Nakanuod Akong Irespeto an mga Babayi Saka an Sadiri Ko

AN BUHAY KO KAIDTO:

Namundag ako sa Mulhouse, amihanan-sirangan kan France, sa sarong tios na lugar na bantog sa kadahasan. Kan aki pa ako, nahihiling ko pirmi an madahas na iriwal nin mga pamilya sa samong lugar. Sa pamilya mi, hababa an paghiling sa mga babayi asin bihira sindang hagadan nin opinyon. Nagdakula ako na iniisip na pangkusina sana sinda asin tagaasikaso sa mga lalaki saka mga aki.

Bakong magayon an mga nangyari sa sako kan aki pa ako. Kan 10 anyos ako, nagadan an sakong ama huli sa pagigin alkoholiko. Pakalihis nin limang taon, naghugot an saro sa mga kuya ko. Kan taon man sanang iyan, nakahiling ako nin paggadan huli sa iriwal nin pamilya, asin ikinabigla ko idtong marhay. Tinukduan ako kan mga kapamilya ko kun paano maggamit nin kutsilyo asin badil saka makipaglaban kun kaipuhan. Nagpa-tattoo ako asin nagin parainom.

Kan 16 anyos na ako, mga 10 sagkod 15 bote nin beer an nauubos ko kada aldaw, tapos dai nahaloy nagdodroga na man ako. Para may pangsustento sa bisyo ko, nagpapabakal ako nin mga lansang o batbat, na an nagkapira hinabunan ko. Puon kan 17 anyos ako, nanamitan ko na an mapreso. Kun susumahon, 18 beses akong nasentensiyahan dahil sa paghabon asin pagigin madahas.

Lalo akong nagpangana kan mag-20 anyos na ako. Sagkod sa 20 istik nin marijuana an nauubos ko kada aldaw, naghe-heroin man ako, asin naggagamit nin iba pang ilegal na droga. Haros pirang beses akong dikit-dikitan nang magadan sa overdose. Dangan, nagin drug pusher ako, kaya pirmi akong may kutsilyo saka badil. Sarong beses ngani, nambadil ako nin sarong lalaki, marahay na sana ta tuminama iyan sa buckle kan paha niya kaya tuminalsik sana! Kan 24 anyos ako, nagadan an sakong ina, kaya mas lalo pa akong nagin arangguton. Pag nasasabatan ngani ako kan mga tawo, minabalyo tulos sinda nin tinampo huli sa takot. Haros Sabado-Domingo akong nasa presinto o ospital ta tinatahi an mga lugad na nakua ko sa pakikiiwal.

Kan ako 28 anyos na, nag-agom ako. Arog kan inaasahan nindo, dai ko trinato an agom ko na may paggalang. Iniinsulto asin kinukulgan ko siya. Mayo kaming ginibong ano man na bagay na magkaibanan. Para sako, tama nang pigpaparatawanan ko siya nin hinabunan na mga alahas. Dangan, nangyari an dai inaasahan. Nagpuon na makipag-adal nin Bibliya an sakong agom sa mga Saksi ni Jehova. Sa inot pa sana niyang pag-adal, ipinundo na niya an pagsigarilyo, sinasayumahan an hinabunan na kuwartang itinatao ko, asin ibinaralik sako su mga alahas. Angguton akong marhay. Kinontra ko an pag-adal niya nin Bibliya asin binubugahan ko siya nin aso kan sigarilyo sa lalawgon. Ipinapasupog ko man siya sa lugar mi.

Sarong banggi, nasulo ko an apartment mi huli sa kaburatan ko. Ilinigtas ako kan sakong agom pati an 5 anyos ming aki. Kan maulian na ako, nakonsiyensiya akong marhay. Pagmati ko dai na ako mapapatawad nin Diyos. Natatandaan kong sinabi nin sarong padi na mapapaduman sa impiyerno an mga maraot. Pati ngani psychiatrist na kinonsultahan ko nagsabi: “Suko na ‘ko saimo! Imposible nang magbago ka pa.”

