Yeremia

51 Yehova atila: “Moneni, ndeleta umwela+ wa konaula Babiloni+ na bekashi ba mu Lebe-kamai; 2 kabili nkatuma kuli Babiloni aba kwela, na bo bakamwela no kusha icalo cakwe icibolya;+ pantu bakamulwisha konse konse mu bushiku bwa bucushi.+

3 “Uwaishiba ukubomfya ubuta ebomfya+ ubuta iyo. Umuntu nangu umo eiminina ne ca kucinga icifuba.

“Kabili mwi-ikatilwa abalumendo bakwe uluse.+ Onauleni abashilika bakwe bonse.+ 4 Bakawa no kufwila mu calo ca bena Kaldi+ no kubapushamo ifumo mu misebo yakwe.+

5 “Pantu Israele na Yuda+ tabalekeleshiwa nga mukamfwilwa kuli Lesa wabo, kuli Yehova wa mabumba.+ Pantu icalo ca bena Kaldi caliba no mulandu ukulingana no kumona kwa Wa Mushilo wa kwa Israele.+

6 “Fulumukeni muli Babiloni,+ kabili pususheni cila muntu umweo wakwe.+ Mwifwila pa filubo fyakwe.+ Pantu ni nshita ya cilandushi ca kwa Yehova.+ Alecita kuli ena ifyo acitile.+ 7 Babiloni ni kapu ya golde mu minwe ya kwa Yehova,+ kabili alelenga inko shonse isha pe sonde ukukolwa.+ Inko shalinwa umwangashi wakwe.+ E mulandu wine inko shicitila nge shapena.+ 8 Babiloni nawa mu kupumikisha, kabili nabongoloka.+ Lileni imisowa pali ena, mwe bantu.+ Mutwalileni balsamu wa kunashako ubukali bwakwe.+ Napamo kuti apola.”

9 “Nga twalyundapa Babiloni, lelo tapola nakalya. Musheni,+ natubwelele cila muntu ku calo cakwe.+ Pantu ubupingushi bwakwe nabufika na ku muulu, nabunina ukufika na mu makumbi.+ 10 Yehova natuletela imilimo ya bulungami.+ Tuleyeni tulondolole mu Sione umulimo wa kwa Yehova Lesa wesu.”+

11 “Nooneni imifwi.+ Kabili fisameni mu nkwela. Yehova naimya imitima ya shamfumu sha bena Madai,+ pantu alefwaya ukucita Babiloni akantu,+ pa kuti amonaule. Pantu cilandushi ca kwa Yehova, ica kulandwila itempele lyakwe.+ 12 Imyeni icishibilo+ pa malinga ya Babiloni. Koselesheni ubulinde. Bikeni abalinshi.+ Teyanyeni aba kubelamina.+ Pantu Yehova natontonkanyapo kabili akacita ifyo alandile pa bekashi ba mu Babiloni.”+

13 “We mwanakashi we waikala pa menshi ayengi,+ we wakwata ifyuma ifingi,+ impela yobe naifika, e lyo ne nshita+ yobe iya kuleka ukupanga icuma naifika.+ 14 Yehova wa mabumba nailapa umwine+ ati, ‘Nkesusha abantu muli imwe, nga makanta,+ na bo bakakuwela.’+ 15 E wapanga isonde ku maka+ yakwe, e wapampamike icalo+ mu mano+ yakwe, kabili e wayansa imyulu+ ku mucetekanya+ wakwe. 16 Kwi shiwi lyakwe fye, amenshi yalabulukuta mu muulu, kabili alenga fubefube ukwima ukufuma ku mpela ye sonde.+ Alipanga ne fipunda fya kufuminamo imfula,+ kabili alenga umwela ukufuma mu fya kututila fyakwe. 17 Umuntu onse acita ubuwelewele ica kuti taishiba.+ Kafula wa cela onse akomfwa insoni pa cimpashanya cakwe icabaswa;+ pantu icimpashanya cakwe icaengwa ca bufi,+ kabili tamwaba umupu muli fyena.+ 18 Fya fye,+ kabili fya kutumpika.+ Mu nshita ya kukandwa kwa fiko, fikaloba.+

19 “Lesa wa kwa Yakobo ena taba nge fi iyo,+ pantu e Kapanga wa fyonse,+ kabili inkonto ya bupyani bwakwe.+ Ishina lyakwe ni Yehova wa mabumba.”+

20 “Uli nkonto yandi, kabili ifyanso fyandi ifya bulwi,+ kabili kuli iwe e ko nkatobawila inko, kabili kuli iwe e ko nkonawila amabufumu. 21 Kuli iwe e ko nkatobawila kabalwe no waninapo, kabili kuli iwe e ko nkatobawila iceleta lya nkondo no waninapo.+ 22 Kuli iwe e ko nkafwantawila umwaume no mwanakashi onse, kabili kuli iwe e ko nkatobawila umukote no mwaice, kabili kuli iwe e ko nkatobawila umulumendo na nacisungu. 23 Kuli iwe e ko nkatobawila umucemi ne mpaanga shakwe, kabili kuli iwe e ko nkatobawila umulimi ne nama shakwe isha kwi koli, kabili kuli iwe e ko nkatobawila abalashi ne nkonkani shabo. 24 Kabili nkabwesesha pali Babiloni na pa bekashi bonse aba mu calo ca Kaldi ububi bonse ubo bacita mu Sione pa menso yenu,”+ e fyasosa Yehova.

