Naaraman mo an katotoohan kan makipag-adal ka sa Bibliya sa mga Saksi ni Jehova. An mga nanudan mo siguradong nakatabang saimo na magkaigwa nin marahay na relasyon sa Diyos asin nin paglaom na mag-ako sa maabot na panahon nin buhay patin mga bendisyon sa sarong paraisong daga sa pamamahala kan Kahadian nin Diyos. Kuminusog an pagtubod mo sa Tataramon nin Diyos, asin huli sa pakikiasosyar sa Kristiyanong kongregasyon, dakul ka nang naako na bendisyon. Nasabutan mo kun paano ginigiyahan ni Jehova an saiyang banwaan sa ngunyan.—Zac. 8:23.

Ngunyan na naghahanda ka na para sa bawtismo, makikinabang ka sa pagrepaso sa saimo kan mga elder manungod sa panginot na mga tinutubod kan mga Kristiyano. (Heb. 6:1-3) Padagos lugod na bendisyunan ni Jehova an gabos mong paghihinguwa na mamidbid siya, asin itao lugod niya sa saimo an ipinanugang premyo.—Juan 17:3.

1. Taano ta gusto mong magpabawtismo?

2. Siisay si Jehova?

• “Si Jehova an tunay na Diyos sa kalangitan sa itaas asin sa daga sa ibaba. Dai na nin iba.”—Deut. 4:39.

• “Ika, na an pangaran Jehova, ika sana an Kahuruhalangkawi sa bilog na daga.”—Sal. 83:18.

3. Taano ta mahalaga na gamiton mo an personal na pangaran nin Diyos?

• “Mamibi kamo nin arog kaini: ‘Ama niyamo na nasa langit, pakangbanalon an ngaran mo.’”—Mat. 6:9.

• “An gabos na nag-aapod sa pangaran ni Jehova maliligtas.”—Roma 10:13.

4. Ano an pira sa mga termino na ginamit sa Bibliya para ki Jehova?

• “Si Jehova, an Kaglalang kan daga puon sa puro sagkod sa ibong na puro kaiyan, sarong Diyos sa bilog na panahon na daing sagkod.”—Isa. 40:28.

• “Ama niyamo na nasa langit.”—Mat. 6:9.

• “An Diyos pagkamuot.”—1 Juan 4:8.

5. Ano an maitatao mo sa Diyos na Jehova?

• “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip pati sa bilog mong kusog.”—Mar. 12:30.

• “Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.”—Luc. 4:8.

6. Taano ta gusto mong magin maimbod ki Jehova?

• “Magin madunong ka, aki ko, asin paugmaha an sakong puso, tanganing may maisimbag ako sa saiya na nagtutuya sa sako.”—Tal. 27:11.

7. Kiisay ka namimibi, asin paagi kiisay?

• “Sinisigurado ko [si Jesus] nanggad sa saindo, kun maghagad kamo nin ano man sa Ama, itatao niya iyan sa saindo sa ngaran ko.”—Juan 16:23.

8. Ano an mga puwede mong ipamibi?

• “Mamibi kamo nin arog kaini: ‘Ama niyamo na nasa langit, pakangbanalon an ngaran mo. Dumatong lugod an Kahadian mo. Mangyari lugod an buot mo, kun paano sa langit, siring man sa daga. Itao mo sa samo ngunyan an samuyang kakanon para sa aldaw na ini; asin patawadon mo kami sa samuyang mga kasalan, kun paanong nagpatawad man kami sa mga nagkasala sa samo. Asin dai mo kami pagpabayaan na madaog nin sugot, kundi iligtas mo kami sa saro na maraot.’”—Mat. 6:9-13.

• “May kumpiyansa kita sa saiya na ano man na bagay na hagadon niyato kauyon kan saiyang kabutan, dinadangog niya kita.”—1 Juan 5:14.

9. Taano ta puwedeng dai dangugon ni Jehova an pamibi nin sarong tawo?

• “Maapod sinda ki Jehova para maghagad nin tabang, pero dai siya masimbag sa sainda . . . dahil sa mararaot na gibo ninda.”—Miq. 3:4.

• “An mga mata ni Jehova nakahiling sa mga matanos, asin an saiyang mga talinga nagdadangog sa saindang pagngayo-ngayo, alagad habo ni Jehova sa mga naggigibo nin maraot na mga bagay.”—1 Ped. 3:12.

10. Siisay si Jesu-Cristo?

• “Nagsimbag si Simon Pedro: ‘Ika an Cristo, an Aki kan buhay na Diyos.’”—Mat. 16:16.

11. Taano ta nagdigdi si Jesus sa daga?

• “An Aki nin tawo nag-abot, bako tanganing paglingkudan, kundi tanganing maglingkod asin itao an saiyang buhay bilang pantubos na karibay nin dakul.”—Mat. 20:28.

