2 Abena Tesalonika

1 Ine ne Paulo pamo na Silbani e lyo na Timote+ twalembela imwe mwe ba mu cilonganino ca bena Tesalonika aba-ampana na Lesa Shifwe e lyo na Shikulu Yesu Kristu:

2 Tuleti icikuuku ca kwa Lesa no mutende ukufuma kuli Lesa Shifwe na Shikulu Yesu Kristu fibe na imwe.+

3 Tufwile ukutootela Lesa lyonse pali imwe,+ mwe bamunyinefwe, pantu ici e calinga, pantu icitetekelo cenu cilekulilako+ fye nga nshi no kutemwana kwenu bonse umo umo kulekoselako.+ 4 E ico tulaitakisha+ pa mulandu wenu mu filonganino fyonse ifya kwa Lesa pa kushipikisha kwenu no kutetekela kwenu muli fyonse ifyo bamucusha na mu mafya ayo muleshipikisha.+ 5 Ubu e bushininkisho bwa kupingula kwalungama ukwa kwa Lesa,+ pa kuti mube abalinga ukuba mu bufumu bwa kwa Lesa,+ ubo muleculila icine cine.+

6 E ico caba icalungama kuli Lesa ukubwesesha ubucushi ku balemucusha,+ 7 lelo kuli imwe mwe balecula, akapwisha ukucula kwenu pamo na ifwe pa kusokololwa+ kwa kwa Shikulu Yesu ukufuma mu muulu pamo na bamalaika bakwe aba maka+ 8 mu mulilo uulebilima, ilyo akaleta icilandushi+ pa bashaishiba Lesa+ na bashinakila+ imbila nsuma iya kwa Shikulwifwe Yesu.+ 9 Aba bantu bakapingwilwa+ ukonaulwa+ umuyayaya ukufuma pa ntanshi ya kwa Shikulu kabili tabakamone ubukata bwa maka yakwe,+ 10 ilyo akesa ku kucindamikilwa pamo na bantu+ bakwe aba mushilo no kutashiwa muli bulya bushiku muli bonse abatetekele, pantu mwalitetekele ifyo twamushimikile.

11 E mulandu wine lyonse tulamupepelako, ukuti Lesa wesu alemumona ukuti mwalilinga ubwite+ bwakwe kabili ku maka yakwe acite ubusuma bonse ubo afwaya no kupwisha umulimo mubomba uwa citetekelo; 12 pa kuti ishina lya kwa Shikulwifwe Yesu licindikwe muli imwe,+ na imwe muli+ ena, ukulingana ne cikuuku+ ca kwa Lesa wesu ne ca kwa Shikulu Yesu Kristu.