Puwede Kitang Mabuhay Sagkod Lamang

1. Ano an epekto sa sato kan paghurop-hurop sa panuga ni Jehova na buhay na daing katapusan?

NANUNUGA si Jehova na an mga nagsusunod sa saiya magkakamit nin “buhay na daing katapusan.” (Roma 6:23) Pag hinuhurop-hurop ta an manungod sa iinaalok sa sato ni Jehova, siguradong mas magigin makusog an pagkamuot ta sa saiya. Pag-isipan ini: Namumutan kitang marhay kan satong Ama sa langit kaya dai kita nuarin man mapapasuway sa saiya.

2. Paano nakakatabang sa sato an panuga na buhay na daing katapusan?

² An panuga nin Diyos na buhay na daing katapusan nakakatabang sa sato na tagalan an mga pagbalo sa sato ngunyan. Dawa pa patakuton kita kan satong mga kaiwal na gagadanon kita, dai kita makikipagkompromiso. Taano? An sarong dahilan iyo na aram niyato na kun magadan kitang maimbod ki Jehova, bubuhayon niya kita hali sa mga gadan na may paglaom na dai na nuarin man magagadan. (Juan 5:28, 29; 1 Cor. 15:55-58; Heb. 2:15) Taano ta makakasigurado kita na posible para sa sato na mabuhay sagkod lamang? Pag-isipan an minasunod na mga dahilan.

SI JEHOVA NABUBUHAY SAGKOD LAMANG

3. Taano ta makakasigurado kita na kaya ni Jehova na papagdanayon kitang buhay sagkod lamang? (Salmo 102:12, 24, 27)

³ Aram niyato na kaya ni Jehova na papagdanayon kitang buhay sagkod lamang huling siya an Burabod nin buhay asin nabubuhay siya sagkod lamang. (Sal. 36:9) Mangnuhon an pira sanang teksto sa Bibliya na nagpapatunay na si Jehova dati nang nag-eeksister asin pirming mag-eeksister. Sinasabi sa Salmo 90:2 na si Jehova “puon sa panahon na daing katapusan sagkod sa panahon na daing katapusan.” Nakakaagid man diyan an sinasabi sa Salmo 102. (Basahon an Salmo 102:12, 24, 27.) Asin an propetang si Habakuk nagsurat manungod sa satong Ama sa langit: “Bakong hali ka sa panahon na daing katapusan, O Jehova? O sakuyang Diyos, sakuyang Banal na Diyos, dai ka nagagadan.”—Hab. 1:12.

4. Dapat daw kitang mahadit kun dai ta nasasabutan an ideya na si Jehova dati nang nag-eeksister? Ipaliwanag.

⁴ Nasasakitan ka daw na masabutan an ideya na si Jehova nag-eksister na sa “bilog na panahon na daing sagkod”? (Isa. 40:28) Natural sanang makamati nin arog kaiyan. Sinabi ni Elihu manungod sa Diyos: “An bilang kan saiyang mga taon dai ta kayang sabuton.” (Job 36:26) Pero dai man buot sabihon na mili ta dai ta nasasabutan an sarong bagay bako na iyan totoo. Halimbawa, minsan ngani dai ta lubos na nasasabutan kun paano nagkakaigwa nin liwanag, nangangahulugan daw ini na dai na nag-eeksister an liwanag? Dai! Sa kaagid na paagi, kitang mga tawo tibaad dai ta lubos na masabutan kun paanong si Jehova dati nang nag-eeksister asin pirming mag-eeksister. Pero dai iyan nangangahulugan na an Diyos dai nabubuhay nin daing sagkod. An katotoohan manungod sa Kaglalang dai nakadepende sa kun ano an kaya o dai ta kayang sabuton. (Roma 11:33-36) Asin nag-eksister na siya bago pa nagkaigwa nin uniberso—kaiba na an mga gikanan nin liwanag siring kan saldang. Inaasigurar kita na si Jehova iyo “an Kaggibo kan daga paagi kan saiyang kapangyarihan.” Iyo, nag-eksister na siya bago niya pa ‘iunat an kalangitan.’ (Jer. 51:15; Gibo 17:24) Ano an saro pang dahilan kun taano ta makakasigurado kita na posible para sa sato na mabuhay sagkod lamang?

