Inyimbo sha Bulanda
א [ʼAʹleph]
1 Iye, ifyo waikala weka,+ we musumba uwafulilemo abantu!+
Ifyo waba nga mukamfwilwa,+ umusumba umwali abantu abengi nga nshi pa nko!+
Ifyo uwali namfumu wa fitungu fya bulashi nomba alabomba umulimo wa kupatikishiwa!+
ב [Behth]
2 Alila sana ubushiku,+ kabili ifilamba fyakwe fili pa masaya yakwe.+
Pali bonse abamutemwa tapali nangu umo uulemusansamusha.+
ג [Giʹmel]
3 Yuda naya muli bunkole pa mulandu wa bucushi+ na pa mulandu wa busha ubwabipisha.+
Ekele mu nko.+ Tasangile apa kutuushisha.
Bonse abalemucusha bamusanga mu kati ka bucushi.+
ד [Daʹleth]
4 Inshila sha ku Sione shileloosha, pantu takuli uuleisa ku mutebeto.+
Impongolo shakwe shonse nashilekeleshiwa;+ bashimapepo bakwe baleteta.+
Banacisungu bakwe baikatwa ubulanda, na o ashikitika.+
ה [Heʼ]
5 Ifibambe fyakwe e fyacimfya.+ Abalwani bakwe tababikileko amano.+
Pantu Yehova amuleetela ubulanda pa mulandu wa kufula kwa bumpulamafunde bwakwe,+
Abana bakwe baenda ukuya muli bunkole ku ntanshi ya mulwani.+
ו [Waw]
6 Kabili ukupuulama kwakwe konse kwafumako ku mwana mwanakashi Sione.+
Bacilolo bakwe bali nge nsebula ishishisangile umulemfwe;+
Kabili benda ababulwa amaka ku ntanshi ya ulebabutusha.+
ז [Zaʹyin]
7 Yerusalemu aibukisha inshiku sha bucushi bwakwe ne sha kulubanta kwa bantu bakwe
Ifisuma fyakwe fyonse ifyaliko ukutula ku nshiku sha kale.+
Ilyo abantu bakwe baponene mu maboko ya mulwani na o takwete uwa kumwafwa,+
Abalwani balimumwene. Basekele ukuwa kwakwe.+
ח [Chehth]
8 Yerusalemu nacita ulubembu ulwabipisha.+ E co abela ica bunani.+
Bonse abalemucindika bamusuula,+ pantu bamona insoni shakwe.+
Na o aleteta+ kabili afutata.
ט [Tehth]
9 Ukukowela kwakwe kuli mu nsalu shakwe.+ Taibukishe inshita yakwe iya ku ntanshi,+
Kabili awa mu cipesha amano. Takwete no wa kumusansamusha.+
Mwe Yehova, moneni ubucushi bwandi,+ pantu umulwani aituumika nga nshi.+
י [Yohdh]
10 Umulwani atambalika ukuboko kwakwe pa fisuma fyakwe fyonse.+
Pantu amona inko ishingiile mu ncende yakwe iya mushilo,+
Isho mwatile te kuti shingile mu lukuta lwenu.
כ [Kaph]
11 Abantu bakwe bonse baleteta; balefwaya ifya kulya.+
Ifisuma fyabo bakaabushanyamo ifya kulya, ku kupuupuutula umweo.+
Moneni, mwe Yehova, kabili lolesheni, pantu nasanguka ngo mwanakashi uwasuulwa.+
ל [Laʹmedh]
12 Bushe ca fye kuli imwe bonse mwe balepita mu nshila? Lolesheni no kumona.+
Bushe kwatala akuba ukukalipwa ngo kukalipwa uko ndekalipwa,+
Uko Yehova alengeleko ubulanda mu bushiku bwa bukali bwakwe ubulepya ngo mulilo?+
מ [Mem]
13 Ukufuma apasansabala atuma umulilo ukwingila mu mafupa yandi,+ kabili anasha ifupa limo na limo.
Ayanshila amakasa yandi isumbu.+ Anenga ukubwelela inuma.
Anenga ukuba umwanakashi uwalekeleshiwa. Nindwala akasuba konse.+
נ [Nun]
14 Acili alemona pa filubo fyandi.+ Mu minwe yakwe e mo fyaipikanya.
Fyamfika na ku mukoshi.+ Amaka yandi yapwa.