25 “Mona, nkakulwisha,+ we lupili lwa bonaushi,”+ e fyasosa Yehova, “we waonaula isonde lyonse;+ kabili nkatambalika ukuboko kwandi pali iwe no kukukunkulusha ukufuma pa fimabwe no kukulenga ukuba ulupili ulwapya.”+

26 “Kabili abantu tabakabuule muli iwe ilibwe lya pa koona nangu ilibwe ilya kubika mu mufula wa kukuulapo,+ pantu ukaba icibolya umuyayaya,”+ e fyasosa Yehova.

27 “Imyeni icishibilo mu calo, mwe bantu.+ Lisheni intandala mu nko. Pekanyeni+ inko shiye ku kumulwisha. Iteni ubufumu bwa Ararati,+ no bwa Manai, no bwa Ashikenasi+ ku kuyamulwisha. Ebeni no mukalamba wa kulemba abashilika ukuti amwimine. Lekeni bakabalwe+ baye nga makanta wa myunga. 28 Pekanyeni inko shiye ku kumulwisha, ishamfumu sha ku calo ca Madai+ na balashi ba ciko ne nkonkani sha ciko shonse ne cifulo conse ico bateka. 29 Kabili isonde nalitenkane no kukalipwa nga nshi,+ pantu Yehova aletontonkanya ukucita Babiloni akantu ukuti alenge Babiloni ukuba ica kupapa, umushakabe umwikashi.+

30 “Impalume sha mu Babiloni nashileka ukulwa. Shikele fye umwa kufisama. Amaka ya shiko nayapwa.+ Shili nga banakashi.+ Amekalo yakwe bayasonteka umulilo. Imipindo yakwe naikontaulwa.+

31 “Inkombe ya lubilo imo yabutuka no kukumanya inkombe ya lubilo imbi, kabili uwa mbila umo abutuka no kukumanya uwa mbila umbi,+ ku kuyaeba imfumu ya mu Babiloni ukuti umusumba wa iko onse naupokwa,+ 32 ne fyabu nafipokwa,+ naboca na mato ya macinda mu mulilo, na baume ba bulwi nabasakamikwa.”+

33 Pantu Yehova wa mabumba, Lesa wa kwa Israele, atila: “Umwana mwanakashi Babiloni aba nga pa kupumina ingano.+ Ni nshita ya kumunyantaula nga nshi. Lelo pashala panono, e lyo inshita ya kumulobolola ikesa.”+

34 Nebukadresari imfumu ya ku Babiloni nandya;+ nanenga ukuba ne cimfulumfulu. Nanteka kwati cipe umwabula akantu. Aminine ine kwati cisoka icikalamba;+ naikuta ifisuma fyandi mwi fumo lwakwe. Kabili nansangulula. 35 ‘No mwikashi wa mu Sione akasosa ati, ‘Ubunkalwe ubwacitwa pali ine na pa mubili wandi nabube pali Babiloni!’+ Kabili Yerusalemu akasosa ati, ‘Umulopa wandi naube pa bekashi ba mu Kaldi!’”+

36 E ico Yehova asosa ati: “Moneni, nkamulubulwilako,+ kabili nkamukandilako.+ Nkakamya na bemba wakwe, kabili nkakamya ne fishima fyakwe.+ 37 Kabili Babiloni akaba imiina ya mabwe,+ umwa kwikala bamumbwe,+ ica kupapa kabili ica kulishishapo umunsoli, umushakabe umwikashi.+ 38 Bonse bakabuluma nge misepela ya nkalamo. Kabili bakabuluma nga bana ba nkalamo.”

39 “Lilya bakomfwa bwino, nkabapekanishisha imitebeto no kubalenga ukukolwa, pa kuti bakasansamuke;+ kabili bakalaala utulo twa muyayaya, kabili tabakashibuke nakalya,”+ e fyasosa Yehova. 40 “Nkabatwala nge mpaanga ku kwipaiwa, kwati ni basukusuku pamo na basawe.”+

41 “Iye, ifyo Sheshaki bamucimfya,+ kabili ifyo Ululumbi lwa pe sonde lyonse balupoka!+ Iye, ifyo Babiloni asanguka ica kupapa mu nko!+ 42 Bemba napita pali Babiloni. Amabimbi ya bemba ayengi nayafimba Babiloni.+ 43 Imisumba yakwe naisanguka ica kupapa, isangwike icalo ca cilala kabili iciswebebe.+ Imisumba ikaba nge calo umushakekale umuntu nangu umo, kabili tamwakapite umuntu nangu umo.+ 44 Kabili nkakanda Bele*+ mu Babiloni, kabili nkafumya mu kanwa kakwe ifyo aliile.+ Ne nko tashakaye kuli ena na kabili.+ Ilinga lya Babiloni na lyo likawa.+

