Kun Ano an Sinasabi kan mga Tawo Manungod sa Pagpamibi
“Pag nangangadyi ako, pagmati ko yaon sa kataid ko an Diyos, na kinakaputan an kamot ko asin inaantabayanan ako pag dai ko na aram an gigibuhon ko.”—MARIA.
“Nagadan an agom ko pagkatapos nin 13 taon na pakikipaglaban niya sa kanser. Aroaldaw ako kaidtong namimibi sa Diyos asin aram ko na talagang nasasabutan niya an kulog na namamatian ko. Kaya, nakakamati ako nin katrangkiluhan.”—RAUL.
“An pamibi sarong magayon na regalo nin Diyos sa mga tawo.”—ARNE.
Para ki Maria, Raul, Arne, asin sa dakul na iba pa, an pamibi o pangadyi sarong espesyal na regalo. Sabi ninda, paagi sa pamibi puwede sindang makipag-ulay sa Diyos, magpasalamat saiya, asin maghagad nin tabang. Lubos sindang kumbinsido na totoo an sinasabi kan Bibliya manungod sa pamimibi sa Diyos: “May kumpiyansa kita sa saiya na ano man na hagadon ta kauyon kan saiyang kabutan, dinadangog niya kita.”—1 Juan 5:14.
Sa ibong kaiyan, dakul na tawo an dai kumbinsido sa sinasabi kan Bibliya manungod sa pamibi. Si Steve nagsabi kan sabuot niya manungod sa pamimibi: “Kan mag-17 anyos ako, tulong amigo ko an nagadan sa duwang magkasuway na aksidente. An saro nagadan sa aksidente sa awto, asin an duwa nalamos sa dagat.” Ano an ginibo ni Steve? “Namibi ako sa Diyos para sa simbag kun ta’no ta nangyayari an gabos na ini, pero mayo akong nakuang simbag. Kaya sabi ko, ‘Ta’no pa ta mamimibi?’” Dahil garo baga dai sinisimbag an saindang mga pamibi iniisip kan dakul kun ta’no ta kaipuhan pang mamibi.
Pigkukuwestiyon man kan mga tawo an halaga kan pamibi huli sa iba pang kadahilanan. May mga nagsasabi na huling naaaraman nin Diyos an gabos na bagay, aram na niya an satong mga pangangaipo o satong mga problema, kaya dai ta na kaipuhan pang sabihon saiya an manungod diyan.
Naniniwala an iba na talagang dai dinadangog nin Diyos an saindang mga pamibi huli sa mga salang nagibo ninda kaidto. “An pinakadakulang problema ko,” an sabi ni Jenny, “iyo idtong mamatian ko na dai akong halaga. May mga nagibo ako kaidto na pinagbasulan ko, kaya sabi ko sa sadiri ko bako akong angay para dangugon nin Diyos.”
Ano man an sabuot mo manungod sa pamimibi? Kun igwa ka man nin arog kaiyan na mga ikinakahadit o pagduda manungod sa pamibi, mararanga ka kan katotoohan na an Bibliya nagtatao nin nakakakontentong mga simbag. Makakapagtiwala kita sa sinasabi kan Bibliya manungod sa pamibi;a matatabangan kita kaiyan na mahanap an simbag sa mga hapot na arog kan:
Dinadangog daw talaga nin Diyos an satong mga pamibi?
Taano ta may mga pamibi na dai sinisimbag?
Paano ka mamimibi tanganing dangugon iyan nin Diyos?
Paano ka matatabangan kan mga pamibi?
a Mababasa sa Bibliya an mga pamibi kan dakul na lingkod nin Diyos, kaiba na idtong ki Jesu-Cristo. An Hebreong Kasuratan, na midbid sa apod na Lumang Tipan, igwa nin labing 150 pamibi.