Yehova ampeela mu minwe ya bantu abo nshingemina.+
ס [Saʹmekh]
15 Aba maka bandi bonse Yehova abapoosa ku mbali ukufuma mu kati kandi.+
Anonganikila abantu, ukuti aputaule abalumendo bandi tupimfya tupimfya.+
Yehova anyantaula ica kukaminamo imyangashi+ ica kwa Yuda umwana mwanakashi nacisungu.+
ע [ʽAʹyin]
16 Pali ifi e po ndelilila ne mwanakashi.+ Amenso yandi yaleitulula amenshi.+
Pantu uwa kusansamusha ali ukutali nga nshi, uwa kupuupuutula umweo wandi.
Abana bandi nabalekeleshiwa,+ pantu umulwani wandi naituumika nga nshi.+
פ [Peʼ]
17 Sione atambulula amaboko yakwe.+ Takwete uwa kumusansamusha.+
Yehova apeela icipope pali Yakobo kuli bonse abamushinguluka abali abalwani bakwe.+
Yerusalemu asanguka ica bunani mu kati kabo.+
צ [Tsa·dhehʹ]
18 Yehova mulungami,+ pantu nshaumfwilile ifyo asosele.+
Umfweni nomba mwe bantu bonse, no kumona ukukalipwa kwandi.
Banacisungu bandi na balumendo bandi nabaya muli bunkole.+
ק [Qohph]
19 Nalilila ku bantemwa nga nshi.+ Lelo bena bambepa.
Bashimapepo bandi na bakalamba bandi bafwila mu musumba,+
Mu kufwayafwaya ifya kulya ifya kuti fipembule umweo wabo.+
ר [Rehsh]
20 Moneni, mwe Yehova, pantu ndi mu bucushi ubukalamba. Mu mala mulenyonga.+
Umutima wandi wapilibuka muli ine,+ pantu ukumfwa nshumfwa.+
Ku nse ulupanga lwanengele ukufwilwa abana.+ Mu kati ka ng’anda cimo fye ne mfwa.+
ש [Shin]
21 Abantu nabomfwa ifyo ndeteta ne mwanakashi.+ Takuli uwa kunsansamusha.+
Abalwani bandi bonse nabomfwa ubucushi ubumponene.+ Nabasekelela, pantu ni mwe mwacita ici.+
Cine cine mukaleta ubushiku ubo mwabilisha ukuti bukesa,+ pa kuti na bo bakabe nga ine.+
ת [Taw]
22 Shi ububi bwabo bonse bwise ku cinso cenu, kabili mubakande icine cine,+
Nga filya fine mwankanda pa mulandu wa filubo fyandi fyonse.+
א [ʼAʹleph]
2 Yangu ifyo Yehova mu bukali bwakwe afimbilikisha umwana umwanakashi Sione!+
Ukufuma mu muulu apoosa pe sonde+ ukuyemba kwa kwa Israele.+
Kabili tebukishe icipuna ca makasa yakwe+ mu bushiku bwa bukali bwakwe.
ב [Behth]
2 Yehova naonaula incende shonse umo Yakobo ekala+ kabili tomfwilile uluse ishi ncende.
Mu bukali bwakwe nabongolola imisumba ya malinga+ iya mwana mwanakashi Yuda.
ג [Giʹmel]
3 Mu bukali bwakwe ubulepya ngo mulilo naputula ulusengo lonse ulwa kwa Israele.+
Nabwesesha ku numa ukuboko kwakwe ukwa ku kulyo ukukufumya ku cinso ca mulwani;+
Kabili muli Yakobo atwalilila ukubilima ngo lubingu lwa mulilo ululeoca konse konse.+
ד [Daʹleth]
4 Nanyantaula ubuta bwakwe ngo mulwani.+ Ukuboko kwakwe ukwa ku kulyo+ kuli mu cifulo ca kuko
Kwati mulwani,+ na o akonkenyepo fye ukwipaya bonse abo amenso yakwe yatemwa.+
Mwi tenti+ lya mwana mwanakashi Sione napongolwelamo ubukali bwakwe, ngo mulilo.+
ה [Heʼ]
5 Yehova ali ngo mulwani.+ Namina Israele.+
Naonaula amayanda yakwe yonse aya pa malinga;+ naonaula imishi yakwe iya malinga.+
Kabili ku mwana mwanakashi Yuda afusha ukuloosha no kupumapo imisowa.+
ו [Waw]
