Ano an Gigibuhon kan Kahadian nin Diyos?

An simbag kan Bibliya

Sasalidahan kan Kahadian nin Diyos an gabos na gobyerno nin tawo asin mamamahala iyan sa bilog na daga. (Daniel 2:44; Kapahayagan 16:14) Pag nangyari na iyan, gigibuhon kan Kahadian nin Diyos an minasunod:

• Hahalion an mga maraot na nagdadara nin kapahamakan sa gabos huli sa pagigin makasadiri ninda. “Tara an magña mararaot na tauo popohoon sa daga, asin an magña makasalan hahaleon dian.”—Talinhaga 2:22, Magna Banal na Kasuratan (BIC).

• Tatapuson an gabos na giyera. “Pinapapundo [kan Diyos] an mga giyera sa bilog na daga.”—Salmo 46:9.

• Madara nin kaginhawahan asin katiwasayan sa bilog na daga. “Matoninong na mamumuhay an lambang saro sa tahaw kan sadiri niyang ubasan saka mga kahoy na higera, asin mayo nang magpapatakot saiya.”—Mikas 4:4, An Marahay na Bareta Biblia (Bikol Popular Version).

• Gigibuhon na paraiso an daga. “Mag-oogma an desyerto, asin mamumurak an kalangtadan.”—Isaias 35:1, An Marahay na Bareta Biblia (Bikol Popular Version).

• Tatawan an gabos nin nakakakontento asin nakakaugmang trabaho. “Lubos na ikakaugma kan [mga pinili nin Diyos] an mga gibo kan saindang mga kamot. Dai sinda magpapagal nin sayang sana.”—Isaias 65:21-23.

• Hahalion an hilang. “Mayong nag-eerok dyan na masabi: ‘May helang ako.’”—Isaias 33:24, An Banal na Biblia (Paulines).

• Hahalion an maraot na epekto nin paggurang. “Magigin mas aki an saiyang kublit kisa kan sa kahobenan niya; mabalik an saiyang kusog arog kaidtong hoben pa siya.”—Job 33:25.

• Bubuhayon liwat an mga gadan. “An gabos na yaon sa mga lulubngan na girumduman makakadangog kan [boses ni Jesus] asin maruluwas.”—Juan 5:28, 29.