Yeremia
41 Nomba mu mweshi walenga cinelubali (7), Ishmaele+ mwana Netania mwana Elishama+ uwali umwana+ wa ku bufumu kabili ali mu bakulu bakulu aba mfumu, na baume bambi ikumi (10) abali nankwe+ baile kuli Gedalia mwana Ahikamu ku Mispa.+ Kabili baliliile pamo ifya kulya ku Mispa.+ 2 E lyo Ishmaele mwana Netania na baume ikumi (10) abali nankwe baimine no kwipaya Gedalia mwana Ahikamu mwana Shafani ku lupanga.+ E ico aipeye uo imfumu ya ku Babiloni yalaashike pa calo.+ 3 Kabili Ishmaele aipeye abaYuda bonse abali na Gedalia ku Mispa, na bena Kaldi abali kulya, e kutila, abaume ba bulwi.
4 Kabili pa bushiku bwakonkelepo ukutula apo baipaile Gedalia, ninshi umuntu nangu umo talaishiba icacitike,+ 5 kwaishile abaume abafumine ku Shekemu,+ ku Shilo+ na ku Samaria,+ abaume amakumi cinekonsekonse (80) nababeya ne myefu,+ bali ne fya kufwala ifyalepauka, ne mibili yabo iyatetaulwa,+ kabili bali no mutuulo wa ngano ne fyanunkila+ mu minwe yabo ifya kutwala ku ng’anda ya kwa Yehova. 6 E lyo Ishmaele mwana Netania afumine mu Mispa ku kuyabakumanya, kabili aile alelila.+ Na o ilyo akumene fye na bo, abebele ati: “Tuleyeni kuli Gedalia mwana Ahikamu.” 7 Awe ilyo fye baingile mu kati ka musumba, Ishmaele mwana Netania na baume abali nankwe baipeye balya bantu no kubapoosa mu cishima.+
8 Lelo kwali abaume ikumi (10) abasangilwepo abasosele apo pene kuli Ishmaele abati: “Witwipaya, pantu twalikwata ifyuma ifyafiswa mwi bala, ingano na barle na mafuta no buci.”+ E ico alibalekele, kabili tabepaile pamo na bamunyinabo. 9 Ne cishima umo Ishmaele+ apoosele ifitumbi fyonse ifya bantu aipeye cali icikalamba, cilya Imfumu Asa yapangile pa mulandu wa kwa Baasha imfumu ya kwa Israele.+ Mulya mwine e mo Ishmaele mwana Netania aiswishe abaipaiwe.
10 E lyo Ishmaele asendele muli bunkole abantu bonse abashele mu Mispa,+ abana banakashi aba mfumu+ na bantu bonse abashele mu Mispa,+ abo Nebusaradani umukalamba wa balinshi ashile mu minwe ya kwa Gedalia mwana Ahikamu.+ E ico Ishmaele mwana Netania alibasendele ukuti babe bankole, no kwima pa kuti abukile ku bana ba kwa Amone.+
11 Nomba Yohanani+ mwana Karea na bakalamba bonse aba mabumba ya bashilika+ abali nankwe baumfwile ububi bonse ubwacitile Ishmaele mwana Netania. 12 Kabili basendele abaume bonse no kuya mu kulwa na Ishmaele mwana Netania, kabili bamusangile mupepi na menshi ayengi aya ku Gibeone.+
13 Awe abantu bonse abali na Ishmaele bashimona fye Yohanani mwana Karea na bakalamba bonse aba mabumba ya bashilika abali nankwe, batemenwe nga nshi. 14 Kabili abantu bonse abo Ishmaele asendele ukuba bankole ukufuma ku Mispa+ balyalwike no kubwelela kuli Yohanani mwana Karea. 15 Na Ishmaele mwana Netania alifulumwike+ pamo na baume cinekonsekonse (8) ku cinso ca kwa Yohanani, no kuya ku bana ba kwa Amone.
16 E lyo Yohanani+ mwana Karea na bakalamba bonse aba mabumba ya bashilika abali nankwe babweseshe bonse abashele pa bantu ukubafumya kuli Ishmaele mwana Netania abo asendele ukufuma ku Mispa, pa numa ya kwipaya Gedalia+ mwana Ahikamu, abaume bene bene, abaume ba bulwi, na banakashi na bana banono na balebombela kwi sano, abo ababweseshe ukufuma ku Gibeone. 17 E ico baile no kuyaikala umwa kutubilisha ku Kimhamu uwali mupepi na Betelehemu,+ pa kuti bengile mu Egupti,+ 18 pa mulandu wa bena Kaldi;+ pantu nomba balebatiina,+ pantu Ishmaele mwana Netania alipeye Gedalia mwana Ahikamu,+ uo imfumu ya ku Babiloni yalaashike pa calo.+