6 Kabili apasaula insakwe yakwe+ nga ilya iya mwi bala.+ Aonaula umutebeto wakwe.
Yehova nalenga umutebeto+ ne sabata ukulabwa mu Sione,
Kabili mu cipyu ca bukali bwakwe asuula imfumu na shimapepo.+
ז [Zaʹyin]
7 Yehova nakaana iciipailo cakwe.+ Nakaana incende yakwe iya mushilo.+
Napeela mu minwe ya mulwani ifibumba fya mayanda yakwe aya pa malinga.+
Mu ng’anda ya kwa Yehova e mo balekela ishiwi lyabo ukumfwika, nga pa bushiku bwa mutebeto.+
ח [Chehth]
8 Yehova napanga ukonaula ilinga+ lya mwana mwanakashi Sione.
Nafungulula intambo ya kupiminako.+ Taleseshe ukuboko kwakwe ukuti kwionaula.+
Kabili e ulenga ica kucingilila ne linga ukuloosha.+ Amaka ya fiko yapwila pamo.
ט [Tehth]
9 Impongolo+ shakwe shakulukila mwi sonde. Naonaula no kukontaula imipindo yakwe tupimfya tupimfya.
Imfumu yakwe na bacilolo bakwe bali mu nko.+ Tamuli ifunde.+
Bakasesema bakwe na bo tabasangile icimonwa kuli Yehova.+
י [Yohdh]
10 Abakalamba ba mwana mwanakashi Sione bekala pa nshi pe sonde, no kuba tondolo.+
Nabakuba ulukungu pa mitwe yabo.+ Nabakaka insamu* mu misana yabo.+
Banacisungu ba mu Yerusalemu nabenamika imitwe yabo pa nshi.+
כ [Kaph]
11 Amenso yandi nayanaka ku kulila ifilamba.+ Amala yandi yalenyonga.+
Ilibu lyandi nalipongolokela pa nshi,+ pa mulandu wa kutobaulwa kwa mwana mwanakashi uwa bantu bandi,+
Pa mulandu wa kufwa umutombo ukwa mwana no kwa onka mu mansa sha mu musumba.+
ל [Laʹmedh]
12 Balesosa kuli banyinabo abati: “Fili kwi ingano no mwangashi?”+
Pa mulandu wa kufwa kwabo umutombo ngo muntu uwakomaulwa mu mansa sha mu musumba,
Pa mulandu wa kuti bafwila pa fifuba fya banyinabo.
מ [Mem]
13 Ni kuli cinshi nalakubomfya ukuba inte? Cinshi nalakupashanyako, we mwana mwanakashi Yerusalemu?+
Cinshi nalakulinganyako, ukuti nkusansamushe, we Sione umwana mwanakashi nacisungu?+
Pantu ukubongoloka kobe+ kwakula fye nga bemba. Nani engakuundapa?+
נ [Nun
14 Bakasesema bobe bamwena iwe ifimonwa fya fintu fya fye kabili ifishiikusha,+
Kabili tabasokolwele icilubo cobe pa kuti ufume muli bunkole,+
Lelo batwalilile ukukumwena ifyebo fya fye kabili ifya kulufya.+
ס [Saʹmekh]
15 Bonse abalepita mu nshila batoota indupi shabo pali iwe.+
Balisha iminsoli+ kabili balepukunya imitwe yabo+ pa mwana mwanakashi Yerusalemu, no kutila:
“Bushe uyu e musumba baleti, ‘E wafikapo ukuyemba, ukusekelela kwa bonse aba pano isonde’?”+
פ [Peʼ]
16 Abalwani bobe bonse ba-asamwina utunwa twabo pali iwe.+
Balisha iminsoli kabili balesumanya fye ameno.+ Baleti: “Twalamumina.+
ע [ʽAʹyin]
17 Yehova nacita ico apangile.+ Nafikilisha amashiwi yakwe,+
Ayo asosele mu nshiku sha ku kale.+ Nabongolola kabili tabomfwilile inkumbu.+
Kabili pali iwe nalenga umulwani ukusekelela.+ Nalenga ulusengo lwa balwani bobe ukusumbuka.+
צ [Tsa·dhehʹ]
18 Imitima yabo yalilila kuli Yehova,+ iye we linga lya mwana mwanakashi Sione.+
Leka ifilamba fikonkoloke ngo mumana akasuba no bushiku.+
Yumfwile ubulanda. Wileka imboni ya linso lyobe ituushe.
