Takot Ako Kaidto sa Kagadanan—Hinahalat Ko Ngonyan an ‘Abundang Buhay’

Isinaysay ni Piero Gatti

SARONG maluyang ragubrob an luway-luway asin orog na nagkokosog. Sinundan iyan kan pagtanog nin mga sirenang nagpapatanid sa mga tawo na magtago. Dangan suminunod an lagabong nin mga bomba asin pagkagaba saka an hugong na nakakabungog sa mga tawong grabe an pagkatakot.

Iyan an Milan, Italia, kan 1943/1944. Bilang hoben na soldados na nakapuesto duman, parate akong pinagbobotan na tiponon an mga bangkay na natambonan nin binombang mga pahiplian sa pag-atake kan mga eroplanong panggiera kun saen nalaom an mga tawo, an saindang mga hawak nagkapiridaso asin dai na mamidbid. Asin bako sanang kagadanan nin iba an naheling ko nin harani. Kun beses ako mismo an dikit pang magadan. Sa mga pangyayaring idto namibi ako, na nanunuga sa Dios na kun makaligtas ako sa lagdoan na mga paggadan, gigibohon ko an saiyang kabotan.

Paghale sa Sakong Takot sa Kagadanan

Nagdakula ako sa sarong baryo na mga 10 kilometros hale sa Como, Italia, harani sa linderos kan Switzerland. Sa amay na edad, napaatubang ako sa kamondoan asin pagkatakot sa kagadanan. An duwa sa mga tugang kong babae nagadan sa trangkaso Española. Dangan kan 1930, kan ako sais anyos pa sana, nagadan an sakong ina, si Luigia. Mantang nagdadakulang Katoliko, kinukuyog ko an mga susundon sa relihion na iyan asin nag-aatender ako sa Misa serosemana. Alagad pirang taon pa an nag-agi kan an pagkatakot ko sa kagadanan nahale sa sarong barberya, bako sa simbahan.

Kan 1944, kadakol an nagagadan sa Guerra Mundial II. Saro ako sa manampulong ribong soldados na Italiano na nagdulag sa lugar nin giera pasiring sa neutral na Switzerland. Pag-abot duman, dinara kami sa nagkapirang kampo nin mga dulag. Dinara ako sa kampo na harani sa Steinach, sa amihanan-sirangan kan nasyon. Tinawan kami duman nin dikit na katalingkasan. An barbero sa Steinach nangaipo nin temporaryong katabang sa saiyang barberya. Nag-istar asin nagtrabaho ako sa saiya nin saro sanang bulan, alagad igo na iyan tanganing magkaigwa ako nin kamidbid na buminago kan sakong buhay.

Saro sa mga parokyano kan barberong iyan si Adolfo Tellini, sarong Italianong nag-iistar sa Switzerland. Sia saro sa Mga Saksi ni Jehova. Dai ko pa noarin man nadangog an grupong ini, na bako man makangangalas huling kan panahon na idto mayo pang 150 an mga Saksi sa bilog na Italia. Sinabi sa sako ni Adolfo an makangangalas na mga katotoohan sa Biblia, an mga panuga manongod sa katoninongan asin ‘abundang buhay.’ (Juan 10:10, NW; Kap. 21:3, 4) Naakit ako kan mensahe na sa maabot na panahon mayo nang giera asin kagadanan. Pagbalik sa kampo nin mga dulag, sinabi ko an paglaom na ini sa saro pang hoben na Italiano, si Giuseppe Tubini, asin sia napahanga man. Sinosongko kami paminsanminsan ni Adolfo asin kan iba pang mga Saksi.