• “Dapat na ipahayag ko [si Jesus] man sa ibang mga siyudad an maugmang bareta kan Kahadian nin Diyos, huli ta dahil kaini kaya ako isinugo.”—Luc. 4:43.

12. Paano mo maipapahiling an saimong pasasalamat sa sakripisyo ni Jesus?

• “Siya nagadan para sa gabos tanganing idtong mga nabubuhay mabuhay bako nang para sa saindang sadiri, kundi para sa saiya na nagadan alang-alang sa sainda saka ibinangon.”—2 Cor. 5:15.

13. Anong awtoridad an itinao ki Jesus?

• “An gabos na awtoridad sa langit asin sa daga itinao na sa sako.”—Mat. 28:18.

• “Ibinugtak siya nin Diyos sa sarong mas halangkaw na posisyon asin may kabuutan na itinao sa saiya an ngaran na mas urog kisa sa gabos na iba pang ngaran.”—Fil. 2:9.

14. Nagtutubod ka daw na an Namamahalang Grupo kan Mga Saksi ni Jehova iyo an “maimbod asin mapagmansay na uripon” na ninombrahan ni Jesus?

• “Siisay man nanggad an maimbod asin mapagmansay na uripon na ninombrahan kan saiyang kagurangnan na mamahala sa mga lingkod niya sa harong, tanganing magtao sa sainda kan saindang kakanon sa tamang panahon?”—Mat. 24:45.

15. An banal na espiritu daw sarong persona?

• “Bilang simbag sinabi sa saiya kan anghel: ‘An banal na espiritu madatong sa saimo, asin an kapangyarihan kan Kahuruhalangkawi malindong sa saimo. Asin huli kaiyan an saro na mamumundag aapudon na banal, Aki nin Diyos.’”—Luc. 1:35.

• “Kun kamo, maski ngani maraot, tataong magtao nin marahay na mga regalo sa mga aki nindo, lalo nang matao an Ama sa langit nin banal na espiritu sa mga naghahagad sa saiya!”—Luc. 11:13.

16. Paano ginagamit ni Jehova an saiyang banal na espiritu?

• “Paagi sa tataramon ni Jehova nagibo an kalangitan, asin paagi sa espiritu kan saiyang nguso nagibo an gabos na bagay na yaon diyan.”—Sal. 33:6.

• “Maako kamo nin kapangyarihan pag uminabot sa saindo an banal na espiritu, asin kamo magigin mga saksi ko . . . sa pinakaharayong parte kan daga.”—Gibo 1:8.

• “Mayong propesiya nin Kasuratan an gikan sa ano man na personal na mga ideya. Huli ta an propesiya dai kasuarin man ipinahayag paagi sa kabutan nin tawo, kundi an mga tawo nagtaram gikan sa Diyos mantang sinda ginigiyahan kan banal na espiritu.”—2 Ped. 1:20, 21.

17. Ano an Kahadian nin Diyos?

• “Sa mga aldaw kan mga hading idto, an Diyos nin langit maestablisar nin sarong kahadian na dai nuarin man malalaglag. Asin an kahadian na ini dai itatao sa arin man na ibang banwaan. Rurunuton kaini asin tatapuson an gabos na kahadian na iyan, asin ini sana an magdadanay sagkod lamang.”—Dan. 2:44.

18. Anong mga bendisyon an makakamtan mo pag namamahala na an Kahadian nin Diyos?

• “Papahidon niya an gabos na luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog. An mga dating bagay nakalihis na.”—Kap. 21:4.

19. Taano ta kumbinsido ka na madali nang mag-abot an mga bendisyon na dara kan Kahadian?

• “An mga disipulo nagdurulok sa saiya na sinda-sinda sana, na sinasabi: ‘Sabihon mo sa samuya, nuarin mangyayari an mga bagay na ini, asin ano an magigin tanda kan saimong presensiya asin kan pagtatapos kan sistema nin mga bagay?’ Bilang simbag sinabi ni Jesus sa sainda: ‘. . . An nasyon makikilaban sa nasyon asin an kahadian makikilaban sa kahadian, asin magkakaigwa nin sunod-sunod na grabeng gutom saka linog sa manlain-lain na lugar. Asin an maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.’”—Mat. 24:3, 4, 7, 14.