LINALANG KITA PARA MABUHAY SAGKOD LAMANG

5. Igwa nin anong paglaom an inot na tawong mag-agom?

⁵ An mga bagay na may buhay digdi sa daga linalang ni Jehova na may limitadong lawig nin buhay, apuwera sa mga tawo. Tinawan niya sinda kan pambihirang paglaom na dai nuarin man magadan. Pero, pinatanidan ni Jehova si Adan: “Kun manungod sa kahoy nin pakaaram kan marahay asin maraot, dai ka magkakan kan bunga kaiyan, huling sa aldaw na magkakan ka kan bunga kaiyan siguradong magagadan ka.” (Gen. 2:17) Kun nagsunod si Adan asin Eva ki Jehova, dai kutana sinda nagadan. Tama sanang isipon na pag-abot nin panahon, itutugot kutana ni Jehova na magkakan sinda kan bunga kan “kahoy nin buhay.” Nangangahulugan kutana ini na igwa sinda kan saiyang asigurasyon na ‘mabubuhay sinda sagkod lamang.’b—Gen. 3:22.

6-7. (a) Ano an iba pang nagpaparisa na an mga tawo dai linalang para magadan? (b) Anong mga bagay an gustong-gusto mong gibuhon sa maabot na panahon? (Hilingon an mga ritrato.)

⁶ Interesante na may nagkapirang parasiyasat an nakahiling nin siyentipikong ebidensiya na an satong hutok igwa kan kakayahan na magsaray nin impormasyon na mas dakul nanggad kisa sa kaya tang matipon durante kan satong lawig nin buhay sa presente. Kan 2010 sinabi sa sarong artikulo sa magasin na Scientific American Mind na sigun sa sarong pagkarkulo, an satuyang hutok igwa kan kakayahan na magsaray nin mga 2.5 milyones na gigabyte nin impormasyon, na katumbas nin tulong milyon na oras (labing 300 na taon) nin nakarekord na programa sa TV. An pagkarkulong iyan garo baga hababaon man. Minsan siring, ipinapahiling kaiyan na dinisenyo ni Jehova an satuyang hutok na magsaray nin impormasyon na mas dakul nanggad kisa sa impormasyon na matitipon ta sa laog sana nin 70 o 80 taon.—Sal. 90:10.

⁷ Linalang man kita ni Jehova na igwa nin makusog na pagmawot na padagos na mabuhay. Manungod sa mga tawo, sinasabi kan Bibliya na ibinugtak kan Diyos “sa puso ninda an panahon na daing kasagkudan.” (Ecl. 3:11) Saro iyan sa dahilan kun taano ta ibinibilang tang kaiwal an kagadanan. (1 Cor. 15:26) Kun nagkahilang kita nin malala, basta ta na lang daw inaako iyan asin minasuko na? Dai. Sa parati, nagpapa-check-up kita sa sarong doktor asin tibaad nag-iinom pa ngani kita nin bulong para labanan an hilang. Sa katunayan, ginigibo ta an gabos na posibleng magigibo ta para dai magadan. Asin pag may nagadan na mahal niyato sa buhay, hoben man iyan o gurang, bako daw na nakakamati kita nin grabeng kulog asin kamunduan sa halawig na panahon? (Juan 11:32, 33) Tunay nanggad, dai kita tatawan kan satuyang mamumuton na Kaglalang kan pagmawot asin kakayahan na padagos na mabuhay kun bako niyang katuyuhan para sa mga tawo na padagos na mabuhay. Pero igwa kita nin iba pang nakakakumbinsir na mga dahilan para magtubod na puwede kitang magkaigwa nin daing sagkod na buhay. Pag-ulayan ta an nagkapira sa mga ginibo kaidto ni Jehova asin ginigibo niya ngunyan na nagpapatunay na dai niya binago an saiyang orihinal na katuyuhan.

DAI NAGBAGO AN KATUYUHAN NI JEHOVA

8. Manungod sa katuyuhan ni Jehova para sa sato, anong asigurasyon an makukua ta sa Isaias 55:11?

⁸ Dawa ngani nagkasala si Adan asin Eva asin nagdara nin kagadanan sa saindang mga aki, dai nagbago an isip ni Jehova manungod sa saiyang katuyuhan. (Basahon an Isaias 55:11.) Katuyuhan pa man giraray niya na an maimbod na mga tawo mabuhay sagkod lamang. Sigurado kita diyan huli sa mga bagay na sinabi asin ginibo ni Jehova para mautob an saiyang katuyuhan.