Iiniba ako ni Adolfo sa Arbon, mga 10 kilometros hale sa Steinach, kun saen nagsasagibo nin mga pagtiripon sa Italiano an sadit na grupo nin mga Saksi. Entusiastiko akong marhay dapit sa sakong nadangog kaya kan suminunod na semana nagbaklay ako pasiring duman. Paghaloyhaloy, nag-atender ako sa asamblea kan mga Saksi sa sarong convention hall sa Zurich. Nabigla ako partikularmente sa sarong slide show dapit sa mga kampo sa pagpoho, na ipinapaheling an nakatambak na mga bangkay. Naaraman kong dakol na Saksing Aleman an ginadan na martir huli sa saindang pagtubod. Sa asambleang idto, nakamidbid ko si Maria Pizzato. Huli sa saiyang mga aktibidad bilang Saksi, sia ibinilanggo nin 11 taon kan mga autoridad na Fascistang Italiano.

Pagkatapos kan giera, buminalik ako sa Italia asin nakiiba sa sadit na kongregasyon sa Como. Dai ako nagkaigwa nin sistematikong pag-adal sa Biblia, alagad malinaw sa isip ko an pundamental na mga katotoohan. Kaiba man sa kongregasyon na idto si Maria Pizzato. Ipinakipag-olay nia sa sako na kaipuhan akong mabautismohan bilang Kristiano asin dinagka nia ako na magduman ki Marcello Martinelli, na nakaistar sa Castione Andevenno, sa probinsia nin Sondrio. Maimbod na linahidan na tugang si Marcello na ibinilanggo nin 11 taon kan diktatoryal na rehimen. Kinaipuhan kong magbisikleta nin 80 kilometros tanganing madumanan sia.

Ginamit ni Marcello an Biblia tanganing ipaliwanag an mga kahagadan para sa bautismo, na pagkatapos kaiyan namibi kami asin nagpasiring sa salog nin Adda, na duman ako binautismohan. Setyembre 1946 kaidto. Espesyal nanggad na aldaw idto! Naogma akong marhay sa sakong desisyon na maglingkod ki Jehova asin na igwa na ako nin masarig na paglaom sa puturo; kaya pagkabanggi dai ko narealisar na nakapagbisikleta na palan ako nin 160 kilometros kan aldaw na idto!

Kan Mayo 1947, ginibo sa Milan an enot na asamblea sa Italia pagkatapos kan giera. Mga 700 an nag-atender, kaiba an dakol na uminagi nin pagpersegir kan Fascistang gobyerno. May pambihirang nangyari sa asambleang ini. Si Giuseppe Tubini, na pinatotoohan ko sa kampo nin mga dulag, an nagtao kan pahayag sa bautismo—na pagkatapos kaiyan sia mismo binautismohan!

Sa asambleang idto, nagkapribilehio akong makaolay si Tugang na Nathan Knorr, hale sa Bethel sa Brooklyn. Dinagka nia kami ni Giuseppe na gamiton an buhay mi sa paglilingkod sa Dios. Nagdesisyon ako na sa laog nin sarong bulan poponan ko na an bilog na panahon na paglilingkod. Pag-abot sa harong, sinabi ko sa mga kapamilya ko an desisyon ko, asin sinda gabos nagprobar na desganaron ako. Pero, determinado ako. Kaya pakalihis nin sarong bulan, nagpoon ako sa paglilingkod sa Bethel sa Milan. Apat na misyonero an naglilingkod duman: si Giuseppe (Joseph) Romano asin an saiyang agom, si Angelina; si Carlo Benanti asin an saiyang agom, si Costanza. An ikalimang miembro kan pamilya iyo si Giuseppe Tubini, na bago pa sanang kaiba ninda, asin ako an ikaanom.

Pakalihis nin sarong bulan sa Bethel, ninombrahan ako bilang an enot na tubong Italia na paraataman nin sirkito sa nasyon na iyan. Naglilingkod na bilang nagbibiaheng paraataman si Tugang na George Fredianelli, an enot na misyonero sa Italia na hale sa Estados Unidos kan 1946. Sinanay nia ako nin pira sanang semana, dangan pinonan ko na nin solo an nakakaogmang gibohon na ini. Partikularmente kong nagigirumdoman an enot na kongregasyon na dinalaw ko—an Faenza. Isip-isipa nanggad! Sagkod sa panahon na idto dai pa lamang ako nakapagpahayag sa kongregasyon! Dawa siring, dinagka ko an mga nag-atender, kaiba an dakol na hoben, na pag-isipan an paglaog sa bilog na panahon na ministeryo. Paghaloyhaloy, an nagkapira sa mga hoben na idto nag-ako nin mga asignasyon na may dakulang paninimbagan sa langtad nin Italia.