ק [Qohph]
19 Ima! Lila ubushiku pa kutendeka kwa bulinde bwa lucelo.+
Pongolola ifya mu mutima+ obe nga menshi pa ntanshi+ ya kwa Yehova.
Sumbwila kuli ena amaboko yobe+ pa mulandu wa mweo wa bana bobe,
Abalefwa umutombo pa mulandu wa cipowe ku mpela ya misebo yonse.+
ר [Rehsh]
20 Moneni, mwe Yehova, kabili lolesheni+ uo mwakanda muli uyu musango.
Bushe abanakashi batwalilile ukulya abana babo, abana abafyalwa abatuntulu,+
Nelyo bushe bashimapepo na bakasesema babepaile mu ncende ya mushilo iya kwa Yehova?+
ש [Shin]
21 Umulumendo no mukote+ balele pa nshi mu misebo.+
Banacisungu bandi na balumendo bandi nabafwa ku lupanga.+
Namwipaya mu bushiku bwa bukali bwenu.+ Namwipayaula;+ tamubelele inkumbu.+
ת [Taw]
22 Nga mu bushiku bwa mutebeto+ mwaitile ififulo fyonse ifyo naikelemo.
Kabili mu bushiku bwa bukali bwa kwa Yehova takwali nangu umo uwafyukile nangu uwa kupusuka;+
Abo nafyele abatuntulu no kukusha, umulwani wandi alibalofeshe.+
א [ʼAʹleph]
3 Ndi muntu uwamona ubucushi+ pa mulandu wa nkonto ya bukali bwakwe.
2 Antungulula kabili anenga ukwenda mu mfifi, mu lubuuto iyo.+
3 Cine cine, ni kuli ine libili libili alwila ukuboko kwakwe akasuba konse.+
ב [Behth]
4 Alenga umubili wandi ne nkanda yandi ukupwa.+ Atobaula amafupa yandi.+
5 Akuula icibumba ukuncilikila, pa kuti anshingulushe+ icimenwa ca busungu+ no bucushi.
6 Umwafiita+ e mo anenga ukwikala nga bantu abafwa kale.+
ג [Giʹmel]
7 Ancilikila kwati cibumba, ukuti nifuma.+ Alenga iminyololo+ yandi iya mukuba ukufina.
8 Kabili, ilyo naita no kupunda mutuule, alafulunganya ipepo lyandi.+
9 Acilika inshila shandi ku mabwe ayabaswa.+ Imisebo yandi yonse anyonganya.+
ד [Daʹleth]
10 Ali nga bere uumbelamine,+ nge nkalamo iili umwafisama.+
11 Na-alula inshila shandi, kabili anenga ukuba uwa fye. Anenga ukuba icibolya.+
12 Anyanta ubuta bwakwe,+ no kunjimika nge ca kulasapo umufwi.+
ה [Heʼ]
13 Andasa imifwi mu mfyo, e kutila abana ba mu mufuko wakwe uwa mifwi.+
14 Bonse abampata balanseka,+ akasuba konse balanyimba mu nyimbo shabo.+
15 Fyafula ifyalula ifyo ampeela.+ Anenga ukukolwa amalulu.+
ו [Waw]
16 Kabili alenga ameno yandi ukutobaika ku nsakalabwe.+ Anenga ukwikala mu mito.+
17 Kabili mwakaana ukuti kwiba umutende ku mweo wandi. Nindaba ifyo ubusuma bumfwika.+
18 Kabili ntila: “Ukupuulama kwandi nakupwa, pamo ne subilo lyandi kuli Yehova.”+
ז [Zaʹyin]
19 Ibukisheni ubucushi bwandi no kulubanta kwandi,+ amalulu ne cimenwa ca busungu.+