9. Ano an ipinanuga nin Diyos? (Daniel 12:2, 13)

⁹ Nanuga si Jehova na bubuhayon niya an mga gadan asin na tatawan sinda kan oportunidad na mabuhay nin daing katapusan. (Gibo 24:15; Tito 1:1, 2) Sigurado an maimbod na si Job na gustong-gusto ni Jehova na buhayon giraray an mga nagadan. (Job 14:14, 15) Aram ni propeta Daniel na an mga tawo igwa kan paglaom na buhayon liwat asin may oportunidad na mabuhay sagkod lamang. (Sal. 37:29; basahon an Daniel 12:2, 13.) Aram man kan mga Judio kan panahon ni Jesus na matatawan ni Jehova nin “buhay na daing katapusan” an saiyang maimbod na mga lingkod. (Luc. 10:25; 18:18) Pauruutrong nagtaram si Jesus manungod sa panugang iyan, asin siya mismo binuhay liwat kan saiyang Ama.—Mat. 19:29; 22:31, 32; Luc. 18:30; Juan 11:25.

10. Ano an pinapatunayan kan mga pagkabuhay liwat kaidto? (Hilingon an ritrato.)

¹⁰ Si Jehova iyo an Paratao nin Buhay asin igwa siya nin kapangyarihan na buhayon liwat an mga tawo. Tinawan niya nin kapangyarihan an propetang si Elias tanganing buhayon liwat an aking lalaki kan babaying balo na taga Zarefta. (1 Ha. 17:21-23) Pag-abot nin panahon, sa tabang nin Diyos, binuhay liwat ni propeta Eliseo an aking lalaki kan babaying Sunamita. (2 Ha. 4:18-20, 34-37) An mga iyan asin an iba pang pagkabuhay liwat nagpapatunay na si Jehova igwa nin kapangyarihan na buhayon liwat an mga tawo. Kan nasa daga si Jesus, pinatunayan niya na tinawan siya kan saiyang ama kan kapangyarihan na iyan. (Juan 11:23-25, 43, 44) Nasa langit na ngunyan si Jesus asin itinao sa saiya “an gabos na awtoridad sa langit asin sa daga.” Kaya magigibo niyang utubon an panuga na bubuhayon liwat “an gabos na yaon sa mga lulubngan na girumduman” na may paglaom na magdanay na buhay sagkod lamang.—Mat. 28:18; Juan 5:25-29.

11. Paano pinagin posible kan pantubos na mabuhay kita sagkod lamang?

¹¹ Taano ta itinugot ni Jehova na mag-agi nin makulugon na kagadanan an saiyang namumutan na Aki? Sinabi ni Jesus an dahilan: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Paagi sa pagtao kan saiyang Aki bilang pantubos para tahuban an satong mga kasalan, pinagin posible nin Diyos na mag-ako kita nin buhay na daing katapusan. (Mat. 20:28) Ipinaliwanag ni apostol Pablo an mahalagang marhay na kabtang na ini kan katuyuhan nin Diyos kan isurat niya: “Kun paanong an kagadanan nag-abot paagi sa sarong tawo, an pagkabuhay liwat kan mga gadan maabot man paagi sa sarong tawo. Huling kun paanong dahil ki Adan an gabos nagagadan, siring man dahil sa Cristo an gabos bubuhayon.”—1 Cor. 15:21, 22.

12. Paano makakatabang an Kahadian para mangyari an katuyuhan ni Jehova para sa sato?

¹² Itinukdo ni Jesus sa saiyang mga parasunod na ipamibi na dumatong an Kahadian nin Diyos asin na mangyari an kabutan nin Diyos digdi sa daga. (Mat. 6:9, 10) Kabtang kan katuyuhan nin Diyos na an mga tawo mabuhay sagkod lamang digdi sa daga. Para mangyari iyan, ninombrahan ni Jehova an saiyang Aki bilang Hadi kan Mesiyanikong Kahadian. Tinitipon na nin Diyos an 144,000 na mga tawo hali sa daga para makaibanan ni Jesus sa pag-utob kan kabutan nin Diyos.—Kap. 5:9, 10.

