Daniele

3 Nebukadnesari imfumu apangile icimpashanya+ ca golde, icalepele imikono amakumi mutanda (60) kabili icali imikono mutanda (6) mu bwipi. Aciimike mwi lungu lya Dura, mu citungu ca bulashi ica Babiloni.+ 2 E lyo Nebukadnesari imfumu atumine ku kulonganya aba kucingilila ubufumu, bakapitao+ na balashi, bakabilo, abasunga icuma, abapingushi,+ abasole na bakalamba bonse aba mu fitungu fya bulashi pa kuti bese mu kusefya+ icimpashanya ico Nebukadnesari imfumu aimike.

3 E lyo abacingilila ubufumu,+ bakapitao, abalashi, bakabilo, abasunga icuma, abapingushi, abasole na bakalamba bonse aba mu fitungu fya bulashi balongene ku kusefya icimpashanya ico Nebukadnesari imfumu aimike, kabili baiminine pa ntanshi ya cimpashanya ico Nebukadnesari aimike. 4 E lyo kabila+ abilikishe, ati: “Kuli imwe kulesoswa, mwe bantu na bantu, aba nko ne ndimi,+ 5 ilyo mwaumfwa ukulila kwa ntandala, icimpeeta, isese, nsango, icilimba ca nsale, icimpeeta ca nyambi ne misango yonse iya filimba,+ muwe pa nshi no kupepa icimpashanya ca golde ico Nebukadnesari imfumu emike. 6 Kabili uushawe pa nshi no kupepa,+ apo pene fye+ alapooswa mu kati ke lungu lya mulilo uulebilima.”+ 7 E ico, ilyo abantu bonse baumfwile ukulila kwa ntandala, icimpeeta, isese, nsango, icilimba ca nsale ne misango yonse iya filimba, bonse bawile pa nshi abantu na bantu,+ aba nko ne ndimi, balapepa icimpashanya ca golde ico Nebukadnesari imfumu aimike.

8 E ico, mu nshita ilya ine abena Kaldi bamo balipaleme no kusoselela abaYuda.+ 9 Baebele Nebukadnesari imfumu, abati: “Mwe mfumu, beni no mweo umuyayaya.+ 10 Imwe mwe mfumu, mwapangile ifunde ilya kuti umuntu onse uwaumfwa ukulila kwa ntandala, icimpeeta, isese, nsango, ifilimba fya nsale, ne cimpeeta ca nyambi ne misango yonse iya filimba,+ awe pa nshi no kupepa icimpashanya ca golde; 11 no kuti uushawe pa nshi no kupepa afwile ukupooswa mu kati ke lungu lya mulilo uulebilima.+ 12 Kuli abaYuda bamo abo mwasontele ukwangalila imilimo ya mu citungu ca bulashi ica Babiloni,+ e kutila Shadraki, Meshaki na Abednego; aba baume tabamubikako amano, mwe mfumu, tababombela balesa benu, ne cimpashanya ico mwaimika tabalecipepa.”+

13 E lyo Nebukadnesari, mu bukali na mu cipyu,+ asosele ukuti balete Shadraki, Meshaki na Abednego.+ Awe aba baume baletelwe ku cinso ca mfumu. 14 Nebukadnesari asosele kuli bena, ati: “Bushe ca cine, mwe Shadraki, Meshaki na Abednego, ukuti tamulebombela balesa bandi,+ ne cimpashanya ca golde ico naimika tamulecipepa?+ 15 Nomba imwe nga mwaiteyanya kabili ilyo mwaumfwa ukulila kwa ntandala, icimpeeta, isese, nsango, ifilimba fya nsale, icimpeeta ca nyambi ne misango yonse iya filimba,+ mwawa pa nshi no kupepa icimpashanya ico nacita, ninshi cawama. Lelo nga tamupepele, apo pene fye mulepooswa mu kati ke lungu lya mulilo uulebilima. Kabili ni lesa nshi uwingamupususha mu maboko yandi?”+