• “Sa huring mga aldaw maabot an delikado asin masakit na mga panahon. Huli ta an mga tawo magigin interesado na sana sa sadiri nindang kapakanan, mamumuton sa kuwarta, mahambog, mapalangkaw, paralanghad, masinuway sa mga magurang, dai tataong magpasalamat, bakong maimbod, mayong pagkamuot sa mga kapamilya, habo nin ano man na kasunduan, parapakaraot, daing pagpupugol sa sadiri, maringis, daing pagkamuot sa karahayan, traydor, matagas an payo, orgulyoso, mas gusto pang magpasiram-siram imbes na magpahiling nin pagkamuot sa Diyos, na nagsasagin man ngayang relihiyoso alagad dai man talaga namumuhay nin uyon diyan.”—2 Tim. 3:1-5.

20. Paano mo maipapahiling na mahalaga sa saimo an Kahadian?

• “Padagos na hanapon nguna an Kahadian saka an saiyang katanusan.”—Mat. 6:33.

• “Sinabi ni Jesus sa mga disipulo niya: ‘Kun an siisay man gustong magsunod sa sako, talikdan niya an saiyang sadiri saka pasanon an saiyang hariging pasakitan asin padagos siyang sumunod sa sako.’”—Mat. 16:24.

21. Siisay si Satanas asin an mga demonyo?

• “Gikan kamo sa saindong amang Diyablo . . . An sarong iyan paragadan puon sa kapinunan.”—Juan 8:44.

• “Ihinulog an dakulang dragon, an gurangan na halas, an inaapod na Diyablo asin Satanas, na nandadaya sa bilog na kinaban; ihinulog siya sa daga, asin an saiyang mga anghel ihinulog kaibanan niya.”—Kap. 12:9.

22. Ano an sahot ni Satanas ki Jehova asin sa mga nagsasamba sa Saiya?

• “Nagsimbag an babayi sa halas: ‘Puwede ming kakanon an bunga kan mga kahoy sa hardin. Pero kun manungod sa bunga kan kahoy na nasa tahaw kan hardin, sinabi nin Diyos: “Dai kamo magkakan kan bunga kaiyan, asin dai nindo pagdutan iyan; ta kun gigibuhon nindo iyan, magagadan kamo.”’ Sinabi kan halas sa babayi: ‘Siguradong dai kamo magagadan. Aram kaya nin Diyos na sa mismong aldaw na magkakan kamo kan bunga kaiyan, mabubuksan an saindong mga mata asin magigin arog kamo nin Diyos na nakakaaram kan marahay saka kan maraot.’”—Gen. 3:2-5.

• “Nagsimbag si Satanas ki Jehova: ‘Kublit para sa kublit. Itatao nin tawo an gabos na yaon sa saiya para sa saiyang buhay.’”—Job 2:4.

23. Paano mo mapapatunayan na sala an mga sahot ni Satanas?

• “Maglingkod ka sa saiya [sa Diyos] nin bilog na puso.”—1 Cron. 28:9.

• “Sagkod na magadan ako, papagdanayon ko an sakuyang integridad!”—Job 27:5.

24. Taano ta nagagadan an tawo?

• “Paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.”—Roma 5:12.

25. Ano an kamugtakan kan mga gadan?

• “Aram kan mga buhay na sinda magagadan, pero an mga gadan dai na lamang nin naaaraman.”—Ecl. 9:5.

26. Ano an paglaom para sa mga nagadan?

• “Bubuhayon liwat nin Diyos an mga matanos pati an mga bakong matanos.”—Gibo 24:15.

27. Pira an maduman sa langit para mamahala kaiba ni Jesus?

• “Nahiling ko an Kordero na nakatindog sa Bukid nin Sion, asin kaibanan niya an 144,000 na sa saindang mga angog nakasurat an saiyang ngaran asin an ngaran kan saiyang Ama.”—Kap. 14:1.

Sa pag-adal mo nin Bibliya, naaraman mo kun ano an hinahagad sa saimo ni Jehova asin kun paano mo masusunod an matanos na mga pamantayan niya. Dahil gusto mong isabuhay an mga nanudan mo, tibaad dakul kang binago sa saimong paggawi asin pananaw sa buhay. Ngunyan na determinado ka nang mamuhay kauyon kan matanos na mga pamantayan ni Jehova, kuwalipikado ka nang magin ministro kan maugmang bareta.

An pagrepaso kan mga minasunod na hapot makakatabang saimo na maisaisip nin malinaw an matanos na mga kahagadan ni Jehova asin maipapagirumdom kaiyan saimo an mga bagay na puwede mong gibuhon tanganing magin inuuyunan na lingkod niya. Makakatabang man ini sa saimo na masabutan na ano man an ginigibo mo, mahalaga na igwa ka nin malinig na konsiyensiya asin natatawan mo nin onra si Jehova.—2 Cor. 1:12; 1 Tim. 1:19; 1 Ped. 3:16, 21.

