Hapot Hali sa mga Parabasa

Nuarin matatapos an isinasagibo ta ngunyan na paghuhulit?

Sinabi ni Jesus: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.” (Mat. 24:14) An tataramon na itrinadusir na “katapusan” sa bersikulong ini, pati man sa bersikulo 6 asin 13, hali sa Griegong tataramon na teʹlos. Nanunungod iyan sa pangultimong katapusan kan kinaban ni Satanas sa Armagedon. (Kap. 16:14, 16) Kaya, padagos kitang mahulit kan maugmang bareta sagkod sa panahon bago mismo an pangultimong katapusan na iyan. Pagliliwat ini sa dati tang pakasabot.

Kaidto, an pakasabot ta iyo na mapundo na kita sa paghuhulit kan maugmang bareta pag magpuon na an dakulang kasakitan na mangyayari pag laglagon na an Dakulang Babilonya. (Kap. 17:3, 5, 15, 16) An paghuna ta kaidto, an pangyayaring ini an magigin tanda kan katapusan kan piguratibong “taon nin marahay na buot ni Jehova.” (Isa. 61:2) Saka paghuna ta man, an mga makakaligtas sa dakulang kasakitan iyo idtong mga napatunayan na maimbod ki Jehova bago magpuon an pangyayaring iyan. Ikinumparar ta sinda sa mga Judio na nakaligtas sa paglaglag sa Jerusalem kaidtong 607 B.C.E. An mga indibidwal na ini patiinot nang minarkahan para sa kaligtasan huling nagsamba sinda ki Jehova asin naungis sa karatan. (Ezek. 5:11; 9:4) Alagad an pagkumparar na iyan bakong kauyon kan sinabi ni Jesus na nasa Mateo 24:14, na nagpaparisa na an mga tawo puwede pang magkaigwa kan oportunidad na akuon an maugmang bareta sagkod sa panahon bago mismo an pangultimong katapusan sa Armagedon.

An pagliliwat na ini sa pakasabot niyato sa Mateo 24:14 pagliliwat man sa pakasabot ta sa mensaheng arog sa pag-uran nin yelo na ihinula sa Kapahayagan 16:21. Naaraman sa urog pang pagsiyasat na magkakomplemento an duwang teksto. Paano? An simbag konektadong marhay sa reaksiyon kan mga tawo sa mensahe kan Kahadian. Isinurat ni apostol Pablo na para sa “mga iliniligtas,” an mensahe sarong maugmang bareta, “hamot nin buhay.” Pero para sa mga kaiwal nin Diyos, mamundong bareta iyan, “parong nin kagadanan.” (2 Cor. 2:15, 16) Angguton sinda sa mensahe kan Kahadian huling ibinubuyagyag kaiyan an saindang kinaban sa kun ano talaga iyan—maraot, pinamamahalaan ni Satanas, asin pasiring sa kalaglagan.—Juan 7:7; 1 Juan 2:17; 5:19.

Mangnuhon man na an simbolikong makusog na pag-uran nin yelo magigin “grabe nanggad.” Ipinaparisa kaini na durante kan dakulang kasakitan, an gibuhon na paghuhulit posibleng magin mas makulog, an buot sabihon, maipapamidbid an pangaran ni Jehova nin urog kisa kasuarin man. (Ezek. 39:7) Sa panahon na iyan, pagkatapos kan paglaglag sa Dakulang Babilonya, may mga maaakit daw sa mensahe arog kan sa mahamuton na parong? Posibleng marhay ini. Tibaad magirumduman o maaraman ninda na sa laog nin dakul na taon ipinahayag kan Mga Saksi ni Jehova an katapusan kan palsong relihiyon.

Bilang pagkumparar, pag-isipan an nangyari kaidto sa suanoy na Ehipto pagkatapos kan Sampulong Damat. Pagkatapos na “[isagibo ni Jehova] an paghukom sa gabos na diyos kan Ehipto,” nag-iba sa saiyang banwaan “an sarong dakulang grupo na manlain-lain an lahi” na mga bakong Israelita. (Exo. 12:12, 37, 38) An mga dayuhan na ini posibleng nagdesisyon na magpahiling nin pagtubod ki Jehova kan mahiling nindang nagkatotoo an mga patanid ni Moises manungod sa Sampulong Damat.

An siisay man na madesisyon na magpahiling nin pagtubod ki Jehova pagkatapos kan paglaglag sa dakulang Babilonya magkakaigwa kan pribilehiyong gumibo nin marahay sa mga tugang ni Cristo na yaon pa digdi sa daga sa panahon na iyan. (Mat. 25:34-36, 40) Siyempre, an oportunidad na iyan na husgaran bilang karnero matatapos bago mismo an Armagedon pag nakamtan na kan natatadang mga linahidan an saindang langitnon na balos.

An paglilinaw na ini sa satong pakasabot mapuwersang nag-iilustrar kan dakulang pagkamuot asin pagkahirak ni Jehova. Iyo, “habo niyang malaglag an siisay man, imbes, gusto niya na an gabos makapagsulsol.”—2 Ped. 3:9.