Ulwa ku ng’omba nkalamba. Ulwa bana ba kwa Kora. Ulwa malumbo.
85 Mwe Yehova, mwasekelela mu calo cenu;+
Mwabwesha abana ba kwa Yakobo abasendelwe bunkole.+
2 Mwalekelela imembu sha bantu benu;+
Mwafimba pa membu shabo shonse.+ Seʹlah.
3 Mwalama ubukali bwenu bonse;+
Mwabwesha ubukali bwenu.+
4 Tubwesheni, mwe Lesa we pusukilo lyesu,+
No bukali bwenu fumyeni pali ifwe.+
5 Bushe ubukali bwenu pali ifwe bukaba fye bwa muyayaya?+
Bushe mwakulatantalisha ubukali bwenu ku nkulo ne nkulo?+
6 Bushe tamwakatupuupuutule na kabili,+
Pa kuti abantu benu bakasekelele muli imwe?+
7 Mwe Yehova, beni ne cikuuku+ kuli ifwe,
Kabili tupususheni.+
8 Nkomfwa ifyo Lesa wa cine Yehova akasosa,+
Pantu akasosa umutende ku bantu+ bakwe na ku ba cishinka bakwe,
Lelo beicetekela na kabili.+
9 Cine cine nomba line ali no kupususha abamutiina,+
Pa kuti ubukata bube mu calo cesu.+
10 Icikuuku ne cishinka nafikumana;+
Ubulungami no mutende—nafifyompana.+
11 Icishinka cikamena ukufuma mu mushili,+
No bulungami bukalolesha pa nshi ukufuma mu muulu.+
12 Yehova na o, akapeela ifisuma,+
Ne calo cesu cikafumya ubulimi bwa ciko.+
13 Ubulungami bukenda pa ntanshi yakwe,+
Kabili inyantilo sha bulungami shikamoneka mu nshila ya kwa Lesa.+