Ngunyan na nakaabot ka na sa puntong ini kan saimong pag-adal, siguradong gusto mo nang magpasakop sa pamamahala ni Jehova asin mapabilang sa organisasyon niya. Makakatabang an mga hapot asin an mga ginamit na teksto para mahiling mo kun talagang nasasabutan mo an kahulugan kan pagpapasakop sa areglo ni Jehova sa laog kan kongregasyon, sa pamilya, o sa mga bagay na may koneksiyon sa pulitika kan sistemang ini sa kinaban. Siguradong mapapakusog an saimong pagpapahalaga sa mga ginigibo ni Jehova para tukduan an mga lingkod niya asin pakusugon an saindang pagtubod. Kaiba diyan an mga pagtiripon sa kongregasyon kaya kaipuhan mong mag-atender asin magpartisipar diyan sagkod na itinutugot kan saimong kamugtakan.

Pag-uulayan man sa seksiyon na ini an kahalagahan kan regular na pagpartisipar sa paghuhulit kan Kahadian, na tinatabangan an iba na mamidbid si Jehova asin maaraman an ginigibo niya para sa katawuhan. (Mat. 24:14; 28:19, 20) Ultimo, iduduon kaini saimo kun gurano kaseryoso kan saimong pagdusay sa Diyos na Jehova asin kan saimong bawtismo. Makakasigurado ka na inaapresyar ni Jehova an saimong udok na pagpapahalaga sa saiyang daing kapantay na kabuutan na ipinahiling niya sa saimo.

1. Ano an pamantayan na sinusunod kan mga Kristiyano sa pag-agom? Ano an solamenteng basehan sa Kasuratan para sa diborsiyo?

• “Dai nindo nabasa na an saro na naglalang sa sainda sa kapinunan ginibo sindang lalaki asin babayi asin nagsabi: ‘Huli kaini babayaan nin lalaki an saiyang ama asin an saiyang ina saka magdadanay siyang kaibanan kan saiyang agom, asin an duwa magigin sarong laman’? Kaya sinda bako nang duwa, kundi sarong laman. Kun siring, an pinagsaro nin Diyos dai pagsuwayon nin siisay man na tawo. . . . An siisay man na dumiborsiyo sa saiyang agom na babayi, apuwera sana kun dahil sa nagibo kaini na seksuwal na imoralidad, asin mag-agom nin iba nakakagibo nin pagsambay.”—Mat. 19:4-6, 9.

2. Taano ta dapat kasal an lalaki asin babayi na nag-iibanan bilang mag-agom? Kun kasal ka, sigurado ka daw na legal asin awtorisado kan gobyerno an kasal nindo?

• “Padagos mo sindang pagirumdumon na magpasakop saka magin masinunod sa mga gobyerno asin mga awtoridad.”—Tito 3:1.

• “Magin kagalang-galang para sa gabos an pag-inaguman, asin magin daing digta an higdaan kan mag-agom, huli ta huhukuman nin Diyos an mga tawong imoral asin mga parasambay.”—Heb. 13:4.

3. Ano an papel mo sa pamilya?

• “Maghimati ka, aki ko, sa disiplina kan saimong ama, asin dai mo pagbayaan an itinutukdo kan saimong ina.”—Tal. 1:8.

• “An agom na lalaki iyo an payo kan saiyang agom na babayi kun paanong an Cristo iyo an payo kan kongregasyon . . . Mga agom na lalaki, padagos na mamutan an saindong mga agom, kun paanong namutan man kan Cristo an kongregasyon.”—Efe. 5:23, 25.

• “Mga ama, dai nindo pagpaangguton an saindong mga aki, kundi padagos sindang padakulaon sa disiplina asin sadol ni Jehova.”—Efe. 6:4.

• “Kamong mga aki, magin masinunod kamo sa saindong mga magurang sa gabos na bagay, huli ta nakakapaugma ini sa Kagurangnan.”—Col. 3:20.

• “Kamong mga agom na babayi, magpasakop kamo sa saindong mga agom.”—1 Ped. 3:1.

4. Taano ta dapat tang igalang an buhay?

• “An [Diyos] nagtatao sa gabos na tawo nin buhay, nin hinangos, asin nin gabos na bagay. Huli sa saiya kita igwa nin buhay asin naghihiro saka nag-eeksister.”—Gibo 17:25, 28.

5. Taano ta dai kita dapat gumadan nin siisay man, kaiba na an dai pa namumundag na umboy?

• “Kun may mag-iwal asin makulgan ninda an sarong bados tapos . . . igwa nin magadan, dapat na magbayad nin buhay sa buhay.”—Ex. 21:22, 23.

• “Nahiling ako kan saimong mga mata dawa kan ako embrayo pa; gabos na parte kaiyan nakasurat sa saimong libro—manungod sa mga aldaw kan an mga iyan mahaman—bago pa mabilog an arin man sa mga iyan.”—Sal. 139:16.

