Ukusokolola Kuli Yohane

1 Ifyasokololwa+ muli lino ibuuku fintu ifyo Lesa asokolwelele+ Yesu Kristu pa kutila Yesu alange abasha+ bakwe ifili no kucitika bwangu bwangu.+ Yesu Kristu na o atumine malaika+ wakwe, uwabomfeshe ifishibilo+ pa kulanga Yohane+ umusha wa kwa Yesu ifi fintu. 2 Yohane na o ashimike fyonse ifyo Lesa amupeele.+ Kabili ashimike fyonse ifyo Yesu Kristu amupeele,+ na fyonse ifyo amwene. 3 Alipaalwa+ uubelenga,+ na bomfwa amashiwi ya muli uku kusesema,+ na bakonka ifyalembwamo;+ pantu inshita naipalama.+

4 Ine ne Yohane, nalembela imwe mwe filonganino+ cinelubali (7) ifyaba mu citungu ca Asia:*

Ndeti icikuuku no mutende fibe na imwe ukufuma ku “Wabako kabili uwaliko kabili uuleisa,”+ no kufuma ku mipashi+ cinelubali iyaba pa ntanshi ya cipuna cakwe ica bufumu. 5 Kabili icikuuku no mutende fibe na imwe ukufuma kuli Yesu Kristu, “Inte ya Cishinka,”+ “uwabalilepo ukubuuka ku bafwa,”+ kabili “Kateka wa shamfumu sha pano isonde.”+

Ku watutemwa+ kabili uwatulubwile ku membu shesu mu mulopa wakwe+— 6 kabili atulengele tube ishamfumu,+ na bashimapepo+ kuli Lesa wakwe kabili Wishi—awe kuli ena kube ubukata na maka pe na pe.+ Ameni.

7 Moneni! Akesa mu makumbi,+ ne linso lyonse likamumona,+ na balya abamulashile+ bakamumona; ne mitundu yonse iya pano isonde ikapumapo imisowa pa mulandu wakwe.+ Cibe ifyo fine, Ameni.

8 “Nine Alifa kabili Omega,”*+ e fyasosa Yehova Lesa, “uwabako, uwaliko kabili uuleisa,+ Uwa Maka Yonse.”+

9 Ine ne Yohane munyinenwe ne o twaba nenu mu macushi,+ na mu bufumu,+ na mu kushipikisha+ pamo na Yesu,+ naishileba pa cishi iciitwa Patmo pa mulandu wa kulanda pali Lesa no kushimika ubunte bwa kwa Yesu.+ 10 Ilyo napokelele umupashi wa mushilo+ naishileba+ mu bushiku bwa kwa Shikulu,+ kabili naumfwile ku numa yandi ishiwi+ ilikalamba kwati lye penga, 11 lileti: “Ico ulemona lemba+ mwi buuku ilyapombwa no kulituma ku filonganino+ cinelubali (7), mu Efese+ na mu Smurna+ na mu Pergamo+ na mu Tuatira+ na mu Sarde+ na mu Filadelfia+ na mu Laodikea.”+

12 Awe nalipilibwike pa kuti mone uwalelanda na ine, kabili ilyo napilibwike, namwene ifya kutekapo inyali cinelubali (7) ifya golde,+ 13 na pa kati ka fya kutekapo inyali pali uwapala umwana wa muntu,+ nafwala ilaya ilyalepa ukufika ku makasa, kabili nakaka umushipi wa golde pa cifuba. 14 Kabili, umutwe wakwe no mushishi wakwe fyali ifyabuuta+ tutu kwati masako yabuuta aya mpaanga, atemwa kwati butonge, na menso yakwe yali kwati lubingu lwa mulilo.+ 15 Amakasa yakwe yalebengeshima kwati mukuba+ uwaengululwa filya ubengeshima mwi lungu; ne shiwi+ lyakwe lyaleumfwika kwati cipooma ca menshi ayengi. 16 Na mu lupi lwakwe ulwa ku kulyo mwali intanda+ cinelubali (7), na mu kanwa kakwe mwalefuma ulupanga+ ulutali ulwatwila kubili kubili, ne cinso cakwe cali nga kasuba akabalikisha.+ 17 Kabili ilyo namumwene, nawilile pa makasa yakwe ngo wafwa.

Na o abikile ulupi lwakwe ulwa ku kulyo pali ine, no kutila: “Witiina.+ Nine Uwa ntanshi+ kabili Uwa kulekelesha,+ 18 kabili ndi uwa mweo;+ nalifwile,+ lelo, mona! ndi uwa mweo pe na pe,+ kabili ndi na makii ya mfwa+ na ya ku Nshiishi.*+ 19 E ico lemba ifyo umwene, ne filecitika nomba, e lyo ne fikacitika pa numa ya ifi.+ 20 Kanshi inkama ya mushilo iya ntanda+ cinelubali (7) isho wacimona mu lupi lwandi ulwa ku kulyo, ne ya fya kutekapo inyali+ cinelubali ifya golde ni yi: Intanda cinelubali ni bamalaika ba mu filonganino cinelubali, ne fya kutekapo inyali cinelubali filonganino cinelubali.+

2 “Lembela malaika+ wa mu cilonganino ca mu Efese,+ auti: Ifi e fyasosa uwaikata intanda+ cinelubali (7) mu lupi lwakwe ulwa ku kulyo, uwendauka pa kati ka fya kutekapo+ inyali cinelubali ifya golde, 2 ‘Ine nalishiba imilimo yobe,+ no kucucutika kobe no kushipikisha kobe. Nalishiba ukuti taufwaya ababi nangu panono, na baleitunga ukuti batumwa+ nangu ca kuti te batumwa walibesha+ no kusanga ukuti ba bufi. 3 Iwe ulashipikisha,+ no kushishimisha pa mulandu we shina+ lyandi kabili taunenuka.+ 4 Nomba, ndi ne ci ica kukushinina, ukuti pali nomba tawantemwa nga filya wantemenwe pa kutendeka.+

5 “‘E ico ibukisha ifyakulengele ukuwa, kabili lapila+ no kucita nge fyo walecita pa kutampa. Lelo nga wakaana, nkesa kuli iwe,+ kabili nkafumya ica kutekapo+ inyali cobe pa ncende ya ciko, nga taulapiile. 6 Na lyo line, cimo ico natemwako kuli iwe ca kuti walipata+ ificita akalibumba ka mapepo aka kwa Nikola,+ nge fyo na ine nafipata. 7 Uuli na matwi omfwe ico umupashi+ ulesosa ku filonganino: Uwacimfya+ nkamupeela insambu sha kulyako ku muti wa mweo,+ uwaba mwi bala lya kwa Lesa.’

8 “Kabili lembela na malaika+ wa mu cilonganino ca mu Smurna, auti: Ifi e fyasosa, ‘Uwa ntanshi kabili Uwa kulekelesha,’+ uwafwile lelo uwaishileba uwa mweo na kabili,+ 9 ‘Nalishiba ubucushi bobe no bupiina bobe—lelo uli mukankaala+—nalishiba ne miponto ya bantu abatila baYuda,+ lelo tabali baYuda iyo, lisunagoge fye lya kwa Satana.+ 10 Witiina ifyo walaswa uculeko.+ Moneni! Satana Kaseebanya+ alatampa ukupoosa bamo pali imwe mu cifungo pa kuti mukeshiwe nga nshi,+ no kuba mu bucushi+ inshiku ikumi (10). Ube uwa cishinka ukufika na ku mfwa,+ na ine nkakupeela icisote ca bufumu ica mweo.+ 11 Uuli na matwi omfwe+ ico umupashi+ ulesosa ku filonganino: Uwacimfya,+ imfwa ya cibili tayakamukumyemo nakalya.’+

12 “Lembela na malaika wa mu cilonganino ca mu Pergamo, auti: Ifi e fyasosa uuli no lupanga ulutali ulwatwila kubili kubili,+ 13 ‘Nalishiba ukuti uko wikala, e ko Satana akwatila icipuna cakwe ica bufumu; nomba iwe ucili walikatisha ishina lyandi,+ kabili tawakeene ukuntetekela+ na mu nshiku sha kwa Antipa, inte yandi,+ iya cishinka, uo baipaile+ uko kwine ku mwenu, ukwaikala Satana.

14 “‘Lelo, ndi na tumo tumo utwa kukushinina, ukuti uli na bamo uko kwine abakonka isambilisho lya kwa Balaamu,+ uwalesambilisha Balaki+ ukubeleleka abana ba kwa Israele, ukuti balye ifyaipailwa utulubi no kucita ubulalelale.+ 15 Kabili naukwata abantu bamo muli iwe abalekonka isambilisho lya kalibumba aka mapepo aka kwa Nikola.+ 16 E ico lapila.+ Nga wakaana, nkesa bwangu kuli iwe, kabili nkesabomina+ ku lupanga ulutali ulwa mu kanwa kandi.+

17 “‘Uuli na matwi omfwe ico umupashi ulesosa ku filonganino:+ Uwacimfya+ nkamupeelapo mana+ iyo bafisa, kabili nkamupeela na kalibwe akabuuta, apalembwa ishina+ ilipya ilishaishibikwa ku muntu nangu umo kano ku ulekapokelela.’+

18 “Lembela na malaika wa mu cilonganino ca mu Tuatira,+ auti: Ifi e fyasosa Umwana+ wa kwa Lesa, uwaba na menso ayabeeka kwati lubingu+ lwa mulilo, na makasa ayabeeka ngo mukuba+ uwaengululwa, 19 ‘Nalishiba ifyo ucita, no kutemwa+ kobe ne citetekelo cobe no mulimo obe no kushipikisha kobe. Nalishiba no kuti pali nomba ulebombesha+ ukucila ifyo walebomba pa kutampa.+

20 “‘Lelo, ndi ne ci ica kukushinina, ica kuti walitekelesha ulya mwanakashi Yesebele,+ uutila ni kasesema, kabili asambilisha+ no kulufya abasha+ bandi ukucita ubulalelale+ no kulya ifyaipailwa utulubi.+ 21 Kabili namupeele inshita ya kuti alapile,+ lelo tafwaya ukulapila ku bulalelale bwakwe.+ 22 Mona! nalaswa imupoose pa busanshi bwa kulwala, na bacita nankwe ubucende nalabapoosa mu bucushi ubukalamba, kano fye nga balapila, baleka no kucita ifibi ifyo balecita nankwe. 23 Na bana bakwe nkabepaya ku cinkunka ica mfwa, pa kuti ifilonganino fyonse fikeshibe ukuti nine mfwayafwaya mu mfyo na mu mitima, kabili nkapeela umuntu onse ukulingana ne fyo acita.+

24 “‘Lelo, kuli imwe, mwe bashala aba mu Tuatira, bonse mwe bashikonka ili sambilisho, mwe bashaishibe ifyo abene basosa abati “ifyashika ifya kwa Satana,”+ ndetila: Nshilemutwika icisendo na cimbi iyo.+ 25 Lelo imwe mwikatishe fye ico mukwete+ nkasuke nkese. 26 Kabili uwacimfya no kucita ifyo mfwaya ukufika na ku mpela+ nkamupeela amaka aya kuteka inko,+ 27 kabili akacemena abantu ku nkonto+ ya cela no kubatobaula nge fipe+ fye bumba, filya fine na ine napokelela amaka kuli Tata, 28 kabili nkamupeela no lutanda+ lwa lucelo. 29 Uuli na matwi omfwe ico umupashi+ ulesosa ku filonganino.’+

3 “Lembela na malaika+ wa mu cilonganino ca mu Sarde, auti: Ifi e fyasosa uwaba ne mipashi+ cinelubali (7) iya kwa Lesa ne ntanda+ cinelubali, ‘Nalishiba ifyo ucita, nalishiba no kuti waishibikwa ukuti uli wa mweo, lelo walifwa.+ 2 Shibuka,+ kabili koselesha+ abashala abali mupepi no kufwa, pantu nimona ukuti imilimo yobe taifikilepo ku cinso ca kwa Lesa wandi.+ 3 E ico, uleibukisha ifyo wapokelela+ ne fyo waumfwile, no kulafikonka,+ kabili lapila.+ Kwena nga taushibwike,+ nkakwishila kwati mupuupu,+ kabili tawakeshibe ne nshita nkesa kuli iwe.+

4 “‘Lelo kwena e mo bali abantu+ bamo mu Sarde abashakowesha+ amalaya yabo. Aba e bakenda na ine ninshi nabafwala amalaya ayabuuta,+ pantu nabalinga.+ 5 Uwacimfya+ akafwikwa amalaya ayabuuta;+ kabili nshakafuute nakalya ishina lyakwe mwi buuku lya mweo,+ lelo nkalumbula ishina lyakwe kuli Tata+ na kuli bamalaika.+ 6 Uuli na matwi omfwe ico umupashi+ ulesosa ku filonganino.’

