Yeremia
13 Yehova anjebele ati: “Kabiye, kashite umushipi wa nsalu kabili uukake mu musana, lelo wiubika mu menshi.” 2 E ico nalishitile umushipi nga fintu Yehova anjebele kabili naukakile mu musana. 3 Yehova anjebele na kabili ati: 4 “Ima! Senda umushipi washitile uo uikakile mu musana, kabiye ku Yufrate, uyeufisa mu lucengo.” 5 E ico naileufisa mu mbali ya Yufrate, nga fintu Yehova anjebele.
6 Lelo ilyo papitile inshiku ishingi, Yehova anjebele ati: “Ima, kabiye ku Yufrate uyesenda umushipi uo nakwebele ukuyafisa kulya.” 7 E ico nalile ku Yufrate kabili naimbile apo nafishile umushipi no ku-ufumya. Lyena namwene ukuti umushipi walyonaike onse ica kuti te kuti ubombe.
8 Lyena Yehova anjebele ati: 9 “Yehova alanda ati, ‘Ifi fine e fyo nkapwisha icilumba ca ba Yuda ne cilumba icikalamba ica ba mu Yerusalemu.+ 10 Aba bantu ababipa abashumfwa ifyo nanda,+ abakonkelela imitima yabo+ iya bucipondoka, kabili abakonka balesa bambi, ukubabombela no kubakontamina, bakaba ngo yu mushipi uwaonaika onse ica kuti te kuti ubombe.’ 11 ‘Pantu nga filya fine umushipi ulambata mu musana wa muntu, e fyo nalengele bonse aba mu ng’anda ya kwa Israele na bonse aba mu ng’anda ya kwa Yuda balambatila kuli ine,’ e fyo Yehova alanda, ‘pa kuti babe abantu bandi,+ ubukata bwandi,+ ilumbo lyandi kabili icintu icisuma. Lelo tabang’umfwilile.’+
12 “Ukabebe no kuti, ‘Yehova Lesa wa kwa Israele alanda ati: “Mu mutondo onse uukalamba bafwile ukwisushamo umwangashi.”’ Kabili bakakwasuka abati, ‘Bushe tatwaishiba ukuti mu mutondo onse uukalamba bafwile ukwisushamo umwangashi?’ 13 Lyena ukabebe auti, ‘Yehova alanda ati: “Bonse abekala muli ici calo+ ndebesushamo umwangashi, kumo ne mfumu ishikala pa cipuna ca bufumu ica kwa Davidi na bashimapepo na bakasesema na bonse abekala mu Yerusalemu mpaka bakolwe. 14 Kabili bonse nkabatobanya, bawishi na bana babo abaume,” e fyo Yehova alanda.+ “Nshakabalangulukile nelyo ukubomfwila ubulanda, kabili nshakabomfwile uluse; takuli nangu cimo icikandesha ukubonaula.”’+
15 “Umfweni kabili bikeniko amano.
Mwiba ne cilumba, pantu Yehova nalanda.
16 Peeleni Yehova Lesa wenu ubukata
Ilyo ashilaleta imfifi
Kabili ilyo amakasa yenu yashilaipununa pa mpili mu nshita ya cungulo bushiku.
Mukalasubila ukuti kukaba ulubuuto,
Lelo akaleta imfifi.
Akalenga ulubuuto lukabe imfifi iyafiitisha.+
Nkalila nga nshi kabili amenso yandi yakalukusha ifilamba,+
Pantu impaanga sha kwa Yehova+ nabashisenda ku calo cimbi pa kuti shiyeba bankole.
18 “Eba imfumu na namfumu+ auti, ‘Fumeni pa cipuna cenu ica bucindami, mwikale panshi,
Pantu icilongwe* cenu icayemba cikapona ku mutwe wenu.’
19 Imisumba yonse iya ku kapinda ka ku kulyo nabaisala,* takuli nangu umo uwakuisula.
Bonse abekala mu Yuda nababasenda ku calo cimbi ku kuyaba bankole,+ tapali nangu umo uushelepo.
20 “Inuna amenso, mona abalefuma ku kapinda ka ku kuso.+
Shili kwi impaanga isho bakupeele, impaanga ishisuma?+
Tabwakese pali iwe nga filya bwisa pa mwanakashi uulepaapa?+
22 Kabili ilyo ukalanda mu mutima obe auti, ‘Cinshi ico ifi fintu fyaishila pali ine?’+
Pa mulandu wa lubembu lobe ulukalamba, nabalepula+ ica kufwala cobe,
Kabili ututende tobe tulekalipa nga nshi.
23 “Bushe umwina Kushi* kuti ayalula inkanda yakwe, nelyo bushe imbwili kuti ya-alula amabala ya iko?+
Ifi nga kuti fyacitika ninshi na imwe kuti mwacita ifisuma,
Mwe basambilila ukucita ifyabipa.
24 E ico nkabasalanganya nge mpimbili isha mu ciswebebe isho umwela uleululula.+
25 Ifi e fikakucitikila, ici e co nakupimina,” e fyo Yehova alanda,
26 E ico nkapimpula ica kufwala cobe no kucifimba ku menso yobe,
Kabili abantu bakamona insoni shobe.+
27 Ubucende ucita,+ ukulila kobe ukwa lunkumbwa,
Na bucilende ubwa nsoni.
Ifi na fyo abantu bakafimona,
Nalimona ifya bunani ifyo ucita+ pa tupili na mu mpanga.
We bulanda kuli iwe we Yerusalemu!
Ni lilali ukaleka ukuba uwakowela?”+