Yeremia

21 Ici e cebo+ icaishile kuli Yeremia ukufuma kuli Yehova, ilyo imfumu Sidekia+ yatumine kuli ena Pashihuri+ mwana Malkiya na Sefania+ mwana Maaseya, shimapepo, ati: 2 “Twipushisheko kuli Yehova,+ pantu Nebukadresari imfumu ya ku Babiloni aletulwisha.+ Napamo Yehova akatucitila ifipesha amano fyakwe, pa kuti Nebukadresari atutaluke.”+

3 E lyo Yeremia atile kuli bena: “Mwebe Sidekia amuti, 4 ‘Yehova Lesa wa kwa Israele atila: “Moneni, ndelenga ifyanso ifili mu minwe yenu ukumwalukila, ifyanso ifyo mulelwishishako imfumu ya Babiloni,+ na bena Kaldi+ abalemushinga ku nse ye linga, kabili nkafilonganika mu kati ka musumba uno.+ 5 Kabili nkalwa na imwe+ ku kuboko ukwatambalikwa kabili ku kuboko ukwakosa na ku bukali na ku cipyu na ku cifukushi.+ 6 Nkoma na bekashi ba muli uno musumba, abantunse kumo ne nama. Bakafwa ku cikuko icikalamba.”’+

7 “‘“Kabili pa numa ya ifi,” e fyasosa Yehova, “Sidekia imfumu ya kwa Yuda na babomfi bakwe na bantu na bakashala muli uno musumba abakapusuka ku cikuko, na ku lupanga, na ku cipowe, nkabapeela mu minwe ya kwa Nebukadresari imfumu ya Babiloni, na mu minwe ya balwani babo na mu minwe ya balefwaya imyeo yabo, kabili akabakoma ku lupanga.+ Takabomfwile ubulanda nangu ukubalangulukila nangu ukubomfwila uluse.”’+

8 “Kabili mwebe aba bantu amuti, ‘Yehova atila: “Moneni ndebika pa ntanshi yenu inshila ya bumi ne nshila ya mfwa.+ 9 Umuntu uwashala naikala muli uno musumba akafwa ku lupanga na ku cipowe na ku cikuko;+ lelo uwafumamo no kuya ku bena Kaldi abaleshinga imwe akaba no mweo, kabili umweo wakwe e o akapususha.”’+

10 “‘“Pantu nindosha icinso candi pali uyu musumba pa kuti ndete ububi te busuma iyo,”+ e fyo Yehova asosa. “Ukapeelwa mu minwe ya mfumu ya Babiloni,+ na yo ikaoca ku mulilo.”+

11 “‘Na imwe mwe ba mu ng’anda ya mfumu ya kwa Yuda, umfweni mwe bantu, icebo ca kwa Yehova.+ 12 Mwe ba mu ng’anda ya kwa Davidi,+ Yehova atila: “Cila lucelo+ mulepingula imilandu no mulinganya,+ no kupokolola uo bebile mu kuboko kwa ncenjeshi,+ pa kuti ubukali bwandi bwifuma ngo mulilo+ no kupya apabula uwa kushimya pa mulandu wa micitile yenu iyabipa.”’+

13 “‘Mona, we mwikashi wa mu mpanga yabatama, we cilibwe ica mu mpanga yabatama,+ ndi no kukulubulwisha,’ e fyasosa Yehova. ‘Na mwe baleti: “Nani akatentemuka ukwisa pali ifwe? Nani akesa uko twikala?”+ 14 Kabili nkamulubulwisha+ pa micitile yenu,’+ e fyasosa Yehova. ‘Kabili nkasonteka umulilo mu mutengo wakwe,+ kabili ukoca fyonse ifyamushinguluka.’”+