27 Namwene icalebeeka nge cela icasakanamo silfere na golde,+ icalemoneka ngo mulilo uwalefuma mu musana wakwe ukuya mu muulu; kabili ukufuma mu musana ukwisa mwi samba, namwene icalemoneka ngo mulilo.+ Kwali ulubuuto ulwalebengeshima ukumushinguluka 28 kwati mukolamfula+ mu makumbi uubako pa bushiku bwa mfula. Ifi e fyo ulubuuto ulwamushingulwike lwalemoneka. Lwalemoneka ngo bukata bwa kwa Yehova.+ Ilyo namwene ifi nalifukeme nafisha ne mpumi panshi, kabili natendeke ukumfwa ishiwi lya walelanda.

9 “Nalitwalilile ukulolesha basuka babika ifipuna fya bufumu apo fyalingile ukuba, kabili Uwa Nshiku ne Nshiku+ alikele.+ Ifya kufwala fyakwe fyali ifyabuuta tuutu,+ no mushishi wa ku mutwe wakwe wali uwabuuta nga masako ya mpaanga. Icipuna cakwe ica bufumu cali ngo mulilo; ne mipeto* ya ciko yalemoneka ngo mulilo uuleaka.+