Yeremia

31 “Mu nshita ilya,” e fyo Yehova asosa, “nkaba Lesa wa ndupwa shonse isha kwa Israele; na bo bakaba abantu bandi.”+

2 Yehova atila: “Abapuswike ku lupanga balipaalilwe mu matololo,+ ilyo abena Israele baleya ku kutuusha.”+ 3 Yehova amoneke kuli ine ukufuma ukutali, no kutila: “Nalikutemwa ukutemwa kwa muyayaya.+ E mulandu wine nakupalamikila ukubomfya icikuuku.+ 4 Kabili nkakukuula cipya cipya, na iwe ukakuulwa cipya cipya,+ we nacisungu Israele. Awe ukabuula utuoma tobe no kuya mu kucinda nga bantu abaleseka.+ 5 Ukalima amabala ya myangashi mu mpili sha Samaria.+ Abalimi bakalima no kutendeka ukulya ifisabo fya yako.+ 6 Pantu kuli ubushiku ilyo abalinshi ba mu citungu ca mpili ica kwa Efraimu bakabilisha abati, ‘Imeni, mwe bantu, natunine tuleya ku Sione, kuli Yehova Lesa wesu.’”+

7 Pantu Yehova atila: “Auleni kuli Yakobo no kusekelela, kabili bilikisheni ku luko ulwacila inko shonse.+ Sabankanyeni.+ Tasheni no kusosa amuti, ‘Mwe Yehova, pususheni abantu benu, abashalapo aba kwa Israele.’+ 8 Moneni, nkabaleta ukufuma ku calo ca ku kapinda ka ku kuso,+ kabili nkabalonganika ukufuma ku ncende she sonde ishaba ukwalepesha.+ Pakaba ne mpofu na balemana, abaimita na balepaapa, bonse capamo.+ Bakabwela kuno bali ulukuta ulukalamba.+ 9 Bakesa balelila,+ nkababwesha ninshi balepapaata ukuti bapaalwe. Nkabatwala ku mimana,+ mu nshila yalungama umo bashakaipunune. Pantu nimba Wishi wa kwa Israele;+ kabili Efraimu e beli lyandi.”+

10 Umfweni icebo ca kwa Yehova, mwe nko, kabili bilisheni mu fishi ifyabela ukutali,+ amuti: “Uwasalangenye Israele, e ukamulonganika,+ kabili akamusunga filya umucemi asunga impaanga shakwe.+ 11 Pantu Yehova akalubula Yakobo+ no kumupokolola mu minwe ya wakosa ukumucila.+ 12 Kabili bakesa no kwaula utupundu pa muulu wa Sione,+ no kusansamuka pa busuma bwa kwa Yehova,+ pa ngano na pa mwangashi+ uupya na pa mafuta na pa bana ba mpaanga na pa bana ba ng’ombe.+ Ne myeo yabo ikaba nge bala ilyatapililwa bwino,+ kabili tabakanake na kabili.”+

13 “Kabili mu nshita ilya nacisungu akasekelela no kucinda, na balumendo na bakote, bonse capamo.+ Ukuloosha kwabo nkakusangula ukusekelela, kabili nkabasansamusha no kubalenga ukusekelela, no bulanda bwabo bukapwa.+ 14 Nkalenga ne myeo ya bashimapepo ukwikuta ifya mafuta,+ na bantu bandi bakasekelela mu busuma bwandi,”+ e fyasosa Yehova.

15 “Yehova atila, ‘Mu Rama+ muleumfwika ishiwi, ukuloosha no kulila ukukalamba;+ ni Rakele+ alelila abana bakwe.+ Nakaana ukumusansamusha pa bana bakwe,+ pantu nabafwa.’”+

16 Yehova atila: “‘Wilalila, kabili wilaponya ifilamba,+ pantu kuli icilambu ku milimo yobe,’ e fyo Yehova asosa, ‘kabili bakabwela ukufuma ku calo ca mulwani.’+

17 “‘Kabili kuli isubilo+ kuli iwe ku ntanshi,’ e fyo Yehova asosa, ‘na bana bakabwelela ku calo cabo.’”+

18 “Ning’umfwa Efraimu aleililila ubulanda+ ati, ‘Namunsalapula, pa kuti nsalapulwe,+ ngo mwana wa ng’ombe uo bashasambilisha.+ Nengeni ukupilibuka, na ine nkabwela,+ pantu ni mwe Yehova Lesa wandi.+ 19 Pantu ilyo napilibwike nalilangulwike;+ kabili ilyo naishibe, naumine ulupi pe tanta lyandi.+ Nalyumfwile insoni no kuseebana,+ pantu nali no museebanya uwa ku bwaice bwandi.’”+

20 “Bushe Efraimu mwana uwatemwikwa kuli ine?+ Bushe mwana uo natemwisha? Pantu filya fine namukalipile, no kumwibukisha e fyo nkamwibukisha.+ E mulandu wine umutima wandi ulemufulukila.+ Kabili nkamubelela uluse,”+ e fyasosa Yehova.