7 “Lembela na malaika+ wa mu cilonganino ca mu Filadelfia, auti: Ifi e fyasosa uwa mushilo,+ uwa cine,+ uuli na makii ya kwa Davidi,+ uwisulako ica kuti takuli uwingesalako kabili uwisalako ica kuti takuli uwingesalako. 8 ‘Nalishiba ifyo ucita+—mona! ninkwiswila iciibi,+ ico umuntu ashingesala—nalishiba ukuti tawakwatisha amaka, lelo kwena walisunga amashiwi yandi ne shina lyandi tawalikaana iyo.+ 9 Mona! nkapeela aba mwi sunagoge lya kwa Satana abatila baYuda,+ lelo abashili baYuda iyo, ababepa fye+—mona! nkabalenga ukwisakufukamina+ pa makasa yobe no kubalenga beshibe ukuti nalikutemwa. 10 Apo walikonkele ifyo nalandile pa lwa kushipikisha kwandi,+ na ine nkakupususha+ mu nshita ya kwesha, iikesa pa bantu bonse aba pano isonde, ku kwesha abaikala pe sonde.+ 11 Ndeisa bwangu.+ Wikatishe ico ukwete,+ wileka umuntu nangu umo akakupokolole icisote cobe ica bufumu.+

12 “‘Uwacimfya—nkamulenga ukuba uluceshi+ mwi tempele+ lya kwa Lesa+ wandi, na o takafumemo na kabili, na ine nkalemba pali ena ishina lya kwa Lesa wandi ne shina lya musumba wa kwa Lesa wandi, Yerusalemu+ mupya uuleika mu muulu ukufuma kuli Lesa wandi. Kabili nkalemba pali ena ne shina lyandi ilipya.+ 13 Uuli na matwi omfwe ico umupashi+ ulesosa ku filonganino.’

14 “Lembela na malaika wa mu cilonganino ca mu Laodikea,+ auti: Ifi e fyo asosa Ameni,+ inte+ ya cishinka+ kabili iya cine,+ uo Lesa abalilepo ukupanga.+ 15 ‘Nalishiba ifyo ucita, ukuti tawatalala kabili tawakaba. Kanshi nga wali uwatalala nangu uwakaba. 16 Lelo ico uli fye icifulefule kabili tawakaba+ nangu ukutalala,+ nkakufwisa. 17 Pantu utila: “Ndi mukankaala+ kabili nalinonka ifyuma kabili nshikabila akantu nangu kamo,” lelo tawaishiba ukuti uli wa nkumbabulili kabili umulanda kabili umupiina kabili impofu+ kabili wenda fye ubwamba. 18 Kanshi ndekupandako amano ukuti ushite kuli ine golde+ iyalopololwa ku mulilo pa kuti ube umukankaala. Kabili ufwale ne fya kufwala ifyabuuta pa kuti wienda ubwamba.+ Ushite no muti wa kubika mu menso+ yobe pa kuti ulemona.

19 “‘Bonse abo natemwa ndabafunda no kubasalapula.+ E ico ube uwacincila no kulapila.+ 20 Mona! ninjiminina pa ciibi,+ ndekonkonsha. Ngo muntu aumfwa ishiwi lyandi no kwisulako iciibi,+ ndeingila mu ng’anda yakwe no kulya pamo nankwe umulaalilo, na o aleliila pamo na ine. 21 Uwacimfya+ nkamusuminisha ukwikala pamo na ine pa cipuna candi ica bufumu,+ ifyo na ine nacimfishe no kwikala+ pamo na Tata pa cipuna cakwe ica bufumu.+ 22 Uuli na matwi omfwe ico umupashi+ ulesosa ku filonganino.’”+

4 Ilyo ifi fyapitile, naliloleshe kabili namwene iciibi nacisuka mu muulu, ne shiwi lya ntanshi ilyo naumfwile lyali kwati lye penga,+ lilelanda na ine aliti: “Nina wise kuno,+ kabili ndekulanga ifili no kucitika.”+ 2 Awe apo pene napokelele umupashi wa mushilo: kabili, moneni! icipuna ca bufumu+ cali mu muulu,+ kabili pali ico cipuna ca bufumu pali no waikelepo.+ 3 Kabili uwaikelepo, alebeeka+ nge libwe lya yaspi+ kabili nge libwe lyakashika ilyauma umutengo, no mukolamfula+ uwalemoneka nge libwe lya emarodi+ washingulwike icipuna ca bufumu.

4 Kabili ifipuna fya bufumu amakumi yabili na fine (24) fyashingulwike icipuna ca bufumu, kabili namwene abakalamba+ amakumi yabili na bane+ abafwele amalaya yabuuta+ ne fisote fya bufumu ifya golde+ bekele pa fipuna fya bufumu.+ 5 Na ku cipuna ca bufumu kwalefuma ukubyata kwa nkuba+ na mashiwi ne fibulukutu;+ kabili kwali inyali+ cinelubali (7) isha mulilo ishaleaka pa ntanshi ya cipuna ca bufumu, ne shi nyali e mipashi+ cinelubali iya kwa Lesa. 6 Na pa ntanshi ya cipuna ca bufumu pali bemba uwaba nge cilola+ kabili uwalebeka kwati libwe lya krustali.

Kabili icipuna ca bufumu cali pa kati ne fya mweo+ fine ifyakwete amenso konse konse ku ntanshi na ku numa fyashingulwike icipuna ca bufumu. 7 Ica mweo ica kubalilapo cali kwati ni nkalamo,+ ne ca mweo icalenga fibili cali kwati ni ng’ombe iilume,+ ne ca mweo+ icalenga fitatu cali ne mpumi kwati ni mpumi ya muntu, ne ca mweo+ icalenga fine cali kwati ni kapumpe+ uulepupuka. 8 Kabili ifya mweo+ fyonse fine (4), cimo cimo cali na mapindo mutanda (6);+ kabili muli aya mapindo, mu kati na ku nse, mwali amenso yeka yeka.+ E lyo akasuba no bushiku tafyaletuusha, fyalesosa fye afiti: “Wa mushilo, wa mushilo, wa mushilo Yehova+ Lesa, Uwa Maka Yonse,+ uwaliko kabili uwabako+ kabili uukesabako.”

9 Kabili lyonse ilyo ifya mweo fyalepeela ubukata no mucinshi no kutootela+ ku Waikele pa cipuna ca bufumu,+ Uwabako umuyayaya,+ 10 abakalamba amakumi yabili na bane (24)+ balewa pa nshi ku cinso ca Waikele pa cipuna ca bufumu no kupepa+ Uwabako umuyayaya, kabili balepoosa ifisote fyabo ifya bufumu pa ntanshi ya cipuna ca bufumu, abati:11 “Mwalilinga, mwe Yehova, mwe Lesa wesu, ukupokelela ubukata+ no mucinshi+ na maka,+ pantu ni mwe mwabumbile ifintu fyonse,+ kabili ni pa mulandu wa kufwaya+ kwenu fyabeleleko no kubumbwa.”+

5 Kabili namwene ibuuku lyapombwa ilyalembwapo mu kati na ku nse+ mu kuboko kwa ku kulyo ukwa Waikala pa cipuna ca bufumu.+ Ili ibuuku lyali ilyakakatikwa+ ku fikakatikilo cinelubali (7). 2 Kabili namwene malaika uwakosa alebilikisha mwi shiwi ilikalamba, aleti: “Nani uwalinga ukukakatula ifikakatikilo fye buuku lyapombwa no kulifungulula?” 3 Lelo takwali nangu umo mu muulu nangu pano isonde nangu pa nshi ye sonde uwalingile ukukakatula ifikakatikilo fye buuku lyapombwa no kumonamo. 4 Awe nalililile nga nshi pantu takwasangilwe nangu umo uwalingile ukukakatula ifikakatikilo fye buuku lyapombwa.+ 5 Lelo umo pa bakalamba anjebele ati: “Leka ukulila. Mona! Inkalamo ya mukowa wa kwa Yuda,+ umushila+ wa kwa Davidi,+ alicimfya+ kabili ena kuti akakatula ifikakatikilo cinelubali (7) ifya ili ibuuku.”

6 Kabili namwene umwana wa mpaanga+ uwali ngo waipaiwe,+ uwali ne nsengo cinelubali (7) na menso cinelubali, aya menso e mipashi+ ya kwa Lesa cinelubali iyatumwa mwi sonde lyonse, naiminina pa kati ka cipuna ca bufumu+ ne fya mweo fine kabili pa kati ka bakalamba.+ 7 Na o alileko no kupoka ibuuku lyapombwa ilyali mu kubomko kwa ku kulyo ukwa Waikele pa cipuna ca bufumu.+ 8 Kabili ilyo apokele ibuuku lyapombwa, ifya mweo fine pamo na bakalamba amakumi yabili na bane (24)+ fyawile pa nshi ku cinso ca Mwana wa mpaanga. Bonse bali na bansango+ ne mbale shafonka isha golde ishaiswilemo ifyanunkila,+ ne fi ifyanunkila mapepo+ ya ba mushilo. 9 Kabili baleimba ulwimbo ulupya,+ abati: “Mwalilinga ukupoka ibuuku lyapombwa no kukakatula ifikakatikilo fya liko, pantu mwalipaiwe, na ku mulopa+ wenu mwashitiile+ Lesa+ abantu ukufuma mu mitundu yonse ne ndimi na bantu ne nko, 10 kabili mwabalengele ukuba ishamfumu+ kabili bashimapepo+ ba kwa Lesa+ wesu, kabili bakaba bashamfumu+ abakalateka isonde.”

11 Kabili naliloleshe, no kumfwa ishiwi lya bamalaika abengi abashingulwike icipuna ca bufumu ne fya mweo na bakalamba, ne mpendwa yabo yali amakana ikumi ukufushiwa ku makana ikumi,+ na makana ya makana,+ 12 balesosa ishiwi ilikalamba abati: “Umwana wa mpaanga uo baipeye+ nalinga ukukwata amaka no bucindami na mano no bukose no mucinshi no bukata ne paalo.”+

13 E lyo naumfwile ifibumbwa fyonse ifyaba mu muulu na pe sonde na pa nshi ye sonde+ na pali bemba, na fyonse ifyabamo, fileti: “Ku Waikala pa cipuna ca bufumu+ na ku Mwana wa mpaanga+ kube ipaalo no mucinshi+ no bukata+ na maka pe na pe.” 14 Ne fya mweo fine fyasosele afiti: “Ameni!” na bakalamba+ bawile pa nshi no kupepa.+

6 Ilyo Umwana wa mpaanga+ akakatwilepo icikakatikilo cimo pa fikakatikilo cinelubali (7),+ nalimwene. Kabili naumfwile cimo pa fya mweo+ fine cilesosa ishiwi ilyaumfwikike kwati kubulukuta kwa mfula, aciti: “Isa!”+ 2 Awe naliloleshe, kabili, moneni! kwali kabalwe+ uwabuuta; no waikelepo+ ali no buta;+ kabili apeelwe ne cisote ca bufumu,+ e lyo aile alecimfya+ mpaka apwishishisha ukucimfya kwakwe.+

3 Kabili ilyo akakatwile icikakatikilo icalenga fibili, naumfwile ica mweo+ icalenga fibili, aciti: “Isa!” 4 E lyo kwafumine kabalwe umbi, uwakashika; no waikelepo apeelwe amaka ya kufumya umutende pe sonde pa kuti abantu bepayane; kabili apeelwe ulupanga ulukalamba.+

5 Kabili ilyo akakatwile+ icikakatikilo icalenga fitatu, naumfwile ica mweo+ icalenga fitatu, aciti: “Isa!” Awe naliloleshe, kabili, moneni! kwali kabalwe uwafiita; no waikelepo ali na sekelo+ mu minwe yakwe. 6 E lyo naumfwile ishiwi kwati lilefuma pa kati+ ka fya mweo+ fine, aliti: “Icipimo cimo ica ngano mu ndalama imo iya denari,*+ ne fipimo fitatu ifya barle mu ndalama imo iya denari; lelo wionaula amafuta ya miolife no mwangashi.”+

7 Kabili ilyo akakatwile icikakatikilo icalenga fine, naumfwile ishiwi lya ca mweo+ icalenga fine, aliti: “Isa!” 8 Awe naliloleshe, kabili, moneni! kwali kabalwe uwabutulukila; no waikelepo ishina lyakwe ni Mfwa. Ne Nshiishi*+ yalemukonka pa numa. Kabili bapeele Imfwa ne Nshiishi amaka pa cipande cimo ica pa fipande fine ifye sonde, aya kwipaila ku lupanga+ ulutali, ku cipowe,+ ku cinkunka ca mfwa, na ku fiswango+ fya pe sonde.

