Ulwimbo lwa kwa Asafi.+
83 Mwe Lesa mwi-ikala tondolo;+
Landenipo fimo kabili citenipo cimo, mwe Lesa wa maka yonse.
2 Pantu moneni! abalwani benu bali mu cimfulumfulu;+
Abamupata balemulwisha.
3 Mu bumfisolo balepangila abantu benu;
Balepangila abo mumona ukuti balicindama.
4 Balanda abati: “Iseni tulofye uluko lwa bena Israele,+
Pa kuti kwikaba nangu umo uukalabebukisha.”
5 Baba no mutima umo ilyo balepangana ifya kucita;
Balyumana akapi pa kuti bamulwishe,+
6 E kutila abena Edomu, abena Ishmaele, abena Moabu,+ abena Hagari,+
7 Abena Gebali, abena Amone,+ abena Amaleke,
AbaPelishiti+ kumo nabekala mu Turi.+
8 Abena Asiria+ nabo bali-ilunda kuli bena;
Bonse aba batungilila abatuntuka muli Lote.+ (Selah)
9 Bacimfyeni nga filya mwacimfishe abena Midiani,+
Kabili nga filya mwacimfishe Sisera na Yabini pa mumana wa Kishone.+
10 Babalofeshe pa En-dore;+
Baishileba umufundo pa mushili.
11 Citeni abakankaala babo nga filya mwacitile Orebu na Seebu,+
Kabili citeni bacilolo babo nga filya mwacitile Seba na Salimuna,+
12 Pantu batile: “Natupoke icalo umo Lesa ekala.”
13 Mwe Lesa wandi, lekeni babe nge cani icauma ico umwela uleululula,+
Nge misungu iyo umwela uleululula.
14 Nga filya umulilo oca impanga,
Na filya ulubingu lubilimya impili,+
15 E fyo mubakonke no mwela wenu uukali,+
Kabili mubatiinishe ku mwela wenu uukalamba.+
16 Fimbeni umuseebanya pa finso fyabo,
Pa kuti bafwaye ishina lyenu mwe Yehova.
17 Nabekatwe insoni kabili babe no mwenso umuyayaya;
Nabaseebane kabili nabalobe;
18 Abantu nabeshibe ukuti ishina lyenu ni Yehova,+
Kabili nimwe mweka mwe Bapulamo pano isonde ponse.+