Yobo

15 E lyo Elifasi umwina Temani ayaswike no kutila:

 2 “Bushe uwa mano kuti ayasuka ukwishiba kwa mupu,+

Nelyo bushe kuti aisusha umwela wa ku kabanga mwi fumo lyakwe?+

 3 Ukukalipila fye ku mashiwi takwakaafwe kantu,

Ne fya kulanda fye tafyakacite nangu cimo.

 4 Lelo, iwe ni we ulenga akatiina ka kwa Lesa ukuba aka fye,

Ulenga bambi ukukanabika amano kuli Lesa.

 5 Pantu imembu shobe e shisambilisha akanwa kobe ifya kusosa,

Kabili usala ululimi lwa ncenjeshi.

 6 Akanwa kobe e kaleti uli mbifi, te ine iyo;

Ne milomo yobe e ilekushinina.+

 7 Bushe ni we wabalilepo ukufyalwa mwa,+

Nelyo bushe bakupangile ilyo utupili+ tushilabako?

 8 Bushe walyumfwa inkama ya kwa Lesa,+

Kabili bushe ni we weka we wakwata amano?

 9 Finshi waishiba ifyo ifwe tushaishiba?+

Finshi wailuka ifyo ifwe tushailuka?

10 Uwa mfwi no mukote bonse tuli na bo,+

Uwa nshiku ishingi ukucila wiso.

11 Bushe ifya kusansamusha fya kwa Lesa,

Nelyo amashiwi ya mutembo ayasoswa kuli iwe tafili ifyakumanina?

12 Cinshi ico umutima obe wapamina,

Kabili cinshi ico amenso yobe yabekela?

13 Pantu ulesosa ifya kukalipila Lesa,

No kufumya amashiwi mu kanwa kobe.

14 Bushe umuntunse umwina kufwa nani uwa kuti asanguluke,+

Nelyo onse uwafyalwa ku mwanakashi nani pa kuti alungame?

15 Mona! Tatetekela aba mushilo bakwe,+

Ne myulu na yo tayasanguluka mu menso yakwe.+

16 Pali bufi uwa bunani kabili uwapondama,+

Umuntu uunwa ubupondamishi nga menshi!

17 Ndekweba. Umfwa kuli ine!+

Ici e co namona, e ico leka nkushimikile,

18 Ico aba mano+ bashimika

Kabili ico bashafishile, apo ni bashibo bashimike.

19 Bena beka e bo bapeele icalo,

Kabili tamwapitile umbi umbi mu kati kabo.

20 Umubifi alunguluka fye inshiku shakwe shonse,

No wa lucu na o alunguluka fye inshiku shonse isha myaka yakwe.

21 Amatwi yakwe yomfwa fye ifilenga umwenso;

Mu nshita ya mutende e mo uupokolola ifipe amwingilila.+

22 Tasumina ukuti akabwela ukufuma mu mfifi,+

Kabili alelolela ukwisaipaiwa ku lupanga.

23 Alaseuluka ku kufwayafwaya ifya kulya—nga fili kwi?+

Alishiba bwino ukuti ubushiku bwa mfifi+ nabupalama.

24 Ubulanda ne nkumbabulili filamuletela umwenso;+

Filamucila amaka nge mfumu iipekenye ukusansa.

25 Pantu emisha ukuboko kwakwe kuli Lesa,

Kabili afwaya ukuikusha ukucila Uwa Maka Yonse;+

26 Pantu abutukila pali ena natalamika umukoshi,

Ne nkwela shakwe ishatikama;

27 Pantu abulumana pa menso ku kwina

No kulenga umusana wakwe ukwina,+

28 Ekala mu misumba iikaloba;

Mu mayanda umushakatwalilile ukwikala abantu,

Ayakashala ifitantaala.

29 Takabe umukankaala ne fyuma fyakwe tafyakafule,

Ne fyo anonka takafisalanganye pano isonde.+

30 Takafume mu mfifi;

Imisambo yakwe, ulubingu lukayumika,

Akasendwa ku mwela wa mupu wa kwa Lesa.+

31 Etetekela ica fye, ninshi alufiwa,

Pantu ica fye e cikaba icilambu cakwe;

32 Ilyo tabulaisa ubushiku bwakwe bakamulambula.

Na kamusambo kakwe takakabe akalelema.+

33 Akalukusha ifipompo fyakwe ifya mwangashi nge bala lya mwangashi,

No kuponya amaluba yakwe ngo muolife.

34 Pantu ulukuta lwa basangu lwaba nge ng’umba,+

Kabili umulilo ukoca amatenti ya ba mafisakanwa.+

35 Baimita ubucushi no kupaapa icabipa,+

Ne fumo lyabo liteyanya ubucenjeshi.”