9 Kabili ilyo akakatwile icikakatikilo icalenga fisano, namwene mwi samba lya ciipailo+ umulopa+ wa baipaiwe+ pa mulandu wa cebo ca kwa Lesa na pa mulandu wa mulimo wa kushimikila+ uo balebomba. 10 Kabili babilikishe ishiwi ilikalamba, abati: “Kufika lilali, mwe Shikulu Mulopwe+ mwe ba mushilo kabili aba cine,+ mukaleka fye ukwabula ukupingula+ no kulandula umulopa+ wesu ku baikala pe sonde?” 11 E lyo cila muntu apeelwe ilaya ilyabuuta;+ kabili baebelwe ukuti balolele inshita inono, mpaka impendwa ikakumane iya basha banabo na bamunyinabo abalaswa bepaiwe+ nga filya na bo baipaiwe.

12 Kabili namwene Umwana wa mpaanga ilyo akakatwile icikakatikilo icalenga mutanda (6), e lyo kwali icinkukuma icikalamba; na kasuba kafiitile fititi kwati ca kufwala ca masako icafiita,+ no mweshi onse walyalwike uwakashika ce kwati mulopa,+ 13 ne ntanda sha mu muulu shaponene pe sonde, nga filya umukunyu ulukusha ifipompo fya uko ilyo icimwela ca maka caupukunya. 14 No muulu walifungilwe kwati libuuku lyapombwa,+ ne mpili shonse ne fishi fyonse fyafumine mu fifulo fya fiko.+ 15 Ne shamfumu sha pe sonde na bashimucindikwa na bakalamba ba bashilika na bakankaala na ba maka no musha onse no muntungwa onse bafiseme mu ncengo na mu fimabwe+ fya mu mpili. 16 E lyo balaeba impili ne fimabwe, abati: “Tuponeneni+ no kutufisa ku cinso ca Waikala pa cipuna ca bufumu+ na ku bukali bwa Mwana wa mpaanga,+ 17 pantu ubushiku+ bukalamba ubwa bukali+ bwabo nabwisa, kabili nani uwingeminina?”+

7 Pa numa ya ifi namwene bamalaika+ bane nabeminina pa makoona yane aye sonde, nabekatilila imyela+ ine iye sonde, pa kuti umwela wipuupila pe sonde nelyo pali bemba nelyo pa fimuti fyonse.+ 2 Kabili namwene malaika umbi alefuma ku kabanga,+ ali ne ca kufwatikilako ica kwa Lesa wa mweo;+ kabili abilikishe ishiwi ilikalamba kuli bamalaika bane abaebelwe ukonaula isonde na bemba, 3 ati: “Mwitala konaula isonde nelyo bemba nelyo ifimuti, mpaka tufwatike icishibilo+ pa mpumi+ sha basha ba kwa Lesa wesu.”

4 Kabili naumfwile impendwa ya bafwatikwepo icishibilo, ukuti bali amakana umwanda umo na makana amakumi yane na makana yane (144,000),+ ukufuma mu mukowa+ onse uwa bana ba kwa Israele:+

9 Pa numa ya ifi naliloleshe, kabili, moneni! kwali ibumba ilikalamba,+ ilyo umuntu nangu umo ashingapenda, abafumine mu nko+ shonse ne mitundu na bantu na bantu+ ne ndimi,+ nabeminina pa ntanshi ya cipuna ca bufumu+ na pa ntanshi ya Mwana wa mpaanga, nabafwala amalaya ayabuuta;+ kabili bali ne misambo ya tuncindu+ mu minwe yabo. 10 Kabili balebilikisha ishiwi ilikalamba, abati: “Ipusukilo lyesu lyafuma kuli Lesa+ wesu, uwaikala pa cipuna ca bufumu,+ na ku Mwana wa mpaanga.”+

11 Kabili bamalaika+ bonse baiminine ukushinguluka icipuna ca bufumu na bakalamba+ ne fya mweo+ fine, e lyo bakupeme pa ntanshi ya cipuna ca bufumu no kupepa Lesa,+ 12 abati: “Ameni! Ipaalo no bukata na mano no kutootela no mucinshi na maka+ no bukose fibe kuli Lesa wesu pe na pe. Ameni.”+

13 Kabili umo uwa mu bakalamba+ anjipwishe, ati: “Nga aba abafwele amalaya+ yabuuta ni bani kabili bafumine kwi?” 14 E lyo na ine namwaswike nati: “Mwe shikulu, ni mwe mwishibe.” Na o anjebele ati: “Aba e bafuma mu bucushi bukalamba,+ kabili balicapa amalaya yabo no kuyabuutusha+ mu mulopa+ wa mwana wa mpaanga. 15 E mulandu wine babelele pa ntanshi+ ya cipuna ca bufumu ica kwa Lesa; kabili balemubombela+ akasuba no bushiku mwi tempele lyakwe; no Waikala pa cipuna ca bufumu+ akafungulwila itenti+ lyakwe pali bena. 16 Tabakomfwe insala na kabili nangu ukumfwa icilaka na kabili, na kasuba takakaboce nangu cikabilila,+ 17 pantu Umwana wa mpaanga,+ uuli pa kati ka cipuna ca bufumu, akabacema,+ kabili akabatungulula ku tumfukumfuku twa menshi+ ya mweo. Kabili Lesa akafuuta ifilamba fyonse ku menso yabo.”+

8 Kabili ilyo akakatwile+ icikakatikilo+ icalenga cinelubali (7), mu muulu mwatalele na tondolo nalimo pali hafu we awala limo. 2 E lyo namwene bamalaika+ cinelubali (7) abeminina ku cinso ca kwa Lesa, babapeela na mapenga cinelubali.

3 Na malaika umbi aishile no kwiminina ku ciipailo,+ ali ne cifutumwino ca golde; kabili bamupeele ifyanunkila+ ifingi pa kuti afituule pamo na mapepo ya ba mushilo bonse pa ciipailo ca golde icali pa ntanshi ya cipuna ca bufumu. 4 E lyo icushi ca fyanunkila cafutumwike mu lupi lwa kwa malaika pamo na mapepo+ ya ba mushilo no kunina ukuya ku cinso ca kwa Lesa. 5 Lelo apo pene malaika abuulile icifutumwino, no kwisushamo umulilo+ wa pa ciipailo no ku-usukusa pe sonde.+ E lyo kwali ukubulukuta,+ amashiwi, ukubyata+ kwa nkuba ne cinkukuma.+ 6 Kabili bamalaika cinelubali+ (7) abali na mapenga+ cinelubali baiteyenye ukuyalisha.

7 No wa ntanshi alishishe ipenga lyakwe. E lyo kwali imfula ya mabwe no mulilo+ ifyasaakanamo no mulopa, kabili fyapooselwe pe sonde; na pa fiputulwa fitatu ifye sonde papiilepo cimo,+ na pa fiputulwa fitatu ifya fimuti papiilepo iciputulwa cimo, ne fimenwa+ fyonse ifiteku fyalipiile.

8 Na malaika wa bubili alishishe ipenga lyakwe. E lyo icapala ulupili+ ulukalamba ululepya capooselwe muli bemba.+ Na pa fiputulwa fitatu ifya bemba, iciputulwa cimo casangwike umulopa;+ 9 na pa fiputulwa fitatu ifya fibumbwa fya muli bemba iciputulwa cimo ica fya mweo califwile,+ na pa fiputulwa fitatu ifya mato, iciputulwa cimo calyonaike.

10 Na malaika walenga batatu alishishe ipenga lyakwe. E lyo ulutanda ulukalamba ulwaleaka nge nyali lwaponene ukufuma mu muulu,+ kabili lwaponene pa ciputulwa cimo pa fiputulwa fitatu ifya mimana na pa tumfukumfuku twa menshi.+ 11 Kabili ishina lya lutanda lulya, balelwita ati Icalula. Na pa fiputulwa fitatu ifya menshi, iciputulwa cimo casangwike icalula, na bantu abengi balifwile ku menshi, pantu yalilulile.+

12 Na malaika uwalenga bane alishishe ipenga lyakwe. E lyo iciputulwa cimo pa fiputulwa fitatu ifya kasuba, califiitile, ne ciputulwa cimo pa fiputulwa fitatu ifya mweshi, califiitile, ne ciputulwa cimo pa fiputulwa fitatu ifya ntanda califiitile, pa kutila cisanika+ ulubuuto mu ciputulwa cimo pa fitupulwa fitatu+ ifya nshita ya kasuba ne nshita ya bushiku ifyo fine.

13 Kabili naliloleshe, no kumfwa kapumpe+ alepupuka mu kati ka muulu+ alepunda ati: “We bulangu, we bulanda, we bulanda+ ku baikala pe sonde pa mulandu wa kulila kwa mapenga ayo bamalaika batatu balaswa balishe!”+

9 Na malaika uwalenga basano alishishe ipenga+ lyakwe. E lyo namwene ulutanda+ ulwaciponene pe sonde ukufuma mu muulu, kabili balupeele ulufungulo+ lwa pa cilindi+ cabula impela. 2 Kabili lwaiswile pa cilindi cabula impela,+ ne cushi cafutumwike mu cilindi kwati cushi ca mwi lungu+ lya mulilo ilikalamba, na kasuba kalifiitile,+ kumo no lwelele, pa mulandu wa cushi icalefuma mu cilindi. 3 Na mu cushi mwafumine bamakanta+ abaishile pe sonde; kabili bapeelwe amaka, nga yalya ayakwatako bakaling’ongo+ ba pe sonde. 4 Kabili baebelwe ukuti beonaula ifimenwa fya pe sonde nangu icani conse nangu ifimuti, kano fye abantu abashafwatikwapo icishibilo ca kwa Lesa pa mpumi shabo.+

5 Kabili bamakanta tabasuminishiwe ukwipaya abo bantu, kano fye ukubacusha+ pa myeshi isano, no bukali bwakwe bwali ngo bukali bwa kwa kaling’ongo+ ilyo asuma umuntu. 6 Na muli shilya nshiku abantu bakafwaya imfwa+ lelo tabakaisange, kabili bakafwaya ukufwa lelo imfwa ikalabafulumuka.