16 Shadraki, Meshaki na Abednego balyaswike, no kutila ku mfumu: “Mwe Nebukadnesari, tatuli na ca kumwasuka pali uyu mulandu.+ 17 Nga caba ifi, Lesa wesu uo tubombela ali na maka ya kutupokolola. Mwi lungu lya mulilo uulebilima kabili mu kuboko kwenu, mwe mfumu, ali no kutupususha.+ 18 Lelo nga tacite ifi, cishibikwe kuli imwe, mwe mfumu, ukuti balesa benu ifwe tatwababombele, na ku cimpashanya ca golde ico mwimike tatwapepeko iyo.”+

19 E lyo Nebukadnesari akalipe nga nshi, na pa menso palyalwike pa mulandu wa kufulilwa Shadraki, Meshaki na Abednego. Asosele ukuti bakafye ilungu, ukulikafya imiku cinelubali (7) ukucila ifyo lyalekafiwa. 20 Aebele na baume bamo aba maka+ aba mwi bumba lyakwe ilya bashilika ukukaka Shadraki, Meshaki na Abednego, pa kuti babapoose mwi lungu lya mulilo uulebilima.+

21 E lyo balya baume bakakilwe ninshi nabafwala ne nsalu shabo, amalaya yabo, insalu sha ku mutwe ne fya kufwala fyabo fimbi no kupooswa mu kati ke lungu lya mulilo uulebilima. 22 Pa mulandu wa kuti icipope ca mfumu cali icakaluka ne lungu lyalikabishe, balya baume abasendele Shadraki, Meshaki na Abednego e bo ulubingu lwa mulilo lwaipeye. 23 Lelo aba baume bambi batatu, Shadraki, Meshaki na Abednego, bawile nabakakwa mu kati ke lungu lya mulilo uulebilima.+

24 E lyo Nebukadnesari imfumu atiinine no kwima napapa nga nshi. Asosele kuli bacilolo ba kwi sano lyakwe, ati: “Bushe te baume batatu tupoosele nabakakwa mu kati ka mulilo?”+ Balyaswike imfumu abati: “Cine cine, mwe mfumu.” 25 Yalyaswike aiti: “Moneni! ndemona abaume bane nabakakulwa, bale-endauka mu kati ka mulilo, kabili tabapiile, kabili uwalenga bane alemoneka kwati mwana umwaume uwa balesa.”+

26 E lyo Nebukadnesari apaleme ku mwinshi we lungu lya mulilo uulebilima.+ Abilikishe ati: “Mwe Shadraki, Meshaki na Abednego, mwe babomfi ba kwa Lesa Uwapulamo,+ fumeni, mwise kuno!” E lyo Shadraki, Meshaki na Abednego bafumine mu kati ka mulilo. 27 Awe aba kucingilila ubufumu, bakapitao na balashi na bacilolo bakalamba+ aba mfumu abalongene bamwene balya baume, ukuti umulilo tawali na maka pa mibili yabo,+ no mushishi wa ku mitwe+ yabo tawababwike, ne nsalu shabo tashapiile ne mibili yabo tayanunkile umulilo nangu panono.

28 Nebukadnesari alyankwile no kutila: “Acindikwe Lesa wa kwa Shadraki, Meshaki na Abednego,+ uwacituma malaika+ wakwe no kupususha ababomfi bakwe abacimutetekela+ kabili abacalula amashiwi ya mfumu no kuitemenwa ukupeela imyeo yabo, pantu te kuti babombele+ nangu ukupepa+ lesa umbi nakalya kano fye Lesa wabo.+ 29 E ico ndepanga ifunde,+ ilya kuti abantu na bantu bonse, aba nko nelyo indimi abasosa icabipa pali Lesa wa kwa Shadraki, Meshaki na Abednego bakatungulwe ifilundwa,+ na mayanda yabo yakasangulwe ifimbusu fya cintubwingi;+ pantu takuli lesa umbi nakalya uwingapokolola ngo yu.”+

30 E lyo imfumu yalengele Shadraki, Meshaki na Abednego ukutunguluka mu citungu ca bulashi ica Babiloni.+