Impendwa
36 Abakalamba ba mu ndupwa ishatuntwike muli Gileadi mwana Makiri+ mwana Manase aba mu ndupwa sha bana ba kwa Yosefe baile mu kulanda na Mose na bacilolo, intungulushi sha mikowa ya bena Israele. 2 Babebele abati: “Yehova aebele shikulu ukuti alingile ukupendula+ pa kwakanya abena Israele impanga; kabili Yehova aebele shikulu ukuti apeele abana banakashi ba kwa Selofehadi+ munyinefwe impanga. 3 Nga baupwa ku baume ba mu mukowa umbi uwa bena Israele, ninshi impanga ya bashifwe iyo bapeele aba abanakashi ikaba ya mukowa uo bakoopilwamo, kabili ninshi iyo impanga bapendwile pa kutupeela, tayakabe yesu. 4 Nomba Umwaka wa Buntungwa+ uwa bena Israele nga wafika, impanga iyo bapeele abanakashi ikalundwa ku mpanga ya mukowa uo bakoopilwamo, ninshi ku mpanga ya mukowa wa bashifwe bakapokako impanga ya aba banakashi.”
5 Lyena Mose aebele abena Israele ifyo Yehova amwebele. Abebele ati: “Ifyo abatuntuka muli Yosefe balelanda fya cine. 6 Ifi e fyo Yehova alandile pa bana banakashi ba kwa Selofehadi: ‘Kuti baupwa ku mwaume onse uo batemenwe. Lelo balingile ukuupilwa fye mu lupwa lwa mu mukowa wa kwa shibo. 7 Impanga ya mukowa umo uwa bena Israele tamufwile ukupeela umukowa umbi, pantu abena Israele bafwile ukulasungilila impanga ya mu mukowa wa fikolwe fyabo. 8 Kabili umwana mwanakashi onse uwakwata impanga mu mikowa ya bena Israele, afwile ukuupwa ku watuntuka mu mukowa wa kwa wishi,+ pa kuti abena Israele bakalesungilila impanga ya fikolwe fyabo. 9 Impanga ya mukowa umo uwa bena Israele tamufwile ukupeela umukowa umbi, pantu aba mu mikowa ya bena Israele bafwile ukulasungilila impanga yabo.’”
10 Abana banakashi ba kwa Selofehadi bacitile filya fine fye Yehova aebele Mose.+ 11 E ico Mahla, Tesa, Hogla, Milika na Noa, abana banakashi ba kwa Selofehadi,+ baupilwe ku baume abafyelwe muli bamunyina ba kwa shibo. 12 Baupilwe ku baume ba mu ndupwa sha kwa Manase mwana Yosefe, pa kuti impanga yabo ikatwalilile ukuba ya mukowa wa kwa shibo.
13 Aya e mafunde no bupingushi ifyo Yehova aebele abena Israele ukupitila muli Mose ilyo bali mu ciswebebe ca Moabu mupepi na Yordani mu Yeriko.+