Yeremia

43 Nomba ilyo fye Yeremia apwishishe ukweba abantu bonse amashiwi yonse aya kwa Yehova Lesa wabo ayo Yehova Lesa wabo amutumine ukuyabeba,+ 2 Asaria mwana Hoshaya+ na Yohanani+ mwana Karea na baume bonse abaituntumbile+ batile kuli Yeremia: “Bufi ulebepa.+ Yehova Lesa wesu takutumine, ukusosa ati, ‘Mwiya ku Egupti no kuyaikala kulya.’+ 3 Lelo Baruki+ mwana Neria e ulekusonga pali ifwe pa kuti tupeelwe mu minwe ya bena Kaldi, ku kutwipaya nangu ukututwala muli bunkole ku Babiloni.”+

4 Kabili Yohanani mwana Karea na bakalamba bonse aba bashilika na bantu bonse tabaumfwile kwi shiwi lya kwa Yehova,+ ilya kuti batwalilile ukwikala mu calo ca kwa Yuda.+ 5 E ico Yohanani mwana Karea na bakalamba bonse aba bashilika basendele bonse abashelepo pali Yuda ababwelele ukufuma mu nko shonse umo bapashiilwe, pa kuti bekaleko panono mu calo ca kwa Yuda,+ 6 kumo na baume bene bene na bakashi babo na bana abanono na bana abanakashi aba mfumu+ no muntu onse uo Nebusaradani+ umukalamba wa bakalinda ashile ukuti ekale na Gedalia+ mwana Ahikamu+ mwana Shafani,+ na Yeremia kasesema na Baruki+ mwana Neria. 7 Baingile na mu calo ca Egupti,+ pantu tabaumfwile kwi shiwi lya kwa Yehova; basukile bafika na ku Tafne.+

8 E lyo icebo ca kwa Yehova caishile kuli Yeremia mu Tafne, no kutila, 9 “Senda mu minwe yobe amabwe ayakalamba, kayafise mu ndaka mu lubansa lwa njelwa ulwaba pa mwinshi wa ng’anda ya kwa Farao mu Tafne pa menso ya bena Yuda.+ 10 Kabili usose kuli bene auti, ‘Yehova wa mabumba, Lesa wa kwa Israele, atila: “Moneni, ndeita Nebukadresari imfumu ya ku Babiloni,+ umubomfi wandi,+ kabili nkabika icipuna cakwe ica bufumu apa pene pa muulu wa aya mabwe ayo mfishile, na o akatanikapo itenti lyakwe ilyaibela. 11 Kabili akesa no kuuma icalo ca Egupti.+ Umuntu uuli no kufwa ku cikuko icabipisha akafwa ku cikuko icabipisha, uuli no kuya muli bunkole akaya muli bunkole, no uli no kufwa ku lupanga akafwa ku lupanga.+ 12 Kabili nkasonteka umulilo mu mayanda ya balesa ba mu Egupti;+ na Nebukadresari akaboca no kubasenda muli bunkole, akaifimba icalo ca Egupti, filya kacema aifimba ica kufwala cakwe,+ kabili akafumamo umutende. 13 Kabili akatobaula ifyaimikwa fya mu Bete-shemeshe, uwa mu calo ca Egupti; na mayanda ya balesa ba mu Egupti akayoca ku mulilo.”’”