Yeremia
28 Nomba muli ulya mwaka, ku kutendeka kwa kuteka kwa kwa Sidekia+ imfumu ya kwa Yuda, mu mwaka walenga ine (4), mu mweshi walenga isano, Hanania+ mwana Asuri, kasesema uwafumine ku Gibeone,+ asosele kuli ine mu ng’anda ya kwa Yehova pa menso ya bashimapepo na bantu bonse ati: 2 “Yehova wa mabumba, Lesa wa kwa Israele atila, ‘Nkafuna ikoli lya mfumu ya ku Babiloni.+ 3 Mu myaka ibili iituntulu nkabwesesha kuli cino cifulo ifipe fyonse ifya mu ng’anda ya kwa Yehova ifyo Nebukadnesari imfumu ya ku Babiloni+ asendele kuli cino cifulo no kufitwala ku Babiloni.’” 4 “‘Kabili Yekonia+ mwana Yehoyakimu,+ imfumu ya kwa Yuda, na bankole bonse aba kwa Yuda abaile ku Babiloni+ nkababwesesha kuli cino cifulo,’ e fyasosa Yehova, ‘pantu nkafuna ikoli+ lya mfumu ya ku Babiloni.’”
5 E lyo Yeremia kasesema atile kuli Hanania kasesema pa menso ya bashimapepo bonse na pa menso ya bantu bonse abaiminine mu ng’anda ya kwa Yehova;+ 6 kabili Yeremia kasesema asosele ati: “Ameni!+ Yehova nacite ifyo fine! Yehova nafikilishe amashiwi ayo wasesema no kubwesha ifipe fya mu ng’anda ya kwa Yehova na bankole bonse ukufuma ku Babiloni ukwisa kuno!+ 7 Lelo, shi umfwa amashiwi aya ayo ndesosa mu matwi yobe na mu matwi ya bantu bonse.+ 8 Bakasesema abantangilile kabili abakutangilile ukufuma na kale,+ balesesema pa nkondo no bucushi ne fikuko ifyali no kwisa pa fyalo ifingi na pa mabufumu ayakalamba.+ 9 Kabili kasesema uwasobela umutende,+ ilyo amashiwi yakwe yashilafikilishiwa, akeshibikwa kasesema untu Yehova atumine ica cine.”+
10 E lyo Hanania kasesema afumishe ikoli pa mukoshi wa kwa Yeremia kasesema no kulifuna.+ 11 Kabili Hanania+ asosele pa menso ya bantu bonse ati: “Yehova atila,+ ‘Ifi fine e fyo nkafuna ikoli lya kwa Nebukadnesari imfumu ya ku Babiloni mu myaka ibili iyashalako ukulifumya pa mikoshi ya nko shonse.’”+ Na o Yeremia kasesema alifuminepo aya.+
12 E lyo icebo ca kwa Yehova caishile kuli Yeremia,+ ilyo Hanania kasesema afunine ikoli no kulifumya pa mukoshi wa kwa Yeremia, no kutila:13 “Kabiye, kebe Hanania auti, ‘Yehova atila: “Iwe wafuna ikoli+ lya cimuti, nomba walapangilamo ikoli lya cela.”+ 14 Pantu Yehova wa mabumba, Lesa wa kwa Israele atila: “Nkabika ikoli lya cela pa mukoshi wa nko shonse ishi, pa kuti shikabombele Nebukadnesari imfumu ya ku Babiloni;+ na sho shikamubombela.+ Nkamupeela ne nama sha mu mpanga.”’”+
15 E lyo Yeremia kasesema atile kuli Hanania+ kasesema: “Umfwa, iwe Hanania! Yehova takutumine iyo, lelo walenga aba bantu ukucetekela ubufi.+ 16 E ico Yehova atila, ‘Mona! Ndekufumya pano calo. Uno mwaka ulefwa,+ pantu ico usosele, kupondokela Yehova apabuuta.’”+
17 Awe Hanania kasesema alifwile muli ulya wine mwaka, mu mweshi walenga cinelubali (7).+