Yeremia
24 E lyo Yehova anengele ukumona, kabili, moneni, imiseke ibili iya makunyu naitekwa pa ntanshi ye tempele lya kwa Yehova, ninshi Nebukadresari imfumu ya ku Babiloni nasenda muli bunkole Yekonia+ mwana Yehoyakimu,+ imfumu ya kwa Yuda, na bacilolo ba kwa Yuda, na bacenjela mu fya kupangapanga+ na bakakuula ba mpungu, ukubafumya ku Yerusalemu no kubatwala ku Babiloni.+ 2 Mu museke umo mwali amakunyu ayasuma nga nshi, kwati makunyu ya mu kubangilila;+ e lyo mu museke umbi mwali amakunyu ayabipa nga nshi, ica kuti te kuti umuntu ayalye pa mulandu wa kubipa.
3 E lyo Yehova atile kuli ine: “Cinshi ulemona, Yeremia?” Na ine natile: “Makunyu, kabili amakunyu ayasuma yali ayasuma nga nshi, na yabipa yali ayabi nga nshi, ica kuti te kuti umuntu ayalye pa mulandu wa kubipa.”+
4 E lyo icebo ca kwa Yehova caishile kuli ine no kutila: 5 “Yehova Lesa wa kwa Israele atila, ‘Nkasakamana bwino bankole ba kwa Yuda, abo nkafumya mu cifulo ici no kubatwala ku calo ca bena Kaldi.+ Nkabasakamana nga makunyu aya ayasuma.+ 6 Kabili nkabalolesha bwino,+ no kubalenga bakabwele kuli cino calo.+ Nkabakuula, kabili nshakababongolole; nkabalimba, kabili nshakabanukule.+ 7 Nkabapeela no mutima wa kunjishiba,+ ukuti nine Yehova; na bo bakaba abantu bandi,+ na ine nkaba Lesa wabo, pantu bakabwelela kuli ine no mutima wabo onse.+
8 “‘Kabili ukupala amakunyu ayabipa ayo umuntu ashingalya pa mulandu wa kubipa,+ Yehova atila: “E fyo nkapeela Sidekia+ imfumu ya kwa Yuda na bacilolo bakwe na bashalapo mu Yerusalemu abakashala muli cino calo+ na baikala mu calo ca Egupti+— 9 kabili nkabalenga ukuba ica kututumya, ukuba ubucushi mu mabufumu yonse aya pe sonde,+ ukuba ica kusaalula, ica kulandapo mu nsoso sha manshoko, ica kupumya,+ kabili icitiipu+ mu ncende shonse isho nkabasalanganishishamo.+ 10 Kabili nkabatumina ulupanga,+ icipowe,+ ne cikuko,+ mpaka bakalobe mu calo ico nabapeele bena ne fikolwe fyabo.”’”+