• “Ikinakaungis ni Jehova [an] mga kamot na nagpapabulos nin dugo nin daing sála.”—Tal. 6:16, 17.

6. Ano an pagbuot nin Diyos may koneksiyon sa dugo?

• “Padagos na maglikay . . . sa dugo [asin] sa pagkakan nin mga hayop na tinilok.”—Gibo 15:29.

7. Taano ta dapat tang kamutan an satong mga tugang na Kristiyano?

• “Tinatawan ko kamo nin sarong bagong tugon, na kamutan nindo an lambang saro; kun paanong namutan ko kamo, kamutan man nindo an lambang saro. Paagi kaini maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.”—Juan 13:34, 35.

8. Para malikayan na maipasa sa iba an nakakaulakit asin posibleng nakakagadan na hilang: (a) Taano ta dapat iwasan kan may hilang an pisikal na pagpahiling nin pagpadangat, arog nin pagkugos asin paghadok? (b) Taano ta dai dapat magkulog an buot niya kun dai siya imbitaran kan iba sa saindang harong? (c) Bago makipag-ilusyon, taano ta dapat magpa-blood test an saro na posibleng nabantad sa nakakaulakit na hilang? (d) Bago magpabawtismo an saro na may nakakaulakit na hilang, taano ta dapat niyang sabihon sa koordineytor kan grupo nin kamagurangan an manungod sa kamugtakan niya?

• “Dai magkautang nin ano man sa kiisay man kundi kamutan an lambang saro. . . . ‘Kamutan mo an saimong kapwa nin siring sa saimong sadiri.’ An pagkamuot dai naggigibo nin maraot sa kapwa.”—Roma 13:8-10.

• “[Tawan] nindo nin atensiyon bako sana an sadiri nindong kapakanan, kundi an kapakanan man kan iba.”—Fil. 2:4.

9. Taano ta inaasahan ni Jehova na papatawadon ta an iba?

• “Padagos na pagpasensiyahan an lambang saro asin lubos na patawadon an lambang saro dawa pa kun an siisay man igwa nin dahilan na ireklamo an saro. Kun paanong lubos kamong pinatawad ni Jehova, iyo man an dapat nindong gibuhon.”—Col. 3:13.

10. Ano an dapat mong gibuhon kun may tugang na nagpakaraot o nandaya saimo?

• “Kun makagibo nin kasalan an saimong tugang, magduman ka asin ihayag mo an sála niya na kamo sana. Kun magdangog siya sa saimo, nabawi mo an saimong tugang. Pero kun dai siya magdangog, mag-iba ka nin saro o duwa pa, tanganing sa patotoo nin duwa o tulong testigo makumpirmar an lambang bagay. Kun dai siya magdangog sa sainda, sabihon mo sa kongregasyon. Kun dai siya magdangog dawa sa kongregasyon, ibilang mo siya na siring sa tawo kan mga nasyon asin siring sa parasingil nin buhis.”—Mat. 18:15-17.

11. Ano an paghiling ni Jehova sa mga kasalan na ini?

▪ Seksuwal na imoralidad

▪ Paggamit nin mga imahen sa pagsamba

▪ Homoseksuwalidad

▪ Paghabon

▪ Pagsugal

▪ Pagburat

• “Dai kamo magpadaya. An mga tawong imoral, mga parasamba sa idolo, mga parasambay, mga lalaking nagpapagamit sa kapwa lalaki, mga lalaking nagdudurog sa kapwa lalaki, mga parahabon, mga mahanab, mga buratsero, mga paralait, asin mga parakikil dai magmamana kan Kahadian nin Diyos.”—1 Cor. 6:9, 10.

12. Manungod sa seksuwal na imoralidad, kaiba na an iba-ibang klase nin seksuwal na mga gibo nin mga bakong mag-agom, ano an determinado mong gibuhon?

• “Dumulag ka sa seksuwal na imoralidad!”—1 Cor. 6:18.

13. Kun bako man para sa pagbulong, taano ta dai kita dapat gumamit nin mga substansiya na nakakaadik o nakakaapekto sa isip?

• “Ipresentar nindo an saindong mga hawak bilang atang na buhay, banal asin akseptable sa Diyos, na sa paaging iyan nagsasagibo kamo nin sagradong paglilingkod gamit an saindong kakayahan na mag-isip. Asin dai na kamo magpamolde sa sistemang ini nin mga bagay, kundi liwaton an saindong pagkatawo paagi sa pagbago kan saindong isip, tanganing mapatunayan nindo sa saindong sadiri an kabutan nin Diyos na marahay asin akseptable saka perpekto.”—Roma 12:1, 2.