20 Cine cine mukebukisha no kukontamina pali ine.+
21 Ici e co nkebukisha ku mutima wandi.+ E mulandu wine nkalalolelela.+
ח [Chehth]
22 Mulandu wa cikuuku+ ca kwa Yehova e co tushilobele,+ pantu inkumbu shakwe tashakapwe.+
23 Cila lucelo shiba ishipya.+ Icishinka cenu cikulu.+
24 “Yehova e o nasala,”+ e fyasosa umweo wandi, “e o nkalolela.”+
ט [Tehth]
25 Yehova musuma ku ulesubila muli ena,+ ku muntu uumufwaya.+
26 Cisuma ukulolela+ ukupususha kwa kwa Yehova,+ ukumulolela mu mutalalila.+
27 Cisuma umuntu ukusenda ikoli ilyo acili umwaice.+
י [Yohdh]
28 Lekeni ekale eka no kuba tondolo,+ pantu nabiika cimo pali ena.+
29 Lekeni abike akanwa kakwe mu lukungu.+ Nalimo kuti kwaba isubilo.+
30 Lekeni apeele isaya lyakwe ku ulemuuma.+ Lekeni aseebane nga nshi.+
כ [Kaph]
31 Pantu Yehova takatwalilile pe ukukaana abantu bakwe.+
32 Pantu nelyo alenga ubulanda,+ akaba ne nkumbu ukulingana no bwingi bwa cikuuku cakwe.+
33 Pantu te ku kufwaya kwakwe acushiishe nelyo ukulenga abana ba bantu ubulanda.+
ל [Laʹmedh]
34 Ukushonawila abafungwa bonse aba pe sonde+ mwi samba lya makasa,+
35 Ukupondamika ubupingushi bwa muntu pa ntanshi ya Wapulamo,+
36 Ukufyenga umuntu mu kulubulula kwakwe, Yehova tatala asuminishako.+
מ [Mem]
37 Nani nomba atila pafwile ukucitika cimo ilyo Yehova umwine talasosa?+
38 Mu kanwa ka Wapulamo tamufuma ifyabipa ne fisuma.+
39 Kuti umuntunse aipoosa shani mu kuilishanya,+ umuntu kuti ailishanya shani pa lubembu lwakwe?+
נ [Nun]
40 Natulolekeshe pa mibele yesu no kutontonkanyapo,+ kabili natubwelele kuli Yehova.+
41 Natuloshe imitima yesu pamo na maboko kuli Lesa mu muulu:+
42 “Natupula mu mafunde yenu, twabikapo no kutalama.+ Imwe tamutwelele.+
ס [Saʹmekh]
43 Mwacilika inshila ku bukali,+ no kulatukonka pa numa.+ Mwatwipaya; mwakaana ukutubelela inkumbu.+
44 Mwacilika inshila ya kufika kuli imwe kwi kumbi ilyafiita fititi,+ pa kuti ipepo lipulinkanya.+
45 Mwatulenga ukuba kwati ni nkokotolo nangu ifisooso mu kati ka nko.”+
פ [Peʼ]
46 Abalwani besu bonse bayasamwina pali ifwe utunwa twabo.+
47 Umwenso ne nindi fyaba kuli ifwe,+ ubonaushi no kubongoloka.+
48 Imilonga ya menshi ikonkoloka ukufuma mu menso yandi pa mulandu wa kubongoloka kwa mwana mwanakashi wa bantu bandi.+
ע [ʽAʹyin]
49 Amenso yandi yapongolola ifilamba no kuputuka iyo, tayatuushishe nakalya,+
50 Mpaka Yehova aloleshe pa nshi no kumona ukufuma mu muulu.+
51 Amenso yandi yancusha nga nshi,+ pa mulandu wa bana banakashi bonse aba mu musumba wandi.+
צ [Tsa·dhehʹ]