7 Kabili bamakanta balemoneka kwati ni bakabalwe+ abateyanishiwa ukuya ku bulwi; na pa mitwe yabo pali ifyalemoneka nge fisote fya bufumu ifya golde, ne finso fyabo fyalemoneka kwati finso fya bantu,+ 8 lelo bali no mushishi ngo mushishi wa banakashi.+ Na meno yabo yali nga meno ya nkalamo;+ 9 kabili bali ne fya kucinga+ icifuba ifyapala ifya cela. Ne congo ca mapindo yabo cali nge congo ca maceleta+ ya bakabalwe abengi abalebutukila ku bulwi.+ 10 Kabili, bali ne micila ne mbola ifyali kwati ni bakaling’ongo;+ na mu micila yabo e mwali amaka yabo aya kucusha abantu imyeshi isano. 11 Imfumu yabo iibateka, ni malaika wa ku cilindi icabula impela.+ Mu ciHebere ishina lyakwe ni Abadone,* mu ciGriki mwena ni Apolione.*+

12 Ubucushi bumo nabupita. Moneni! Kwashala ubucushi+ bubili ubwalakonkapo.

13 Na malaika+ uwalenga mutanda (6) alishishe ipenga+ lyakwe. E lyo naumfwile ishiwi+ limo ukufuma mu nsengo sha pa ciipailo+ ca golde icaba ku cinso ca kwa Lesa 14 lilesosa kuli malaika uwalenga mutanda (6), uwali ne penga, aliti: “Kakula bamalaika+ bane abakakilwa+ pa mumana ukalamba uwa Yufrate.”+ 15 Na bamalaika bane balibakakwile, abaipekanishisha ukwipayapo iciputulwa cimo ica bantu pa fiputulwa fitatu pa nshita ino ine iya bushiku buno bwine ubwa mweshi uno wine mu mwaka uno wine.

16 Ne mpendwa ya bashilika ba pali bakabalwe yali amakana amakumi yabili ukufushiwa ku makana ikumi (200,000,000): iyi mpendwa ya bashilika naliyumfwile. 17 Kabili ifi e fyali bakabalwe abo namwene mu cimonwa, na baikelepo: bali ne fya kucinga icifuba ifyakashika kwati mulilo ne fyafitulukila ne fya libwe lya mingu; ne mitwe ya bakabalwe yalemoneka kwati mitwe ya nkalamo,+ na mu tunwa twabo mwalefuma umulilo ne cushi ne libwe lya mingu.+ 18 Kabili ifi ifinkunka fitatu fyaipeyepo iciputulwa cimo ica bantu pa fiputulwa fitatu, ku mulilo ne cushi ne libwe lya mingu ifyalefuma mu tunwa twabo. 19 Pantu amaka ya bakabalwe yali mu tunwa twabo na mu micila yabo; pantu imicila yabo yalemoneka kwati ni nsoka+ kabili yali ne mitwe, na kuli iyi mitwe e ko bakabalwe balecushisha abantu.

20 Lelo abantu abasheleko abashaipaiwe kuli ifi finkunka tabalapiile ku milimo ya minwe yabo,+ kabili tabalekele ukupepa ifibanda+ no tulubi twa golde na silfere+ no mukuba ne libwe ne cimuti. Utu tulubi tatumona nangu ukumfwa nangu ukwenda.+ 21 Kabili tabalapiile no kuleka ukwipaya+ abantu nangu ukupupa+ imipashi* nangu ukucita ubulalelale nangu ukwiba.

10 Kabili namwene malaika+ umbi uwa maka aleika mu muulu, naikubanya ne kumbi,+ no mukolamfula wali pa mutwe wakwe, ne cinso cakwe calebengeshima kwati kasuba,+ na makasa+ yakwe yali nge nceshi sha mulilo, 2 kabili ali na kalibuuku akafunguluka mu minwe yakwe. Kabili anyantile ulukasa lwakwe ulwa ku kulyo pali bemba, no lwa ku kuso pa mulundu,+ 3 kabili abilikishe ishiwi ilikalamba nga filya inkalamo+ ibuluma. Kabili ilyo abilikishe, ukubulukuta cinelubali (7) kwalandile amashiwi.+

4 Nomba ilyo ukubulukuta cinelubali (7) kwalandile, napene nembe; lelo naumfwile ishiwi mu muulu+ lileti: “Sunga mu nkama ifilandile+ ukubulukuta cinelubali, kabili wifilemba iyo.” 5 Kabili malaika uo namwene naiminina pali bemba na pa mulundu aimishe ukuboko kwakwe ukwa ku kulyo,+ 6 no kulapa Uwaikala+ umuyayaya,+ uwapangile umuulu ne fyabamo ne sonde+ ne fyabapo na bemba ne fyabamo,+ ati: “Takwakabe ukushingashinga+ na kabili; 7 lelo mu nshiku sha kulisha kwa kwa malaika+ uwalenga cinelubali (7), ilyo alaswa alishe ipenga+ lyakwe, e lyo ikafikilishiwa inkama ya kwa Lesa+ ukulingana ne mbila nsuma iyo abilile ku basha bakwe bakasesema.”+

8 Ne shiwi+ ilyo nacumfwa ukufuma mu muulu lyanjeba na kabili aliti: “Kabiye, kabuule akalibuuku akafunguluka akali mu minwe ya kwa malaika uwiminine pali bemba na pa mulundu.”+ 9 Awe naile kuli malaika no kumweba ukuti ampeele akalibuuku. Na o atile kuli ine: “Buula, no kukalya,+ na ko kalalenga mu nda yobe ukulula, lelo mu kanwa kobe kalalowa ngo buci.” 10 Na ine nabuulile akalibuuku mu minwe ya kwa malaika, nakalya no kukalya,+ na mu kanwa kandi kalilowele ngo buci;+ lelo ilyo nakaminine, mu nda yandi mwalilulile. 11 Kabili banjebele abati: “Ukaseseme na kabili pa bantu na bantu na pa nko na pa ba ndimi na pa shamfumu ishingi.”+

11 Kabili ampeele itete lyapala inkonto,+ no kutila: “Ima, upime itempele+ lya kwa Lesa, ne ciipailo na balepepelamo. 2 Lelo ulubansa ululi ku nse+ ye tempele, lwena ulupoose ku nse wilupima iyo, pantu nalupeelwa ku bena fyalo,+ na bo bakanyantaula umusumba+ wa mushilo imyeshi amakumi yane na ibili (42).+ 3 Kabili nkalenga inte shandi shibili+ ukusesema+ inshiku ikana limo ne myanda ibili na makumi mutanda (1,260) ninshi nabafwala insamu.”*+ 4 Aba e miolife ibili+ kabili e fya kutekapo+ inyali fibili kabili ifyaiminina ku cinso ca kwa Shikulu we sonde.+

5 Kabili ngo muntu afwaya ukubacita icabipa, umulilo ulafuma mu tunwa twabo no koca abalwani babo;+ kabili umuntu uwafwaya ukubacita icabipa, e fyo akulaipaiwa ifi fine. 6 Mu nshiku sha kusesema kwabo, bena balikwata amaka ya kwisala umuulu+ ne mfula yafilwa ukuloka,+ kabili balikwata na maka ya kwalula amenshi ukuba umulopa+ kabili balikwata amaka ya kuleta icinkunka ca musango onse pe sonde lyonse ilyo bafwaya.

7 Kabili ilyo bakapwisha ubunte bwabo, iciswango icikafuma mu cilindi cabula impela+ cikalwa na bo, cikabacimfya no kubepaya.+ 8 Ne fitumbi fyabo fikaba mu musebo ukalamba uwa mu musumba ukalamba uwitwa mu manshoko ati Sodomu+ na Egupti, umo bapoopele na Shikulwibo.+ 9 Na bantu na bantu ne mitundu ne ndimi ne nko+ bakatamba ifitumbi fyabo inshiku shitatu na hafu,+ kabili tabakasuminishe ukuti ifitumbi fyabo fibikwe mu nshiishi. 10 Kabili abaikala pe sonde bakasekelela+ pali bena no kusansamuka, kabili bakapeeleshanya ifya bupe,+ pa mulandu wa kuti aba bakasesema babili balicushishe nga nshi abaikala pe sonde.

11 Kabili pa numa ya nshiku+ shitatu na hafu amaka ya bumi ukufuma kuli Lesa yaingile muli bena,+ kabili baliminine, no mwenso ukalamba waikete abalebatamba. 12 E lyo baumfwile ishiwi+ ilikalamba mu muulu lilebeba ati: “Nineni, mwise kuno.”+ Na bo baile mu muulu mwi kumbi, ninshi na balwani babo balemonako. 13 Kabili muli ilya nshita kwaponene icinkukuma icikalamba, ne ciputulwa cimo ica pa fiputulwa ikumi (10)+ ifya musumba caliwile; na bantu amakana cinelubali (7,000) balipaiwe ku cinkukuma, na basheleko balitiinine no kucindika Lesa wa mu muulu.+

14 Ubucushi+ bwa cibili nabupita. Moneni! Ubucushi bwa citatu buleisa bwangu.

15 Na malaika uwalenga cinelubali (7) alishishe ipenga+ lyakwe. E lyo kwaumfwikike amashiwi ayakalamba mu muulu, ayati: “Ubufumu bwa calo nomba bwaba bufumu bwa kwa Shikulwifwe+ no bwa kwa Kristu+ wakwe, kabili akateka umuyayaya.”+

16 Kabili abakalamba amakumi yabili na bane (24)+ abaikele pa fipuna fyabo ifya bufumu ku cinso ca kwa Lesa bawile ubukupeme+ no kupepa Lesa,+ 17 abati: “Twamutootela,+ mwe Yehova Lesa, Uwa Maka Yonse,+ uwabako+ kabili uwaliko, pantu namubuula amaka+ yenu ayakalamba no kutendeka ukuteka.+ 18 Nomba inko shena shakalipa, no bukali bwenu bwaisa, ne nshita ya kupingula abafwa yafika, ne ya kupeela icilambu+ ku basha benu bakasesema+ na ku ba mushilo na ku batiina ishina lyenu, abantu yaweyawe na bashimucindikwa,+ ne ya konaula+ abaleonaula isonde.”+

19 Kabili itempele lya kwa Lesa, ilyaba mu muulu+ lyaliswike, ne cipao+ ca cipangano cakwe calimoneke mwi tempele.+ E lyo kwali ukubyata kwa nkuba, ifibulukutu na mashiwi, ne cinkukuma ne mfula ya mabwe iikalamba.

12 E lyo mu muulu mwamoneke icishibilo+ icikalamba, umwanakashi+ afwele akasuba, no mweshi wali mwi samba lya makasa yakwe, na pa mutwe wakwe pali icisote ca bufumu ica ntanda ikumi na shibili (12), 2 kabili aali ne fumo. E lyo alilile pa mulandu wa kukalipwa+ no kucula sana pa kupaapa.

3 Ne cishibilo cimbi calimoneke mu muulu, kabili, moneni! kwali icing’wena+ icikalamba icakashika, ica mitwe cinelubali (7) ne nsengo ikumi (10) na pa mitwe ya ciko pali ifisote fya bufumu cinelubali; 4 no mucila+ wa ciko wakulile iciputulwa cimo pa fiputulwa fitatu ifya ntanda+ sha mu muulu, no kushiponesha pe sonde.+ Ne cing’wena caiminine pa ntanshi ya mwanakashi+ uwali mupepi no kupaapa,+ pa kuti nga apaapa fye, cilye+ umwana wakwe.