KUN PAANO BINAGO KAN BIBLIYA AN BUHAY KO:

Pagkatapos kan insidenteng idto, nakiistar kami sa mga panugangan ko. Pagbisita kan mga Saksi sa agom ko, hinapot ko sinda, “Mapapatawad pa daw ako nin Diyos maski grabe an mga kasalan ko?” Ipinahiling ninda sako sa Bibliya an 1 Corinto 6:9-11. Sinaro-saro diyan an mga paggawi na kinokondenar nin Diyos, pero nagsabi man iyan: “Siring an nagkapira sa saindo.” Sinigurado kaiyan sa sako na puwede pa akong magbago. Pagkatapos, siniyerto sako kan mga Saksi na padangat ako nin Diyos. Ipinahiling ninda sako an 1 Juan 4:8. Huli kaiyan, pinakiulayan ko sinda na duwang beses ninda akong tukduan sa Bibliya, asin nagpuon na man akong mag-atender nin Kristiyanong mga pagtiripon. Nagparapamibi ako ki Jehova.

Sa laog nin sarong bulan, nagdesisyon akong punduhon na an pagdroga asin pagburat. Dahil diyan namati kong garo may naglalaban sa laog kan lawas ko! Binabangungot ako, makulog pirmi an payo, kinakalambre, asin kun ano-ano pang namamati huli sa pagpundo sa bisyo. Pero kasabay kaiyan, namamatian ko man na garo ako kinakaputan ni Jehova asin pinapakusog ako. Namatian ko an namatian ni apostol Pablo. Nagsurat si Pablo dapit sa tabang na itinao nin Diyos: ‘Ako makakagibo kan gabos na bagay diyan sa saiya na nagpapakusog sako.’ (Filipos 4:13) Dai nahaloy, napundo ko na pati an pagsigarilyo.—2 Corinto 7:1.

Nakatabang sako an Bibliya bako sana sa pagkontrol kan buhay ko, kundi pati sa kun paano magigin maugma an samong pamilya. Nabago an pagtrato ko sa sakong agom. Mas irinespeto ko na siya asin nagsasabi na ako nin “tabi” saka “salamat.” Nagin tunay na ama na man ako sa samong aking babayi. Pagkatapos nin sarong taon na pag-adal sa Bibliya, idinusay ko an sakong buhay ki Jehova asin nagpabawtismo, arog kan agom ko.

KUN PAANO AKO NAKINABANG:

Masasabi ko na talagang ilinigtas kan mga prinsipyo sa Bibliya an buhay ko. Maski an mga kapamilya kong bakong Saksi nagsasabi na puwedeng gadan na gayod ako ngunyan huli sa pagdroga o pakikipag-iwal.

Biyong binago kan mga katukduan sa Bibliya an pamilya mi. Nanudan ko diyan an sakong mga paninimbagan bilang agom asin ama. (Efeso 5:25; 6:4) Dakul na kaming ginigibo na magkairibanan bilang pamilya. Ngunyan, maugma ko siyang sinusuportaran sa pagigin bilog na panahon na ebanghelisador niya. Bako na siyang pangkusina sana. Maugma man niya akong sinusuportaran sa pagigin elder ko sa kongregasyon.

Napahiro talaga an buot ko kan pagkamuot asin pagkahirak sako kan Diyos na Jehova. Gustong-gusto kong ipakipag-ulay an magagayon niyang kuwalidad sa mga tawong ibinibilang na mayo nang pag-asa, huli ta arog man kaiyan an paghiling sa sako kaidto. Naniniwala ako na may puwersa an Bibliya na tabangan an siisay man na magkaigwa nin malinig asin makahulugan na buhay. Itinukdo sako kan Bibliya na kamutan asin irespeto an iba, lalaki asin babayi, pati na an sadiri ko.