52 Ukununga banunga nge cuni abalwani bandi,+ apabula umulandu.+
53 Baonaula ubumi bwandi mu cilindi,+ kabili balepoosa amabwe pali ine.
54 Amenshi yapita pa muulu wa mutwe wandi.+ Na ine natila: “Nalafwa!”+
ק [Qohph]
55 Nalilila kwi shina lyenu, mwe Yehova, ukufuma mu cilindi icashika nga nshi.+
56 Umfweni ishiwi lyandi.+ Mwifisa ukutwi kwenu pa kuti munjilululeko, no kumfwa ukulila kwandi.+
57 Mwalipaleme mu bushiku nalemwita.+ Mwatile: “Witiina.”+
ר [Rehsh]
58 Mwe Yehova, mwasenda ifya kupilikita fya mweo wandi.+ Mwalubula ubumi bwandi.+
59 Mwe Yehova, namumona ububi ubwacitwa kuli ine.+ Mukwai mumpingwileko umulandu.+
60 Namumona icilandushi cabo conse, amapange yabo yonse pali ine.+
ש [Sin] nelyo [Shin]
61 Mwe Yehova, namumfwa imiponto yabo, amapange yabo yonse pali ine,+
62 Imilomo yabanjimina+ e lyo no kutepeleshanya kwabo pali ine akasuba konse.+
63 Lolesheni ukwikala kwabo no kwima kwabo.+ Nine bemba mu nyimbo shabo.+
ת [Taw]
64 Mwe Yehova, mukabwesesha pali bena imicitile yabo ukulingana ne milimo ya minwe yabo.+
65 Mukabapeela umutima wa misuula,+ icitiipu cenu cikaba pali bena.+
66 Mukabakonka mu bukali bwenu no kubalofya+ mwi samba lya muulu wa kwa Yehova.+
א [ʼAʹleph]
4 Iye ifyo golde iibeeka yashibantukila, golde iisuma!+
Iye ifyo amabwe ya mushilo+ yasalangana pa makoona yonse aya misebo!+
ב [Behth]
2 Kumfwa abana baume aba kwa Sione abatemwikwa,+ abalingiilwe kuli golde iyalopololwa,
Iye ifyo babatunga ati mitondo iikalamba, iyabumbwa ku minwe ya kwa nakabumba!+
ג [Giʹmel]
3 Bamumbwe bena bapeela utwana twabo ibele. Baonsha utwana twabo.
Umwana mwanakashi wa bantu bandi abo munkalwe,+ nga bamwakatala mu matololo.+
ד [Daʹleth]
ה [Heʼ]
5 Abalelya ifisuma bapeshiwa amano mu misebo.+
Abo balelelela mu shakashika ce+ bafukatila imiina ya mito.+
ו [Waw]
6 Kabili ukukandwa kwa mwana mwanakashi uwa bantu bandi pa cilubo cakwe kwakula ukucila ukukandwa kwa kwa Sodomu pa lubembu lwakwe,+
Uo bawishishe mu nshita fye iinono, kabili uushakwete na wa kumwafwa.+
ז [Zaʹyin]
7 AbaNasiri+ bakwe baali abasanguluka ukucila imfula ya bunga bunga;+ babuutile ukucila umukaka.
Na kuba bakashike+ ukucila bakorali; ukubeeka kwabo kwali ngo kwa safiri.+
ח [Chehth]
8 Imimonekele yabo yafiita ukucila icafiita fititi. Bafilwa ukubeshiba mu misebo.+
Inkanda yabo yalambatila ku mafupa yabo.+ Yauma yaba fye nge cimuti icauma.
ט [Tehth]
9 Abafwila ku lupanga+ bawama ukucila abafwa ku cipowe,+
Pantu aba bapomponteka, babalasa pa kubulwa ifisabo fya mwi bala.
י [Yohdh]
10 Iminwe ya banakashi ba nkumbu yaipika abana babo aba kuifyalila.+
Basanguka ifya kulya fya cisansamushi ku muntu mu nshita ya kutobaulwa kwa mwana mwanakashi wa bantu bandi.+
כ [Kaph]
11 Yehova nafikilisha icipyu cakwe.+ Napongolola ubukali bwakwe ubulepya ngo mulilo.+
Kabili nasonteka umulilo mu Sione, na o waoca umufula wakwe uwa kukuulapo.+
ל [Laʹmedh]
12 Imfumu sha pe sonde na bekashi bonse aba mu calo tabasumine+
Ukuti icipondo no mulwani fikengila mu mpongolo sha ku Yerusalemu.+
מ [Mem]
13 Pa mulandu wa membu sha bakasesema bakwe, ifilubo fya bashimapepo bakwe,+
Mu kati kakwe mwali abalepongolola umulopa wa balungami.+
נ [Nun]
14 Balulumba nge mpofu+ mu misebo.+ Bakantaikwa no mulopa,+
Ica kuti takuli uwingekata ifya kufwala fyabo.+
ס [Saʹmekh]
15 “Tutalukeni! Natukowela!”+ e fyo babilikisha kuli bena. “Tutalukeni! Tutalukeni! Mwitwikatamo!”+
Pantu tabakwete apa kwikala.+ Kabili balelulumba fye.+ Abantu mu nko batila: “Tabakabe kabili abalebeshi.+
פ [Peʼ]
16 Yehova umwine nabapaatukanya.+ Takaloleshe pali bena na kabili.+
Abantu tabakalangulukile nangu ni bashimapepo.+ Tabakabelele uluse na bakote.”+
ע [ʽAʹyin]
17 Ilyo tucilipo, amenso yesu yanaka ku kulolela ibusha aba kutwafwa.+
Mu nshita ya kucebaceba twalolesha ku luko ulushingapususha.+
צ [Tsa·dhehʹ]
