1 Imilandu
22 E lyo Davidi atile: “Iyi e ng’anda+ ya kwa Yehova Lesa wa cine, kabili ici e ciipailo+ bakatuulilapo amalambo ya koca aya bena Israele.”
2 Davidi nomba asosele ukuti balonganike abalebeshi+ abali mu calo ca Israele, kabili abacitile ukuba aba kuputula amabwe+ pa kuti baleputula amabwe+ ya kukuulila ing’anda ya kwa Lesa wa cine. 3 Kabili Davidi apekenye ifyela ifingi ifya kupangila imisomali ya fiibi fya mpongolo ne fya kwikatanya imbao, kabili no mukuba uwingi nga nshi ica kuti te kuti baupime ifyo wafinine,+ 4 kabili ne miti ya mikedari+ iishingapendwa; pantu abena Sidone+ na bena Turi+ baletele imiti ya mikedari iingi kuli Davidi. 5 Awe Davidi atile: “Solomone umwana wandi mwaice kabili talakosa,+ kabili ing’anda akakuulila Yehova ikaba iyapuulama+ nga nshi pa kuti ikawame+ ukucila amayanda yambi mu fyalo fyonse. Kanshi kamupekanishishe ifintu.” E ico Davidi ateyenye ifintu ifingi nga nshi ilyo ashilafwa.+
6 Kabili, aitile Solomone umwana wakwe pa kuti amwebe ukukuulila Yehova Lesa wa kwa Israele ing’anda. 7 Awe Davidi asosele kuli Solomone umwana wakwe ati: “Ine mu mutima+ wandi nafwaile ukukuulila ishina+ lya kwa Yehova Lesa wandi ing’anda. 8 Lelo icebo ca kwa Yehova caishile kuli ine, aciti, ‘Walisumya umulopa uwingi nga nshi,+ kabili walilwa inkondo ishikalamba.+ Tawakakuulile ishina lyandi ing’anda,+ pantu walisumya umulopa uwingi pe sonde ku cinso candi. 9 Mona! Ukafyala umwana umwaume.+ Ena akaba umuntu wa mutende, kabili abalwani bakwe bonse ababa mu mbali konse konse tabakalemucusha;+ pantu ishina lyakwe akenikwa Solomone,+ kabili nkabika pali Israele umutende+ no mutelelwe mu nshiku shakwe. 10 Ena e ukakuulila ishina+ lyandi ing’anda, kabili akaba umwana+ wandi, na ine nkaba wishi.+ Kabili nkapampamika icipuna ca bufumu+ bwakwe pa bena Israele umuyayaya.’
11 “Nomba, mwana wandi, Yehova abe nobe, kabili ukatunguluke no kukuula ing’anda ya kwa Yehova Lesa obe, nge fyo alanda pali iwe.+ 12 Shi Yehova nakupeele fye ukushilimuka no mucetekanya,+ kabili nakupeele icipope ca pa bena Israele pa kuti ulesunga amafunde ya kwa Yehova Lesa obe.+ 13 Nga wacita ifyo ukatunguluka+ nga wabombesha ukukonka ifipope+ no bupingushi+ ubo Yehova apeele+ Mose pa kuti abena Israele balekonka. Shipa kabili kosa.+ Witiina+ nelyo ukututuma.+ 14 Kabili ilyo nalecula+ nateyanishishe ing’anda ya kwa Yehova amatalanti ya golde+ amakana umwanda (100,000) na matalanti ya silfere milioni umo (1,000,000), kabili umukuba+ ne fyela+ tafingapendwa pantu fingi nga nshi; ne miti na mabwe naliteyanya, lelo ukalundapo. 15 Kabili naukwata ababomfi abengi aba kubomba umulimo, aba kuputula amabwe na babomfi abaishiba amabwe+ ne miti na onse uwacenjela mu mulimo onse.+ 16 Golde, silfere no mukuba ne fyela takuli inshila ya kufipendelamo.+ Ima no kubomba,+ kabili shi Yehova abe na iwe.”+
17 Kabili Davidi aebele bacilolo bonse aba kwa Israele ukwafwa Solomone umwana wakwe, ati: 18 “Bushe Yehova Lesa wenu tali na imwe,+ kabili bushe tamupeela ukutuusha konse fye?+ Pantu alipeela mu minwe yandi abekashi ba mu calo, kabili icalo calicimfiwa pa ntanshi ya kwa Yehova+ na ku bantu bakwe. 19 Nomba bikeni imitima yenu ne myeo+ yenu ku kwipusha kuli Yehova Lesa wenu,+ kabili imeni no kukuula incende ya mushilo+ iya kwa Yehova Lesa wa cine,+ pa kuti muletemo icipao+ ca cipangano ica kwa Yehova ne fipe fya mushilo ifya kwa Lesa wa cine ku ng’anda iilekuulilwa ishina+ lya kwa Yehova.”