Magin Onesto sa Gabos na Bagay

Gusto ta gabos nin onestong amigo. Gusto man ni Jehova na onesto an mga amigo niya. Pero bako iyan pasil ta kadakul nin bakong onesto sa kinaban na ini. Ano an mga pakinabang kun magigin onesto kita sa gabos na bagay?

1. Ano an pinakaimportanteng dahilan kaya gusto tang magin onesto?

Pag onesto kita, ipinapahiling ta ki Jehova na namumutan asin iginagalang ta siya. Pag-isipan ini: Aram ni Jehova an gabos niyatong iniisip asin ginigibo. (Hebreo 4:13) Nahihiling niya pag pinipili tang magin onesto asin nauugma siya kaiyan. Sinasabi kan Bibliya: “Ikinakabaldi ni Jehova an tawong tuso, pero dayupot Siyang nakikipag-amigo sa mga matanos.”—Talinhaga 3:32.

2. Sa satong aroaldaw na pamumuhay, ano an pirang paagi na maipapahiling tang onesto kita?

Gusto ni Jehova na “magtaram [kita] nin katotoohan sa lambang saro.” (Zacarias 8:16, 17) Ano an buot sabihon kaiyan? Pag nakikipag-ulay kita sa satong mga kapamilya, katrabaho, kapagtubod, o sa mga opisyal nin gobyerno, dai kita nagpuputik o nagtatao nin mapandayang impormasyon. An mga tawong onesto dai naghahabon o nandadaya. (Basahon an Talinhaga 24:28 asin Efeso 4:28.) Binabayadan ninda an gabos na buhis na kaipuhan nindang bayadan. (Roma 13:5-7) Sa mga arog kaiyan na paagi asin iba pa, ‘naggagawi kita nin may pagkaonesto sa gabos na bagay.’—Hebreo 13:18, nota sa ibaba.

3. Ano an mga pakinabang kun onesto kita?

Kun bistado kita na onestong tawo, pagtitiwalaan kita kan iba. Nakakatabang kita na magin pamugtak an buot kan lambang saro sa kongregasyon asin mamamati ninda na garo kita mga kapamilya na padangat an kada saro. Nagkakaigwa kita nin malinig na konsiyensiya. Saka pag onesto kita, ‘nasasamnuhan ta an katukduan kan satuyang Paraligtas, an Diyos,’ asin puwede iyan makapahiro sa iba na paglingkudan man si Jehova.—Tito 2:10.

ARAMON PA

4. Nauugma si Jehova pag onesto kita

Basahon an Salmo 44:21 asin Malakias 3:16, dangan pag-ulayan an mga hapot na ini:

• Sa hiling mo, taano ta kamangmangan na isipon na maitatago ta an katotoohan?

• Ano sa hiling mo an mamamati ni Jehova kun pipilion tang sabihon an katotoohan dawa sa mga pagkakataon na masakit iyan gibuhon?

5. Magin onesto sa gabos na panahon

VIDEO: Ano an mga Nagtatao nin Tunay na Kaugmahan?—Malinig na Konsiyensiya (2:32)

Basahon an Hebreo 13:18, dangan pag-ulayan kun paano kita magigin onesto . . .

• sa satong pamilya.

• sa trabaho o sa eskuwelahan.

• sa iba pang mga sitwasyon.

6. Makikinabang kita kun onesto kita

Tibaad magkaproblema kita dahil sa pagigin onesto. Pero mahihiling mo na iyan an pirming pinakamarahay na gibuhon. Basahon an Salmo 34:12-16, dangan pag-ulayan an hapot na ini:

• Ano an pakinabang nin pagigin onesto?

1. Pag onesto an mag-agom sa lambang saro, magigin mas makusog an saindang relasyon

2. Pag onesto an sarong trabahador, pagtitiwalaan siya kan saiyang amo

3. Pag onesto an sarong siyudadano, magkakaigwa siya nin marahay na reputasyon sa mga opisyal nin gobyerno

SUMARYO

Gusto ni Jehova na magin onesto an mga amigo niya sa gabos nindang sinasabi asin ginigibo.

Rebyu

• Ano an pirang paagi na maipapahiling ta na onesto kita?

• Taano ta kamangmangan na isipon na maitatago ta an katotoohan?

• Taano ta gusto mong magin onesto sa gabos na panahon?

HILINGON MAN

Paano matutukduan kan mga magurang an saindang aki na magin onesto?

Magsabi nin Totoo (1:44)

Ano an mga pakinabang kun inuutob ta an satong mga pangako?

Utubon an Saimong mga Pangako, Mag-ako nin mga Bendisyon (9:09)

Aramon kun taano ta kaipuhan tang magbayad nin buhis dawa nagagamit iyan sa salang paagi.

“Dapat Ka Bang Magbayad ng Buwis?” (Ang Bantayan, Setyembre 1, 2011)

Ano an nakapahiro sa sarong mangloloko na magbago asin maghanap nin tultol na trabaho?

“Nanudan Ko na si Jehova Mahihirakon Asin Mapagpatawad” (An Torrengbantayan, Hulyo-Agosto 2015)