Naghahapot an mga Parabasa
Inooyonan daw nin Dios an Poligamiya?
Dai; monogamiya an pamantayan na inestablisar nin Dios sa Eden para sa enot na pag-agoman. Kan huri, idinoon giraray ni Jesu-Cristo an pamantayan na iyan sa mga parasunod nia.—Genesis 2:18-24; Mateo 19:4-6.
Kan mga panahon bago kan mga Kristiano, bako daw na an mga lalaki na siring ki Abraham, Jacob, David, asin Salomon nagkaigwa nin labi sa sarong agom? Iyo, alagad paano daw ilinaladawan kan Biblia an areglong iyan? Ihinahayag kaiyan an dai pagkakaoyon asin iriwal na nangyari sa mga pamilya ni Abraham asin Jacob bilang resulta nin poligamiya. (Genesis 16:1-4; 29:18–30:24) Paghaloyhaloy, iiniba sa Ley nin Dios an direktibang ini para sa lambang hade: “Dai . . . sia maninigong magpadakol nin agom, tanganing an saiyang puso dai sumuhay.” (Deuteronomio 17:15, 17) Binaliwala ni Salomon an direktibang iyan paagi sa pag-agom nin labi sa 700 na babae! Makamomondo, an puso ni Salomon talagang suminuhay nanggad ki Jehova huli sa maraot na impluwensia kan dakol na agom nia. (1 Hade 11:1-4) Malinaw nanggad, negatibo an paglaladawan kan Biblia sa poligamiya.
Pero, tibaad iniisip nin nagkapira kun taano ta itinogot nin Dios an poligamiya sa saiyang banwaan. Isip-isipa: Nangyari na daw sa saindo na dawa ngani kaipuhan nang ribayan an sarong muebles dai nguna nindo ginibo iyan, na tibaad nangangatanosan na bakong praktikal o magigin disareglado na haleon iyan ngonyan? Siempre, an mga dalan asin kaisipan nin Dios mas halangkaw kisa kan sa sato. (Isaias 55:8, 9) Pero, may makukua kitang nagkapirang praktikal na rason kun taano ta itinogot nia an poligamiya sa laog nin sarong panahon.
Girumdomon na sa Eden, ipinanuga ni Jehova an sarong “banhi” na sa katapustapusi iyo an malaglag ki Satanas. Paghaloyhaloy, sinabihan si Abraham na sia magigin ama nin dakulang nasyon asin na an ihinulang Banhi magikan sa saiyang lahi. (Genesis 3:15; 22:18) Determinado si Satanas na olangon an pag-abot kan Banhing iyan. Huli kaini, determinado siang laglagon an suanoy na nasyon na iyan nin Israel. Parate niang sinusugotan an Israel tanganing magkasala, asin huli kaiyan mawara kan nasyon an pabor asin proteksion nin Dios.
Tanganing labanan an mga pag-atake, paorootrong sinugo ni Jehova an saiyang mga propeta tanganing patanidan an banwaan nia kun sinda minarayo na sa matanos na mga pamantayan. Minsan siring, aram nia antes pa na sa parate dai makukuyog kan saiyang banwaan dawa an pinakasimple sa mga pagboot, arog kan pagboot tumang sa idolatriya. (Exodo 32:9) Kun masasakitan sindang kuyogon an sarong simplehon na ley, paano ninda kukuyogon an ley tumang sa poligamiya? Huli sa sangkap na pakasabot ni Jehova sa naturalesa nin tawo, naheling nia na bako pa idtong panahon na ipagbawal an poligamiya, na haloy nang naestablisar kan mga panahon na idto. Kun iyan ipinagbawal na nia kaidto, madalion kutana para ki Satanas na sugotan an Israel tanganing magkasala.
An temporaryong pagtogot nin Dios sa poligamiya igwa nin iba pang pakinabang. Nakatabang iyan sa marikas na pagdakula kan nasyon. An mas dakulang populasyon nakatabang na siertohon na magdanay an nasyon sagkod sa panahon kan Mesiyas. An poligamiya nakapagtao man nin proteksion minsan paano sa nagkapirang babae, na nagtao sa sainda nin istaran asin pamilya sa delikadong mga panahon.
Pero, girumdomon na bako si Jehova an nag-establisar kan poligamiya. Itinogot nia iyan sa laog nin limitadong panahon, mantang estriktong kinokontrol iyan tanganing malikayan an mga pag-abuso. (Exodo 21:10, 11; Deuteronomio 21:15-17) Kan magdesisyon si Jehova na taposon an paggibo nin poligamiya kan mga nagsasamba sa saiya, ginamit nia an saiya mismong Aki tanganing idoon liwat an pamantayan sa pag-agoman na naestablisar sa Eden. Sa siring, ipinagbawal ni Jesus sa saiyang mga parasunod an poligamiya. (Marcos 10:8) Dangan, nagin mas malinaw pa ngani an katotoohan na ini: An Ley ni Moises marahay kan panahon na idto, alagad orog pa nganing marahay “an ley kan Cristo.”—Galacia 6:2.