5 Na o afyele umwana umwaume+ uukacemena inko shonse ku nkonto ya cela.+ Lelo umwana balimusendele no kumutwala kuli Lesa na ku cipuna cakwe ica bufumu.+ 6 Umwanakashi ena afulumukile ku matololo,+ ku ncende uko Lesa amuteyanishishe, pa kuti bamuliishe+ pa nshiku ikana limo ne myanda ibili na makumi mutanda (1,260).+

7 Awe kwabuukile inkondo mu muulu: Mikaele+ na bamalaika bakwe balwile ne cing’wena, icing’wena na bamalaika ba ciko na fyo fyalwile na bo 8 lelo tafyacimfishe iyo, kabili tafyakwete apa kwikala ku muulu. 9 E fyo icing’wena+ cikalamba capooselwe pa nshi, icisoka+ ca pa kutendeka, iciitwa Kaseebanya+ kabili Satana,+ icilufya aba pano isonde bonse;+ capooselwe pe sonde,+ na bamalaika ba ciko bapooselwe pamo na co. 10 E lyo naumfwile ishiwi likalamba mu muulu lileti:

“Nomba fyaisa ipusukilo+ na maka+ no bufumu bwa kwa Lesa+ wesu na maka ya kwa Kristu+ wakwe, pantu uubepesha bamunyinefwe napooswa pa nshi, uubabepesha akasuba no bushiku ku cinso ca kwa Lesa wesu!+ 11 Na bo bamucimfiishe+ ku mulopa wa Mwana wa mpaanga+ na ku mashiwi ya bunte+ bwabo, kabili tabatemenwe imyeo+ yabo ukufika fye na ku mfwa. 12 E ico, sansamukeni, mwe myulu na mwe baikalamo!+ Nomba cabipila+ imwe mwe sonde na bemba,+ pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.”+

13 Nomba ilyo icing’wena camwene ukuti nabacipoosa pe sonde,+ catampile ukucusha umwanakashi+ uwafyele umwana mwaume. 14 Lelo umwanakashi bamupeele amapindo yabili aya kwa kapumpe+ umukalamba, pa kuti apupukileko no kuya ku matololo+ ku cifulo cakwe; uko bakamusunga+ inshita imo ne nshita shibili na hafu wa nshita,+ ukumupususha ku cisoka.+

15 E lyo icisoka calukile amenshi+ ngo mumana ku numa ya mwanakashi, pa kutila anwene mu mumana.+ 16 Lelo isonde lya-afwile+ umwanakashi, kabili lya-asamwine akanwa ka liko no kumina umumana uo icing’wena calukile. 17 Ne cing’wena calikalipe no kufulilwa umwanakashi,+ kabili caile ku kulwa na bana ba mwanakashi abasheleko, abasunga amafunde ya kwa Lesa kabili abakwata umulimo wa kushimikila+ pali Yesu.

13 Awe icing’wena caiminine pa mucanga+ wa pali bemba.

E lyo namwene iciswango+ cilefuma muli bemba,+ cali ne nsengo ikumi (10)+ ne mitwe+ cinelubali (7), na pa nsengo ikumi pali ifisote fya bufumu ikumi, lelo pa mitwe ya ciko pali amashina ya miponto.+ 2 Kabili iciswango ico namwene calemoneka kwati ni mbwili,+ lelo amakasa ya ciko yali kwati ni bere,+ na kanwa ka ciko kali kwati kanwa ka nkalamo.+ Ne cing’wena+ capeele iciswango amaka ya ciko ne cipuna ca ciko ica bufumu no bufumu bwa ciko bonse.+

3 Kabili namwene umutwe umo uwa ciswango uwalemoneka kwati untu bakomene no kufwa kwati naufwa,+ lelo walipolele, ne sonde lyonse lyakonkele iciswango no kucikumbwa. 4 Kabili bapepele icing’wena pantu capeele amaka ku ciswango, kabili bapepele iciswango, abati: “Nani uwaba nge ciswango, kabili nani uwingalwa na co?” 5 Kabili capeelwe akanwa akalelanda ifya kuituumika+ ne fya miponto,+ kabili capeelwe amaka aya kubomba imyeshi+ amakumi yane na ibili (42). 6 Kabili catampile ukupontela+ Lesa, ukupontela ishina lyakwe no ko ekala, pamo na baikala mu muulu.+ 7 Kabili casuminishiwe+ ukulwa na ba mushilo no kubacimfya,+ kabili capeelwe amaka pa mitundu yonse na pa bantu bonse na pa ba ndimi shonse na pa nko shonse. 8 Na bonse abaikala pe sonde bakacipepa; ukufuma fye ilyo icalo caishilebako,+ tapaba nangu umo pali aba uwalembwa ishina mwi buuku+ lya mweo ilya Mwana wa mpaanga uo baipeye.+

9 Uuli na matwi, naomfwe.+ 10 Onse uuli no kusendwa bunkole, akasendwa muli bunkole.+ Onse uukepaila ku lupanga, na o wine akepaiwa ku lupanga.+ Apa e po aba mushilo+ balekabila ukushipikisha+ no kuba ne citetekelo.+

11 Kabili namwene iciswango+ cimbi cilefuma mu mushili,+ kabili cali ne nsengo shibili ngo mwana wa mpaanga, lelo catendeke ukulanda nge cing’wena.+ 12 Kabili calebomfya amaka yonse ayo capokelele ku ciswango+ ca ntanshi. Kabili calengele aba pano isonde na baikalapo ukupepa iciswango ca ntanshi, icapolele ku mpumo.+ 13 Kabili calecita ifipesha amano ifikalamba.+ Calelenga no mulilo ukufuma mu muulu no kuponena pe sonde ninshi na bantu balemonako.

14 Kabili calelufya abaikala pe sonde, pa mulandu wa fipesha amano ifyo capeelwe amaka ya kucita pa ntanshi ya ciswango, ilyo cale-eba abaikala pe sonde ukupanga icimpashanya+ ca ciswango icakomenwe+ ku lupanga lelo icapolele. 15 Kabili capeelwe amaka ya kupuuta umupu wa mweo mu cimpashanya ca ciswango, pa kuti icimpashanya ca ciswango cilande no kulenga ukuti baleipaya bonse abalekaana ukupepa icimpashanya+ ca ciswango.

16 Kabili calepatikisha abantu+ bonse, abantu yaweyawe na bashimucindikwa, abakankaala na bapiina, abantungwa na basha, ukuti bapeelwe icishibilo pa cisansa cabo ica ku kulyo nelyo pa mpumi shabo,+ 17 no kuti umuntu nangu umo eshita nelyo ukushitisha kano fye uuli ne cishibilo, e kutila ishina+ lya ciswango nelyo inambala ya ciko.+ 18 Pano e palefwaikwa ukuba na mano: Uwacenjela asange umulolele inambala ya ciswango, pantu ni nambala ya muntu;+ ne nambala ya ciko myanda mutanda na makumi mutanda na mutanda (666).+

14 Awe naliloleshe, kabili, moneni! Umwana wa mpaanga+ aiminine pa Lupili lwa Sione,+ kabili ali pamo na ba makana umwanda umo na makana makumi yane na makana yane (144,000).+ Aba bantu pa mpumi shabo palembelwe ishina lya Mwana wa mpaanga ne shina lya kwa Wishi.+ 2 Kabili naumfwile iciunda ukufuma mu muulu nge ciunda ca menshi+ ayengi kabili nge ciunda ca cibulukutu cikalamba; kabili iciunda ico naumfwile cali nge ca bakemba abali na masese+ abalelisha amaseese yabo. 3 Kabili baleimba+ ulwimbo+ ulupya pa ntanshi ya cipuna ca bufumu na pa ntanshi ya fya mweo+ fine na bakalamba;+ kabili takwali uwaishibe ulo lwimbo kano aba makana umwanda umo na makana amakumi yane na makana yane (144,000),+ abashitilwe+ pe sonde. 4 Aba e bashaikoweshe ku banakashi;+ na kuba, bashimbe.+ Aba e bakonka Umwana wa mpaanga konse uko aya.+ Aba bashitilwe+ mu bantu pa kuti babe ifisabo+ fya ntanshi ukupeelwa kuli Lesa na ku Mwana wa mpaanga, 5 na mu tunwa twabo tamwasangilwe ubufi;+ kabili tabakwata akalema.+

6 Kabili namwene malaika umbi alepupuka mu muulu,+ kabili aali ne mbila+ nsuma ya muyayaya iya kubila ku baikala pe sonde, na ku nko shonse na ku mitundu yonse na ku ba ndimi shonse na ku bantu bonse,+ 7 alesosa ishiwi ilikalamba, ati: “Tiineni Lesa+ no kumupeela umucinshi,+ pantu inshita ya bupingushi bwakwe naifika,+ e ico pepeni Uwapangile+ umuulu ne sonde na bemba no tumfukumfuku twa menshi.”+

8 E lyo pakonkele malaika umbi uwalenga babili, alesosa ati: “Nawa! Babiloni+ Mukalamba nawa,+ uwalengele inko shonse ukunwako umwangashi+ wa cipyu ca bulalelale bwakwe!”+

9 E lyo pakonkele malaika uwalenga batatu, alesosa ishiwi ilikalamba, ati: “Ngo muntu apepa iciswango+ ne cimpashanya+ ca ciko, no kupokelela icishibilo pa mpumi yakwe nelyo pa cisansa cakwe,+ 10 akanwako ne cipyu ca kwa Lesa icishasunduka ico bapongolwela muli kapu wa bukali+ bwakwe, kabili akacushiwa+ ku mulilo na ku libwe lya mingu+ ku cinso ca bamalaika ba mushilo na ku cinso ca Mwana wa mpaanga. 11 Ne cushi ca kulunguluka kwabo cikalafutumuka pe na pe,+ kabili akasuba no bushiku, abapepa iciswango ne cimpashanya ca ciko, na bonse abapokelela icishibilo+ ce shina lya ciko tabakaletuusha. 12 Apa e po aba mushilo,+ abasunga amafunde ya kwa Lesa+ kabili abatetekela+ Yesu, balekabila ukushipikisha.”

13 Kabili naumfwile ishiwi ukufuma mu muulu, lileti: “Lemba auti: Balipaalwa abakulafwila+ muli Shikulu+ ukufuma pali nomba.+ Cine cine, e fyo umupashi wasosa auti, lekeni batuushe ku kucucutika kwabo, pantu imilimo yabo ilebakonka.”

14 Awe naliloleshe, kabili, moneni! kwali ikumbi lyabuuta, na pe kumbi napekala uwapala umwana wa muntu,+ nafwala ne cisote+ ca bufumu ica golde na mu minwe yakwe ekete icikwakwa icatwa.

15 Na malaika umbi afumine mwi tempele, alebilikisha ishiwi ilikalamba ku waikele pe kumbi ati: “Pishamo icikwakwa cobe, akuseepa,+ pantu inshita ya kuseepa nafika,+ ne fya kuseepa nafipiisha pe sonde.”+ 16 No waikele pe kumbi apishishe icikwakwa cakwe pe sonde, ne fyali pe sonde fyaliseepelwe.

17 Na malaika umbi afumine mwi tempele lya ku muulu,+ na o wine, ali ne cikwakwa icatwa.

18 E lyo malaika umbi ena afumine mu ciipailo kabili ali na maka pa mulilo.+ Kabili abilikishe ishiwi ilikalamba ku wali ne cikwakwa icatwa, ati: “Pishamo icikwakwa cobe icatwa, no kuputula ifisansangu fya mwangashi wa pe sonde,+ pantu naipya imyangashi ya uko.” 19 Na malaika+ apishishe icikwakwa cakwe mwi sonde no kuputula imyangashi+ iya pe sonde, no kuipoosa umwa kukamina imyangashi umukalamba umwa bukali bwa kwa Lesa.+ 20 E lyo banyantawile umwa kukamina imyangashi ku nse ya musumba,+ no mulopa wafumine umwa kukamina imyangashi ukufika ku mikobelo ya bakabalwe,+ intamfu ya bastadia ikana limo ne myanda mutanda (1,600).+

15 Kabili namwene icishibilo+ cimbi mu muulu, icikalamba kabili ica kupapa, bamalaika+ cinelubali (7) abali ne finkunka cinelubali.+ Aba e ba kulekelesha, pantu e bo Lesa abomfya ku kupwisha+ ubukali+ bwakwe.

