Abena Roma

11 E ico, ndeipusha nati, Bushe Lesa alikeene abantu bakwe?+ Awe iyo! Pantu na ine wine ndi mwina Israele,+ uwa mu mwana wa kwa Abrahamu, uwa mu mukowa wa kwa Benjamini.+ 2 Lesa takeene abantu bakwe, abo aisalile+ umwine ukufuma fye ku kale. Bushe cine cine tamwaishiba ico Ilembo lisosa pali Eliya, ilyo aleilishanya kuli Lesa pa mulandu wa bena Israele?+ 3 Atile, “Mwe Yehova, nabepaya bakasesema benu, nabonaula ifiipailo fyenu, kabili nshelepo fye neka, e lyo na ine balefwaya ukunjipaya.”+ 4 Lelo, bushe Lesa amwaswike+ shani? Lesa atile, “Ncili ninkwata abantu abacilile pa makana cinelubali (7,000), abashapepako Baali.”+ 5 Ifyo fine, kanshi, pali ndakai na po abashalapo+ balimoneka ukulingana no kusala+ pa mulandu wa cikuuku ca kwa Lesa. 6 Awe nga ni ku cikuuku+ ca kwa Lesa, ninshi te ku milimo+ kabili iyo; pantu nga te ifyo, ici cikuuku te kuti cibe na kabili cikuuku iyo.+

7 Nga tutile shani? Abena Israele tabasangile ico balefwaya.+ Abacisangile bantu fye abanono abasalilwe.+ Bambi bena Lesa alekele ukuti imitima yabo italame;+ 8 filya calembwa ati: “Lesa abaleka ukupona mu tulo utukalamba,+ amenso yabo tayamona na matwi yabo tayomfwa, ukufika fye na kuli lelo.”+ 9 Davidi na o atile: “Amaliila yabo nayabe iciteyo kabili ulukose kuli bena, kabili nayabe ica kubapunwisha ne ca kubakanda;+ 10 lekeni amenso yabo yabe na kafifi pa kuti yemona, kabili inshita yonse bale-enda abakongama.”+

11 E ico ndeipusha nati, Ilyo abena Israele bawile, bushe baliwililila+ fye calipwa? Awe iyo! Pantu ukulufyanya+ kwabo kwalenga ukuti abena fyalo+ bamwenemo ipusukilo, pa kuti abena Israele babe no bufuba.+ 12 Ukulufyanya kwa bena Israele nga e kwalenga ukuti abantu ba muli ici calo bacindamikwe, kabili ukucepa kwabo nga e kwalenga ukuti abena fyalo+ bacindamikwe, ninshi abena Israele bonse+ nga babwelela kuli Lesa, ubucindami bwa bena fyalo bukacililako!

13 Nomba nalalanda kuli imwe mwe bena fyalo. Ala nalicindika+ umulimo+ wandi uwa kuba umutumwa+ ku bena fyalo,+ 14 pantu limbi kuti nalenga abantu bandi ukuba no bufuba, no kupusushapo+ bamo pali bena.+ 15 Pantu ukupooswa+ kwabo nga e kwalenga aba muli ici calo ukubwelela+ kuli Lesa, nga kanshi cikaba shani ilyo abena Israele bakapokelelwa na kabili kuli Lesa? Bushe tacakabe fye kwati kubuuka ukufuma ku bafwa? 16 Nga ca kutila mwatuulapo+ umufuba umo kuli Lesa, ninshi mwatuula no mufuba onse; kabili umushila nga wa mushilo,+ ninshi ne misambo na yo ya mushilo.