14. Anong mga sa-demonyong gibo an ipinagbabawal nin Diyos?

• “Dai dapat magkaigwa sa saindo . . . nin siisay man na naghuhula, nin siisay man na nagmamahika, nin siisay man na naghahanap nin mga senyales, nin espiritista, nin siisay man na naggagamit nin orasyon para gibuhan nin maraot an iba, nin siisay man na nagkokonsulta sa sarong espiritista o parahula, o nin siisay man na naghahapot sa gadan.”—Deut. 18:10, 11.

15. Kun an saro makagibo nin magabat na kasalan asin gusto niyang makamtan giraray an pag-uyon ni Jehova, ano an dapat na gibuhon niya tulos?

• “Itinuga ko sa saimo an sakong kasalan; dai ko pigtahuban an sakuyang sála. An sabi ko: ‘Itutuga ko ki Jehova an sakong mga paglapas.’”—Sal. 32:5.

• “Igwa diyan sa saindo nin may hilang? Makipag-ulay siya sa kamagurangan kan kongregasyon, asin ipapamibi ninda siya, na linalahidan siya nin lana sa ngaran ni Jehova. Asin an pamibi na ipinahayag na may pagtubod mapaumay sa saro na may hilang, dangan tatabangan siya ni Jehova na makabangon. Siring man, kun may nagibo siyang mga kasalan, papatawadon siya.”—Sant. 5:14, 15.

16. Kun aram mo na an sarong kapwa Kristiyano nakagibo nin magabat na kasalan, ano an dapat mong gibuhon?

• “Kun an saro testigo sa sarong pagkakasala o nahiling o naaraman niya iyan, pero dai niya iyan isinumbong pagkatapos niyang madangog an pangapudan sa publiko na magtestigo manungod diyan, kun siring, magkakasala siya asin maninimbag huli kaiyan.”—Lev. 5:1.

17. Kun ipaisi sa kongregasyon na an sarong indibidwal bako nang Saksi ni Jehova, paano ta siya dapat tratuhon?

• “Ipundo nindo an pakikiiba-iba sa siisay man na inaapod na tugang pero sarong imoral o mahanab o parasamba sa idolo o paralait o buratsero o parakikil, asin maski an magkakan kaiba kan tawong iyan dai nindo paggibuhon.”—1 Cor. 5:11.

• “Kun an siisay man magdiyan sa saindo asin dai niya dara an katukduan na ini, dai nindo siya pag-akuon sa saindong harong o pagkumustahon.”—2 Juan 10.

18. Taano ta su mga namumuot ki Jehova an dapat na magin mga amigo mo?

• “An saro na naglalakaw kaiba kan mga madunong magigin madunong man, pero an saro na nakikiiba-iba sa mga mangmang mapapahamak.”—Tal. 13:20.

• “Dai kamo magpadaya. An maraot na pag-iriba minaraot kan marahay na mga ugali.”—1 Cor. 15:33.

19. Taano ta neutral an mga Saksi ni Jehova pag-abot sa pulitika?

• “Bako sindang kabtang kan kinaban, kun paanong ako [si Jesus] bakong kabtang kan kinaban.”—Juan 17:16.

20. Taano ta dapat kang magsunod sa gobyerno?

• “Magpasakop an lambang tawo sa haralangkaw na awtoridad, huli ta mayong awtoridad na bakong hali sa Diyos; an nag-eeksister na mga awtoridad nag-ookupar kan saindang manlain-lain na posisyon na inasignar nin Diyos.”—Roma 13:1.

21. Kun an ley nin tawo kontra sa ley nin Diyos, ano an gigibuhon mo?

• “An Diyos an dapat niyamong sunudon bilang tagapamahala imbes na an mga tawo.”—Gibo 5:29.

22. Sa pagpili nin trabaho, anong mga teksto an makakatabang saimo para dai ka magin parte kan kinaban?

• “An nasyon dai na mabingat nin espada laban sa nasyon, ni mag-aadal pa man sinda nin pakikigiyera.”—Miq. 4:3.

• “Lumuwas kamo sa saiya, banwaan ko, kun habo nindong madamay sa saiyang mga kasalan, asin kun habo nindong magsapar nin mga damat na para sa saiya.”—Kap. 18:4.

23. Anong klase nin mga libangan an pipilion mo, asin arin an mga iiwasan mo?

• “Ikinakaungis [ni Jehova] an siisay man na namumuot sa kadahasan.”—Sal. 11:5.

• “Kaungisan an maraot; mangapot sa kun ano an marahay.”—Roma 12:9.