18 Bakonka umupitile intampulo+ shesu ica kuti twafilwa ukwenda mu mansa shesu.
Impela yesu yapalama. Inshiku shesu shafikapo, pantu impela yesu yaisa.+
ק [Qohph]
ר [Rehsh]
20 Umupu wa mu myona yesu,+ uwasubwa wa kwa Yehova,+ aikatwa mu cilindi cabo icikalamba,+
Uo twatile: “Mu cintelelwe+ cakwe e mo tukabela no bumi mu nko.”+
ש [Sin]
ת [Taw]
22 Icilubo cobe, we mwana mwanakashi Sione, capwa.+ Takakutwale muli bunkole na kabili.+
Nalolesha pa filubo fyobe, we mwana mwanakashi Edomu. Nasokolola imembu shobe.+
5 Ibukisheni, mwe Yehova, icatuponena.+ Lolesheni no kumona ukuseebana kwesu.+
2 Ica bupyani cesu capeelwa kuli bambi bambi, amayanda yesu ku bena fyalo.+
3 Twasanguka abana ba nshiwa, ababula shibo.+ Banyinefwe bali nga bamukamfwilwa.+
4 Amenshi yesu aya kunwa e yo twashita mu ndalama.+ Ne nkuni shesu na sho twashita.
5 Batukonka ulubilo no kutupeemena pa mikoshi.+ Twafunshika. Tatutuusha.+
6 Ku Egupti+ e ko twatambulwila amaboko yesu;+ na kuli Asiria+ twalombako ifya kulya.
7 Ifikolwe fyesu e fyabembwike.+ Fyalifwa. Lelo, ifilubo fyabo e fyo twasenda.+
8 Ababomfi fye e batuteka.+ Takuli nangu umo uwa kutupokolola mu minwe yabo.+
9 Pa kuibika mu kapoosa mweo e mo tumwena ifya kulya,+ pa mulandu wa lupanga lwa mu matololo.
10 Imibili yesu yakaba nge lungu, pa mulandu wa kukalipwa ku nsala.+
11 Abakashi besu mu Sione babasaalula,+ na banacisungu mu misumba ya kwa Yuda.
12 Bacilolo bakobekwa ku maboko yabo.+ Ne finso fya bakote taficindikwe.+
13 Abalumendo na bo baimya impelo,+ kabili bakalume batalantanta ne nkuni.+
14 Abakalamba baleka ukwikala ku nse ya mpongolo,+ abalumendo na bo baleka ukulisha ifilimba.+
15 Ukwanga kwa mitima yesu kwapwa. Ukucinda kwesu kwasanguka ukuloosha.+
16 Icilongwe nacipona ku mitwe yesu.+ Nomba we bulanda kuli ifwe, pantu natubembuka!+
17 Pali ici imitima yesu nailwala.+ Pali ifi fine e po amenso yesu yanakiile,+
18 Pa mulandu wa lupili lwa mu Sione ulwashala icibolya;+ bamumbwe baendaukapo.+
19 Lelo imwe, mwe Yehova, mukekala umuyayaya.+ Icipuna cenu ca ku nkulo ne nkulo.+
20 Cinshi ico mwatulabila pe,+ ico mwatushiila pa nshita ntali?+
21 Tubwesesheni kuli imwe,+ mwe Yehova, na ifwe twalabwela. Lengeni cipya cipya inshiku shesu nga ku kale.+
22 Na lyo line, ukukaana mwatukaana.+ Namukalipa icine cine pali ifwe.+
Abantu balefwala “insamu” nga baleloosha nelyo nga bali no bulanda.