17 Awe, nga baputula imisambo imo iya muolife uo abantu balimba, kuti balundako+ imisambo ya muolife wa mu mpanga. Na imwe bene mwe bena fyalo mwaba nge misambo ya muolife wa mu mpanga uo Lesa abuula no kulunda ku muolife uo abantu balimba. Nomba na imwe mulepokelela amapaalo+ ayafuma ku mishila ya muolife+ uo abantu balimba. 18 Iwe we musambo wa mu mpanga, wilasuula imisambo inobe iyo baputula ku muolife walimbwa. Nga kuti walaitakisha+ shani kwati ni we uliisha imishila+ ilyo imishila e ikuliisha?+ 19 Nalimo kuti watila: “Ico bafumisheko+ iyo misambo ni pa kuti ine banundeko.”+ 20 Cisuma! Iyo misambo bali-ifumisheko pantu tayali na citetekelo,+ iwe walilundilweko pantu walitetekela.+ Kanshi wilaitutumuna,+ lelo uleba na katiina.+ 21 Pantu Lesa nga talekele imisambo ine ine, na iwe wine takakuleke iyo.+ 22 E ico kanshi wamona ukuti Lesa wa cikuuku+ e lyo kabili mukali.+ Pa bawile pali ubukali+ bwa kwa Lesa, lelo pali iwe pali icikuuku cakwe, kulila fye waikalilila+ mu cikuuku cakwe; nga te ifyo, na iwe wine ukaputulwako.+ 23 Abena Israele na bo, nga ba-aluka no kutetekela na kabili, bakalundwako;+ pantu Lesa te kuti afilwe ukubalundako na kabili. 24 Pantu imwe mwe bena fyalo nga mwaputwilwe ku muolife wa mu mpanga uwaimenene fye kabili mwalundilwe+ ku muolife wa kulimba fye, kanshi kuti ca-anguka imisambo yali ku muolife wa kulimba fye ukulundwa ku muolife yaliko!+

25 Mwe bamunyinane, nshilefwaya imwe ukukanaishiba iyi nkama ya kwa Lesa,+ pa kuti mwiba aba mano mu menso yenu mwe bene. Abena Israele bamo balitalamike+ imitima mpaka impendwa+ yonse iya bena fyalo ikakumane,+ 26 kabili e fyo Israele+ onse akapusuka. Filya calembwa ati: “Kalubula akafuma ku Sione+ no kufumya ububifi muli Yakobo.+ 27 Kabili nkapangana na bo icipangano,+ ilyo nkasenda imembu shabo.”+ 28 Abena Israele basanguka abalwani ba kwa Lesa pantu balisuula imbila nsuma. Ici calenga na imwe mwe bena fyalo mushukilemo,+ lelo apo Lesa alibasala, alibatemwa pa mulandu wa fikolwe fyabo.+ 29 Pantu Lesa tapoka ubupe ubo apeela umuntu kabili uo aita ninshi calaala capwa naitwa.+ 30 Pantu imwe mwe bena fyalo kale tamwaleumfwila+ Lesa lelo nomba mwalibelelwa uluse+ pa mulandu wa bucintomfwa+ bwa bena Israele, 31 ifyo fine na aba pali nomba tabomfwila Lesa icalenga ukuti imwe mubelelwe uluse,+ pa kuti na bo bene babelelwe uluse. 32 Pantu bonse Lesa alibaleka ukuti babe bacintomfwa,+ e pa kuti abelele abantu fye bonse uluse.+

33 Iye amapaalo+ ubwingi ayafuma kuli Lesa! Yangu ifyo akwatisha amano!+ We fintu ubwingi ifyo aishibisha!+ Takuli nangu umo uwingeluka ubupingushi+ bwakwe ne mibele yakwe! 34 Pantu “nani aishiba ukutontonkanya+ kwa kwa Yehova, atemwa nani uwingaba impanda mano yakwe?”+ 35 Napamo, “Nani abalilapo ukupeela Lesa ubupe, pa kuti Lesa na o akamubweseshe?”+ 36 Pantu fyonse fifuma kuli ena kabili e walenga ukuti fibepo kabili e o fyabelako.+ Kuli ena kube ubukata pe na pe.+ Ameni.