Yeremia
11 Yehova aebele Yeremia ati: 2 “Umfweni amashiwi ya muli ici cipangano mwe bantu!
“Webe* abaYuda na bekala mu Yerusalemu aya mashiwi, 3 ubebe auti, ‘Yehova Lesa wa kwa Israele alanda ati: “Abe uwatiipwa umuntu onse uushikonka amashiwi ya muli ici cipangano,+ 4 ayo naebele ifikolwe fyenu pa bushiku nabafumishe mu calo ca Egupti,+ ilyo nabafumishe mwi lungu lya kulopolwelamo ifyela,+ nabebele nati, ‘Muleumfwa ishiwi lyandi kabili mulecita fyonse ifyo nakulamweba; lyena mukaba abantu bandi na ine nkaba Lesa wenu,+ 5 pa kuti mfikilishe umulapo nalapile ku fikolwe fyenu. Nalapile ukuti nkabapeela icalo umwaba umukaka no buci,+ na buno bwine bushiku ncili ndafwaya ukufikilisha uyu mulapo.’”’”
Lyena na-aswike nati: “Ameni,* mwe Yehova.”
6 Lyena Yehova anjebele ati: “Bilisha aya mashiwi yonse mu misumba ya mu Yuda na mu misebo ya mu Yerusalemu, ubilishe auti: ‘Umfweni amashiwi ya muli ici cipangano kabili muleyakonka. 7 Pantu nalisokele ifikolwe fyenu pa bushiku nabafumishe mu calo ca Egupti, nabebele nati: “Muleumfwa ishiwi lyandi.”+ Kabili nalebasoka pa miku iingi* ukufika na lelo. 8 Lelo tabaumfwile kabili tababikileko amano;* bali bacintomfwa kabili balekonkelela umutima wabo uwabipa.+ E ico nalibakandile nga fintu nalandile mu cipangano napangene nabo, nabebele ukuti balekonka ifyaba muli ici cipangano lelo balikeene.’”
9 Lyena Yehova anjebele ati: “AbaYuda na bekala mu Yerusalemu nabapangana ukumpondokela. 10 Nababwelela ku membu isho ifikolwe fyabo fyacitile kale, ifyakeene ukukonka ifyo nalefyeba.+ Nabo balekonka tulesa tumbi kabili baletubombela.+ Aba mu ng’anda ya kwa Israele na ba mu ng’anda ya kwa Yuda nabatoba icipangano candi ico napangene ne fikolwe fyabo.+ 11 E ico Yehova alanda ati, ‘Moneni ndeleta ubucushi pali bena+ ubo bashakafumemo; nga balilila kuli ine ukuti mbafwe, nshakomfwe.+ 12 Lyena aba mu misumba ya mu Yuda na bekala mu Yerusalemu bakaya kuli balesa abo batuulila amalambo* ukuti babafwe,+ lelo aba balesa tabakabapusushe mu nshita ya bucushi. 13 Pantu balesa bobe nabafula nge misumba yobe, we Yuda, naupangila icintu ca nsoni* ifiipailo ifingi nge misebo ya mu Yerusalemu, naupanga ifiipailo fya kutuulilapo Baali amalambo.’+
14 “Lelo iwe,* wipepelako aba bantu, wibapaapaatilako nelyo ukubapepelako+ ukuti mbafwe, pantu nga balilila kuli ine pa mulandu wa bucushi nshakomfwe.
15 “Bushe umutemwikwa wandi alikwata insambu sha kuba mu ng’anda yandi,
E lyo ninshi abantu abengi balicita ifyabipa?
Bushe umunofu wa mushilo* uo batuula kuti walenga ubucushi bwikesa pali iwe?
Bushe ukasekelela pali ilya nshita?
16 Pa nshita imo Yehova amwitile ati umuolife uwalelema,
Uumoneka bwino kabili uutwala ifisabo ifisuma.
Lelo kwali icongo icikalamba, kabili alimusonteke umulilo,
Balikontawile ne misambo yakwe.
17 “Yehova wa mabumba uwa kulimbile,+ nalanda ukuti ubucushi bukesa pali iwe pa mulandu ne fyabipa ifyo aba mu ng’anda ya kwa Israele na ba mu ng’anda ya kwa Yuda bacitile. Baletuulila Baali+ amalambo pa kuti bankalifye.”
18 Mwe Yehova mwalinjebele pa kuti njishibe;
Pali ilya nshita mwalengele imone ifyo balecita.
19 Nali nge mpaanga iyana iyanakilila iyo baleya mu kwipaya.
Nshaishibe ukutila balempangila+ abati:
“Natonaule icimuti ne fisabo fya ciko,
Kabili natumulofye mu calo ca ba mweo,
Pa kuti ishina lyakwe bekalibukisha na kabili.”
Lekeni imone ifyo mukabakanda,
Pantu kuli imwe e ko naleta umulandu wandi.
21 E ico Yehova aeba abena Anatote+ abafwaya ukulofya umweo obe kabili abalanda abati: “Wilasesemena mwi shina lya kwa Yehova,+ pantu ukuboko kwesu kukakwipaya”; 22 Yehova wa mabumba alanda ati: “Mona! Ndi no kubakanda. Abalumendo bakafwa ku lupanga.+ Kabili abana babo abaume na bana babo abanakashi bakafwa ku cipowe.+ 23 Takwakabe nangu umo uukashalapo pali bena, pantu nkaleta ubucushi pa bena Anatote+ mu mwaka nkabakanda.