• “Ano man na bagay na totoo, ano man na bagay na angay tawan nin seryosong atensiyon, ano man na bagay na matanos, ano man na bagay na malinig, ano man na bagay na kawili-wili, ano man na bagay na positibo, ano man na bagay na igwang karahayan, asin ano man na bagay na kaumaw-umaw, padagos nindong isip-isipon an mga ini.”—Fil. 4:8.

24. Taano ta dai nakikiiba sa pagsamba nin ibang relihiyon an mga Saksi ni Jehova?

• “Dai kamo puwedeng magkakan sa ‘lamesa ni Jehova’ asin sa lamesa nin mga demonyo.”—1 Cor. 10:21.

• “‘Isuway nindo an saindong sadiri,’ an sabi ni Jehova, ‘asin ipundo nindo an pagdutdot kan maating bagay’; ‘dangan aakuon ko kamo.’”—2 Cor. 6:17.

25. Anong mga prinsipyo sa Bibliya an makakatabang saimo kun baga mapartisipar ka o dai sa sarong selebrasyon?

• “Nakiiba-iba sinda sa mga nasyon asin inarog an gibo-gibo kan mga ini. Padagos sindang naglingkod sa mga idolo kan mga ini, asin an mga iyan nagin siod sa sainda.”—Sal. 106:35, 36.

• “An mga gadan dai na lamang nin naaaraman.”—Ecl. 9:5.

• “Bako sindang kabtang kan kinaban, kun paanong ako bakong kabtang kan kinaban.”—Juan 17:16.

• “Igo na an nag-aging panahon na ginamit nindo sa paggibo kan kagustuhan kan mga tawo kan mga nasyon, na iyo an daing pakundangan na paggawi, daing kontrol na mga hurot, sobrang pag-inom nin arak, mariribok na kaurugmahan, pataragalan sa pag-inom, asin mga makababalding idolatriya.”—1 Ped. 4:3.

26. Paano makakatabang saimo an mga halimbawa sa Bibliya kun baga maselebrar ka nin birthday o dai?

• “Pag-abot kan ikatulong aldaw, kumpleanyo ni Faraon, asin naghanda siya nin bangkete para sa gabos niyang lingkod. Dangan an panginot na kopero saka an panginot na panadero pareho niyang pinaluwas asin dinara sa atubangan kan saiyang mga lingkod. Tapos ibinalik niya an panginot na kopero sa katungdan kaini . . . Pero ipinabitay niya an panginot na panadero.”—Gen. 40:20-22.

• “Kan pigseselebrar an kumpleanyo ni Herodes, nagbayle sa okasyon na idto an aking babayi ni Herodias asin napaugma kaining marhay si Herodes kaya suminumpa siya na itatao niya sa babayi an ano man na hagadon kaini. Dangan sa pagpasunod kan saiyang ina, nagsabi an babayi: ‘Itao mo sa sakuya na nasa bandehado an payo ni Juan Bautista.’”—Mat. 14:6-8, 10.

27. Taano ta gusto mong sunudon an instruksiyon asin paggiya kan mga elder?

• “Magin masinunod sa mga nanginginot sa saindo asin magin mapagpasakop, huli ta binabantayan ninda kamo asin ibinibilang nindang kargo ninda kamo, na sa siring magibo ninda ini na may kaugmahan asin dai nagagabatan, huli ta makakadanyar ini sa saindo.”—Heb. 13:17.

28. Taano ta mahalaga saimo saka sa pamilya mo na magkaigwa nin regular na iskedyul para basahon asin pag-adalan an Bibliya?

• “An ikinakaugma niyang marhay iyo an katugunan ni Jehova, asin an Saiyang katugunan binabasa niya sa maluway na boses, aldaw asin banggi. Magigin siring siya sa sarong kahoy na itinanom sa gilid kan mga sulugan nin tubig, sarong kahoy na namumunga sa kapanahunan kaiyan, na an mga dahon dai naluluyos. Asin an gabos na ginigibo niya magigin mapanggana.”—Sal. 1:2, 3.

29. Taano ta talagang gusto mong mag-atender asin magpartisipar sa mga pagtiripon?

• “Ipapahayag ko sa sakuyang mga tugang an saimong pangaran; uumawon taka sa tahaw kan katiripunan.”—Sal. 22:22.

• “Padagos tang isip-isipon an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon, siring kan nakaugalian na nin nagkapira, kundi padagos na pinapakusog an lambang saro, lalo na ta nahihiling nindo na an aldaw harani na.”—Heb. 10:24, 25.

30. Ano an pinakaimportanteng trabaho na ipinapagibo sa sato ni Jesus?

• “Padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda . . . , na tinutukduan sinda na utubon an gabos na bagay na ipinagbuot ko sa saindo.”—Mat. 28:19, 20.