2 Kabili namwene icapala bemba+ uwaba nge cilola uwasakenemo umulilo, na bacimfishe+ iciswango ne cimpashanya+ ca ciko no kukaana inambala+ ya ciko nabeminina mupepi na bemba+ uwaba nge cilola, bali na maseese+ ya kwa Lesa. 3 Kabili baleimba ulwimbo lwa kwa Mose+ umusha wa kwa Lesa no lwimbo lwa Mwana wa mpaanga,+ abati:

“Ikalamba kabili yalipesha amano imilimo+ yenu, mwe Yehova Lesa, Uwa Maka Yonse.+ Yalilungama kabili ya cine imibele yenu,+ mwe Mfumu ya muyayaya.+ 4 Nani uushakamutiine,+ mwe Yehova,+ no kucindika ishina+ lyenu, apo ni mwe fye mweka mwe ba cishinka?+ Ne nko shonse shikesa no kupepa ku cinso cenu,+ pantu nafimoneka ifipope fyenu ifyalungama.”+

5 Kabili pa numa ya ifi naliloleshe, namwene umuputule wa mushilo nga nshi uwa mwi tempele+ mu muulu waisuka,+ 6 na bamalaika+ cinelubali (7) abali ne finkunka+ cinelubali bafumine mu muputule uwa mushilo nga nshi, nabafwala insalu+ sha busaka, ishabuuta tuutu, kabili nabakaka mu fifuba fyabo imishipi ya golde. 7 Na cimo pa fya mweo+ fine capeele bamalaika cinelubali (7) imbale shafonka cinelubali isha golde ishaiswilemo icipyu ca kwa Lesa,+ uwaikala pe na pe.+ 8 Na mu muputule wa mushilo nga nshi mwaiswile icushi pa mulandu wa bukata bwa kwa Lesa+ na pa mulandu wa maka yakwe, kabili takwali nangu umo uwaingile mu muputule wa mushilo nga nshi fyasukile fyapwa ifinkunka+ cinelubali (7) ifya bamalaika cinelubali.

16 Kabili naumfwile ishiwi+ ilikalamba ukufuma mu muputule wa mushilo nga nshi lile-eba bamalaika cinelubali (7) aliti: “Kabiyeni, kapongolweleni ubukali+ bwa kwa Lesa mwi sonde ubuli mu mbale shafonka cinelubali.”

2 Kabili uwa ntanshi+ aliile no kupongolwela ifyali mu mbale yakwe pe sonde.+ Ne filonda+ ifyabipisha kabili ifikali nga nshi fyaikete fye bonse abaali ne cishibilo ca ciswango+ kabili abalepepa icimpashanya ca ciko.+

3 No walenga babili+ apongolwelele ifyali mu mbale yakwe muli bemba.+ Na bemba alyalwike aba kwati mulopa+ wa muntu uufwile, na fyonse ifya mweo fyalifwile, e kutila ifya muli bemba.+

4 No walenga batatu+ apongolwelele ifyali mu mbale yakwe mu mimana+ na mu tumfukumfuku twa menshi. Na fyo fyasangwike umulopa.+ 5 E lyo naumfwile malaika uwakwata amaka pa menshi aleti: “Mwe babako kabili abaliko,+ mwe ba cishinka,+ mwalilungama, pantu mwapingula ifi,+ 6 pantu basuumishe umulopa wa ba mushilo no wa bakasesema,+ na imwe mwabalenga ukunwa umulopa.+ Nacilinga ukubacita ifi.”+ 7 Kabili naumfwile iciipailo cileti: “Cine cine, mwe Yehova Lesa, Uwa Maka Yonse,+ ubupingushi bwenu bwa cine kabili bwalilungama.”+

8 No walenga bane+ apongolwelele ifyali mu mbale yakwe pa kasuba; na kasuba kapeelwe amaka ya koca+ abantu ku mulilo. 9 Na bantu balipiile nga nshi ku cikabilila ca kasuba, lelo baponteele ishina+ lya kwa Lesa, uwaba na maka+ pali ifi finkunka, kabili tabalapiile no kumucindika.+

10 No walenga basano apongolwelele ifyali mu mbale yakwe pa cipuna ca bufumu ica ciswango.+ Ne mfifi yakupile ubufumu bwa ciko,+ kabili batendeke ukuisumaula indimi pa mulandu wa kukalipwa, 11 lelo baponteele+ Lesa wa mu muulu pa mulandu wa kukalipwa kwabo na pa mulandu wa filonda fyabo, kabili tabalapiile ku milimo yabo.

12 No walenga mutanda+ apongolwelele ifyali mu mbale yakwe pa mumana ukalamba Yufrate,+ na menshi ya uko yalikamine,+ pa kuti ishamfumu+ sha ku kabanga shipitemo.

13 Kabili namwene ifyebo+ fyakowela fitatu ifya mupashi ifyalemoneka kwati fyula+ filefuma mu kanwa ka cing’wena+ na mu kanwa ka ciswango+ na mu kanwa ka kwa kasesema wa bufi.+ 14 Na kuba, ifi e fyebo+ ififuma ku fibanda kabili e ficita ifipesha amano.+ Fyaile ku shamfumu+ sha ba pano isonde shonse,+ ku kushilonganika ku nkondo+ ya bushiku+ bukalamba ubwa kwa Lesa Wa Maka Yonse.+

15 “Moneni! ndeisa ngo mupuupu.+ Alipaalwa uulelola+ no kusunga ifya kufwala fyakwe, pa kuti e-enda ubwamba na bantu bemutambila.”+

16 Kabili fyashilonganike ku cifulo iciitwa mu ciHebere Armagedone.+

17 No walenga cinelubali (7) apongolwelele ifyali mu mbale yakwe mu lwelele.+ E lyo ishiwi+ ilikalamba lyafumine ku cipuna ca bufumu icali mu muputule wa mushilo nga nshi, aliti: “Nomba capwa!” 18 E lyo kwali ukubyata kwa nkuba, amashiwi, ne fibulukutu, kabili kwali ne cinkukuma+ icikalamba icishatala acibako ukutula apo abantu babela pe sonde,+ cali cinkukuma+ icikalamba nga nshi. 19 No musumba+ uukalamba wa-akanikene patatu, ne misumba ya nko yaliwile; na Lesa aibukishe Babiloni Mukalamba,+ no kumupeela kapu wa mwangashi wa cipyu ca bukali bwakwe.+ 20 Kabili, ifishi fyonse fyalifulumwike, ne mpili tashasangilwe, shalilobele.+ 21 Ne mfula+ ya mabwe iikalamba yafumine mu muulu no kulokela pa bantu. Ilibwe limo lyafinine mupepi na makilogramu amakumi yabili (20). Na bantu baponteele+ Lesa pa mulandu wa cinkunka ca mfula+ ya mabwe, pantu ico cinkunka cali icikalamba nga nshi.

17 Kabili umo pali bamalaika cinelubali (7) abali ne mbale+ ishafonka cinelubali aishile kuli ine no kunjeba, ati: “Isa, nkulange ifyo cilende+ mukalamba uwaikala pa menshi+ ayengi akapingulwa, 2 uo ishamfumu sha pe sonde shacitile nankwe ubulalelale,+ na ba pe sonde bakolelwe umwangashi wa mu bulalelale bwakwe.”+

3 Kabili ansendeele mu mupashi+ no kuntwala mu matololo. Awe naishilemona umwanakashi naikala pa ciswango+ icakashika ce icakwete amashina+ ya miponto umubili onse kabili icali ne mitwe+ cinelubali (7) ne nsengo ikumi (10). 4 No mwanakashi afwele ifyakashikila+ ne fyakashika ce,+ kabili aiyemfeshe ku fya golde na ku mabwe ayauma umutengo na kuli bamargariti,+ na mu minwe yakwe aali na kapu+ ya golde iyaiswilemo ifya bunani+ ne fyakowela ifya mu bulalelale bwakwe.+ 5 Na pa mpumi yakwe palembelwe ishina, ilya nkama,+ ilya kuti: “Babiloni Mukalamba, nyina wa banakashi bacilende+ kabili umwine wa fya bunani ifya pano isonde.”+ 6 Kabili namwene ukuti uyu mwanakashi alikolelwe, akolelwe umulopa+ wa ba mushilo no mulopa wa nte sha kwa Yesu.+

Awe, ilyo namumwene nalipapile no kupeshiwa amano nga nshi.+ 7 E ico malaika anjebele ati: “Cinshi wapapila? Nalakweba inkama ya uyu mwanakashi+ ne ya ciswango icimusendele icili ne mitwe cinelubali (7) ne nsengo ikumi (10):+ 8 Cilya ciswango wacimona, e po cali,+ lelo tacilipo, kabili calaswa cifume mu cilindi icabula impela,+ kabili cili no kuya ku bonaushi. Kabili ilyo abaikala pe sonde abo amashina yabo tayalembwa mwi buuku lya mweo+ ukufuma pa kutendeka kwa calo+ bakamona ukuti iciswango icalipo, lelo tacilipo, kabili caisabako bakapeshiwa amano no kucicindika.

9 “Pano e palekabila ukuba na mano ya kwiluka:+ Imitwe+ cinelubali (7) ni mpili+ cinelubali, apaikala umwanakashi. 10 Kabili kuli imfumu cinelubali (7): shisano shaliwa,+ imo icilipo,+ imbi icili tailaisa,+ lelo ilyo ikesa ikekala fye inshita iinono.+ 11 Kabili iciswango icalipo lelo tacilipo,+ na co cine ni mfumu iyalenga cinekonsekonse (8), lelo catuntuka muli ishi cinelubali (7), kabili cileya ku bonaushi.

12 “Ne nsengo ikumi (10) isho wacimona ni mfumu+ ikumi, ishishilapokelela ubufumu, lelo shikapokelela amaka ya kuba ishamfumu pamo ne ciswango mwi awala fye limo. 13 Ishi shikaba ne pange limo, kabili shikapeela amaka ya shiko no bufumu bwa shiko ku ciswango.+ 14 Shikalwa no Mwana wa mpaanga,+ lelo, pantu ni Shikulu wa bashikulu kabili Imfumu ya shamfumu,+ Umwana wa mpaanga akashicimfya.+ Kabili balya abaitwa, abasalwa, kabili aba cishinka na bo bakashicimfisha pamo nankwe.”+

15 Kabili malaika anjebele ati: “Amenshi ayo wacimona, apaikala cilende, bantu abengi kabili mabumba ya bantu, ni nko shonse na ba ndimi shonse.+ 16 Kabili insengo+ ikumi (10) ne ciswango+ ifyo wacimona, fikapata cilende+ no kumupokolola fyonse ukumusha ubwamba, kabili fikalya umubili wakwe no kumoca fye onse mu mulilo.+ 17 Pantu ni Lesa e walengele imitima ya fiko ukuti icite ifyo umwine alefwaya,+ no kufikilisha ipange lya fiko ilya kupeela ubufumu bwa fiko ku ciswango,+ yakasuke amashiwi ya kwa Lesa yakafikilishiwe.+ 18 No mwanakashi+ uo wacimona, musumba uukalamba uwateka ishamfumu shonse isha pe sonde.”+

18 Pa numa ya ifi namwene malaika umbi aleika mu muulu, ali na maka+ nga nshi; na pe sonde palibuutile ku bukata bwakwe.+ 2 Kabili abilikishe ishiwi+ ilikalamba, ati: “Nawa! Babiloni Mukalamba nawa,+ kabili nomba e mo ifibanda fileikala, e muli ne mipashi+ yonse iyakowela ne fyuni fyonse ifyakowela kabili ifyo abantu bapata!+ 3 Pantu inko shonse shalinwako+ umwangashi wa cipyu, uwa mu bulalelale bwakwe, ne shamfumu sha pe sonde shalecita nankwe ubulalelale,+ na bashimakwebo+ ba pe sonde banonkeele mu fyuma fyakwe ifingi nga nshi.”+

4 E lyo naumfwile ishiwi limbi ukufuma mu muulu lileti: “Fumenimo muli ena, mwe bantu+ bandi, nga tamulefwaya ukuwila mu membu+ shakwe, kabili nga tamulefwaya ifinkunka fyakwe ukwisa pali imwe. 5 Pantu imembu shakwe nashituulumana ukufika na mu muulu,+ na Lesa naibukisha ulufyengo lwakwe.+ 6 Citeni kuli ena ifyo na o acitile,+ kabili fusheni imiku ibili, mufushisheni imiku ibili impendwa ya fyo acitile;+ muli kapu+ umo asakanishishe mumusakanishishemo imiku ibili+ ifyo asakenyemo.+ 7 Filya fine aicindamike no kukwatisha ifyuma, e fyo na imwe mumucululushe no kumulenga ukuloosha.+ Pantu mu mutima wakwe atila, ‘Ine ndi namfumu,+ nshili mukamfwilwa,+ no kuloosha nshakalooshe nakalya.’+ 8 E co fikeshila mu bushiku fye bumo ifinkunka+ fyakwe, imfwa, ukuloosha ne cipowe, kabili akapya ku mulilo+ ukwabula ukushalako, pantu Yehova Lesa uwamupingwile, wa maka.+

