Mika
4 Nomba mu nshiku+ sha ku mpela, e mo ulupili+ lwa ng’anda+ ya kwa Yehova lukapampamikwa ukucila pa muulu wa mpili, kabili lukasumbulwa ukucila utupili;+ kabili inko shonse shikakonkomokelako.+ 2 Ne nko ishingi shikayako no kutila: “Iseni,+ natunine tuleya ku lupili lwa kwa Yehova, tuleya ku ng’anda ya kwa Lesa wa kwa Yakobo;+ kabili akatusambilisha imibele yakwe,+ kabili tukenda mu nshila shakwe.”+ Pantu mu Sione e mukafuma amafunde, ne cebo ca kwa Yehova cikafuma mu Yerusalemu.+ 3 Kabili akapingula pa kati ka bantu na bantu abengi,+ no kulungika+ imilandu ya nko sha maka isha kutali.+ Kabili bakafula impanga shabo ukuti shibe baplao, na mafumo yabo ukuti yabe ifya kutungwilako imiti.+ Kabili uluko talwakemishe uluko lunankwe ulupanga, nangu ukusambilila inkondo na kabili.+ 4 Kabili bakekala umuntu onse mwi samba lya mwangashi wakwe, na mwi samba lya mukunyu wakwe,+ tapakabe no wa kubatiinya;+ pantu akanwa ka kwa Yehova wa mabumba nakasosa.+
5 Pantu abantu bonse bakendela cila muntu mwi shina lya kwa lesa wakwe;+ lelo ifwe twakulaendela mwi shina lya kwa Yehova Lesa+ wesu umuyayaya umuyayaya.+
6 “Muli bulya bushiku,” e fyasosa Yehova, “nkalonganya abalesunta;+ nkalonganya na bo nasalangenye,+ na bo nacushishe. 7 Kabili nkalenga abalesunta ukuba abashalapo,+ na batwelwe ukutali nkabalenga ukuba uluko lwa maka;+ kabili Yehova akaba imfumu pali bena mu Lupili lwa Sione, ukufuma nomba no kufika ku nkulo ne nkulo.+
8 “Kabili na iwe, we lupungu lwa mpaanga, we lupili lwa mwana mwanakashi Sione,+ ukufika na kuli iwe bukesa ubuteko bwa ntanshi,+ ubufumu bwa mwana umwanakashi Yerusalemu.+
9 “Nomba mulandu nshi upundila?+ Bushe muli iwe tamwaba imfumu, nalimo bushe impanda mano yobe nailoba, ica kuti ukushikitika kwa kupaapa nakukwikata ngo kwa mwanakashi uulepaapa?+ 10 Shikitika no kunyongotoka, we mwana mwanakashi Sione, ngo mwanakashi uulepaapa,+ pantu nomba ukafuma mu musumba, no kuyaikala mu mpanga.+ Kabili ukayafika fye na ku Babiloni.+ Kulya e ko ukapokololwa.+ E ko Yehova akakulubula ukukufumya mu lupi lwa balwani bobe.+
11 “Nomba inko ishingi shikalonganina iwe, ashiti , ‘Nabe uwakowela, na menso yesu yaloleshe pali Sione.’+ 12 Lelo shena tashaishiba amatontonkanyo ya kwa Yehova, kabili tashailuka ukupanda amano kwakwe;+ pantu akabalonganika kwati myanshi ya ngano iyaputulwa nomba line pa kuti baitwale apa kupumina.+
13 “Ima no kupuula ingano, we mwana umwanakashi Sione;+ pantu ulusengo lobe nkalwalula ukuba icela, na mabondo yobe ukuba umukuba, kabili ukashonaula abantu abengi;+ kabili ukapeela kuli Yehova ubunonshi bwabo ubwa mu bucenjeshi,+ ne fyuma fyabo kuli Shikulu wa cine uwe sonde lyonse.”+