Yeremia
40 Yehova alandile na Yeremia pa numa Nebusaradani+ umukalamba wa balelonda amuleka ukuti aye ukufuma mu Rama.+ Amutwele mulya ninshi amaboko yakwe nabayakaka amaceni, kabili ali pa bantu abo bafumishe mu Yerusalemu na mu Yuda abo baletwala ku Babiloni ku kuyaba bankole. 2 Lyena umukalamba wa balelonda asendele Yeremia pa mbali e lyo amweba ati: “Yehova Lesa obe alisobele ukuti ifi ifyabipa fikesa pali ici cifulo, 3 Yehova nalenga ukuti ifi ficitike nga filya fine alandile. Pantu imwe mwe bantu mwalibembukile Yehova kabili tamwaumfwile ishiwi lyakwe. E mulandu wine ifi fyacitikila kuli imwe.+ 4 Nomba buno bushiku nalakukakula amaceni ayo bakukaka ku maboko yobe. Nga wamona ukuti cili fye bwino ukuya na ine ku Babiloni, natuleya, kabili nkalakusunga. Lelo nga taulefwaya ukuya na ine ku Babiloni, shala. Mona! Kuti waikala konse uko ulefwaya muli ici calo. Kabiye mu kwikala uko utemenwe we mwine.”+
5 Ilyo Yeremia ashilapilibuka, Nebusaradani amwebele ati: “Bwelela kuli Gedalia+ umwana wa kwa Ahikamu,+ umwana wa kwa Shafani,+ uo imfumu ya ku Babiloni isontele ukuteka imisumba ya mu Yuda, kabili uleikala nankwe pamo na bantu; nelyo kuti wayaikala konse uko ulefwaya.”
Lyena umukalamba wa balelonda amupeele ifya kulya no bupe, kabili amulekele aya. 6 E ico Yeremia aile kuli Gedalia umwana wa kwa Ahikamu ku Mispa+ no kutendeka ukwikala nankwe pamo na bantu abashele mu calo.
7 Mu kupita kwa nshita abakalamba ba bashilika bonse abali mu mpanga pamo na bashilika babo balyumfwile ukuti imfumu ya ku Babiloni yalisontele Gedalia umwana wa kwa Ahikamu ukuti aleteka icalo, kabili alimusontele ukuti aleteka abaume, abanakashi na bana abali pa bapiina ba mu calo abo bashasendele ku Babiloni mu kuyaba bankole.+ 8 E ico baishile kuli Gedalia ku Mispa.+ Abaishile bali ni Ishmaele+ umwana wa kwa Netania, Yohanani+ na Yonatani, abana ba kwa Karea, Seraya umwana wa kwa Tanhumete, abana ba kwa Efai umwina Netofa na Yesania+ umwana wa kwa Maakati. Baishile pamo na bashilika babo. 9 Gedalia umwana wa kwa Ahikamu, umwana wa kwa Shafani alapile umulapo kuli bena na ku bashilika babo, ati: “Mwitiina ukubombela abena Kaldi. Akwikaleni mu calo kabili mulebombela imfumu ya ku Babiloni, ne fintu fikalamwendela bwino.+ 10 Lelo ine nakulaikala mu Mispa pa kuti ndemwimininako* ku bena Kaldi abesa kuli ifwe. Nomba imwe mufwile ukulonganika imyangashi, ifisabo fya mu lusuba na mafuta no kufibika mu fipe fya kusungilamo ifintu kabili muleikala mu misumba iyo mwapoka.”+
11 Kabili abaYuda bonse abaleikala mu Moabu, mu Amone na mu Edomu, ukubikako fye na baleikala mu fyalo fimbi ifyashala, nabo balyumfwile ukuti imfumu ya ku Babiloni naileka abashelepo baleikala mu Yuda no kuti naisonta Gedalia umwana wa kwa Ahikamu, umwana wa kwa Shafani ukuti alebateka. 12 E ico abaYuda bonse batendeke ukubwela ukufuma ku fyalo fyonse uko basalanganine, babwelele ku calo ca Yuda, kuli Gedalia ku Mispa. Kabili balonganike imyangashi ne fisabo fya mu lusuba ifingi nga nshi.
13 Yohanani umwana wa kwa Karea na bakalamba bonse aba bashilika abali mu mpanga baishile kuli Gedalia ku Mispa. 14 Bamwebele abati: “Bushe nawishiba ukuti Baalisi imfumu ya bena Amone,+ natuma Ishmaele umwana wa kwa Netania ukwisa mu ku kwipaya?”*+ Lelo Gedalia umwana wa kwa Ahikamu tasumine ifyo bamwebele.
15 Lyena Yohanani umwana wa kwa Karea aebele Gedalia ku Mispa mu bumfisolo ati: “Ndefwaya ukuyaipaya Ishmaele umwana wa kwa Netania, kabili umuntu nangu umo taishibe. Inga cinshi alakwipaila,* kabili cinshi abaYuda bonse abalongene kuli iwe balasalanganina na bashalapo mu Yuda balalobela?” 16 Lelo Gedalia+ umwana wa kwa Ahikamu aebele Yohanani umwana wa kwa Karea ati: “Wimwipaya, pantu ulebepesha fye Ishmaele.”