Amose
3 “Umfweni amashiwi aya ayo Yehova asosa pali imwe,+ mwe bana ba kwa Israele, pali bonse aba mu lupwa ulo naninike ukufuma mu calo ca Egupti,+ ndetila, 2 ‘Ni mwe naishiba+ mweka pa ndupwa shonse isha pano nse.+ E mulandu wine nkamulubulwishisha pa membu shenu shonse.+
3 “‘Bushe abantu babili kuti baendela pamo nga tabapangene?+ 4 Bushe inkalamo kuti yabuluma mu mutengo nga taikwete ica kutaakanya?+ Bushe umusepela wa nkalamo kuti wabuluma mu bwikalo bwa uko nga tapali ifyo wikete? 5 Bushe icuni kuti cawila mu citeyo nga ca kuti tapali ubulyo?+ Bushe iciteyo cilafwampuka pa mushili apabula ifyo caikata? 6 Intandala nga yalila mu musumba, bushe abantu tabatutuma?+ Bushe nga kwapona ubucushi mu musumba, bushe ninshi te Yehova acitilepo cimo? 7 Pantu Shikulu Mulopwe Yehova tacita icintu nangu cimo kano abala asokolola inkama yakwe ku babomfi bakwe bakasesema.+ 8 Inkalamo naibuluma!+ Nani uushatiine? Shikulu Mulopwe Yehova nasosa! Nani uushaseseme?’+
9 “‘Sabankanyeni mu mayanda ya pa malinga aya mu Ashidode na mu mayanda ya pa malinga aya mu calo ca Egupti,+ no kutila: “Longaneni pamo pa kuti mulwishe impili sha Samaria,+ no kumona ifimfulunganya ifingi mu kati kakwe ne milandu ya lufyengo iili muli ena.+ 10 Kabili tabaishiba ukucita icalungama,”+ e fyo asosa Yehova, “abatutila ubunkalwe+ no kusampa ifipe mu mayanda yabo aya pa malinga.”’
11 “E ico Shikulu Mulopwe Yehova atila, ‘Kuli no mulwani mu kati ka calo,+ akakupoka na maka yobe, na mayanda yobe aya pa malinga yakapokwa.’+
12 “Yehova atila, ‘Filya fine umucemi asompola mu kanwa ka nkalamo amolu yabili nelyo icipimfya ca kutwi,+ e fyo na bana ba kwa Israele bakasompolwa, abaikala mu Samaria pa ca kwikalapo+ ica bukankaala na pa musengele wa bena Damaseke.’+
13 “‘Umfweni no kushimika ubunte+ mu ng’anda ya kwa Yakobo,’ e fyo Shikulu Mulopwe Yehova, Lesa wa mabumba asosa. 14 ‘Pantu mu bushiku nkalubulwisha+ Israele pa kupondoka kwakwe, nkalubulwisha ne fiipailo fya ku Betele;+ ne nsengo sha ku ciipailo shikaputaulwa no kuponena pa nshi.+ 15 Nkabongolola ne ng’anda+ ya mu nshita ya mpepo pamo ne ng’anda ya mu lusuba.’+
“‘Na mayanda ya meno ya nsofu yakaloba,+ kabili amayanda ayengi yakaloba,’+ e fyasosa Yehova.”