9 “Ne shamfumu+ sha pe sonde ishacitile nankwe ubulalelale kabili ishanonkeele mu fyuma fyakwe ifingi shikalila no kumuloosha nga nshi,+ pa kumona icushi+ ca kupya kwakwe, 10 ninshi nashiminina akatalamukila pa mulandu wa kutiina ukulunguluka kwakwe, ashiti,+ ‘Owe ifyo cabipa, we musumba+ ukalamba, Babiloni we musumba wa maka, pantu bakonaula fye mwi awala limo!’+

11 “Kabili, bashimakwebo+ ba pe sonde balelila no kumuloosha,+ pantu takwali uwaleshita na kabili fyonse ifyo bakwete, 12 ifya+ golde, ifya silfere, ifya mabwe ayauma umutengo, bamargariti, insalu ishisuma ne shakashikila ne sha kolokondwe ne shakashika ce; na fyonse ifyapangilwa ne mbao sha kacena kasuma na fyonse ifyapangilwa na meno ya nsofu na fyonse ifyapangilwa ne mbao shauma umutengo nga nshi ne fya mukuba ne fya cela ne fya marbele;+ 13 na kinamone na amomo ne fyanunkila na mafuta aya kacena kasuma na libani no mwangashi na mafuta ya miolife no buunga ubwapeleka, ne ngano ne ng’ombe ne mpaanga, na bakabalwe na maceleta na basha na bantu.+ 14 Cine cine, ifisabo ifisuma ifyo walefwaisha+ nafiloba, ne fisuma ne fyabalabata nafiloba, na bantu tabakatale abafisanga na kabili.+

15 “Bashimakwebo+ ba ifi, abanonkele kuli ena, bakeminina akatalamukila pa mulandu wa kutiina ukulunguluka kwakwe kabili bakalila no kuloosha,+ 16 abati, ‘Owe ifyo cabipa—we musumba+ uukalamba, uwafwele insalu ishisuma ne shakashikila ne shakashika ce, no kufwala ifya golde na mabwe ayauma umutengo na bamargariti,+ 17 pantu mwi awala limo e mo fyaonaika ifyuma ifingi nge fi!’+

“No mukalamba onse uwa bensha amato no muntu onse uwenda pali bemba,+ na bakensha ba mato na bonse abasanga ubunonshi pali bemba, baiminine akatalamukila+ 18 no kubilikisha pa kumona icushi ca kupya kwakwe, abati, ‘Musumba nshi uwingalingana no musumba uyu uukalamba?’+ 19 Kabili baikubile ulukungu pa mitwe+ no kubilikisha, balelila no kuloosha,+ abati, ‘Owe ifyo cabipa—we musumba ukalamba, umo bonse abakwata amato pali bemba+ banonkeele+ pa mulandu wa fyuma fyakwe ifingi, pantu mwi awala limo fye e mo aonaulwa!’+

20 “Sansamukeni, mwe ba mu muulu,+ na mwe ba mushilo+ na mwe batumwa+ na mwe bakasesema, pantu Lesa amukandilako Babiloni!”+

21 E lyo malaika uwa maka aimishe ilibwe ilikulu kwati ni mpelo+ iikalamba no kulifubula muli bemba,+ no kutila: “E fyo na Babiloni umusumba ukalamba ukafubulwa fubu, kabili tawakatale aumoneka na kabili.+ 22 Ne ciunda ca bakemba abalisha amaseese ne ca bakalisha wa filimba ne ca bakalisha wa mitolilo ne ca bakalisha wa mapenga tafyakatale afyumfwika na kabili muli iwe,+ na bonse abapanga ifya kupangapanga tabakasangwe na kabili muli iwe, ne congo ca mpelo tacakomfwike na kabili muli iwe, 23 no lubuuto lwa nyali talwakasanike na kabili muli iwe, ne shiwi lya kwa shibwinga ne lya kwa nabwinga tafyakomfwike na kabili muli iwe;+ pantu abo walebomfya mu makwebo+ yobe baali ni bashimucindikwa+ ba pe sonde, pantu walufishe ne nko shonse pa mulandu wa kupupa imipashi.*+ 24 Cine cine, muli Babiloni e mwasangilwe umulopa+ wa bakasesema+ no wa ba mushilo+ no wa bantu bonse abaipaiwe pe sonde.”+

19 Pa numa ya ifi naumfwile icongo icikalamba icali kwati congo ca bantu abengi mu muulu.+ Balesosa abati: “Lumbanyeni+ Jah! Ipusukilo+ no bukata na maka fya kwa Lesa wesu,+ 2 pantu mu cishinka na mu bulungami+ e mo apingwila. Pantu napingula cilende mukalamba uwakoweshe isonde ku bulalelale bwakwe, kabili nalandula umulopa wa basha bakwe abo uyu cilende aipeye.”+ 3 Na po pene umuku walenga ibili basosele abati: “Lumbanyeni+ Jah! Ne cushi icilefuma ku musumba wa Babiloni cakulafutumuka fye pe.”+

4 Na bakalamba+ amakumi yabili na bane (24) ne fya mweo+ fine bawile pa nshi no kupepa Lesa uwaikala+ pa cipuna ca bufumu, abati: “Ameni! Lumbanyeni Jah!”+

5 Kabili, ishiwi lyafumine ku cipuna ca bufumu, aliti: “Lumbanyeni Lesa wesu, mwe basha+ bakwe bonse, mwe bamutiina, abantu yaweyawe na bashimucindikwa.”+

6 Kabili naumfwile amashiwi ayaleumfwika kwati mashiwi ya bantu abengi kabili kwati kupooma kwa menshi ayengi kabili kwati kupanta kwa nkuba ukwa maka nga nshi. Balesosa abati: “Lumbanyeni Jah,+ pantu Yehova Lesa wesu, Uwa Maka Yonse,+ natendeka ukuteka.+ 7 Natusekelele no kwanga, kabili natumucindike,+ pantu yafika+ inshita ya bwinga+ bwa Mwana wa mpaanga, no mukashi wakwe naipekanya.+ 8 Kabili napeelwa insalu ishabuuta tuutu, isha busaka, ishawama ukuti afwale, pantu insalu ishawama e milimo yalungama iya ba mushilo.”+

9 Kabili anjebele ati: “Lemba auti: Balipaalwa abaitwa+ ku mulaalilo wa bwinga bwa Mwana wa mpaanga.”+ Kabili, anjebele ati: “Aya e mashiwi ya cine aya kwa Lesa.”+ 10 Awe nawile pa nshi ku makasa yakwe pa kuti imupepe.+ Lelo anjebele ati: “Wiesha ukucita ifyo!+ Ine ndi musha munobe, kabili uwa bamunonko abali no mulimo wa kubila pali Yesu.+ Pepa Lesa;+ pantu ico kwabela ukusesema ni uyu wine umulimo wa kubila pali Yesu.”+

11 Kabili namwene umuulu waisuka, kabili moneni kabalwe uwabuuta.+ No waikelepo etwa ati Uwa Cishinka+ kabili Uwa Cine,+ na mu bulungami e mo apingwila no kulwila.+ 12 Amenso yakwe yali ngo lubingu lwa mulilo,+ na pa mutwe wakwe pali ifisote fya bufumu ifingi.+ Ali ne shina+ ilyalembelwe ilyo umuntu nangu umo ashaishiba kano fye umwine, 13 kabili afwele ilaya ilyakantaikwako umulopa,+ ne shina lyakwe ni Cebo+ ca kwa Lesa. 14 Kabili, amabumba ya mu muulu yalemukonka pali bakabalwe ababuuta, kabili bafwele insalu ishabuuta, isha busaka, ishisuma. 15 Na mu kanwa kakwe mwalefuma ulupanga+ ulutali ulwatwa, ukuti omineko inko, kabili akashicemena ku nkonto ya cela.+ Anyantile no mwa kukamina imyangashi+ umwa cipyu ca bukali bwa kwa Lesa+ Uwa Maka Yonse. 16 Na pe laya lyakwe, pe tanta lyakwe, palembelwe ishina lya kuti, Imfumu ya shamfumu kabili Shikulu wa bashikulu.+

17 Namwene na malaika naiminina mu kasuba, kabili abilikishe ishiwi ilikalamba, no kweba ifyuni+ fyonse ifipupuka mu muulu, ati: “Iseni kuno, longaneni ku mulaalilo uukalamba uwa kwa Lesa, 18 pa kuti mulye imibili+ ya shamfumu ne mibili ya bakalamba ba bashilika ne mibili ya ba maka+ ne mibili ya bakabalwe+ ne ya baikalapo, ne mibili ya bonse, iya bantungwa pamo na basha ne ya bantu yaweyawe ne ya bashimucindikwa.”

19 Kabili namwene iciswango+ ne shamfumu+ sha pe sonde na mabumba ya shiko nafilongana ku kulwa+ no waikala pali kabalwe+ ne bumba lyakwe. 20 Ne ciswango+ caliketwe, pamo na kasesema+ wa bufi uwacitile ifishibilo+ pa ntanshi ya ciswango ifyo alufiishemo abapokelele icishibilo+ ca ciswango na bapepa icimpashanya ca ciko.+ Ilyo ficili ifya mweo, fyonse fibili fyapooselwe muli bemba wa mulilo umwaba amabwe ya mingu ayabilima umulilo.+ 21 Lelo abasheleko baipaiwe ku lupanga ulutali ulwa waikala pali kabalwe,+ ulwalefuma mu kanwa kakwe.+ Ne fyuni+ fyonse fyaikwite+ imibili yabo.+

20 Kabili namwene malaika aleika mu muulu ali na makii ya pa cilindi+ icabula impela no munyololo uukalamba mu minwe yakwe. 2 Kabili aikete icing’wena,+ icisoka ca pa kutendeka,+ e kutila Kaseebanya+ kabili Satana,+ no kucikaka imyaka ikana limo (1,000). 3 Kabili acipoosele mu cilindi+ icabula impela no kwisalapo no kukomenena pa muulu wa ciko, pa kuti cilufya na kabili inko mpaka imyaka ikana limo (1,000) ikapwe. Pa numa ya ifi cikakakulwa inshita iinono.+

4 Kabili namwene ifipuna fya bufumu,+ pali na baikelepo, abapeelwe amaka ya kupingula.+ Awe namwene abaipaiwe kwi sembe pa mulandu wa kushimikila pali Yesu na pa mulandu wa kulanda pali Lesa, na bashapepeleko iciswango+ nangu icimpashanya+ ca ciko kabili abashapokelele icishibilo pa mpumi shabo na pa fisansa fyabo.+ Kabili baishileba aba mweo no kuteka+ pamo na Kristu imyaka ikana limo (1,000). 5 (Abafwa+ abashelepo tabali no mweo yasuka yapwa imyaka ikana limo [1,000]).+ Uku e kubuuka kwa ntanshi.+ 6 Alipaalwa+ kabili wa mushilo+ onse uukabuuka mu kubuuka kwa ntanshi; pali aba imfwa+ ya cibili taikwetepo amaka,+ lelo bakaba bashimapepo+ ba kwa Lesa kabili aba kwa Kristu, kabili bakateka pamo nankwe imyaka ikana limo (1,000).+

7 Awe ilyo fye imyaka ikana limo (1,000) ikapwa, Satana akakakulwa mu cifungo, 8 no kuyalufya inko sha mu tupinda tune utwe sonde, ishitwa Goge na Magoge, ku kushilonganikila ukulwa inkondo. Impendwa yabo yaba ngo mucanga wa pali bemba.+ 9 Kabili basalanganine pano isonde ponse no kushinguluka inkambi ya ba mushilo+ no musumba uwatemwikwa.+ Lelo umulilo wafumine mu muulu no kuboca.+ 10 Na Satana Kaseebanya+ uwalebalufya apooselwe muli bemba wa mulilo umwaba na mabwe ya mingu, umwali iciswango+ na kasesema wa bufi;+ kabili muli uyu mulilo e mo bakalacululuka akasuba no bushiku pe na pe.