Pinonan ko an nakakaogmang buhay bilang nagbibiaheng paraataman. Iyan pano nin sorpresa, pagliliwat, kadepisilan, asin kagayagayahan, saka namatean ko dian an dakulang kapadangatan kan sakong namomotan na mga tugang.

An Kamugtakan nin mga Relihion sa Italia Pagkatapos kan Giera

Togotan nindo akong mag-estorya dapit sa kamugtakan nin mga relihion kaidto sa Italia. Nangibabaw an Iglesia Katolika. Dawa ngani may bago nang konstitusyon kan 1948, kaidto sanang 1956 nahale an Fascistang mga ley na nag-oolang sa talingkas na paghuhulit kan mga Saksi. Huli sa panggigipit kan klero, parateng naaabala an mga pansirkitong asamblea. Alagad kun beses biyong nasusudya an paghihingoa kan klero, arog kan nangyari kan 1948 sa Sulmona, sadit na banwaan sa tahaw na parte nin Italia.

An asamblea ginibo sa sarong teatro. Kan Domingong aga, ako an tsirman, asin si Giuseppe Romano an nagtao kan pampublikong pahayag. Kadakol na kan nag-aatender kan panahon na idto. Sa panahon na mayo nganing 500 an parahayag sa bilog na nasyon, napano an teatro nin 2,000 katawo. Sa katapusan kan diskurso, sarong soltero an luminukso pasakat sa entablado, sa instruksion nin duwang padi na yaon duman. Sa intension na magparibok, sia nagkurahaw nin makosogon. Tolos-tolos ko siang sinabihan, “Kun may sasabihon ka, mag-arkila ka nin tiriponan, asin duman mo sabihon an ano man na gusto mo.” An mga nag-atender dai napahanga sa saiya, asin an saiyang boses nadaog nin mga kapahayagan nin pagdesaprobar. Huli kaini, an soltero tuminagbang sa entablado asin nawara na sana.

Kan mga panahon na idto, masakit nanggad an pagbiahe. Kun minsan naglalakaw ako pasiring sa sunod na kongregasyon, nagbibisikleta, naglulunad sa rogado asin surusoan na bus o nagtetren. May beses na an sakong dagosan sarong kuadra o kamalig nin mga kasangkapan. Katatapos pa sana kan giera, asin pobre an kadaklan na Italiano. Pipira sana an tugang, asin tikapo sinda. Pero marahayon man giraray an buhay sa paglilingkod ki Jehova.

Pagsasanay sa Gilead

Kan 1950, inimbitaran kami ni Giuseppe Tubini na umatender sa ika-16 na klase kan paadalan sa pagmimisyonero sa Gilead. Sa kapinonan pa sana, narealisar ko na madedepisilan akong makanood nin Ingles. Ginibo ko an sakong pinakamakakaya, alagad talagang depisil iyan. Kaipuhan ming basahon an bilog na Biblia sa Ingles. Tanganing magibo ini, dai ako nangungudto kun minsan tanganing mag-ensayo sa pagbasa nin makosog. Uminabot an panahon, ako na an matao nin pahayag. Nagigirumdoman ko an komento kan instruktor na garo baga iyan kasuhapon pa sana, “Marahayon an saimong mustra asin entusiasmo, alagad dai nanggad masabotan an saimong Ingles!” Sa ibong kaini, mapanggana kong natapos an kurso. Pagkatapos kaiyan, iinasignar giraray kami ni Giuseppe sa Italia. Huli sa dugang na pagsasanay, pareho na kaming mas may kakayahan na maglingkod sa mga tugang.

