Yeremia
49 Yehova asosa pa bana ba kwa Amone+ ati: “Bushe Israele takwata abana abaume nelyo bushe takwata impyani? Nga kanshi cinshi ico Malkamu+ apyanine Gadi,+ kabili cinshi abantu bakwe baleikalila mu misumba ya kwa Israele?”+
2 “‘E ico, moneni! inshiku shileisa,’ e fyasosa Yehova, ‘ilyo nkalenga intandala ya kusoka pa bulwi+ ukumfwika na pali Raba+ uwa bana ba kwa Amone; kabili akaba umwina wa fitantaala,+ ne mishi yakwe+ ikapya ku mulilo.’+
“‘Na Israele akapyana balya abamupyene,’+ e fyo asosa Yehova.
3 “‘Lila umusowa,+ we Heshebone,+ pantu Ai naonaulwa! Pundeni, mwe mishi ya kwa Raba. Fwaleni insamu.*+ Lileni, no kulubanta mu macinka ya mabwe, pantu Malkamu akaya muli bunkole,+ kumo na bashimapepo bakwe na bacilolo bakwe.+ 4 Mulandu nshi utakishisha pa mpanga yobo iyabatama, impanga umupita amenshi,+ we mwana mwanakashi uwabula icishinka, we wacetekela ifyuma,+ ati: “Nani akesa kuli ine?”’”+
5 “‘Mona, nkaleta pali iwe ica kukutiinya,’+ e fyo Shikulu Mulopwe,+ Yehova wa mabumba asosa, ‘ukufuma kuli bonse abakushinguluka. Kabili imwe mwe bantu mukapaswa, cila muntu mu ntunga yakwe,+ kabili takwakabe no wa kulonganika abakabutuka.’”
6 “‘Lelo pa numa ya ifi, nkalonganika bankole ba bana ba kwa Amone,’+ e fyo Yehova asosa.”
7 Yehova Lesa wa mabumba atila kuli Edomu: “Bushe amano+ nayapwa mu Temani?+ Bushe ukupanda amano kwa beluka nakupwa? Bushe amano yabo nayonaika?+ 8 Fulumukeni!+ Alukeni! Kabiyeni kabelameni,+ mwe bekashi ba mu Dedani!+ Pantu nkaleta pali ena ubucushi bwa kwa Esau, mu nshita nkamukanda.+ 9 Aba kusaba imyangashi nga balishile kuli imwe, bushe te kuti bashepo iya kutolelesha? Abapuupu nga balishile ubushiku, kuti baonaula fye apo balefwaila.+ 10 Lelo ine nkapokolola Esau fyonse.+ Nkafimbula no mwa kubelama mwakwe,+ kabili takwakabe umuntu uukafisama.+ Abana bakwe na bamunyina na bena mupalamano bakwe bakonaulwa,+ kabili takabeko na kabili.+ 11 Sheni abana benu aba nshiwa.+ Ine nkabaleka bakabe aba mweo, na bamukamfwilwa benu bakantetekela.”+
12 Pantu Yehova atila: “Moneni! Nangu ca kuti tabanwena muli kapu, ukunwa kwena bakanwa.+ Bushe iwe uleti ukalekwa fye ukwabula ukukandwa? Tawakalekwe fye ukwabula ukukandwa, pantu ukunwa kwena ukanwa.”+
13 “Pantu nali-ilapa ne mwine,”+ e fyo Yehova asosa, “ukuti Bosera+ akaba ica kupapa,+ umuseebanya, icibolya kabili icitiipu; ne misumba yakwe yonse ikaba ifibolya umuyayaya.”+
14 Kuli imbila iyo ng’umfwile kuli Yehova, kabili kuli inkombe iituminwe mu nko, aiti: “Longaneni, musanseni, kabili imeni no kulwa.”+
15 “Pantu mona! nakulenga ukuba uwacepa mu nko, uwasuulwa ku bantu.+ 16 Ukututumya uko waletutumya nakukubepa, no kuituntumba kwa mu mutima obe,+ we wikala mu cilibwe ica kuubamo, we waikala pa muulu wa kapili. Nangu ca kuti wapikula icinsa cobe pa muulu nga kapumpe,+ nkakusamunapo,”+ e fyasosa Yehova. 17 “Kabili Edomu akaba ica kupapa.+ Umuntu onse uwapita akalolesha no kupapa no kulisha umunsoli pa mulandu wa finkunka fyakwe fyonse.+ 18 Filya fine ukuwa kwa Sodomu na Gomora ne mishi yakwe iyali mupepi kwali,”+ e fyasosa Yehova, “tamwakekale umuntu, kabili tamwakekale umulebeshi.+
