Dapat Daw Kitang Sumamba sa mga Imahen?

An simbag kan Bibliya

Dai, dai kita dapat sumamba sa mga imahen. Kun manungod sa mga katugunan na itinao nin Diyos sa nasyon nin Israel, an New Catholic Encyclopedia nagsasabi: “Mahihiling sa manlain-lain na bersikulo sa Bibliya na an tunay na pagsamba sa Diyos dai naggagamit nin mga imahen.” Mangnuhon an mga bersikulong ini sa Bibliya:

• ‘Dai ka maggibo sa saimo nin ladawan, o ano man na kabaing nin bagay na idtuon sa itaas sa langit, sa irarom kan daga, o sa mga tubig sa irarom kan daga. Dai ka [magduko] sa sainda, dai ka man sainda maglingkod, huli ta ako si Jehova na saimong Diyos, [sarong Diyos na naghahagad na ako sana an sambahon].’ (Exodo 20:4, 5) Huling naghahagad an Diyos na ‘siya sana an sambahon,’ dai siya nauugma kun uumawon o sasambahon ta an mga imahen, ritrato, rebulto, ladawan, estatuwa, o simbolo.

• ‘Dai ako matugot na mahirasan kan sakong kaumawan an mga ladawan.’ (Isaias 42:8, An Marahay na Bareta Biblia) Dai inaako nin Diyos an pagsamba sa saiya paagi sa mga imahen. Kan purbaran nin nagkapirang Israelita na sambahon siya gamit an sarong estatuwa nin ugbon na baka, sinabi nin Diyos na sinda “nagin maraot asin nagkasala.”—Exodo 32:7-9, An Marahay na Bareta Biblia.

• “Dai niyato dapat isipon na an Banal na Persona nakakaagid sa sarong inukit na bagay na gibo sa bulawan o plata o gapo, na kinortehan asin dinisenyo nin mga tawo.” (Gibo 17:29) Bakong arog kan paganong pagsamba, na parating naggagamit nin mga imahen na “kinortehan asin dinisenyo nin mga tawo,” an mga Kristiyano dapat na ‘naglalakaw sigun sa pagtubod asin bakong sigun sa nahihiling,’ arog kan sinasabi kan Bibliya.—2 Corinto 5:7.

• “Rumayo kamo sa mga idolo.” (1 Juan 5:21) Sa mga pagbuot na parehong itinao sa nasyon nin Israel asin sa mga Kristiyano, pirming ihinahayag kan Bibliya na bakong totoo an tukdo na inuuyunan daa nin Diyos an paggamit nin mga imahen saka ladawan sa pagsamba.