Daniele
4 “Nebukadnesari imfumu atila, ku bantu na bantu bonse, ku ba nko ne ndimi abaikala mwi sonde lyonse, ati:+ Umutende wenu ufule.+ 2 Ifipesha amano ne fipapwa ifyo Lesa Uwapulamo abomba kuli ine, cawama ukuti mfilondolole.+ 3 Ifipesha amano fyakwe fyalikulisha nga nshi, ne fipapwa fyakwe fyalikula icine cine!+ Ubufumu bwakwe bufumu bwa muyayaya,+ no kuteka kwakwe kwa ku nkulo ne nkulo.+
4 “Ine, ne Nebukadnesari, nali umutelelwe+ mu ng’anda yandi kabili uwatunguluka mwi sano lyandi.+ 5 Kwali iciloto ico nalotele, kabili canengele ukutiina.+ Kabili ifya kwelenganya fya pa busanshi bwandi ne fimonwa fya mu mutwe wandi fyalintiinishe.+ 6 Awe nafumishe icipope ca kuti balete kuli ine aba mano bonse aba mu Babiloni, pa kuti banondolwele umwalolele iciloto.+
7 “E lyo baingile bashimapepo ba finjelengwe, bakabuka, abena Kaldi,+ na babukila ku ntanda;+ na ine nabalondolwelele iciloto, lelo bafililwe ukunjeba umo calolele.+ 8 Asukile Daniele aisa kuli ine, uo ishina lyakwe ni Belteshasari+ ukulingana ne shina lya kwa lesa+ wandi kabili uo umupashi wa balesa ba mushilo wabamo;+ kabili nalondolwele iciloto kuli ena, nati:
9 “‘We Belteshasari we mukalamba wa bashimapepo ba finjelengwe,+ pa kuti ine ninjishiba ukuti umupashi wa balesa ba mushilo waba muli iwe+ kabili inkama yonse tayayafya kuli iwe,+ unjebe ifimonwa fya ciloto candi ico nalotele no mo cilolele.+
10 “‘Kabili namwene+ ifimonwa fya mu mutwe wandi pa busanshi bwandi, kabili, moneni! kwali icimuti+ mu kati ke sonde, icitali nga nshi.+ 11 Icimuti calikulile no kukosa, kabili calilepele casuka cafika na ku muulu, kabili calemoneka ukufika ku mpela ya pano isonde ponse.+ 12 Amabula ya ciko yali ayasuma, ne fisabo fya ciko fyali ifingi, kabili mwali ifya kulya ifya nama fye shonse ishaleikalamo. Mwi samba lya ciko e mo inama+ sha mu mpanga shasangile icintelelwe,+ na mu misambo ya ciko e mo ifyuni fya mu lwelele fyaleikala,+ kabili ifya mweo fyonse fyaleliishiwa kuli cena.
13 “‘Nakonkenyepo ukumona mu fimonwa fya mu mutwe wandi pa busanshi bwandi, kabili, moneni! kalinda,+ uwa mushilo,+ aleika mu muulu. 14 Alebilikisha, no kutila: “Temeni icimuti,+ no kuputulako imisambo. Pululeniko amabula, no kupasa ifisabo fya ciko. Inama shifulumuke mwi samba lya ciko, ne fyuni mu misambo ya ciko.+ 15 Lelo icishiki ca cimuti, lekeni cishale mu mushili, kabili cikakweko icipaafya ca cela no mukuba, mu cani ca mu mpanga; kabili umume wa mu muulu ucibomfye, kabili cilelya umulemfwe wa pa nshi pamo ne nama.+ 16 Umutima wa ciko waluke ufume mu buntunse kabili cipeelwe umutima wa nama,+ ne nshita cinelubali (7)+ shipitepo. 17 Icipope ca bakalinda,+ kabili amashiwi ya ba mushilo ya kuti, aba mweo beshibe ukuti Uwapulamo e uteka mu bufumu bwa bantunse+ kabili abupeela ku o atemenwe,+ no kubikapo umulanda wapelekeshako mu bantunse.”+
18 “‘Ici e ciloto ico ine, ne Mfumu Nebukadnesari, nalotele; e ico nomba we Belteshasari, londolola umo cilolele, pantu aba mano bonse aba mu bufumu bwandi balifilwa ukunondolwela umwalola iciloto.+ Lelo iwe walifikapo, pantu umupashi wa balesa ba mushilo waba muli iwe.’+
19 “E lyo Daniele, uo ishina lyakwe ni Belteshasari,+ apeshiwe amano pa kashita kanono, na matontonkanyo yakwe yalimutiinishe.+
“Imfumu yayankwile Daniele aiti, ‘We Belteshasari, wileka iciloto nangu umo cilolele fikutiinye.’+
“Belteshasari alyaswike no kutila, ‘Mwe shikulu, iciloto cibe ku bamupata, no kwilulwa kwa ciko ku balwani benu.+