21 “Imika ifya kulangilila inshila. Bika ifishibilo.+ Bika umutima obe pa nshila iyo ukapitamo.+ Bwela, we nacisungu Israele. Bwelela ku misumba yobe ino.+ 22 Kufika lilali ukalulumba,+ we mwana mwanakashi uushumfwa?+ Pantu Yehova nalenga icintu icipya mwi sonde: Umwanakashi akapalama ku mwaume.”

23 Yehova wa mabumba, Lesa wa kwa Israele, atila: “Kabili bakasosa aya amashiwi mu calo ca kwa Yuda na mu misumba yakwe, ilyo nkalonganika bankole babo, abati, ‘Yehova akupaale,+ we bwikalo bwalungama,+ we lupili lwa mushilo.’+ 24 E mo bakekala pamo abaYuda na ba mu misumba bonse, abalimi na bendauka ne fitekwa.+ 25 Pantu nkapembesula uwapomponteka, no kulenga uwanaka ukwikuta.”+

26 E ico nalishibwike no kulolesha; awe utulo twandi twaliweme.

27 “Moneni! Inshiku shileisa,” e fyo Yehova asosa, “ilyo nkabyala abana aba mu ng’anda ya kwa Israele na ba mu ng’anda ya kwa Yuda pamo na bana ba bantunse na bana ba fitekwa.”+

28 “Kabili filya fine nali uwalola kuli bena+ pa kunukula no kuwisha no kubongolola no konaula no koomona,+ e fyo nkaba uwalola kuli bena pa kukuula no kulimba,”+ e fyasosa Yehova. 29 “Mu nshiku shilya tabakasose na kabili abati, ‘Bashibo e baliile imyangashi iibishi, lelo ameno ya bana e yawa.’+ 30 Nomba umuntu onse akafwila pa membu shakwe.+ Umuntu onse uwalya imyangashi iibishi, e o ameno yakawa.”

31 “Moneni! Inshiku shileisa,” e fyo Yehova asosa, “ilyo nkapangana icipangano icipya+ na ba mu ng’anda ya kwa Israele+ na ba mu ng’anda ya kwa Yuda;+ 32 icipangano icishakabe nga cilya napangene ne fikolwe fyabo mu bushiku nabekete ku kuboko kwabo pa kuti mbafumye mu calo ca Egupti,+ ‘icipangano candi ico batobele,+ nangu nali umulume wabo,’+ e fyasosa Yehova.”

33 “Pantu ici e cipangano+ ico nkapangana na ba mu ng’anda ya kwa Israele pa numa ya nshiku shilya,”+ e fyasosa Yehova. “Nkabika amafunde yandi muli bena,+ kabili nkayalemba mu mitima yabo.+ Kabili nkaba Lesa wabo, na bo bakaba abantu bandi.”+

34 “Kabili umuntu onse takasambilishe umunankwe nangu munyina,+ ati: ‘Ishiba Yehova!’+ pantu bonse bakanjishiba, ukufuma ku munono ukufika ku mukalamba,”+ e fyasosa Yehova. “Pantu nkelela ifilubo fyabo, nshakebukishe ne membu shabo.”+

35 Yehova, uupeela akasuba ku kubalika mu kasuba,+ ne fipope+ fya mweshi+ ne ntanda ku kusanika ubushiku,+ uusunkanya bemba pa kuti amabimbi yeme,+ uo ishina lyakwe ni Yehova wa mabumba,+ asosa ati:36 “‘Nga fingafumishiwapo ifipope ifi ku cinso candi,’+ e fyasosa Yehova, ‘ninshi na bana ba kwa Israele kuti baleka ukuba uluko kuli ine umuyayaya.’”+

37 Yehova atila: ‘Nga kuti yapimwa imyulu iyaba mu muulu, kabili nga yengeshibikwa amashintililo ya pa nshi ye sonde,+ ninshi na ine kuti nakaana abana ba kwa Israele bonse pa mulandu wa fyonse ifyo bacita,’+ e fyasosa Yehova.”

38 “Moneni! Inshiku shileisa,” e fyasosa Yehova, “ilyo umusumba ukakuulilwa+ Yehova ukufuma ku Lupungu lwa kwa Hananele+ no kufika ku Mpongolo ya ku Koona.+ 39 Ne ntambo ya kupiminako+ ikalungama ku kapili ka Garebu, ikalukila na ku Gao. 40 Na monse mu mpanga yabatama iya fitumbi+ ne ya mito ya mafuta,+ na mabala yonse ukufika na ku mupokapoka wa Kidrone,+ ukufika na pa koona ya ku Mpongolo ya Bakabalwe,+ ukulola ku kabanga, fikaba fya mushilo kuli Yehova.+ Umusumba tawakanukulwe, nangu kubongololwa na kabili umuyayaya.+