Yeremia

34 Icebo caishile kuli Yeremia ukufuma kuli Yehova, ilyo Nebukadresari imfumu ya ku Babiloni+ ne bumba lyakwe lyonse ilya bashilika+ no bufumu bonse ubwa pe sonde, ubuteko ubo aletekapo,+ na bantu bonse, balelwa na Yerusalemu ne misumba ya uko yonse,+ aciti:

2 “Yehova Lesa wa kwa Israele atila, ‘Kabiye, webe Sidekia imfumu ya kwa Yuda,+ kabili umwebe auti: “Yehova atila, ‘Mona, ndepeela uno musumba mu minwe ya mfumu ya ku Babiloni,+ kabili ikaoca mu mulilo.+ 3 Na iwe tawakafyuke mu minwe ya iko, pantu ukwikatwa ukekatwa kabili ukapeelwa mu minwe ya iko.+ Kabili amenso yobe yakamona amenso ya mfumu ya ku Babiloni,+ na kanwa ka iko kakalanda na kanwa kobe, kabili ukaya ku Babiloni.’ 4 Lelo, umfwa icebo ca kwa Yehova, Sidekia, we mfumu ya kwa Yuda,+ ‘Yehova asosa pali iwe ati: “Tawakafwe ku lupanga. 5 Ukafwa umutende;+ kabili bakakocela+ ifyanunkila filya fine baocelele ifikolwe fyobe, ishamfumu ishakutangilile.+ Kabili bakakuloosha+ abati, ‘Iye, mwe shikulu!’+ pantu ‘ninanda aya mashiwi,’ e fyasosa Yehova.”’”’”

6 Kabili Yeremia kasesema aebele Sidekia imfumu ya kwa Yuda aya mashiwi yonse+ mu Yerusalemu, 7 ilyo amabumba ya bashilika ba mfumu ya ku Babiloni yalelwisha Yerusalemu ne misumba yonse iya kwa Yuda iyasheleko,+ e kutila Lakishi+ na Aseka;+ pantu e misumba ya malinga+ iyashelepo pa misumba ya kwa Yuda.+

8 Icebo caishile kuli Yeremia ukufuma kuli Yehova pa numa Imfumu Sidekia yapangene icipangano na bantu bonse abali mu Yerusalemu ukuti ibilishe kuli bena ukulubuka,+ 9 ukuti cila muntu aleke umubomfi wakwe aye umutungwa: umubomfi wakwe umwaume no mubomfi wakwe umwanakashi, umuHebere+ umwaume no muHebere umwanakashi, pa kuti nomba abaYuda bamunyinabo beba na kabili ababomfi.+ 10 E ico bacilolo bonse+ balyumfwilile, na bantu bonse abasuminisheko ku cipangano ca kuti cila muntu aleke umubomfi wakwe umwaume na cila muntu aleke umubomfi wakwe umwanakashi aye umutungwa, ukuti nomba beba na kabili ababomfi babo, balyumfwilile no kubaleka baya.+ 11 Lelo pa numa ya ifi balyalwike+ no kutendeka ukubwesha ababomfi abaume na babomfi abanakashi abo balekele baya abantungwa, kabili babalengele ukuba na kabili ababomfi abaume na babomfi abanakashi.+ 12 E lyo icebo ca kwa Yehova caishile kuli Yeremia ukufuma kuli Yehova, no kutila:

13 “Yehova Lesa wa kwa Israele atila, ‘Napangene icipangano ne fikolwe fyenu+ mu bushiku nabafumishe mu calo ca Egupti,+ ukubafumya mu ng’anda ya busha,+ no kutila:14 “Pa mpela ya myaka cinelubali (7), mufwile ukuleka aye cila muntu munyina+ umuHebere,+ uo mwashitile+ kabili uwamubombela imyaka mutanda (6); kabili muli no kumuleka aye umuntungwa ukufuma kuli imwe.” Lelo ifikolwe fyenu tafyaumfwile kuli ine, nangu ukukutika.+ 15 Kabili buno bushiku imwe mwapilibuka no kucita icatambalala mu menso yandi pa kubila ukulubuka cila muntu ku munankwe, kabili mwacita icipangano pa menso yandi+ mu ng’anda iyainikwa ishina lyandi.+ 16 Lelo na kabili mwa-aluka+ no kusaalula ishina lyandi+ no kubwesha cila muntu umubomfi wakwe umwaume kabili cila muntu umubomfi wakwe umwanakashi, abo mwalekele baye abantungwa uko balefwaya, kabili mwabalenga ukuba na kabili ababomfi benu abaume na babomfi benu abanakashi.’+

17 “E ico Yehova atila, ‘Tamumfwilile ine mu kubila lyonse ukulubuka+ cila muntu kuli munyina na cila muntu ku munankwe. Moneni, ndebila kuli imwe ukulubuka,’+ e fyasosa Yehova, ‘ku lupanga,+ ku cikuko+ na ku cipowe,+ kabili nkamulenga ukuba ica kutiinya ku bufumu bonse ubwa pe sonde.+ 18 Kabili abantu abapulile mu cipango candi nkabapeela ku balwani babo,+ pa mulandu wa kuti tabacitile ifyaba mu cipangano ico bapangene pa menso yandi, pa kuputula umwana wa ng’ombe pa kati,+ ukuti bapite pa kati ka fiputulwa fya uko;+ 19 e kutila, bacilolo ba kwa Yuda na bacilolo ba mu Yerusalemu,+ ababomfi ba kwi sano na bashimapepo na bantu bonse aba mu calo abapitile pa kati ka fiputulwa fya mwana wa ng’ombe— 20 kabili nkabapeela mu minwe ya balwani babo na mu minwe ya balefwaya umweo wabo;+ ne fitumbi fyabo fikaba ifya kulya fya fyuni ifipupuka mu lwelele ne nama sha pe sonde.+ 21 Kabili Sidekia imfumu ya kwa Yuda+ na bacilolo bakwe nkabapeela mu minwe ya balwani babo na mu minwe ya balefwaya umweo wabo na mu minwe ye bumba lya bashilika ilya mfumu ya ku Babiloni+ abalekele ukulwisha imwe.’+

22 “‘Moneni, nkatuma amashiwi,’ e fyasosa Yehova, ‘kabili nkabaleta kuli uno musumba,+ na bo bakaulwisha no ku-upoka no kuoca mu mulilo;+ nkalenga ne misumba ya kwa Yuda ukuba icibolya umushaba umwikashi.’”+