Impendwa

17 Nomba Yehova aebele Mose ati: 2 “Ulande na bena Israele kabili upoke inkonto imo imo ku ntungulushi sha mayanda ya bashibo,+ inkonto 12. Ulembe ne shina lya cila ntungulushi pa nkonto yaiko. 3 Ufwile ukulemba ishina lya kwa Aarone pa nkonto ya kwa Lebi, pantu umukalamba umo na umo uwa mu mayanda ya bashibo nakwata inkonto. 4 Ukashibike mwi tenti lya kukumaninamo pa ntanshi ya cipao ca Cipangano,+ apo monekela lyonse kuli imwe.+ 5 Kabili inkonto ya muntu uo nkasala+ ikapuuka, e fyo nkalenga abena Israele bakaleke ukuilishanya pali ine+ na pali imwe.”+

6 E ico Mose alilandile na bena Israele, kabili intungulushi shabo shonse shamupeele inkonto imo imo, ukulingana na mayanda ya bashibo. Shali inkonto 12 kabili inkonto ya kwa Aarone nayo yali pa nkonto shabo. 7 Lyena Mose atwele inkonto mwi tenti umwali icipao ca Cipangano pa cinso ca kwa Yehova.

8 Pa bushiku bwakonkelepo ilyo Mose aingile mwi tenti umwali icipao ca Cipangano, moneni! inkonto ya kwa Aarone iya ng’anda ya kwa Lebi yalipuukile kabili yalefumya intombo, yalebalula na maluba kabili yaletwala ama-almonde ayapya. 9 Lyena Mose afumishe inkonto shonse pa cinso ca kwa Yehova no kulanga abena Israele bonse. Balishilolekeshe kabili cila muntu asendele inkonto yakwe.

10 Pa numa Yehova aebele Mose ati: “Bwesesha inkonto ya kwa Aarone+ pa ntanshi ya cipao ca Cipangano. Iyi inkoto yalaba cishibilo+ ca kusoka bacipondoka,+ pa kuti baleke ukuilishanya pali ine, na pa kuti befwa.” 11 Ilyo line fye Mose acitile ifyo Yehova amwebele. Filya fine fye e fyo acitile.

12 Lyena abena Israele baebele Mose abati: “Nomba tuli no kufwa, nangu cibe shani, bonse tuli no kuloba! 13 Onse uulepalama kwi tenti lya mushilo ilya kwa Yehova, alefwa!+ Bushe ifi fine fye e fyo twakulafwa?”+