Yeremia
26 Ku kutendeka kwa kuteka kwa kwa Yehoyakimu+ mwana Yoshia, imfumu ya kwa Yuda, kwaishile ici cebo ukufuma kuli Yehova, ica kuti: 2 “Yehova atila, ‘Keminine mu lubansa lwa ng’anda ya kwa Yehova,+ kabili ulande fyonse ifyo nalakweba ukusosa kuli bonse aba mu misumba ya kwa Yuda abaleisa ku kupepa mu ng’anda ya kwa Yehova.+ Wishako amashiwi nangu yamo.+ 3 Nalimo kuti baumfwa no kuleka, umuntu onse imibele yakwe iyabipa,+ kabili kuti naumfwa ubulanda pa bucushi ubo ndetontonkanya ukubaletela pa mulandu wa micitile yabo iyabipa.+ 4 Kabili ubebe ati: “Yehova atila, ‘Nga tamwaumfwe kuli ine no kwenda mu mafunde yandi+ ayo namupeela,+ 5 no kumfwila amashiwi ya babomfi bandi bakasesema, abo ndetuma kuli imwe, abo mushumfwako,+ 6 na ine nkalenga ino ng’anda ukuba nge ya ku Shilo,+ no yu musumba nkaulenga ukuba icitiipu ku nko shonse isha pe sonde.’”’”+
7 Awe bashimapepo na bakasesema na bantu bonse baumfwile Yeremia alesosa aya mashiwi mu ng’anda ya kwa Yehova.+ 8 Nomba ilyo Yeremia apwishishe ukulanda fyonse ifyo Yehova amwebele ukulanda ku bantu bonse, bashimapepo na bakasesema na bantu bonse balimwikete, no kumweba ati: “Ukufwa kwena walafwa.+ 9 Nga cinshi ico wasesemena mwi shina lya kwa Yehova, auti, ‘Ino ng’anda ikaba nge ya ku Shilo,+ na uno musumba ukonaulwa kabili tamwakabe umwikashi’?” Na bantu bonse balongene ukushinguluka Yeremia mu ng’anda ya kwa Yehova.
10 Awe bacilolo ba kwa Yuda balyumfwile aya mashiwi, kabili bafumine ku ng’anda ya mfumu no kwisa ku ng’anda ya kwa Yehova+ no kwikala pa mpongolo iipya iya kwa Yehova.+ 11 E lyo bashimapepo na bakasesema balaeba bacilolo na bantu bonse, abati: “Uyu muntu alingile ukupingulwa ukufwa,+ pantu asesemene uno musumba nge fyo muyumfwilile na matwi yenu.”+
12 Na o Yeremia atile kuli bacilolo bonse na ku bantu bonse: “Ni Yehova e wantumine ukusesema pali ino ng’anda na pali uno musumba fyonse ifyo mumfwile.+ 13 E ico wamyeni imibele yenu ne micitile yenu,+ no kumfwila ishiwi lya kwa Yehova Lesa wenu, kabili Yehova akomfwa ubulanda pa bucushi ubo atile aleleta pali imwe.+ 14 Lelo ine, moneni, ndi mu minwe yenu.+ Citeni kuli ine icisuma nangu icalungama mu menso yenu.+ 15 Nomba ico mwishibe fye ca kuti, nga mwanjipaya, ninshi mulopa wa kaele mulebika pa mitwe yenu na pali uno musumba na pa bekashi ba uko,+ pantu ine ukulanda fye ica cine, ni Yehova e wantumine ukulanda ifi fyonse kuli imwe.”+
16 E lyo bacilolo+ bonse na bantu bonse batile kuli bashimapepo na bakasesema: “Uyu muntu talingile ukupingulwa ukufwa,+ pantu ni mwi shina lya kwa Yehova Lesa wesu e mo alandiile kuli ifwe.”+
17 Kabili bamo aba mu bakalamba ba mu calo balimine balaeba ulukuta lonse ulwa bantu, abati:+ 18 “Mika+ uwa ku Moreshete+ alesesema mu nshiku sha kwa Hisekia imfumu ya kwa Yuda+ no kusosa ku baYuda bonse ati, ‘Yehova wa mabumba atila: “Sione akalimwa nge bala,+ na Yerusalemu akashala ifitantaala,+ no lupili lwa Ng’anda lukaba lwa fifulo fya kupepelapo ifya mu mutengo.”’+ 19 Bushe Hisekia imfumu ya kwa Yuda na baYuda bonse balimwipeye? Bushe tatiinine Yehova no kunasha umutima wa kwa Yehova,+ ica kuti Yehova aumfwile ubulanda pa fyabipa ifyo atile ali no kubaletela?+ E ico tuleiletela fye ubucushi fwe bene.+
20 “Kabili kwali umuntu uwalesesemena mwi shina lya kwa Yehova, Uriya mwana Shemaya uwa ku Kiriati-yearimu.+ Kabili alesesema pali uno musumba na pali cino calo ukulingana na mashiwi yonse aya kwa Yeremia. 21 Ilyo Imfumu Yehoyakimu+ na bantu ba iko bonse impalume na bacilolo bonse baumfwile amashiwi yakwe, imfumu yapangile ukumwipaya.+ Awe na o Uriya pa kumfwa ifi apo pene alitiinine,+ kabili alifulumwike no kuya ku Egupti. 22 Lelo Imfumu Yehoyakimu yatumine bamo ku Egupti, Elnatani mwana Akbore+ pamo na baume bambi ukuya ku Egupti. 23 Na bo bailesenda Uriya ku Egupti no kumuleta ku Mfumu Yehoyakimu, na yo yamwipaile ku lupanga+ no kupoosa icitumbi cakwe mu nshiishi ya bana ba bantu.”
24 Kabili ukuboko kwa kwa Ahikamu+ mwana Shafani+ kwali na Yeremia, ukuti epeelwa mu minwe ya bantu ukuti bamwipaye.+