19 “Moneni! Umo akesa ku bwikalo bwa kale na kale nge nkalamo+ iilefuma mu mushitu mu mbali ya Yordani,+ lelo mu nshita fye iinono nkabalenga bakafulumukeko.+ Kabili uwasalwa e o nkabikako. Pantu nani uwaba nga ine,+ kabili nani engansonsomba,+ kabili nani kacema uwingeminina ku cinso candi?+ 20 E ico umfweni, ifyo Yehova alefwaya ukucita kuli Edomu,+ ne fyo aletontonkanya ukucita kuli Temani:+ Abana ba mpaanga shakwe bakakulululwa. Kabili akalenga ubwikalo bwabo ukuba icibolya pa mulandu wabo.+ 21 Pano isonde patenta ku congo ca kuwa kwabo.+ Kuli ukulila!+ Nakumfwika na kuli Bemba Wakashika.+ 22 Moneni! Akekila no kufooka nga kapumpe,+ kabili akafungulwila amapindo yakwe pali Bosera;+ ne mitima ya mpalume sha kwa Edomu mu bushiku bulya ikaba ngo mutima wa mwanakashi ilyo alecululuka pa kupaapa.”+
23 Kuli Damaseke:+ “Hamati+ na Aripadi+ nabekatwa insoni, pantu nabomfwa imbila iyabipa. Nababongoloka.+ Abantu bali nga mabimbi pali bemba; nabafilwa ukwikala umutende.+ 24 Damaseke natompoka. Nafulumuka, kabili naikatwa umwenso.+ Ukukalipwa no kucululuka kwa kupaapa nafimwishila ngo mwanakashi uulepaapa.+ 25 Cili shani ukuti umusumba wa lulumbi taulekeleshiwe, umushi wa kusekelelamo?+
26 “E ico abalumendo bakwe bakawa mu mansa shakwe, na baume ba bulwi bonse bakepaiwa mu bushiku bulya,”+ e fyo Yehova asosa. 27 “Kabili nkasonteka umulilo pe linga lya kwa Damaseke, kabili ukoca amayanda ya malinga aya kwa Ben-hadadi.”+
28 Yehova alanda pali Kedari+ na mabufumu ya kwa Hasore,+ ayo Nebukadresari imfumu ya ku Babiloni aonawile,+ atila: “Imeni, kabiyeni ku Kedari, no kupokolola ifipe fya bana ba ku Kabanga.+ 29 Bakasenda amatenti+ yabo, impaanga shabo,+ insalu shabo isha matenti+ ne fipe fyabo fyonse. Bakasenda ne ngamila+ shabo. Kabili bakabilikisha kuli bena abati: “Konse kuli umwenso!’”+
30 “Fulumukeni, butukileni ukutali; kabiyeni kabelameni, mwe bekashi ba mu Hasore,”+ e fyo Yehova asosa. “Pantu Nebukadresari imfumu ya ku Babiloni+ namupangila, kabili ali na mapange pali imwe.”
31 “Imeni, kabiyeni kalweni no luko ulwaba no mutende,+ ulwaikala umutelelwe!”+ e fyo Yehova asosa.
“Talwakwata ifiibi ne mipindo. Bantu abaikala fye beka.+ 32 Bakabapokolola ne ngamila+ shabo, ne fitekwa fyabo ifingi bakafisenda. Nkabasalanganishisha na ku ncende shonse,*+ balya ababeya umushishi wa mu nsensematwi;+ kabili nkaleta ubucushi bwabo ukufuma ku fitungu fyonse ifyapalaminako,’ e fyasosa Yehova. 33 “Na Hasore+ akasanguka umwa kwikala bamumbwe,+ icibolya ca muyayaya. Tamwakekale umuntu, kabili tamwakekale umulebeshi.”+
34 Ici e cebo ca kwa Yehova icaishile kuli Yeremia kasesema pali Elamu+ ku kutendeka kwa kuteka kwa kwa Sidekia+ imfumu ya kwa Yuda:35 “Yehova wa mabumba atila, ‘Moneni, nkafuna ubuta bwa kwa Elamu,+ uko amaka yabo yafuma. 36 Nkaleta na pali Elamu imyela ine ukufuma ku mpela shine isha muulu.+ Nkabasalanganishisha na mu ncende shonse ishi,+ kabili takwakabe uluko uko bashakaye aba muli Elamu abakasalanganishiwa.’”+
37 “Kabili nkalenga abena Elamu ukutiina ku cinso ca balwani babo na ku balefwaya imyeo yabo; kabili nkaleta ubucushi pali bena, no bukali bwandi ubulepya ngo mulilo,”+ e fyo Yehova asosa. “Kabili nkabatumina ulupanga mpaka nkabalofye.”+
38 “Nkabika ne cipuna candi ica bufumu mu Elamu,+ kabili nkonaula imfumu na bacilolo ba mulya,” e fyo Yehova asosa.
39 “Kabili mu nshiku sha ku mpela,+ nkalonganika bankole ba kwa Elamu,”+ e fyo Yehova asosa.