45 “Fumeni muli ena, mwe bantu bandi,+ kabili pususheni cila muntu umweo wakwe+ ku bukali bwa kwa Yehova ubulepya ngo mulilo.+ 46 Nga te ifyo, ninshi imitima yenu ikekatwa umwenso,+ kabili mukatiina pa mulandu wa mbila iikomfwika mu calo. Kabili imbila ikesa mu mwaka fye umo, e lyo mu mwaka umbi pakakonka imbila no bunkalwe mwi sonde kabili kateka akemina kateka. 47 E ico moneni! inshiku shileisa, ilyo nkakanda ifimpashanya ifyabaswa ifya mu Babiloni;+ ne calo cakwe conse cikekatwa insoni, na baipaiwa bakwe bonse bakawila mu kati kakwe.+

48 “Kabili imyulu ne sonde na fyonse ifyabamo fikaula no kusekelela pali Babiloni,+ pantu aba konaula bakesa pali ena ukufuma ku kapinda ka ku kuso,”+ e fyasosa Yehova. 49 “Babiloni alengele abaipaiwa ba kwa Israele ukuwa,+ kabili Babiloni alengele fye na baipaiwa ba pe sonde ponse ukuwa.+

50 “Mwe bafyuka ku lupanga, akuyeni. Mwi-iminina iyo.+ Ibukisheni Yehova ilyo muli ukutali,+ kabili ibukisheni Yerusalemu mu mitima yenu.”+

51 “Tuli ne nsoni,+ pantu natumfwa umuseebanya.+ Kabili tuli ne nsoni pa finso fyesu,+ pantu abantu bambi bambi nabesa ku kulwisha ififulo fya mushilo ifya mu ng’anda ya kwa Yehova.”+

52 “E ico, moneni! inshiku shileisa,” e fyasosa Yehova, “ilyo nkakanda ifimpashanya fyakwe ifyabaswa,+ na mu calo cakwe monse, mukaba ukuteta kwa bantu abo balashile amafumo.”+

53 “Nangu Babiloni enganina ku muulu,+ nangu ukulenga icifulo cakwe icasansuka ukuba icishingafikwako,+ kuli ine kukafuma aba kumonaula abakaya kuli ena,”+ e fyasosa Yehova.

54 “Umfweni! Kuli ukulila ku Babiloni,+ no kubongoloka ukukalamba ku calo ca bena Kaldi,+ 55 pantu Yehova aleonaula Babiloni, kabili akonaula ishiwi ilikalamba muli ena,+ kabili amabimbi yabo yakema nga menshi ayengi.+ Kukaba icongo ce shiwi lyabo. 56 Pantu pali ena, pali Babiloni, pakesa uwa konaula,+ ne mpalume shakwe shikekatwa.+ Na mata yakwe yakafunaulwa,+ pantu Yehova ni Lesa wa cilandushi.+ Ukulandula kwena akalandula.+ 57 Kabili nkalenga bakakolwe+ bacilolo bakwe na ba mano bakwe, na balashi bakwe ne nkonkani shakwe ne mpalume shakwe, kabili bakalaala utulo twa muyayaya, kabili tabakashibuke nakalya”+ e fyasosa Imfumu,+ uo ishina lyakwe ni Yehova wa mabumba.+

58 Yehova wa mabumba atila: “Nangu ca kuti ilinga lya Babiloni likalamba, ukulyonaula kwena bakalyonaula;+ nangu ca kuti impongolo shakwe shitali, bakashoca.+ Kabili abantu nangu bakacucutike shani, bakaicusha fye,+ ne nko shikacucutikila umulilo;+ shikatompoka fye.”

59 Amashiwi ayo Yeremia kasesema aebele Seraya mwana Neria+ mwana Maaseya,+ ilyo aile na Sidekia imfumu ya kwa Yuda ku Babiloni mu mwaka walenga ine ukutula apo atendekele ukuteka; kabili Seraya ali mukalamba wa bulendo. 60 Kabili Yeremia alembele mwi buuku+ limo ubucushi bonse ubwali no kwisa pali Babiloni, e kuti amashiwi yonse ayalembelwe pali Babiloni. 61 Kabili Yeremia atile kuli Seraya: “Nga wafika fye ku Babiloni no kumona umusumba, ukabelenge amashiwi yonse aya mwi shiwi ilyaumfwika.+ 62 E lyo ukasose auti, ‘Mwe Yehova, ni mwe mwalandile pali cino cifulo ukuti cikaloba pa kuti mwikaba umwikashi,+ umuntu nangu icitekwa, lelo cikaba icibolya umuyayaya.’ 63 Kabili ilyo wapwisha ukubelenga ili buuku, ukalikake ku libwe, no kulipoosa mu mumana wa Yufrate.+ 64 Kabili ukasose auti, ‘E fyo Babiloni akebila no kwibuka iyo, pa mulandu wa bucushi ubo ndeleta pali ena;+ kabili bakanaka.’”+

Pano e papelela amashiwi ya kwa Yeremia.