Yeremia
9 Iye, kanshi umutwe wandi nga wali amenshi, na menso yandi nga yali akamfukumfuku ka filamba!+ Akasuba no bushiku kuti naloosha abantu ba mwana mwanakashi uwa bantu bandi abo baipaya.+
2 Iye, kanshi nga nali no mwa kutubilisha abalendo+ mu matololo! Nga nalishiile abantu bandi no kufuma kuli bena, pantu bonse bacende,+ kabili libumba lya ncenjeshi;+ 3 kabili mu bufi batinta indimi shabo ngo buta;+ lelo tababa ni mpalume sha cishinka mu calo.
“Pantu bafumine ku bubi baya ku bubi na bumbi, balinsuulile no kunsuula,”+ e fyasosa Yehova.
4 “Cila muntu alecenjela ku munankwe,+ kabili mwitetekela munyinenwe.+ Pantu munyina onse kuti apoka icifulo mu bucenjeshi,+ na cibusa onse endauka alecita ulwambo,+ 5 kabili abantu balabepana;+ tabalanda ne cine nakalya. Balisambilisha indimi shabo ukubepa ubufi.+ Balinaka abene mu kucita ububi.+
6 “Mwaikala mu bucenjeshi.+ Kabili mu bucenjeshi balikaana ukunjishiba,”+ e fyasosa Yehova.
7 E ico Yehova wa mabumba atila: “Moneni, ndebasungulula, kabili ndi no kubaceeceeta,+ pantu nkalandula shani pa mwana mwanakashi wa bantu bandi?+ 8 Indimi shabo mifwi ya kwipailako.+ Shisosa ubufi. Ku kanwa e ko umuntu asosela umutende ku munankwe; lelo mu mutima wakwe alepanga ukumubelamina.”+
9 “Bushe nshifwile ukubalubulwisha pa mulandu wa ifi?” e fyasosa Yehova. “Kabili bushe nshifwile ukulandula uluko lwa musango yu?+ 10 Nkaloosha no kulila impili, kabili nkembila impanga sha mulemfwe ulwimbo lwa bulanda;+ pantu fikapya+ ica kuti tamwakapite umuntu nangu umo kabili abantu tabakomfwe icongo ca fitekwa.+ Ifyuni fya mu lwelele ne nama fikafulumuka; kabili fikaya.+ 11 Nkalenga na Yerusalemu ukuba umwina wa mabwe,+ kabili umwa kwikala bamumbwe;+ ne misumba ya mu Yuda nkailenga ukushala ifibolya, umwabula uwa kwikalamo.+
12 “Nani uwa mano, pa kuti omfwikishe ici, uo Yehova ebele ukuti alande?+ Mulandu nshi icalo cingalobela, no kupya kwati matololo umwabula no wa kupitamo?”+
13 Kabili Yehova atile: “Pa mulandu wa kusuula amafunde yandi ayo nabapeele, na pa mulandu wa kuti tabomfwilile ifyo nasosele nangu ukufikonka,+ 14 lelo bale-enda mu kutalama kwa mitima yabo+ no kukonka ifimpashanya fya kwa Baali,+ ifyo ifikolwe fyabo fyabasambilishe;+ 15 e ico, Yehova wa mabumba, Lesa wa kwa Israele atila, ‘Moneni, ndelenga aba bantu ukulya ifyalula sana,+ kabili nkabalenga ukunwa amenshi umuli sumu;+ 16 kabili nkabasalanganishisha mu nko isho bashaishibe kabili isho ne fikolwe fyabo fishaishibe,+ kabili nkabatumina ulupanga mpaka nkabalofye.’+
17 “Yehova wa mabumba atila, ‘Beni na mano, kabili iteni abanakashi abemba inyimbo sha bulanda,+ pa kuti bese; kabili tumeni aba kwita abanakashi abaishiba ukuloosha, pa kuti bese,+ 18 kabili bendeshe no kutuloosha. Kabili amenso yesu nayalukushe ifilamba kabili amenso yesu nayatonye amenshi.+ 19 Pantu kuleumfwika ishiwi lya kuloosha ukukalamba ku Sione+ aliti: “Ifyo batusampila ifipe!+ Ifyo twaikatwa nga nshi insoni! Pantu natusha icalo; pantu nabawisha ififulo fyesu ifya kwikalamo.”+ 20 Lelo umfweni mwe banakashi imwe, amashiwi ya kwa Yehova, kabili lekeni amatwi yenu yomfwe amashiwi ayafuma ku kanwa kakwe. Kabili sambilisheni abana benu ukuloosha,+ kabili cila mwanakashi asambilishe umunankwe ulwimbo lwa bulanda.+ 21 Pantu imfwa naingila pa mawindo yesu; naingila mu mayanda yesu aya malinga, pa kuti ilofye umwana mu musebo, na balumendo mu mansa.’+
22 “Sosa auti, ‘Yehova atila: “Ifitumbi fya bantu na fyo fikaponena pa mushili ngo mufundo wa mu mushili mwi bala kabili nge myanshi ya ngano pa numa ya kuseepa, lelo ukwabula uwa kulonganika.”’”+
23 Yehova atila: “Uwa mano eitakishisha pa mano yakwe,+ kabili uwa maka eitakishisha pa maka yakwe.+ No wa fyuma na o eitakishisha pa fyuma fyakwe.”+
24 “Lelo umuntu uuleitakisha aitakishishe pa kwiluka+ no kwishiba ine, ukuti nine Yehova,+ uwaba no luse ulukalamba, ubulungi no bulungami mwi sonde;+ pantu ifi fintu e fyo nsekelamo,”+ e fyasosa Yehova.
25 “Moneni! inshiku shileisa,” e fyasosa Yehova, “ilyo nkalubulwisha onse uwasembululwa lelo uwaba kwati tasembululwa,+ 26 nkalubulwisha Egupti+ na Yuda+ na Edomu+ na bana ba kwa Amone+ na Moabu+ na bonse ababeya umushishi wa mu nsensematwi abaikala mu matololo;+ pantu inko shonse tashasembululwa, na ba mu ng’anda ya kwa Israele bonse tabasembululwa mu mutima.”+