11 Kabili namwene icipuna ca bufumu icikalamba icabuuta e lyo no waikelepo.+ Isonde no muulu fyalifulumwike ku cinso cakwe,+ kabili tafyasangile apa kuti fikale. 12 Kabili namwene abafwa, bashimucindikwa na bantu yaweyawe,+ nabeminina ku cinso ca cipuna ca bufumu, na mabuuku yapombwa yalifungulwilwe. E lyo ne buuku lyalifungulwilwe; ibuuku lya mweo.+ Na bafwa babapingwilile ku fyalembelwe mwi buuku ukulingana ne fyo balecita.+ 13 Bemba alekele abafwa abalimo, ne mfwa ne Nshiishi* na fyo fyalekele abafwa+ abalimo, kabili bonse bapingwilwe ukulingana ne fyo balecita.+ 14 E lyo imfwa+ ne Nshiishi* fyapooselwe muli bemba wa mulilo. Uyu bemba wa mulilo+ ni mfwa ya cibili.+ 15 Kabili, bonse abashalembelwe mwi buuku lya mweo+ bapooselwe muli bemba wa mulilo.+

21 Kabili namwene umuulu+ uupya ne calo icipya;+ pantu umuulu+ wa ntanshi ne calo+ ca ntanshi ninshi nafiya, na bemba+ talipo na kabili. 2 Namwene no musumba+ wa mushilo, Yerusalemu Mupya, uleika mu muulu+ ukufuma kuli Lesa kabili naupekanishiwa kwati ni nabwinga+ uwapuulamikilwa umulume wakwe.+ 3 E lyo naumfwile ishiwi ilikalamba ukufuma ku cipuna ca bufumu lileti: “Moneni! Itenti+ lya kwa Lesa lili pamo na bantunse, kabili akekala+ pamo na bo, kabili bakaba abantu bakwe.+ Na Lesa umwine akaba pamo na bo.+ 4 Kabili akafuuta ifilamba+ fyonse ku menso yabo, ne mfwa tayakabeko na kabili,+ takwakabe no kuloosha nangu ukuteta nangu ukukalipwa na kabili.+ Ifya ntanshi nafiya.”+

5 Kabili Uwaikala pa cipuna+ ca bufumu atile: “Moneni! Ndelenga ifintu fyonse ukuba ifipya.”+ Kabili, atile: “Lemba, pantu aya mashiwi ya cishinka kabili ya cine.” 6 Kabili anjebele ati: “Fyonse nafifikilishiwa! Nine Alifa kabili Omega, nine intendekelo kabili impela.+ Onse uuli ne cilaka nkamupeelapo amenshi aya bupe fye aya mu kamfukumfuku ka menshi ya mweo.+ 7 Onse uwacimfya akapyana ifi fintu, kabili nkaba Lesa+ wakwe na o akaba umwana wandi.+ 8 Lelo bakuuwe, na bashatetekela,+ na basali+ abaselausha, na bepaya+ abantu, na ba bulalelale,+ na bapupa imipashi,* na bapepa utulubi,+ na ba bufi bonse,+ bakapooswa muli bemba wa mulilo+ umwaba na mabwe ya mingu.+ Iyi ni mfwa ya cibili.”+

9 E lyo kwaishile umo uwa muli bamalaika cinelubali (7) abaali ne mbale ishafonka cinelubali ishaiswilemo ifinkunka+ cinelubali ifya kulekelesha, kabili alandile na ine, ati: “Isa kuno nkulange nabwinga, umukashi wa Mwana wa mpaanga.”+ 10 Awe ansendeele mu mupashi no kuntwala ku lupili+ ulukalamba kabili ulwalepa, no kunanga umusumba+ wa mushilo Yerusalemu uleika mu muulu ukufuma kuli Lesa+ 11 kabili ulebengeshima no bukata bwa kwa Lesa.+ Ukubengeshima kwa uko kwali nge libwe ilyauma umutengo nga nshi, nge libwe lya yaspi ilyabeeka kwati ni krustali.+ 12 Wali ne linga+ ilikalamba kabili ilyalepa kabili wali ne mpongolo ikumi na shibili (12), na pa mpongolo pali bamalaika ikumi na babili na mashina ayalembelwepo ni yalya aya mikowa ikumi na ibili iya bana ba kwa Israele.+ 13 Ku kabanga kwali impongolo shitatu, na ku kapinda ka kuso kwali impongolo shitatu, na ku kapinda ka kulyo kwali impongolo shitatu, na ku masamba na ko kwali impongolo shitatu.+ 14 Ilinga lya musumba na lyo lyakwete amabwe aya mufula+ ikumi na yabili (12), na pali aya mabwe pali amashina ikumi na yabili aya batumwa+ ikumi na babili aba Mwana wa mpaanga.

15 Awe uwalelanda na ine aikete itete+ lya golde ilya kupiminako, pa kuti apime umusumba ne mpongolo sha uko ne linga lya uko.+ 16 No musumba wali ne mbali shine ishalingana, kabili mu butali na mu bwipi shalilingene. Kabili apimine umusumba+ kwi tete, bastadia amakana ikumi na makana yabili (12,000); mu butali na mu bwipi no kulepa fyalilingene. 17 Kabili, apimine ilinga lya uko, imikono umwanda umo na makumi yane na ine (144), ukulingana no kupima kwa bantunse, no kwa bamalaika. 18 Awe ilinga lyakuulilwe na mabwe ya yaspi,+ no musumba wakuulilwe na golde iisuma sana iyalemoneka kwati cilola icalengama. 19 Imifula+ ya kukuulapo iye linga lya musumba yapangilwe na mabwe+ ayauma umutengo aya misango yonse: umufula wa kukuulapo uwa ntanshi wali wa yaspi,+ no walenga ibili wali wa safiri,+ no walenga itatu wali wa kalkedone, no walenga ine wali wa emarodi,+ 20 uwalenga isano wali wa sardonukisi, no walenga mutanda (6) wali wa sardi, no walenga cinelubali (7) wali wa krusoliti,+ no walenga cinekonsekonse (8) wali wa beruli, no walenga pabula (9) wali wa topasi,+ no walenga ikumi (10) wali wa krusoprashi, no walenga ikumi na umo (11) wali wa yakinti, no walenga ikumi na ibili (12) wali wa ametusti.+ 21 Kabili, impongolo ikumi na shibili (12) ni bamargariti ikumi na babili; impongolo imo imo yapangilwe na margariti umo.+ No musebo uukalamba uwa musumba wali wa golde iisuma sana, iyalemoneka kwati cilola icalengama.

22 Kabili nshamwenemo itempele,+ pantu Yehova+ Lesa Uwa Maka Yonse+ e tempele lya uko,+ pamo no Mwana wa mpaanga.+ 23 Kabili umusumba taukabila ulubuuto lwa kasuba nangu ulwa mweshi, pantu ubukata bwa kwa Lesa bwaliubuutusha,+ ne nyali ya uko Mwana wa mpaanga.+ 24 Ne nko shikendela mu lubuuto lwa uko,+ ne shamfumu sha pe sonde shikaletamo ubukata bwa shiko.+ 25 Ne mpongolo sha uko tashakesalwe nangu panono akasuba,+ pantu tabwakatale abwila.+ 26 Kabili aba nko shonse bakaletamo ubukata no mucinshi.+ 27 Lelo icakowela conse tacakengile mu musumba no muntu onse uucita ifya bunani+ no kubepa ubufi+ takengilemo nakalya;+ kano fye abalembwa mwi buuku lya mweo ilya Mwana wa mpaanga.+

22 Kabili anangile umumana wa menshi ya mweo,+ uwalengama kwati libwe lya krustali, uwalefuma ku cipuna ca bufumu ica kwa Lesa ne ca Mwana wa mpaanga,+ 2 walepita mu kati ka musebo uukalamba uwa mu musumba. Kabili buno bushilya bwa mumana na bulya bushilya kwali imiti+ ya mweo iitwala ifisabo ikumi na fibili (12), iitwala ifisabo cila mweshi.+ Kabili amabuula ya iyi miti ya kundapilako inko.+

3 Kabili tamwakabe icitiipu nangu cimo.+ Lelo icipuna ca kwa Lesa+ ne ca Mwana wa mpaanga+ cikaba mu musumba, na basha bakwe bakamubombela;+ 4 kabili bakamona icinso+ cakwe, ne shina lyakwe likaba pa mpumi shabo.+ 5 Kabili, tabwakaleila nakalya,+ tabakakabile ulubuuto lwa nyali nangu lubuuto lwa kasuba, pantu Yehova Lesa akababalikila,+ kabili bakateka umuyayaya.+

6 Kabili anjebele ati: “Aya mashiwi ya cishinka kabili ya cine;+ kabili, Yehova Lesa uwapeele bakasesema+ amashiwi+ balandile atumine malaika wakwe ku kulanga abasha bakwe ifili no kucitika bwangu bwangu.+ 7 Kabili, mona! ndeisa bwangu.+ Alipaalwa onse uulesunga amashiwi ya kusesema kwa muli cino cimfungwa.”+

8 Awe, ine ne Yohane naleumfwa no kumona ifi fintu. Kabili ilyo naumfwile no kumona, nawile pa nshi ku makasa ya kwa malaika uwalenanga ifi fintu pa kuti imupepe.+ 9 Lelo anjebele ati: “Wiesha ukucita ifyo! Ine ndi musha munobe fye kabili umusha wa bamunonko bakasesema+ no wa basunga amashiwi ya muli cino cimfungwa. Pepa Lesa.”+

10 Kabili anjebele ati: “Wifisa amashiwi ya kusesema aya muli cino cimfungwa, pantu inshita naipalama.+ 11 Uulecita ifyabipa, atwalilile ukucita ifyabipa;+ no musali atwalilile ukuba umusali;+ lelo uwalungama+ atwalilile ukucita ifyalungama, no wa mushilo atwalilile ukuba uwa mushilo.+

12 “‘Mona! ndeisa bwangu,+ ne cilambu+ ico nkapeela ndi na co, ica kupeela umo umo ukulingana no mulimo wakwe.+ 13 Nine Alifa kabili Omega,+ uwa ntanshi kabili uwa kulekelesha,+ nine intendekelo kabili impela. 14 Balipaalwa abacapa amalaya yabo,+ pa kuti bakwate insambu sha kuya ku miti ya mweo+ no kuti bengile mu musumba pa mpongolo sha uko.+ 15 Ku nse kwaba imbwa,+ na bapupa imipashi,*+ na ba bulalelale,+ na bepaya abantu, na bapepa utulubi, na bonse abatemwa ubufi mu milandile na mu micitile.’+

16 “‘Ine, ne Yesu, nine ntumine malaika wandi ku kwisasokolola fyonse kuli imwe mu filonganino. Ine ndi mushila+ kabili umwana+ wa kwa Davidi, kabili ulutanda ulubalika ulwa lucelo.’”+

17 Kabili umupashi+ na nabwinga+ balesosa abati: “Iseni!” Na onse uuleumfwa lekeni asose ati: “Iseni!”+ Na onse uuli ne cilaka ese;+ onse uulefwaya anwepo amenshi ya mweo aya bupe fye.+

18 “Ndesokako umuntu onse uuleumfwa amashiwi ya kusesema aya muli cino cimfungwa, ndeti: Ngo muntu alundapo+ pali ifi fintu, Lesa akalundapo pali ena ifinkunka+ ifyalembwa muli cino cimfungwa; 19 kabili ngo muntu afumyapo amashiwi ya mu cimfungwa ca kuno kusesema, Lesa akamutana fyonse ifyalembwa muli ici cimfungwa kabili takamuleke ukulyako ifisabo ku miti ya mweo+ na mu musumba+ wa mushilo akamutamfyamo.

20 “Uuleshimika ifi fintu atila, ‘Cine cine; ndeisa bwangu.’”+

“Ameni! Iseni, mwe Shikulu Yesu.”

21 Icikuuku ca kwa Shikulu Yesu Kristu cibe na ba mushilo.+