Ibuuku lya Kubalilapo Ilya kwa Samwele

27 Lelo Davidi alandile mu mutima wakwe ati: “Bushiku bumo Shauli akanjipaya. Ico mfwile fye ukucita kufyukila+ ku calo ca baPelishiti. Nga nacita ifi, Shauli akaleka ukumfwaya mu calo conse ica Israele,+ lyena nkapusuka.” 2 E ico Davidi pamo na baume 600+ abo ali nabo balimine baya kuli Akishi+ umwana wa kwa Maoke, imfumu ya Gati. 3 Davidi aikele na Akishi mu Gati, pamo na baume bakwe. Cila muntu ali na ba mu ng’anda yakwe. Davidi na o ali na bakashi bakwe babili, Ahinoamu+ umwina Yesreele na Abigaili+ umwina Karmele uwali umukashi wa kwa Nabali ilyo Nabali ashilafwa. 4 Ilyo bamo baebele Shauli ukuti Davidi alibutukiile ku Gati, alilekele ukumufwaya.+

5 Lyena Davidi aebele Akishi ati: “Nga mwamona ukuti cili fye bwino, mukwai mpeeleniko apa kwikala mu musumba uwabela mu mpanga pa kuti e po ndeikala. Cinshi ne mubomfi wenu ningalaikalila na imwe mu musumba wa mfumu?” 6 E ico pali bulya bushiku Akishi apeele Davidi umusumba wa Siklagi.+ E co Siklagi yabela musumba wa mfumu sha Yuda ukufika na lelo.

7 Inshiku Davidi aikele mu mpanga ya baPelishiti shali umwaka umo ne myeshi 4.+ 8 Davidi na baume abo ali nabo baleya mu kusansa abena Geshuri,+ abena Gisiri na bena Amaleke,+ pantu baleikala mu calo icatendekela ku Telamu ukufika ku Shuri,+ ukuyafika fye na ku calo ca Egupti. 9 Davidi nga asansa icalo, aleipaya abaume bonse na banakashi bonse, taleshako nangu fye umo.+ Lelo alesenda impaanga, ing’ombe, impunda, ingamila ne fya kufwala. Lyena alebwelela kuli Akishi. 10 Akishi nga amwipusha ati: “Ni kwi mwaciyasansa lelo?” Davidi aleasuka ati: “Ku kapinda ka ku kulyo aka Yuda”*+ nelyo “Ku kapinda ka ku kulyo aka bena Yeraameele,”+ nangu “Ku kapinda ka ku kulyo aka bena Keni.”+ 11 Davidi aleipaya abaume bonse na banakashi bonse, taleshapo nangu umo uwakuleta ku Gati, pantu aleti: “Pa kuti betusoselela abati, ‘Ifi e fyo Davidi acitile.’” (Kabili ifi fine e fyo alecita inshiku shonse isho aikele mu mpanga ya baPelishiti.) 12 E ico Akishi alicetekele Davidi, kabili aleti: “Nangu cibe shani abantu bakwe abena Israele nabamupata icine cine, kanshi akatwalilila ukuba umubomfi wandi.”