na kaulayon an komander?— Bako, ta siyempre komander idto. Pero makusog an buot kan pamangkin ni Pablo. Kinaulay niya an komander.

Aram kan komander an dapat gibuhon. Haros 500 na suldados an pigpaiba niya para proteksiyunan si Pablo! Sinabihan niya an mga ini na darahon si Pablo sa Cesarea kan bangging idto. Nakaligtas daw si Pablo?— Iyo, dai nakaatake an maraot na mga tawo! Dai nadagós an maraot nindang plano.

Ano an manunudan mo sa istoryang ini?— Puwede ka man magin makusog an buot arog kan pamangkin ni Pablo. Dapat na makusog an buot mo pag sinasabi mo sa iba an manungod ki Jehova. Ipapahiling mo daw na makusog an buot mo asin padagos mong sasabihon sa iba an manungod ki Jehova?— Kun iyo, matatabangan mo an iba na makaligtas.