Esaya

20 Mu mwaka imfumu Sarigone iya ku Asiria yatumine Tartani* ku Ashidode,+ ailelwisha umusumba wa Ashidode no ku-ucimfya.+ 2 Pali ilya nshita Yehova alandiile muli Esaya+ umwana wa kwa Amose ati: “Kabiye, fuula insamu mu ntungu shobe, kabili fuula indyato ku makasa yobe.” Ifi fine e fyo acitile, aendele ubwamba* kabili ukwabula indyato.

3 Lyena Yehova alandile ati: “Ifi fine umubomfi wandi Esaya endele ubwamba kabili ukwabula indyato imyaka itatu nge cishibilo+ kabili icilesobela ifikacitikila Egupti+ na Etiopia,+ 4 e fyo cikaba ilyo imfumu ya mu Asiria ikatungulula ibumba lya balumendo na bakote, bankole ba mu Egupti+ na bankole ba ku Etiopia. Bakenda ubwamba kabili ukwabula indyato, ku matako yabo takwakabe nangu cimo ico bakafimbako, Egupti akaba ubwamba.* 5 Kabili bakomfwa umwenso ne nsoni pali Etiopia uo bacetekele na pali Egupti uo baleitakishishapo.* 6 Muli bulya bushiku abekala muli ulu lulamba bakalanda abati, ‘Moneni ifyacitikila uo twacetekela, uo twafulumukileko ukuti atwafwe pa kuti tulubuke ku mfumu ya ku Asiria! Nomba twalafyuka shani?’”