20 “‘Icimuti ico mwamwene, icakulile no kukosa ica kuti calilepele ukufika na ku muulu kabili icamoneke mwi sonde lyonse,+ 21 na mabula ya ciko ayali ayasuma, ne fisabo fya ciko ifingi, umwali ne fya kulya fya nama fye shonse; mwi samba lya ciko umwaikele inama sha mu mpanga, na mu misambo ya ciko umwaikele ifyuni fya mu lwelele,+ 22 ni mwe, mwe mfumu,+ pantu mwalikula no kukosa, kabili bukatebebe bwenu bwalikula bwafika na ku muulu,+ no kuteka kwenu kwafika ku mpela ya pano isonde.+
23 “‘Kabili apo imfumu yamwene kalinda, uwa mushilo,+ aleika mu muulu, no kutila: “Temeni icimuti, no kuconaula. Lelo, icishiki ca ciko lekeni cishale mu mushili, kabili cikakweko icipaafya ca cela no mukuba, mu cani ca mu mpanga, kabili umume wa mu muulu ucibomfye, kabili cilelya pamo ne nama sha mu mpanga, shikasuke inshita cinelubali (7) ashipita pali cena,”+ 24 umu e mulolele iciloto, mwe mfumu, kabili ici e cipope+ ca Wapulamo+ icikaponena pali shikulu imfumu.+ 25 Imwe mukatamfiwa pa bantu, na ku nama sha mu mpanga e kukaba ubwikalo bwenu,+ mukalalya no mulemfwe nge ng’ombe ishilume;+ kabili umume wa mu muulu ukamubomfya, ne nshita cinelubali (7)+ shikapita pali imwe, mukasuke amwishiba ukuti Uwapulamo e uteka mu bufumu bwa bantu,+ kabili abupeela ku o atemenwe.+
26 “‘Kabili apo batile icishiki ca cimuti+ cishale, ubufumu bwenu bukabweshiwa kuli imwe pa numa ya kwishiba ukuti imyulu e iteka.+ 27 E ico, mwe mfumu, umfweni ifyo ine nalamupandako amano,+ kabili fumyeni imembu shenu pa kucita ubulungami,+ ne filubo fyenu mufifumyepo pa kuba no luse ku balanda.+ Nalimo ubucindami bwenu kuti bwatantalila.’”+
28 Fyonse ifi fyaponene pali Nebukadnesari imfumu.+
29 Ku mpela ya myeshi ikumi na ibili (12), ale-enda pa mutenge we sano lya mu Babiloni. 30 Imfumu yalyankwile no kutila:+ “Bushe uyu te Babiloni Mukalamba, uo ine nakuula ku kuba ing’anda ya bufumu ku maka+ yandi ayakalamba kabili ku kuba ubukata bwa kucindama kwandi?”+
31 Ilyo imfumu tailapwa no kulanda ifi, kwafumine ishiwi mu muulu, aliti: “Cilesoswa kuli iwe, we Nebukadnesari imfumu, ukuti ‘Ubufumu bobe nabufuma pali iwe,+ 32 kabili uletamfiwa pa bantu, kabili wakulaikala ne nama sha mu mpanga.+ Ukalalya umulemfwe nge ng’ombe, ne nshita cinelubali (7) shikapita pali iwe, ukasuke awishiba ukuti Uwapulamo e wakwata amaka pa mabufumu ya bantu, kabili ayapeela ku o atemenwe.’”+
33 Mu nshita ilya ine+ amashiwi yalifikilishiwe pali Nebukadnesari, kabili balimutamfishe pa bantu, atampile no kulya umulemfwe nge ng’ombe, kabili umubili wakwe wabombele ku mume wa mu muulu, wasuka umushishi wakwe wakula waba nga masako ya kwa kapumpe, ne ngala shakwe shaba nge sha cuni.+
34 “Kabili ku mpela ya nshiku isho,+ ine ne Nebukadnesari, nainwine amenso yandi mu muulu,+ e lyo amano yandi yabweleele kuli ine; kabili nacindike Uwapulamo,+ natashishe no kucindika Uwabako umuyayaya,+ pantu ukuteka kwakwe kuteka kwa muyayaya no bufumu bwakwe bwa ku nkulo ne nkulo.+ 35 Kabili abekashi ba pano isonde bonse abamona aba fye,+ kabili acita ukulingana no kufwaya kwakwe ku fya mu muulu na ku bekashi ba pano isonde.+ Kabili takuli uwingalesha ukuboko+ kwakwe nelyo ukutila kuli ena, ‘Cinshi ico ulecita?’+
36 “Muli ilya ine inshita, amano yandi yalibwelele muli ine, kabili pa kuti ubufumu bwandi bube no bukata, ukucindama kwandi no kuyemba kwandi fyabweleele kuli ine;+ kabili abakalamba ba bacilolo bandi aba ku bufumu na bakankaala bandi balamfwayafwaya, kabili nabweshiwe cipya cipya pa bufumu bwandi, no bukulu ubwapesha amano bwalilundilweko kuli ine.+
37 “Nomba ine, ne Nebukadnesari, ndetasha no kusansabika no kucindika Imfumu ya mu muulu,+ pantu imibombele ya iko yonse ya cishinka ne mibele ya iko ya mulinganya,+ kabili abenda mu matutumuko ilabaceefya.”+