Yeremia

47 Ici e cebo ca Yehova icaishile kuli Yeremia kasesema pa baPelishiti+ ilyo Farao talacimfya Gasa.+ 2 Yehova atila:

“Moneni! Amenshi yalefuma+ ku kapinda ka ku kuso,+ kabili nomba yali umumana uulepoosa. Kabili yakabunsha icalo ne fyabamo, umusumba na baikalamo.+ Kabili abantu bakapunda, na bonse abekala mu calo bakalila imisowa.+ 3 Ku congo fye ica nshindo sha mabondo ya bakabalwe bakwe,+ na ku congo fye ica maceleta yakwe aya nkondo,+ ne congo ca mipeto yakwe,+ bashibo tabakapilibukile ku bana, pantu amaboko yabo yakatompoka, 4 pa mulandu wa bushiku ubuleisa ku konaula abaPelishiti+ bonse, ku kulofya aba mu Turi+ na ba mu Sidone,+ ku kulofya umuntu onse uwapuswike uwalebafwilisha.+ Pantu Yehova ali no konaula abaPelishiti,+ abashalapo ukufuma ku cishi ca Kaftore.+ 5 Ipala+ likesa pali Gasa.+ Ashkelone+ naonaulwa. Mwe bashalapo ba mu mpanga yabatama iya ku Gasa na Ashkelone, bushe kufika lilali mukatetaula imibili yenu?+

6 “Eya, we lupanga lwa kwa Yehova!+ Bushe kufika lilali ushakekale tondolo? Ingila mu ca kubikamo ulupanga cobe. +Tuushako no kuba tondolo.

7 “Kuti lwaikala shani tondolo, apo ni Yehova e ulwebele? Lufwile ukuba ku Ashkelone na ku lulamba lwa bemba.+ Kulya e ko alusontela ukuba.”