Kan 1955, pinakasalan ko si Lidia, na kan bautismohan pitong taon na an nakaagi, ako an nagtao kan pahayag para dian. An saiyang ama, si Domenico, sarong namomotan na tugang na natabangan an gabos na pito niang aki na akoon an katotoohan, sa ibong kan pagpersegir sa saiya kan Fascistang rehimen asin pagkadistiero nin tolong taon. Si Lidia nakipaglaban man na marhay para sa katotoohan. Inatubang nia an tolong kaso sa korte bago narekonoser sa kahurihurihi an samong legal na deretso na magharongharong. Kan anom na taon na kaming kasal, namundag si Beniamino, an matua ming aki. Kan 1972 nagkaaki pa kami nin saro, si Marco. Naoogma akong marhay na sinda saka an saindang pamilya maigot na naglilingkod ki Jehova.

Pagdadanay na Aktibo sa Paglilingkod ki Jehova

Durante kan maogmang buhay na naglilingkod sa iba, nagkaigwa ako nin dakol na eksperyensia na dai malilingawan. Halimbawa, sa kapinonan kan dekada nin 1980, sinuratan kan sakong panugangan na lalaki an presidente kaidto nin Italia, si Sandro Pertini. Durante kan Fascistang diktadura, pareho sindang idinistiero sa isla nin Ventotene, na duman dinara an mga hinohonang kaiwal kan rehimen. Nakiolay an sakong panugangan na mainterbio an presidente tanganing makapagpatotoo sa saiya. Kan tinogotan sia, inibanan ko sia, asin maogma kaming inako—sarong bagay na dai nanggad kami tuod. Maogmang tinaratara asin kinugos kan presidente an sakong panugangan. Dangan ipinakipag-olay mi an dapit sa samong pagtubod asin tinawan sia nin nagkapirang literatura.

Kan 1991, pakalihis nin 44 taon bilang nagbibiaheng paraataman, nagpondo na ako sa gibohon sa sirkito, pagkatapos na madalaw an mga kongregasyon sa bilog na Italia. Sa suminunod na apat na taon, naglingkod ako bilang paraataman kan Assembly Hall sagkod na kinaipuhan kong pagianon an sakong aktibidad huli sa grabeng helang. Minsan siring, salamat sa dai na kutana maninigong kabootan ni Jehova, nasa bilog na panahon na paglilingkod pa man giraray ako. Ginigibo ko an sakong pinakamakakaya na maghulit asin magtokdo kan maogmang bareta, asin nagkokondukta ako sa presente nin nagkapirang pag-adal sa Biblia. Sinasabi pa man giraray kan mga tugang na igwa ako nin mapuersang entusiasmo kun ako nagtatao nin mga pahayag. Nagpapasalamat ako ki Jehova na dai naiinaan an sakong bagsik huli sa paggurang.

Kan ako hoben pa, biyo akong nadaog kan pagkatakot sa kagadanan, alagad an pakakua nin tamang kaaraman sa Biblia nagtao sa sako nin siertong paglaom na buhay na daing katapusan—an ‘abundang’ buhay, siring kan apod dian ni Jesus. (Juan 10:10, NW) Iyan an inaantisipar ko ngonyan—an buhay na pano nin katoninongan, katiwasayan, asin kaogmahan, na may abundang bendisyon hale ki Jehova. Logod na an gabos na onra mapasa satong mamomoton na Kaglalang, na nagkapribilehio kitang darahon an saiyang ngaran.—Sal. 83:18.

[Mapa sa pahina 22, 23]

(Para sa aktuwal na format, hilingon an publikasyon)

SWITZERLAND

BERN

Zurich

Arbon

Steinach

ITALIA

ROMA

Como

Milan

Salog nin Adda

Castione Andevenno

Faenza

Sulmona

Ventotene

[Ritrato sa pahina 22]

Pasiring sa Gilead

[Ritrato sa pahina 22]

Kaiba si Giuseppe sa Gilead

[Ritrato sa pahina 23]

Kan aldaw kan samong kasal

[Ritrato sa pahina 23]

An sakong namomotan na agom kaibaiba ko nin labi nang 55 taon