106 Lumbanyeni Jah!+
Tooteleni Yehova, pantu musuma;+
Pantu icikuuku cakwe ca muyayaya.+
2 Nani engalumbula imilimo ya maka iya kwa Yehova,+
Nangu uwingalenga ukumulumbanya kumfwike?+
3 Balipaalwa ababa no mulinganya,+
Abacita ubulungami inshita yonse.+
4 Mwe Yehova, mukanjibukishe ilyo mukacitila abantu benu ubusuma.+
Munsunge no kumpususha,+
5 Pa kuti mone ubusuma bwenu ku basalwa benu,+
Pa kuti nsaminwe mu kusekelela kwa luko lwenu,+
Pa kuti njitakishishe pamo na bantu benu.+
6 Natubembuka nge fyabembwike bashifwe;+
Natulufyanya; natubifya.+
7 Bashifwe mu Egupti,
Tabailwike imilimo yenu iyapesha amano.+
Tabaibukishe ifyo icikuuku cenu cakula,+
Lelo balimusangukile pali bemba, pali Bemba Wakashika.+
8 Awe alibapuswishe pa mulandu we shina lyakwe,+
Pa kuti alenge amaka yakwe ukwishibikwa.+
9 Akalipile Bemba Wakashika, na o aile alekama;+
Kabili abenseshe mu menshi ayashika kwati alebensha mu matololo;+
10 E fyo abapokolwele mu minwe ya wabapata+
No kubalubula mu minwe ya mulwani.+
11 E lyo amenshi yabwelele no kwibisha abalwani babo;+
Tapaapuswike nangu umo.+
12 E lyo nomba batetekele icebo cakwe.+
Batendeke ukwimba ulwa kumulumbanya.+
13 Awe balabile bwangu ifyo acitile;+
Tabapembelele ukuti abapande amano.+
14 Lelo ulunkumbwa lwa bukaitemwe lwaishilemoneka ilyo bali mu matololo+
Kabili baeseshe Lesa mu ciswebebe.+
15 Na o abapeele ico balombele+
No kutuma ubulwele bwa kondoloka mu mibili yabo.+
16 Awe batendeke ukufimbila Mose mu nkambi,+
Kumo na Aarone uwa mushilo wa kwa Yehova.+
17 E lyo umushili walepwike no kumina Datani,+
Washiikile no lukuta lwa kwa Abiramu.+
18 No mulilo waile ulepya mu lukuta lwabo;+
Kabili ulubingu lwaocele ababifi.+
19 Kabili, bapangile umwana wa ng’ombe mu Horebu+
No kukontamina icimpashanya icaengwa,+
20 Ica kuti pa bukata bwandi bapyanikepo+
Icimpashanya ca ng’ombe iilume, iilya fye umulemfwe.+
21 Balabile Lesa, Umupusushi wabo,+
Uwacitile ifikalamba mu Egupti,+
22 Ifipesha amano mu calo ca kwa Hamu,+
Ne fya kutiinya pali Bemba Wakashika.+
23 Kabili nga te Mose uwasalwa wakwe,
Uwashipile no kwiminina pa kati ka kwa Lesa na bena Israele,+
Ku kubwesha ubukali bwakwe ukuti ebonaula,+
kwashele fye panono nga alibonaula,+
24 Awe basuulile icalo cilya icisuma;+
Tabatetekele icebo cakwe.+
25 Baikalile fye ukuilishanya mu matenti yabo;+
Tabaumfwile kwi shiwi lya kwa Yehova.+
26 E ico aimishe ukuboko kwakwe no kulapa,+
Ukuti akabepaila mu matololo,+
27 No kuti abana babo aali no kubepaila mu nko,+
No kuti akabasalanganishisha mu fyalo.+
28 Awe batendeke ukupepa Baali wa ku Peore+
No kulya amalambo ayo baaletuulila abafwa.+
29 Apo balemukalifya ku micitile yabo,+
Mwaponene icikuko mu kati kabo.+
30 Ilyo Finehasi aimine no kubombelapo,+
E lyo icikuko caputwike.
31 Kabili pali ici acitile alemonwa ukuti mulungami
Ku nkulo ne nkulo umuyayaya.+
32 Na kabili, balimukalifye pa menshi ya ku Meriba,+
Ica kuti Mose alibipiilwe pa mulandu wabo.+
33 Pantu bakalifye umutima wakwe
Na o talamine imilomo yakwe mu kusosa.+
34 Tabaonawile inko,+
Nge fyo Yehova abebele.+
35 Lelo batobenkene ne nko shimbi.+
No kusambilila imicitile ya shiko.+
36 Kabili balebombela utulubi twa shiko,+
No tu twaishileba iciteyo kuli bena.+
37 Kabili baletuula abana babo abaume+
Na bana babo abanakashi ku kuba amalambo ku fibanda.+
38 E fyo baalesumya umulopa wa kaele,+
Umulopa wa bana babo abaume no wa bana babo abanakashi,
Abo baletuula ku tulubi twa bena Kanaani;+
Ne calo caishilekowela pa mulandu wa kusuumya umulopa.+
39 E fyo imicitile yabo yabalengele ukukowela+
Kabili baalecita bucilende.+
40 No bukali bwa kwa Yehova bwaishile pa bantu bakwe,+
Kabili aishilepata icikwatwa cakwe.+
41 Kabili libili libili alebapeela mu minwe ya nko,+
Pa kuti ababapata balebateka,+
42 No kuti abalwani babo balebacusha,
Kabili bainashishe kuli bena.+
43 Imiku iingi alebapokolola,+
Lelo abene balemupondokela pa mulandu wa bucintomfwa bwabo,+
Kabili pa mulandu wa membu shabo baalesaalulwa.+
44 Kabili alemona ukucula kwabo+
Nga aumfwa ukupapaata kwabo.+
45 Kabili aleibukisha icipangano acitile pali bena,+
No kubalangulukila pa mulandu wa kufulisha kwa cikuuku cakwe.+
46 Kabili alelenga abaalebasenda bunkole
Ukubomfwila uluse.+
47 Tupususheni, Mwe Yehova Lesa wesu,+
Kabili tulonganikeni pamo ukufuma mu nko+
Pa kuti tutootele ishina lyenu ilya mushilo,+
No kuti tumulumbanye ne nsansa.+
48 Acindikwe Yehova Lesa wa kwa Israele+
Ukufuma umuyayaya no kuya umuyayaya;
Na bantu bonse batile Ameni.+
Lumbanyeni Jah!+