31. Pag nagtatao nin donasyon para sa gibuhon na pang-Kahadian o nagtatabang sa satong mga tugang, ano an dapat na magin sabuot ta para mapaugma si Jehova?

• “Tawan mo nin onra si Jehova paagi kan saimong mahahalagang pagsadiri.”—Tal. 3:9.

• “Gibuhon kan lambang saro an uyon sa napagdesisyunan niya sa saiyang puso, na bakong magabat an buot o napipiritan, huli ta namumutan nin Diyos an maugmang nagtatao.”—2 Cor. 9:7.

32. Anong mga kadipisilan an inaasahan na kan mga Kristiyano?

• “Maugma an mga pinepersegir dahil sa katanusan, huli ta sa sainda an Kahadian kan kalangitan. Maugma kamo kun pigtutuya kamo nin mga tawo asin kun pinepersegir ninda kamo saka kun sinda putik na nagtataram laban sa saindo nin gabos na klase nin maraot na bagay nin huli sa sako. Mag-ugma kamo asin maggaya-gayang marhay ta dakula an saindong balos sa langit, huli ta arog man kaiyan an pagpersegir ninda sa mga propetang nainot sa saindo.”—Mat. 5:10-12.

33. Taano ta espesyal na pribilehiyo an mabawtismuhan bilang sarong Saksi ni Jehova?

• “An saimong mga tataramon nanumpungan, asin kinakan ko an mga iyan; asin an saimong tataramon nagin labi-labing kaugmahan asin kagaya-gayahan kan sakong puso, huling inapod ako sa pangaran mo, O Jehova na Diyos.”—Jer. 15:16.

An pagbawtismo parating ginigibo sa mga asembleya asin kumbensiyon kan Mga Saksi ni Jehova. Sa pagtatapos kan pahayag sa bawtismo, sasabihan kan ispiker an mga kandidato sa bawtismo na tumindog asin simbagon nin makusog an minasunod na duwang hapot:

1. Pinagsulsulan mo na daw an saimong mga kasalan, idinusay na an saimong sadiri ki Jehova, asin inako na an pagliligtas niya paagi ki Jesu-Cristo?

2. Nasasabutan mo daw na paagi sa saimong pagpabawtismo, ipinapamidbid mo na saro ka nang Saksi ni Jehova asin kabilang ka na sa organisasyon ni Jehova?

Paagi sa pagsimbag nin iyo sa mga hapot na ini, “hayagan na ipinapahayag” kan mga kandidato sa bawtismo na nagtutubod sinda sa pantubos asin lubos na nindang idinusay an saindang sadiri ki Jehova. (Roma 10:9, 10) Marahay na patiinot nang pag-isipan asin ipamibi kan mga kandidato sa bawtismo an mga hapot na ini tanganing makasimbag sinda kauyon kan sadiri nindang desisyon.

Idinusay mo na daw an saimong sadiri ki Jehova paagi sa pamibi, na nangangakong siya sana an sasambahon mo asin na an paggibo kan saiyang kabutan an magigin pinakaimportante sa buhay mo?

Kumbinsido ka na daw talaga na dapat ka nang magpabawtismo sa pinakamadaling panahon?

Ano an angay na isulot sa bawtismo? (1 Tim. 2:9, 10; Juan 15:19; Fil. 1:10)

Dapat na an satong pagbado “may kabinian asin tultol na isip” tanganing maipahiling niyato an satong “debosyon sa Diyos.” Kaya an mga mapabawtismo dai masulot nin mapang-akit na badong pambasâ o pangkarigos, o bado na may mga surat, islogan, o ritrato. An saindang bado dapat na maayos, malinig, asin angay sa okasyon.

Paano dapat gumawi an saro sa panahon kan saiyang bawtismo? (Luc. 3:21, 22)

An bawtismo ni Jesus nagseserbing halimbawa para sa bawtismo nin mga Kristiyano sa ngunyan. Nasabutan niya na seryosong bagay an pagpabawtismo, asin nahiling ini sa saiyang sabuot asin paghiro. Kaya an lugar kan bawtismo bakong lugar para sa surubahan, pagkawat, paglangoy, o iba pang paggawi na makakabawas sa pagigin seryoso kan okasyon; asin dai man magawi an bagong mabawtismuhan na garo baga nanggana siya sa kontest. Dawa ngani an bawtismo sarong maugmang okasyon, an kaugmahan na iyan dapat na ipahayag nin may dignidad.

Paano makakatabang sa saimo an regular na pag-atender asin pakikiiba-iba sa kongregasyon para mautob mo an saimong pagdusay ki Jehova?

Dawa bawtisado ka na, taano ta mahalagang marhay na ipagpadagos mo an iskedyul nin personal na pag-adal asin regular na pagpartisipar sa ministeryo?