Abapingushi
17 Kwali umwaume umo uwa mu citungu ca mpili ica kwa Efraimu,+ ishina lyakwe ni Mika. 2 Aebele nyina ati: “Shilya indalama sha silfere 1,100 isho bamusendeele kabili isho mwatiipilepo uwasendele ninshi ndeumfwa no kumfwa, moneni! nine nkwete. Nine nabuulile.” E lyo nyina amwebele ati: “Shi Yehova nakupaale mwana wandi.” 3 E ico abweseeshe nyina indalama sha silfere 1,100, lelo nyina alandile ati: “Nangu cibe shani nkapeela Yehova ishi indalama sha silfere pa kuti umwana wandi akapangemo ifimpashanya fibili.+ Nomba nakubwesesha ishi indalama.”
4 Ilyo abweseeshe nyina indalama sha silfere, nyina abuulilepo indalama 200 apeela kafula wa silfere. Lyena apangilemo ifimpashanya fibili, kabili bafibikile mu ng’anda ya kwa Mika. 5 Uyu Mika alikwete ing’anda umo alepepela tulesa twakwe. Abilile ica kufwala ca efode+ kabili apangile utulubi twa terafimu*+ e lyo apeela umo pa bana bakwe amaka ya kuba shimapepo wakwe.+ 6 Muli isho inshiku mu Israele tamwali imfumu.+ E ico cila muntu alecita fye ifyo amona ukuti fili fye bwino.+
7 Nomba kwali umulumendo wa mu Betelehemu+ mu Yuda uwa mu lupwa lwa kwa Yuda.* Ali mwina Lebi+ uwaikele mu Betelehemu mu Yuda pa nshita iinono. 8 Uyu mulumendo afumine mu musumba wa Betelehemu mu Yuda pa kuti ayefwaya incende apakwikala. Ilyo ali pa lwendo afikile mu citungu ca mpili ica kwa Efraimu, e lyo aya ku ng’anda ya kwa Mika.+ 9 Lyena Mika amwipwishe ati: “Wafuma kwi?” Na o ayaswike ati: “Ndi mwina Lebi, njikala mu Betelehemu mu Yuda, kabili ndi pa lwendo lwa kufwaya apakwikala.” 10 E ico Mika amwebele ati: “Akwikala na ine kabili ube impanda mano* yandi kabili shimapepo wandi. Cila mwaka nakulakupeela indalama sha silfere 10, ifya kufwala ne fya kulya.” E ico umwina Lebi alingiile mu ng’anda. 11 E fyo uyu umulumendo umwina Lebi asumine ukulaikala na Mika, kabili Mika alemumona fye kwati mwana wakwe. 12 Mika apeele uyu umwina Lebi amaka ya kuba shimapepo wakwe,+ kabili aleikala mu ng’anda ya kwa Mika. 13 Lyena Mika alandile ati: “Nomba naishiba ukuti Yehova akancitila ifisuma, pantu shimapepo wandi mwina Lebi.”