13. Ano an ginigibo ngunyan ni Jehova, asin ano an dapat mong gibuhon?

¹³ Tinitipon na ngunyan ni Jehova an “sarong dakulang kadaklan” nin mga tawo asin sinasanay sinda na magin sakop kan saiyang Kahadian. (Kap. 7:9, 10; Sant. 2:8) An mga kabilang sa grupong iyan, dawa ngani nabubuhay sa sarong kinaban na baranga huli sa takot asin giyera, nagmamaigot na mahali an pagkaungis huli sa pagkakalain nin nasyonalidad, tribo, asin pagkakalain bilang indibidwal. Sa simbolikong paagi pinupulpog na ninda ngunyan an saindang mga espada tanganing magin mga tarom nin arado. (Mik. 4:3) Imbes na makikabtang sa mga giyera na minaresulta sa kagadanan nin dakul, tinatabangan ninda an mga tawo na manumpungan “an tunay na buhay” paagi sa pagtutukdo sa sainda manungod sa tunay na Diyos asin sa saiyang mga katuyuhan. (1 Tim. 6:19) Tibaad kontrahon sinda kan saindang mga kapamilya o tibaad maapektaran an saindang pagbuhay huli sa pagsuportar ninda sa Kahadian nin Diyos, pero sinisigurado ni Jehova na igwa sinda kan mga bagay na kaipuhan ninda. (Mat. 6:25, 30-33; Luc. 18:29, 30) An mga katotoohan na iyan nag-aasigurar sa sato na totoo an Kahadian nin Diyos asin na padagos kaiyan na uutubon an katuyuhan ni Jehova.

SARONG MAGAYON NA PUTURO

14-15. Paano sa katapos-tapusi mauutob an panuga ni Jehova na hahalion an kagadanan sagkod lamang?

¹⁴ Nakatukaw na ngunyan si Jesus sa langit bilang Hadi asin uutubon niya an gabos na ipinanuga ni Jehova. (2 Cor. 1:20) Puon kan 1914 nandadaog na si Jesus sa saiyang mga kaiwal. (Sal. 110:1, 2) Dai na mahahaloy, tatapuson niya asin kan saiyang kairibang tagapamahala an saindang pandadaog asin lalaglagon ninda an mga maraot.—Kap. 6:2.

¹⁵ Durante kan Sangribong Taon na Paghadi ni Jesus, an mga gadan bubuhayon asin an masinunod na mga tawo magigin perpekto. Pagkatapos kan pangultimong pagbalo, an mga huhukuman ni Jehova bilang mga matanos “magigin pagsadiri . . . an daga, asin maistar sinda diyan nin daing sagkod.” (Sal. 37:10, 11, 29) Nakakaugma ta “an ultimong kaiwal, an kagadanan, paparaon.”—1 Cor. 15:26.

16. Ano an dapat na magin panginot na motibo niyato sa paglilingkod ki Jehova?

¹⁶ Arog kan naaraman ta sa artikulong ini, an satong paglaom na mabuhay sagkod lamang talagang nakabasar sa Tataramon nin Diyos. An paglaom na iyan makakatabang sa sato na magdanay na maimbod sa masakit na panahon na ini nin huring mga aldaw. Pero para mapaugma si Jehova, dapat na motibado kita bako lang nin pagmawot na magdanay na buhay. An panginot na dahilan niyato kaya nagdadanay kitang maimbod ki Jehova asin ki Jesus iyo an satong hararom na pagkamuot sa sainda. (2 Cor. 5:14, 15) An pagkamuot na iyan an nagmomotibar sa sato na arugon sinda asin sabihon sa iba an paglaom na igwa kita. (Roma 10:13-15) Mantang nanunudan niyato na magin bakong makasadiri asin magin matinao, nagigin kita an klase nin mga tawo na gusto ni Jehova na magin saiyang mga amigo sagkod lamang.—Heb. 13:16.

17. Ano an responsabilidad kan lambang saro sa sato? (Mateo 7:13, 14)

¹⁷ Makakabilang daw kita sa mga magkakamit kan buhay na daing katapusan? Binuksan sa sato ni Jehova an oportunidad na iyan. Nasa sato na kun magdadanay kita sa dalan na pasiring sa buhay. (Basahon an Mateo 7:13, 14.) Ano an magigin buhay niyato pag nabuhay kita sagkod lamang? Pag-uulayan ta an simbag sa hapot na iyan sa sunod na artikulo.